О Јехова мангела дуј џене сој ко брако те овен бахтале хем те уживинен ки пли врска која со ка трајнел (Мат. 19:4-6). Ако мангеа те кхуве ко брако, сар шај те аракхе туке шукар брачно партнери? О Јехова створинѓа амен хем ов џанела со ваљани те кера те шај те овел амен бахтало брако. Адалеске, те шај те ова успешна, ваљани те применина о начелија со дела амен. Те дикха несаве таро адала начелија.

Прво, мора те хаљова кај „о вило тано поховавно таро било со јавер хем спремно тано ко са“ (Ерем. 17:9). Кеда дуј џене кола со мангена те кхувен ко брако ка почминен те запознајнен пе, шај сигате те почминен те развинен чувствија јекх јекхеске. А адала силна чувствија шај те керен ленге пхаро те анен мудра одлуке. Кеда сигате кхувена ко брако само адалеске со иси лен чувствија јекх јекхеске, тегани бут пути тане разочариме (Изр. 28:26). Адалеске, нане мудро панда рано ки врска те вакерен пумаре чувствија јекх јекхеске, или те ветинен песке нешто иако на пенџарена пе шукар.

Ко Изреки 22:3 пишинела: „О гоѓавер мануш дикхела о лошнипе хем цидела пе, а о глупава џана понадари хем трпинена последице“. Соске шај те овел опасно те користинел пе интернет-странице коте со шај те аракхел пе брачно партнери? Жално тано адава со кеда несаве почминѓе те запознајнен пе преку интернет некасаја со на џанена лен, разочаринѓе пе соске халиле кај кхелѓе песке ленгере чувствонцар. Исто аѓаар, акала мануша керена песке ховавне профилија те шај те чорен некастар паре. Понекогаш, асавке мануша ховавена кај тане е Јеховаскере сведокија.

Размислин баши панда јекх опасност. Несаве интернет-странице користинена математичка алгоритмија те шај те откринен кола дуј мануша одговоринена јекх јекхеске. Ама, на постојнела доказ кај асавке методе тане успешна. Нане мудро те овел амен доверба ки несави компјутерско програма со керѓа ла мануш те шај те ана одлука башо нешто сој добором важно, сар сој о брако. Асавке методе ни хари нашти те спорединен пе е библиска начелонцар (Изр. 1:7; 3:5-7).

Јекх начело со аракхљовела ко Изреки 14:15 вакерела: „О наивно мануш верујнела ко секова лафи, а о паметно пазинела ко секова пло чекори“. Англедер те одлучине дали некој ка овел туке шукар брачно партнери, ваљани шукар те пенџаре ле. Ама, ако запознајнеа тут преку асавке интернет-странице, адава шај те овел пхаро.  Иако шај дикхена са о информацие таро тумаре профилија хем накхавена бут време заедно преку интернет, дали шај те вакере кај чаче пенџареа ле? Несаве со мислинѓе кај аракхле е мануше касаја со мангена те накхен цело пло живото, сине бут изненадиме кеда дикхле пе лично.

О псалмисти вакерѓа: „На дружинава ман е манушенцар со ховавена хем на џава ко окола со гаравена саве тане“ (Пс. 26:4). Бут џене мислинена кај тано нормално те ховавен ко пле интернет профилија запознајбаске те шај те овен попривлечна е јаверенге. Ола шај те гаравен саве чаче тане, или ма те вакерен несаве информацие пестар кеда пишинена е јаверенге. Иако несаве мануша шај те вакерен кај тане Јеховаскере сведокија, дали чаче тане крстиме христијања? Дали тане духовно зрела? Дали о јавера таро ленгоро собрание поштујнена лен? Или, на постапинена мудро хем тане „лошно друштво“? (1. Кор. 15:33; 2. Тим. 2:20, 21). Хем дали спрема и Библија тане слободна те кхувен ко брако? Ваљани те џане о одговорија башо акала пучиба. Ама, шај те овел пхаро те џане о одговорија ако на кереа лафи јавере сведоконцар кола со шукар џанена лен (Изр. 15:22). Џанѓола пе, јекх верно слуга е Јеховаскоро, никогаш нане те размислинел те кхувел ко брако некасаја со нане сведоко хем аѓаар те овел ко јарем неверникоја (2. Кор. 6:14; 1. Кор. 7:39).

Адалеске сој тано опасно те користинел пе асавке интернет-странице, иси бут пошукар начинија коте со шај те аракхе хем те запознајне тле идно брачно партнере. Коте шај те аракхе шукар брачно партнери? Кеда ка шај палем те кхеда амен, тегани ка шај те запознајна амен лично е јавере Сведоконцар џикоте сием ко амаре состанокија, или ко конгресија.

Адалеске со иси и пандемија КОВИД-19, користинаја електронска уредија те шај те икера амаре состанокија, хем атхе шај те запознајне јавере сведокон кола со нане ко брако. Адатхе шај те дикхе сар икерена пле задаче хем сар преку о коментарија сикавена пумари вера (1. Тим. 6:11, 12). Ако тумаро собрание пало состанок делинела пе ко потикне групе, шај ка овел тут прилика те кере лафи некасаја каске со сиан заинтересиримо. Ко асавко дружибе преку интернет е пхраленцар, шај те приметине сар ов или ој понашинела пе е манушенцар хем аѓаар ка дикхе сави личност тани (1. Пет. 3:4). А сар ка накхел о време, ка пенџарен тумен пошукар хем ка дикхен дали иси тумен о иста целија хем вредностија, хем дали одговоринена јекх јекхеске.

Кеда окола со нане ко брако користинена о библиска начелија те шај те роден песке брачно партнери, тегани ка овен бахтале ко брако хем ка доживинен упри песте о лафија тари јекх изрека: „Кој аракхља шукар ромни или ром, ов аракхља нешто шукар хем ов [или ој] добинела милост таро Јехова“ (Изр. 18:22).