1-2. Сар о ветување таро Исаија 65:16, 17 поможинела аменге ма те откажина амен?

„МА ОТКАЖИН ТУТ!“ сине и тема е регионално конгресескири башо 2017 берш. Акава конгрес сикавѓа аменге сар шај те истрајна кеда иси амен проблемија. Накхле штар берш откеда сине амен акава конгрес, а амен панда мора те истрајна ко акава лошно свето.

² Саве проблемија сине тут ко последно време? Дали муло некој тари тли фамилија или несаво паше амал? Дали иси тут несаво пхаро насвалипе? Дали о живото туке пхаро адалеске со пхујровеа? Дали доживинѓан природно катастрофа, насилство или прогонство? Или шај и пандемија КОВИД-19 или нешто слично керѓа те овел туке пхаро? Едвај аџикераја о диве кеда са акала проблемија нане више те овен, кеда ка бистра лен хем никогаш више нане те случинен пе! (Читин Исаија 65:16, 17.)

3. Со мора те кера панда акана хем соске?

³ О живото ко акава свето тано пхаро, хем сар со ка накхел о време шај те овел панда попхаро (Мат. 24:21). Значи, понадари да ваљани те истрајна. Соске? Адалеске со о Исус вакерѓа: „Преку тумари истрајност ка спасинен тумаро живото“ (Лука 21:19). Ка овел аменге полокхо те истрајна ако размислинаја башо адава сар о јавера истрајнена кеда иси лен слична проблемија сар амаре.

4. Соске шај те вакера кај о Јехова тано најшукар пример баши истрајност?

⁴ Кој тано најшукар пример баши истрајност? О Јехова. Шај акава одговор изненадинела тут. Ама размислин башо акава. Акале светоја владинела о Сатана, адалеске тано  пхердо проблеменцар. Е Јехова иси ле моќ одма те чхинавел са о проблемија, сепак ов аџикерела ко диве со одрединѓа ле башо адава (Рим. 9:22). Ама џикоте на авела адава диве, амаро Девел понадари да истрајнела. Те дикха ења буќа коленде со о Јехова истрајнела.

5. Сар сине лаџакердо е Девлескоро анав, хем со мислинеа ту башо адава?

⁵ Е Јеховаскоро анав сине лаџакердо. Ов мангела пло анав хем мангела секова јекх те поштујнел ле (Иса. 42:8). Ама ко последна шов милја берша лескоро анав тано лаџакердо (Пс. 74:10, 18, 23). Ки градина Еден о Бенг, со значинела „клеветнико“, вакерѓа кај о Девел на дела е Адамеске хем е Еваке адава со ваљани ленге те овен бахтале (1. Мој. 3:1-5). Оттегани о Јехова тано кривимо кај на дела е манушенге адава со чаче ваљани ленге. Е Исусе мучинела сине адава со лескере Дадескоро анав сине лаџакердо. Адалеске, ов сикавѓа пле ученикон те молинен пе: „Амаро Дад со сиан ко небо, те славинел пе тло свето анав“ (Мат. 6:9).

6. Соске о Јехова мукхела те накхел доволно време англедер те докажинел кај иси ле право те владинел?

⁶ Бут џене тане против е Девлескоро право те владинел. Само е Јехова иси ле право те владинел ко небо хем ки Пхув, хем ов владинела ко најшукар начин (Отк. 4:11). Ама о Бенг пробинѓа те ховавел е ангелен хем е манушен те шај те мислинен кај е Девле нане ле право ко адава. О проблеми башо е Јеховаскоро право те владинел нашти решинела пе сине одма. Адалеске о Девел мудро мукхља доволно време е манушенге те шај те дикхен кај ако пробинена те владинен бизи лесте ола нашти те овен успешна (Ерем. 10:23). Адалеске со о Јехова тано стрпливо акава проблеми ка решинел пе јекх пути засекогаш. Лескоро право те владинел ка овел оправдимо. Хем ка докажинел пе кај само лескоро Царство ка анел чачутно мир хем сигурност.

7. Кој бунинѓа пе против о Јехова хем со ка керел ов башо адава?

⁷ Несаве таро е Јеховаскере чхаве бунинѓе пе против лесте. Ов створинѓа е ангелен хем е манушен совршена, бизи нисави маана. Ама тегани о ангели о Сатана, со значинела „противнико“, бунинѓа пе против о Јехова. Ов убединѓа е совршена манушен, е Адаме хем е Ева, те бунинен пе против лесте. Јавера да ангелија хем мануша исто аѓаар бунинѓе пе (Јуда 6). Покасно чак несаве тари Израелско нација, е Девлескоро биримо народо, отфрлинѓе ле хем почминѓе те обожавинен ховавне девлен (Иса. 63:8, 10). Е Јехова сине ле право со осетинѓа пе изневеримо. Ама ов истрајнѓа хем понадари да ка истрајнел, са џикоте на авела о време те уништинел са околен со бунинена пе. Тегани о Јехова хем лескере верна слуге на ка ваљани више те истрајнен о лошна буќа таро акава свето!

