1. Сар ваљани те дикха ки предност со шај те молина амен е Јеховаске?

 ИСИ АМЕН јекх бут скапоцено поклон, окова со створинѓа о небо хем и пхув дозволинела аменге те молина амен леске. Размислин само, шај те пхрава е Јеховаске амаро вило ко било саво време хем ки било сави чхиб, бизо те закажина термини. Шај те молина амен кеда сием ки болница или ко затвор хем те ова увериме кај ка шунел амен амаро Дад. Амен сием бут благодарна башо акава поклон.

2. Сар сикавѓа о Давид кај ценинела и предност со шај те молинел пе?

² О цари о Давид бут ценинела сине и предност те молинел пе. Ки јекх гили вакерѓа е Јеховаске: „Мли молитва нека овел спремими англи туте сар темјани“ (Пс. 141:1, 2). Ко е Давидескоро време о свето темјани, кова со користинена сине о свештеникија, сине внимателно спремимо (2. Мој. 30:34, 35). Исто сар окола со шукар спреминена сине о темјани, аѓаар о Давид да мангља шукар те размислинел башо адава со ка вакерел е Јеховаске ки молитва. Амен да мангаја те кера о исто. Мангаја амаре молитве те овен угодна е Јеховаске.

3. Саво стави ваљани те овел амен кеда молинаја амен е Јеховаске, хем соске?

³ Кеда молинаја амен е Јеховаске ваљани те пазина сар кераја лафи хем те сикава хор поштовање. Размислин башо визие со дикхле лен о Исаија, о Езекиел, о Даниел хем о Јован. Акала визие сине различна, ама ки ленде сине нешто заедничко. Са ола опишинѓе е Јехова сар величествено Цари. О Исаија дикхља „сар о Јехова бешела  ко јекх учо хем возвишено престол“ (Иса. 6:1-3). О Езекиел дикхља сар о Јехова бешела ки пли небесно кочија хем околу лесте сине „бари светлина... слично сар виножито“ (Езек. 1:26-28). О Даниел дикхља „Околе со постојнела таро пуране диве“, уравдо ко парне шеја хем таро лескоро престол икљола сине јаг (Дан. 7:9, 10). Хем о Јован дикхља сар о Јехова бешела ко пло престол хем околу ки лесте сине виножито слично сар смарагд (Отк. 4:2-4). Џикоте размислинаја баши е Јеховаскири бари слава, дикхаја која бари предност иси амен те молина амен леске хем кобор тано важно те сикава поштовање џикоте кераја адава. Ама башо со ваљани те молина амен?

4. Со сикљоваја таро е Исусескере лафија кола со вакерѓа лен ко почеток тари најпенџарди молитва со аракхљовела ко Матеј 6:9, 10?

⁴ Читин Матеј 6:9, 10. Ки Проповед ки гора, о Исус сикавѓа пле следбеникон сар те молинен пе ко начин кова сој прифатливо е Девлеске. Откеда вакерѓа „значи, молинен тумен аѓаар“, о Исус прво спомнинѓа некобор важна буќа кола сој поврзиме е Јеховаскере намераја — те славинел пе лескоро свето анав, те авел о Царство кова со ка уништинел са е Девлескере душманен хем те анел берекетија упри пхув хем о мануша. Ако вклучинаја акала буќа ко амаре молитве, сикаваја кај е Девлескири намера тани аменге важно.

5. Дали тано шукар те молина амен башо лична буќа?

⁵ Ко следно дело тари молитва, о Исус сикавѓа кај тано исто аѓаар шукар те молина амен башо лична буќа. Шај те молина ле те дел амен хајбаске адава диве, те простинел аменге амаре гревија, те заштитинел амен таро искушенија хем те спасинел амен таро лошно (Мат. 6:11-13). Кеда молинаја е Јехова башо акала буќа признајнаја кај зависинаја лестар хем сикаваја кај мангаја те кера лескири волја.

6. Дали ваљани те молина амен само башо буќа сој тане спомниме ки најпенџарди молитва? Објаснин.

