1. Со керѓа баши туте о Јехова?

САР уљан јекх таро е Јеховаскере сведокија? Шај „о шукар хабери“ шунѓан ле таро тле родителија, таро тле колеге или таро тле соученикија, или шај некој ало ко тло удар те проповединел туке (Мар. 13:10). Пало адава, некој одвојнѓа бут време хем трудо те шај те проучинел туја и Библија. Хем џикоте проучинеа сине, почминѓан те заманге е Јехова хем дикхљан кај ов да мангела тут. О Јехова анѓа тут ко чачипе хем адалеске со сиан е Христосескоро ученико иси тут надеж башо вечно живото (Јован 6:44). Сигурно сиан благодарно адалеске со о Јехова поттикнинѓа некас те сикавел тут башо чачипе хем со прифатинѓа тут те ове лескоро слуга.

2. Со ка дикха ки акаја статија?

² Адалеске со џанаја о чачипе, иси амен чест те поможина е јаверенге те авен ко друмо со ингарела ко живото. Шај аменге полокхо те проповедина таро кхер ко кхер, ама пхаро аменге те нудина хем те водина библиско курси некасаја. Дали туке да аѓаар? Ако оја, о предлогија тари акаја статија шај те поможинен туке. Ка кера лафи башо адава со поттикнинела амен те кера ученикија. Исто аѓаар, ка дикха сар шај те накхава о предизвикија кола со шај чхинавена амен те водина библиско курси. Ама најангле те дикха соске освен со проповединаја, ваљани исто аѓаар те сикава о шукар хабери.

3. Соске проповединаја?

³ Кеда сине о Исус ки Пхув, денѓа заповед пле учениконге која со вклучинела сине дуј буќа. Прво, ов вакерѓа ленге те проповединен о шукар хабери башо Царство, хем сикавѓа ленге сар те керен адава (Мат. 10:7; Лука 8:1). На пример, ов вакерѓа ленге со те керен кеда о мануша ка шунен о хабери башо Царство, а со те керен кеда нане те шунен (Лука 9:2-5). Ов исто аѓаар објаснинѓа кај лескере ученикија ка проповединен буте манушенге хем ко бут тхана кеда вакерѓа кај ола ка ден „сведоштво са е народонге“ (Мат. 24:14; Дела 1:8). Бизи разлика сар ка реагиринен о мануша, о Исус денѓа заповед пле учениконге те вакерен башо е Девлескоро Царство хем башо адава со ка керел ов.

4. Спрема Матеј 28:18-20, со јавер ваљани те кера освен те проповедина башо Царство?

⁴ Која сине и дујто бути тари заповед која со денѓа ла о Исус пле учениконге? Ов вакерѓа ленге те сикавен е манушен те овен послушна ко са лескере заповедија. Ама, несаве шај те вакерен кај о Исус денѓа адаја заповед само е христијаненге таро прво веко. Дали тано точно адава? На. О Исус сикавѓа кај акаја важно задача ка керел пе ко амаро да време „џи ко крајо таро акава свето“. (Читин Матеј 28:18-20.) О Исус веројатно денѓа акаја заповед кеда појавинѓа пе повише таро 500 учениконге (1. Кор. 15:6). Хем ки визија со денѓа ла е Јованеске, о Исус јасно сикавѓа кај мангела са лескере ученикија те поможинен е јаверенге те сикљовен башо Јехова (Отк. 22:17).

5. Спрема 1. Коринќаните 3:6-9, солеа спорединѓа о Павле о керибе ученикија?

⁵ О апостол Павле спорединѓа и задача те керел пе ученикија е буќаја со керела ла јекх земјоделцо, кова со керела повише него само те садинел. Ов вакерѓа е Коринќаненге: „Ме садинѓум, о Аполо чхивѓа пани... а тумен сиен е Девлескири нива“. (Читин 1. Коринќаните 3:6-9.) Сар работникија ки е „Девлескири нива“, амен садинаја о семе кеда проповединаја, а чхиваја пани кеда сикаваја (Јован 4:35). Ама, на бистраја кај о Девел тано адава со керела о семе те бајрол.

6. Со ваљани те кера џикоте сикаваја е јаверен?

⁶ Амен родаја околен со „исправно дикхена ко вечно живото“ (Дела 13:48). Те шај те овен ученикија, мора те поможина ленге 1) те хаљовен, 2) те прифатинен хем 3) те применинен адава со сикљовена тари Библија (Јован 17:3; Кол. 2:6, 7; 1. Сол. 2:13). Сарине ко собрание шај те поможинен е интересентенге аѓаар со ка сикавен ленге мангипе хем љубезно ка доџакерен лен кеда ка авен ко состанок (Јован 13:35). А о објавители со водинела о курси шај ка ваљани те трошинел бут време хем сила те шај те поможинел е интересентеске те менинел несаве пуране верувања хем постапке (2. Кор. 10:4, 5). Шај ка ваљани бут масекија те поможина некаске те керел акала промене ко пло живото те шај те крстинел пе. Ама адава со ка трудина амен нане те овел џабе.

