1. Која тани е Јеховаскири волја авдиве?

 Е ДЕВЛЕСКИРИ волја авдиве тани о шукар хабери башо Царство те проповединел пе ки цело пхув (Мар. 13:10; 1. Тим. 2:3, 4). Акаја задача авела таро Јехова хем адалеске сој тани бут важно, ов биринѓа пле мангле Чхаве те водинел ла. Шај те ова сигурна кај адалеске со о Исус водинела амен, о проповедибе ка овел завршимо баш сар со мангела о Јехова, англедер те авел о крајо (Мат. 24:14).

2. Со ка дикха ки акаја статија?

² Ки акаја статија ка дикха сар о Исус користинела е верно хем разборито робо те дел духовно храна хем те организиринел пле следбеникон баши најбари проповедничко акција џи акана (Мат. 24:45). Исто аѓаар ка дикха со шај секова јекх амендар те керел те шај те поддржинел е Исусе хем е Верно робо.

3. Сави власт тани денди е Исусеске?

³ О Исус водинела и проповедничко активност. Котар џанаја адава? Кратко англедер те џал ко небо, о Исус керѓа лафи несавенцар таро пле верна ученикија ки јекх планина ки Галилеја. Ов вакерѓа ленге: „Денди манге цело власт хем ко небо хем ки пхув“. Приметин со вакерела одма пало акава: „Адалеске џан хем керен ученикија таро  мануша таро са о народија“ (Мат. 28:18, 19). Значи машкар о јавера буќа, е Исусеске исто аѓаар сине денди и власт те водинел и проповедничко активност.

4. Соске шај те ова сигурна кај о Исус понадари да надглединела и проповедничко активност?

⁴ О Исус вакерѓа кај ка проповединел пе хем ка керел пе ученикија ко „са о народија“ хем кај ов ка овел пле следбениконцар „ко са о диве џи ко крајо акале светоскоро“ (Мат. 28:20). Акала лафија јасно сикавена кај о Исус водинела и проповедничко активност ко амаро да време.

5. Сар поможинаја те исполнинен пе о лафија таро Псалм 110:3?

⁵ О Исус на сине секиримо башо адава дали ка овен доволно работникија ко последна диве акале светоскере. Ов сине сигурно кај о лафија со вакерѓа лен о псалмисти ка исполнинен пе: „Тло народо спремно ка џал туја ко диве кеда е војска ка ингаре ки војна“ (Пс. 110:3). Ако ту да учествујнеа ко проповедибе, тегани поддржинеа е Исусе хем е Верно робо хем поможинеа те исполнинел пе адава пророштво. Акаја задача напредујнела ама иси предизвикија.

6. Кова тано јекх предизвик со иси амен авдиве?

⁶ Јекх предизвик со иси околен со проповединена тано о прогонство. О отпадникија, о религиозна водачија хем о политичарија вакерѓе бут ховајба е манушенге баши амари активност. Ако амари фамилија, о колеге хем о јавера мануша колен со пенџараја верујнена ко акала ховајба, тегани ола шај те керен аменге притисок те чхинава те служина е Јеховаске хем те проповедина. Ко несаве пхувја амаре пхраља хем пхења тане прогониме аѓаар со нападинена лен, заканинена пе ленге хем пхандена лен ко затвор. На сием изненадиме со о мануша аѓаар постапинена аменцар. О Исус пророкујнѓа: „Са о народија ка мрзинен тумен башо мло анав“ (Мат. 24:9). Адава со доживинаја асавко прогонство тано доказ кај џаја пало е Исусескоро пример хем кај о Јехова прифатинела амен (Мат. 5:11, 12). О прогонство авела таро Сатана, ама о Исус тано бут помоќно лестар. Адалеске со поддржинела амен о Исус, о шукар хабери проповединела пе са е народонге.

7. Кова доказ сикавела кај о Откровение 14:6, 7 исполнинела пе?