8-9. Саве ховајба тане вакерде башо Јехова хем со шај амен те кера башо адава?

⁸ Е Сатанаскере ховајба. О Сатана обвининѓа е Јове хем са е јавере верна слуген е Јеховаскере кај обожавинена ле таро себична причине (Јов 1:8-11; 2:3-5). Ов керела адава авдиве да (Отк. 12:10). Амен шај те поможина те докажинел пе кај о Сатана тано ховавно аѓаар со ка истрајна ко амаре неволје хем ка ачхова верна е Јеховаске соске мангаја ле. Исто сар е Јове, о Јехова ка наградинел амен да ако сием истрајна (Јак. 5:11).

⁹ Преку о ховавне религиозна водачија о Сатана вакерела кај о Јехова тано сурово  хем криво башо муке со цидена о мануша. Несаве чак вакерена кај кеда несаво чхаво мерела, о Девел леља ле соске ваљанѓе леске повише ангелија ко небо. Акалеа ни хари на поштујнена е Девле. Ама амен џанаја кај о Јехова тано Дад пхердо мангипаја. Никогаш на кераја криво е Девле кеда иси амен пхаро насвалипе или кеда мерела амендар некој со мангаја ле. Наместо адава амен верујнаја кај о Девел јекх диве ка сасљарел са о насвалипа хем ка ваздел е мулен. Адалеске, сариненге со мангена те шунен вакераја кај о Јехова тано пхердо мангипе. Тегани о Јехова ка шај те одговоринел околеске со асала леске (Изр. 27:11).

10. Со вакерела аменге о Псалм 22:23, 24 башо Јехова?

¹⁰ Е Девлескере мангле слуге мучинена пе. О Јехова тано сочувствително Девел. Ов тано бут тажно кеда дикхела кај мучинаја амен, бизи разлика дали адава тано таро прогонство, насвалипе или несовршеност. (Читин Псалм 22:23, 24.) О Јехова хаљола амари дукх. Ов мангела те чхинавел ла хем ка керел адава. (Споредин 2. Мој. 3:7, 8; Иса. 63:9.) Паше тано о диве кеда „ка косел секоја асвин таро амаре јакхја хем мерибе нане те овел више, ни жалибе, ни ројбе, ни дукха“ (Отк. 21:4).

11. Со осетинела о Јехова спрема пле верна слуге со муле?

¹¹ О Јехова тано одвојмо пле амалендар со муле. Со осетинела о Јехова спрема пле верна слуге кола со муле? Ов едвај аџикерела палем те дикхел лен! (Јов 14:15). Замислин само кобор фалинела е Јеховаске лескоро амал о Авраам (Јак. 2:23). Или о Мојсеј, касаја со керела сине „муј мујеа“ лафи (2. Мој. 33:11). Хем кобор само мангела те шунел е Давиде хем е јавере псалмистен сар гиљавена пумаре бут шуже  фалбена гиља! (Пс. 104:33). Иако лескере амала муле, ов на бистерѓа лен (Иса. 49:15). Ов памтинела секова детали баши ленде. И Библија пхенела кај „леске сарине ола тане џивде“ (Лука 20:38). Јекх диве, ов ка иранел лен ко живото хем палем ка шунел ленгере искрена молитве хем ка прифатинел ленгоро обожавање. Ако муло тутар некој со мангеа ле, акала лафија шај те утешинен тут.

12. Со посебно дукхавела е Јехова ко акала последна хем лошна диве?

¹² О лошна мануша керена штета е јаверенге. Кеда случинѓа пе и побуна ки Еденско градина, о Јехова џанља кај о условија ки Пхув ка овен са полошна. Ов мрзинела о лошнипе, и неправда хем о насилство со иси авдиве ко свето. Отсекогаш посебно грижинела пе околенге сој тане слаба. Сар на пример околенге колен со нане кој те поможинел, сар сој о чхаве бизо родителија хем о удовице (Зах. 7:9, 10). Ле посебно дукхала ле кеда дикхела кај лескере слуге тане прогониме хем пханле. Шај те овен сигурна кај о Јехова мангела саринен тумен со истрајнена заедно леа!

13. Кола одвратна постапке дикхела о Јехова машкар о мануша хем со ка керел башо адава?

¹³ О мануша овена са понеморална. О мануша сине створиме спрема е Девлескоро лико, ама о Сатана мангела те чхивел лен те керен неморална буќа. Кеда о Девел ко е Ноескоро време „дикхља кај о лошнипе е манушенгоро ки пхув тано баро... пело пишмани со керѓа е мануше ки Пхув хем дукхандило ле ко вило“ (1. Мој. 6:5, 6, 11). Дали оттегани о свето уло пошукар? Дикхјола пе кај на! Е Сатанаске тано бут мило кеда дикхела сар о мануша керена неморал на само манушенцар таро исто пол, него хем манушенцар таро спротивно пол (Еф. 4:18, 19). Ов тано посебно бахтало кеда шај те чхивел некас со обожавинела е Јехова те керел сериозно грево. Кеда е Јеховаскири стрпливост ка авел џи ки граница, ов ка сикавел кај мрзинела о неморално понашибе хем ка уништинел са околен со на мангена те менинен пле неморална постапке.