7. Со поттикнинела амен те проповедина е јаверенге хем те сикава лен о шукар хабери?

⁷ Соске проповединаја хем кераја ученикија? Прво, соске мангаја е Јехова. Кеда деа тутар са те шуне и заповед те проповедине хем те кере ученикија, ту сикавеа кај мангеа е Девле (1. Јов. 5:3). Размислин  башо акава, ту проповединеа е манушенге соске мангеа е Јехова. Дали сине туке локхо те шуне акаја заповед? Веројатно на. Дали сине тут трема кеда прво пути сиан сине ки служба? Сигурно кај оја. Ама адалеске со џанљан кај о Исус мангела те проповедине, ту шунѓан адаја заповед. Хем пало несаво време веројатно уло туке полокхо те џа ки служба. А дали астарела тут трема кеда размислинеа башо адава те водине библиско курси? Ако молинеа тут е Јеховаске хем родеа лестар храброст те нудине библиско курси, ов шај те поможинел туке те манге те кере ученикија.

8. Спрема Марко 6:34, со јавер поттикнинела амен те сикава е јаверен башо чачипе?

⁸ Дујто, о мангипе спрема о мануша поттикнинела амен те сикава лен башо чачипе. Ки јекх прилика о Исус хем лескере ученикија сине уморна соске бут проповединѓе. Ола родена сине тхан коте со шај сине те одморинен пе, ама тегани баро мноштво таро мануша аракхле лен. Е Исусеске пело жал башо мануша хем адалеске почминѓа те сикавел лен башо „бут буќа“. (Читин Марко 6:34.) Иако сине бут уморно, соске ачхило те сикавел е манушен? О Исус чхивѓа пе ленге ко тхан. Ов мангља те поможинел ленге соске дикхља кај цидена сине муке хем кај ваљани ленге надеж. О мануша авдиве аракхљона ки слично ситуација. Иако дикхјона сар те пхене тане бахтале хем задоволна, лен да иси лен проблемија хем ваљани ленге надеж. Ола тане сар бакхре со нашавдиле колен со нане пастири те водинел лен. О Павле вакерѓа кај асавке мануша на џанена е Девле хем нане лен надеж (Еф. 2:12). Ола тане „ко друмо со ингарела ко уништување“ (Матеј 7:13). Кеда размислинаја ки сави духовно состојба тане о мануша ко амаро подрачје, о мангипе хем о сочувство поттикнинена амен те поможина ленге. Хем о најшукар начин сар шај те поможина ленге тано аѓаар со ка нудина ленге библиско курси.

9. Спрема Филипјаните 2:13, сар шај те поможинел туке о Јехова?

⁹ Шај мислинеа тут дали те нудине некаске библиско курси соске џанеа кај адава ка лел тутар време. Ако осетинеа тут аѓаар, кер е Јеховаја лафи. Молин ле те поможинел туке те развине желба те проучине некасаја и Библија. (Читин Филипјаните 2:13.) О апостол Јован вакерѓа кај о Девел ка одговоринел ко амаре молитве сој спрема лескири волја (1. Јов. 5:14, 15). Адалеске, шај те ове сигурно кај о Јехова ка поможинел туке те манге те сикаве е јаверен башо чачипе.

10-11. Кова тано јекх предизвик со шај те керел аменге пхаро те проучина некасаја и Библија?

¹⁰ Џанаја кај тано бут важно те кера ученикија. Ама, шај те овел аменге пхаро те кера ки служба добором кобор со мангаја. Те дикха несаве предизвикија хем сар шај те накхава лен.

¹¹ Шај амаре околностија спречинена амен. На пример, несаве објавителија тане попхуре или насвале. Дали ту да сиан јекх лендар? Ако оја, размислин со сиклилем тари акаја пандемија КОВИД-19. Дикхлем кај шај те водина библиска курсија преку телефони или јавера електронска уредија. Адава значинела кај шај те почмине хем те водине библиско курси кхералдан. Исто аѓаар, несаве мангена те проучинен и Библија, ама шај тане слободна рано сабајле или касно раќате, време кеда обично амаре пхраља на џана ки служба. Шај ли те проучине и Библија некасаја ко адава време? О  Исус сине спремно те сикавел е Никодиме раќате, време кеда е Никодимеске сине најшукар (Јован 3:1, 2).

12. Кола буќа шај те поможинен аменге те овел амен доверба кај шај те водина библиско курси?