⁷ Јекх јавер предизвик со иси амен сар проповедникија тано адава со о мануша керена ко различна чхибја лафи. Ко откровение кова со сине дендо е апостол Јованеске, о Исус пророкујнѓа кај о шукар хабери ка проповединел пе ко цело свето, иако ка овен различна чхибја. (Читин Откровение 14:6, 7.) Сар исполнинела пе акава? Е проповедибаја авдиве даја прилика со повише манушенге те шунен о хабери башо е Девлескоро Царство. Мануша таро цело свето шај те читинен библиско литература ки амари интернет страна jw.org адалеске со ки лате иси информацие ко повише таро 1.000 чхибја. О Водечко тело одобринѓа те превединел пе о лил Ов бахтало засекогаш, амари главно публикација колаја со кераја ученикија, ко повише таро 700 чхибја. Керена пе исто аѓаар видеоклипија е кашукенге хем литература ко Брајово писмо околенге сој короле. Дикхаја сар исполнинена пе о библиска пророштвија! Мануша таро цело свето сикљовена те керен лафи ки „чисто чхиб“ е чачипаскири (Зах. 8:23; Соф. 3:9). Са акава овела адалеске со о Исус Христос надглединела акаја активност.

8. Кола тане о резултатија таро проповедибе џи авдиве?

 ⁸ Авдиве повише таро офто милиоња мануша ко 240 пхувја тане дело тари е Јеховаскири организација, хем секова берш повише таро 100 милја крстинена пе! Ама сој панда поважно таро бројке тане о духовна особине, „и неви личност“, кола со развинена акала неве ученикија (Кол. 3:8-10). Бут џене чхинавѓе те живинен неморално, те овен насилна, нане лен више предрасуде хем нане националистија. О лафија таро Исаија 2:4, коте со пишинела кај нане повише те сикљовен те марен пе авдиве исполнинена пе. Адалеа со даја амендар са те урава и неви личност привлечинаја е јавере манушен те авен ки е Девлескири организација хем исто аѓаар сикаваја кај џаја пало амаро Надгледнико, о Христос Исус (Јован 13:35; 1. Пет. 2:12). Ништо таро акава нане случајно! О Исус поможинела амен ко са акава.

9. Спрема Матеј 24:45-47, со вакерѓа о Исус кај ка случинел пе ко време е крајоскоро?

⁹ Читин Матеј 24:45-47. О Исус вакерѓа кај ко време е крајоскоро ка поставинел јекх „верно хем разборито робо“ кова со ка дел духовно храна. Адалеске шај те очекујна кај акава робо ка овел бут зафатимо ко амаро време. Хем адава тано чаче аѓаар. О Исус користинела јекхе тикне група таро помазаникија те шај те дел е Девлескере народоске хем е интересентенге „духовно храна ко право време“. Акаја група на дикхела ки песте сар господари упри е јаверенгири вера (2. Кор. 1:24). Наместо адава, ола дикхена ко Исус сар „водачи хем заповеднико“ пле народоскоро (Иса. 55:4).

10. Кова таро акала лила сој сикавде ко слике поможинѓа туке те почмине те служине е Јеховаске?

¹⁰ Таро 1919 берш, о Верно робо спреминѓа  различна публикацие кола со е невенге сине прво прилика те шај те сикљовен башо чачипе таро е Девлескоро Лафи. Ко 1921 берш, о робо икалѓа о лил Е Девлескири харфа која со поможинѓа околенге со интересинена пе те сикљовен о основна библиска сикљојба. Сар со накхела сине о време јавера публикацие сине издајме. Кова лил поможинѓа туке те запознајне хем те заманге амаре небесно Даде? Дали сине о лил О Девел нека овел чачутно, Чачипе кова со ингарела ко вечно живото, Ти можеш засекогаш да живееш во рајот на Земјата, Спознание кое води до вечен живот, Што навистина учи Библијата?, Со сикавела амен и Библија? или амаро најнево лил Ов бахтало засекогаш? Са акала лила сине керде те шај те поможинен аменге те кера ученикија. Хем ола сине издајме баш ко време кеда ваљанела сине аменге адава.

11. Соске тано важно сарине амен те добина и духовно храна?

¹¹ Сариненге ваљани зорали духовно храна, а на само е интересентенге. О апостол Павле пишинѓа: „И зорали храна тани е зрела манушенге“. Ов понадари вакерѓа кај ако применинаја адава со сикљоваја тари Библија ка шај те разликујна о „исправно хем о погрешно“ (Евр. 5:14). Авдиве шај те овел пхаро те икера амен ко е Јеховаскере мерилија соске о мануша бут руминдиле. Ама о Исус керела са те шај амен те добина и потребно сила преку и вкусно духовно храна. Акаја духовно храна добинаја ла преку е Девлескоро Лафи, и Библија. О Исус водинела е Верно робо те спреминел хем те дел акаја духовно храна.