14. Со керена о мануша е Пхувјаја хем е животненцар?

¹⁴ О мануша уништинена и Пхув која со ов створинѓа ла. На само со „о мануш владинела упро мануш ки лескири штета“, него исто аѓаар на грижинела пе шукар е Пхувјаке хем е животненге сар со родинѓа о Јехова (Проп. 8:9; 1. Мој. 1:28). Несаве научникија вакерена кај е манушенгере постапке шај те анен џи ко адава јекх милиони врсте животне хем растенија те овен уништиме башо некобор берша. Шај те хаљова соске несаве мануша тане секириме баши природа. Ама, о Јехова ветинѓа кај ов ка „уништинел околен со уништинена и пхув“ хем кај ка керел цели Пхув рај (Отк. 11:18; Иса. 35:1).

15-16. Со ваљани те поттикнинел амен те истрајна сар о Јехова? Вакер пример.

¹⁵ Размислин само кобор пхаре проблемија трпинела амаро небесно Дад бут милја берша. (Дикх и рамка „ Ко со истрајнела о Јехова“.) О Јехова кеда мангела шај те чхивел крајо акале лошно светоске, ама амен да иси амен корист тари лескири стрпливост. Те шај те хаљова акава те вакера јекх пример. Замислин туке кај јекхе брачно пареске вакерена кај ленгоро бебе ка бијанѓовел сериозно насвалипаја, нане те овел ле локхо живото хем ка мерел бут рано. Иако џанена кај нане те овел ленге локхо те грижинен пе леске, сепак ола тане бут бахтале кеда бијанѓовела. Адалеске со бут мангена  ле, ола истрајнена о пхарипа те шај те овел ле о најшукар живото со шај.

¹⁶ Слично аѓаар, е Адамескере хем е Евакере чхаве бијанѓовена несовршена. Сепак, о Јехова мангела лен хем грижинела пе ленге (1. Јов. 4:19). Ама бут поразлично е родителендар таро пример, о Јехова шај те чхинавел о муке пле чхавенгере. Ов одрединѓа о време кеда ка чхивел крајо са е манушикане мукенге (Мат. 24:36). Е Јеховаскоро мангипе ваљани те поттикнинел амен да те истрајна са џикоте ваљани.

17. Сар адава со пишинела башо Исус ко Евреите 12:2, 3 охрабринела амен понадари да те истрајна?

¹⁷ О Јехова тано совршено пример баши истрајност. О Исус гело пало пле Дадескоро пример хем кеда сине ки Пхув ов истрајнѓа вреџиба, лаџ хем мерибе ко стубо мучибаске. (Читин Евреите 12:2, 3.) Е Јеховаскоро пример баши истрајност сигурно денѓа сила е Исусеске те истрајнел, а шај те дел сила аменге да.

18. Сар о лафија таро 2. Петрово 3:9 поможинена аменге те хаљова со случинела пе адалеске со о Јехова тано стрпливо?

¹⁸ Читин 2. Петрово 3:9. О Јехова џанела кеда тано најшукар те чхивел крајо акале лошно светоске. Адалеске сој тано стрпливо, бут мануша шај сине те запознајнен ле. Хем акана баро мноштво таро милиоња мануша обожавинена ле. Ола тане благодарна е Јеховаске со истрајнѓа добором време те шај те бијанѓовен, те запознајнен ле, те манген ле хем те ден лафи кај ка служинен леске. Кеда милиоња мануша ка добинен пли награда адалеске со истрајнѓе џи ко крајо, тегани ка дикхел пе кај о Јехова шукар керѓа со истрајнѓа.

19. Ко со ваљани те ова одлучна, хем сави ка овел амари награда?

¹⁹ Таро Јехова сикљоваја сар те ова бахтале џикоте истрајнаја. Иако о Сатана керѓа те овел бут пхарипе хем муке, сепак о Јехова понадари да тано „бахтало Девел“ (1. Тим. 1:11). Амен да шај те ачхова бахтале џикоте стрпливо аџикераја о Јехова те славинел пло свето анав, те оправдинел пло право те владинел, те анел крајо е лошнипаске хем са е проблеменге со иси амен авдиве. Адалеске, те ова одлучна те истрајна хем никогаш ма те бистра кај амаро Дад сој ко небо исто аѓаар истрајнела. Ако кераја аѓаар акала лафија ка важинен аменге да: „Бахтало тано о мануш со истрајнела ко искушенија, соске откеда ка овел искушимо ка приминел и награда, о живото, кова со о Јехова ветинела околенге со мангена ле“ (Јак. 1:12).