¹² Шај мислинаја аменге кај на сием способна те водина библиско курси. Шај мислинеа туке кај ваљани повише те џане те шај те проучине некасаја и Библија. Ако мислинеа аѓаар, дикх трин буќа кола со ка поможинен туке те овел тут доверба ки туте. Прво, о Јехова џанела кај ту шај те проучине е јаверенцар (2. Кор. 3:5). Дујто, о Исус коле со иси ле секоја власт ко небо хем ки Пхув, денѓа тут и заповед те сикаве е јаверен (Матеј 28:18). Хем трито, шај те поможинен туке о Јехова хем о јавера објавителија. О Јехова поможинѓа е Исусеске те џанел со те вакерел, хем шај те поможинел туке да (Јован 8:28; 12:49). Исто аѓаар, шај те роде помош таро надгледнико е групакоро проповедибаске, или таро искусно пионери или објавители те шај те почмине хем те водине библиско курси. Јекх начин сар шај те бајраре тли доверба тано ако сиан присутно ко ленгере библиска курсија.

13. Соске ваљани те прилагодина амен?

¹³ Шај те овел аменге пхаро те прилагодина амен ко неве методе хем алатке службаке. О начин сар водинаја библиска курсија акана менинѓа пе. Адалеске со амари главно публикација проучибаске тани Ов бахтало засекогаш!, ваљани те спремина амен хем те водина о библиско курси ко поразлично начин него англедер. Иси похари пасусија читибаске а повише кераја лафи е интересентеа. Кеда проучинаја некасаја, користинаја повише видеоклипија, статие тари амари интернет-страница хем и апликација JW Library^®. Ако на џанеа сар те користине акала алатке, роде некој те поможинел туке. Амен о мануша обично кераја о буќа сар со сием навикниме, адалеске пхаро аменге те кера промене. О Јехова хем о јавера шај те поможинен туке те овел туке полокхо те прилагодине тут хем чак те уживине џикоте проучинеа е јаверенцар. Јекх пионери вакерѓа кај, „хем о објавители хем о интересенти шај те уживинен ко акава нево начин проучибаске“.

14. а) Со на ваљани те бистра кеда проповединаја ко пхаро подрачје? б) Сар о 1. Коринќаните 3:6, 7 охрабринела амен?

¹⁴ Шај живинаја ко подрачје коте сој пхаро те почминел пе библиско курси. Несаве мануша на мангена те шунен о шукар хабери, па чак противинена пе. Со шај те поможинел аменге те ачхова позитивна ко асавко подрачје? На ваљани те бистра кај е манушенгоро живото шај сигате те менинел пе ко акава несигурно свето, хем окола со англедер на мангена сине те шунен шај акана манген (Матеј 5:3). Несаве со одбинена сине те читинен амари литература, покасно прифатинѓе те проучинен. Исто аѓаар, џанаја кај о Јехова тано о Господари е жетвакоро (Матеј 9:38). Ов мангела понадари да те садина хем те чхива пани, ама ов тано адава со керела те бајрол (1. Кор. 3:6, 7). Хем кобор охрабринела амен адава со џанаја кај чак ако ко моменти нашти те водина несаво библиско курси, о Јехова наградинела амаро трудо, а на о резултати! *

15. Сар осетинела пе о Јехова кеда некој прифатинела те проучинел и Библија хем применинела адава со сикљовела?

¹⁵ О Јехова тано бахтало кеда некој прифатинела  о чачипе тари Библија хем вакерела е јаверенге башо адава со сиклило (Изр. 23:15, 16). Ов тано сигурно бут бахтало кеда дикхела сар лескоро народо авдиве ревно проповединела хем сикавела е јаверен! На пример, ко 2020 службено берш, иако сине и пандемија, водинѓе пе 7.705.765 библиска курсија колендар со 241.994 џене денѓе лафи е Јеховаске кај ка служинен леске хем крстинѓе пе. А акала неве ученикија исто аѓаар ка водинен библиска курсија хем ка керен ученикија (Лука 6:40). Шај те ова увериме кај о Јехова тано бахтало кеда поможинаја е јаверенге те овен ученикија.

16. Сави цел шај те чхива аменге?

¹⁶ Те керел пе ученикија нане локхо, ама о Јехова шај те поможинел аменге те сикава е јаверен те манген ле. Шај ли те чхива аменге цел те овел амен барем јекх библиско курси? Ако користинаја секоја прилика те нудина библиско курси, шај ка изненадина амен таро резултатија. Сигурно о Јехова ка дел берекети башо амаро трудо.

17. Сар ка осетина амен ако водинаја библиско курси?

¹⁷ Иси амен бари чест со шај те проповедина хем те сикава е јаверен о чачипе! Акаја задача чаче керела амен бахтале. О апостол Павле, кова со поможинѓа буте џененге таро Солун те овен ученикија, вакерѓа сар осетинѓа пе: „Сој тани амари надеж, или бахталипе, или круна колаја со дичинаја амен англо амаро Господари о Исус ко време тари лескири присутност? На сиен ли тумен адава? Оја тумен сиен амари слава хем бахталипе“ (1. Сол. 2:19, 20; Дела 17:1-4). Бут џене авдиве осетинена пе аѓаар. И Стефани, јекх пхен која заедно пле ромеа, поможинѓа буте џененге те крстинен пе вакерела: „Нане побаро бахталипе таро адава те поможине е манушенге те ден лафи е Јеховаске кај ка служинен леске“.