12. Исто сар о Исус, сар амен да славинаја е Девлескоро анав?

¹² Сар о Исус амен да славинаја е Девлескоро анав соске ов заслужинела адава  (Јован 17:6, 26). На пример, ко 1931 берш почминѓем те пхирава о анав Јеховаскере сведокија кова со темелинела пе ки Библија. Адалеа сикавѓем кобор аменге важно е Девлескоро анав хем кај мангаја о јавера те џанен кај служинаја амаре небесно Дадеске (Иса. 43:10-12). Хем таро октомври адава берш, акава свето анав појавинела пе ки насловно страна ко секова издание таро акава списание. Исто аѓаар ко Свето писмо — превод Нов свет тано ирамо е Девлескоро анав ко секова тхан коте со ваљани те појавинел пе. Акава тано бут поразлично таро цркве кола со цидинѓе е Јеховаскоро анав таро пумаре библиска преводија.

13. Со уверинела тут кај о Исус користинела е верно хем разборито робо авдиве? (Јован 6:68).

¹³ Преку о „верно хем разборито робо“ о Исус керѓа јекх организација ки пхув која со ширинела о чисто обожавибе. Со мислинеа баши адаја организација? Шај мислинеа исто сар о апостол Петар кова со вакерѓа е Исусеске: „Господаре, касте те џа? Ки туте тане о лафија башо вечно живото“ (Јован 6:68). Кај ка ова сине џи акана те на шуна сине баши е Јеховаскири организација? Преку лате о Исус керела са со шај те шај амен те ова чале ко духовно поглед. Ов исто аѓаар обучинела амен те шај те ова успешна ки амари служба. Исто аѓаар ов поможинела аменге те урава и „неви личност“ те шај те кера бахтало е Јехова (Еф. 4:24).

14. Сар користинела туке адава со сиан дело тари е Јеховаскири организација ко тек тари пандемија КОВИД-19?

¹⁴ О Исус исто аѓаар дела амен мудра  упатствија ко пхаре времија. Кеда почминѓа и пандемија КОВИД–19 дикхља пе кобор тане корисна адала упатствија. Џикоте бут џене ко свето на џанена сине со те керен, о Исус денѓа амен мудро водство те шај те заштитинел амен. Сием сине поттикниме те пхирава маске кеда сием авријал хем те икера физичко дистанца. Е старешиненге сине вакердо те овен редовно ко контакт сариненцар таро собрание хем те џанен кола тане ленгере физичка хем духовна потребе (Иса. 32:1, 2). Исто аѓаар добинѓем упатствија хем охрабрување преку о извештаија таро Водечко тело.

15. Саве упатствија добинѓем башо амаре состанокија хем баши амари служба кеда почминѓа и пандемија, хем саве сине о резултатија?

¹⁵ Кеда почминѓа и пандемија добинѓем упатствија сар те икера амаре состанокија хем сар те кера амари служба. Бут сигате почминѓем те икера амаре состанокија хем конгресија преку интернет. Исто аѓаар почминѓем те сведочина преку писмија хем телефонија. О Јехова наградинѓа амаро трудо. Ко бут подружнице барило о број е објавителенгоро. Уствари, ко акава периоди буте џенен сине лен охрабрувачка искуствија. (Дикх и рамка „ О Јехова дела берекети амаре службаке“.)

16. Ко со шај те ова увериме?

¹⁶ Несаве шај мислинена сине кај и организација дела амен превише упатствија поврзиме е пандемијаја. Ама сар накхела сине о време са појасно сине кај о упатствија со добинѓем лен сине мудра (Мат. 11:19). Хем џикоте размислинаја башо начин сар о Исус водинела пле народо, увериме сием кај бизи разлика со ка случинел пе ки иднина, о Јехова хем лескоро мангло Чхаво ка овен аменцар. (Читин Евреите 13:5, 6.)

17. Сар осетинеа тут башо адава со сиан водимо таро Исус?

¹⁷ Бут сием бахтале адалеске со о Исус водинела амен! Дело сием тари јекх организација коте со нане поделбе адалеске со ки лате иси различна културе, нацие хем чхибја. Ко духовно поглед иси амен бут хајбаске хем обучиме сием те шај те кера амари служба. Секова јекх амендар добинела помош сар те уравел и неви личност хем сикљоваја те манга јекх јекхе. Иси амен бут причине те дичина амен амаре Надгледникоја е Исусеа!