⁶ О Исус на мангља лескере ученикија те повторинен о иста лафија тари најпенџарди молитва. Ко пле јавера молитве о Исус спомнинѓа различна буќа кола со сине  леске важна ко адава време (Мат. 26:39, 42; Јован 17:1-26). Амен да шај те молина амен баши секоја бути со мучинела амен. Кеда ваљани те ана несави одлука шај те молина амен баши мудрост хем те ова разумна (Пс. 119:33, 34). Ако ваљани те почмина несави пхари задача шај те молина амен баши помош те хаљова пошукар сар те завршина ла (Изр. 2:6). О родителија шај те молинен пе башо пумаре чхаве, о чхаве шај те молинен пе башо пумаре родителија хем сарине амен шај хем ваљани те молина амен башо амаре интересентија хем околенге каске со сведочинаја. Ама кеда молинаја амен на ваљани само те рода о Јехова те поможинел аменге.

7. Соске ваљани те фалина е Јехова ки молитва?

⁷ На ваљани те бистра те фалина е Јехова ко амаре молитве. Амаро Девел заслужинела највише те фалина ле соске ов тано шукар хем спремно те простинел. Ов исто аѓаар тано милостиво хем сочувствително, стрпливо, пхердо мангипе хем верност (Пс. 86:5, 15). Сигурно иси амен бут причине те фалина е Јехова башо лескере особине хем башо адава со керела.

8. Кола тане несаве буќа башо кола со шај те благодарина е Јеховаске? (Псалм 104:12-15, 24).

⁸ Освен со ваљани те фалина е Јехова ко амаре молитве, амен сием исто аѓаар поттикниме те благодарина леске башо бут шуже буќа со дела амен. На пример, шај те благодарина леске башо шуже бое со дикхаја лен ко лулуѓа, башо различно вкусно хајбе хем башо амаре паше амала кола со керена амен бахтале. Амаро Дад дела амен са акава хем панда бут јавера буќа те шај те ова бахтале. (Читин Псалм 104:12-15, 24.) А сој најважно, благодарна сием е Јеховаске со дела амен барвали духовно храна хем баши бут шужи надеж.

9. Со шај те поможинел аменге те на бистра те благодарина е Јеховаске? (1. Солуњаните 5:17, 18).

⁹ Шај бут локхесте те бистра те благодарина е Јеховаске башо са со керела аменге. Со шај те поможинел амен те на бистра те кера адава? Шај те кере јекх списако таро буќа башо коленде со молинѓан тут хем пало несаво време проверин  со пишинѓан те шај те дикхе сар о Јехова одговоринѓа ко тле молитве. Тегани благодарин тут баши лескири помош. (Читин 1. Солуњаните 5:17, 18.) Обично бут сием бахтале хем осетинаја амен мангле кеда о јавера сикавена аменге кај тане благодарна. Слично, о Јехова тано бахтало кеда на бистраја те благодарина леске адалеске со одговоринела ко амаре молитве (Кол. 3:15). Ама, иси јавер да важно причина башо со ваљани те благодарина е Девлеске.

10. Спрема 1. Петрово 2:21, соске ваљани те благодарина е Јеховаске адалеске со бичхалѓа е Исусе ки пхув?

¹⁰ Читин 1. Петрово 2:21. Ваљани те благодарина е Јеховаске адалеске со бичхалѓа пле мангле Чхаве те сикавел амен. Кеда читинаја башо Исус, сикљоваја бут буќа башо Јехова хем башо адава сар те кера ле бахтало. Ако сикаваја вера ки е Исусескири жртва шај те овел амен паше амалипе е Јеховаја хем те ова ко мир леа (Рим. 5:1).

11. Соске молинаја амен преку е Исусескоро анав?

¹¹ Благодарна сием е Јеховаске со шај те молина амен преку лескоро Чхаво. О Јехова шунела хем одговоринела ко молитве кола сој бичхалде преку е Исусескоро анав. О Исус вакерѓа: „Било со те роден ко мло анав, адава ка керав, те шај те славинел пе о Дад преку о Чхаво“ (Јован 14:13, 14).

12. Која тани јавер причина соске ваљани те благодарина е Јеховаске башо лескоро Чхаво?

¹² О Јехова простинела амаре гревија преку е Исусескири откупно жртва. И Библија опишинела е Исусе сар амаро „првосвештенико кова со бешља ки десно страна таро престол таро Севишно ко небо“ (Евр. 8:1). „Ко амаро Дад иси амен помошнико, о Исус Христос“ (1. Јов. 2:1). Бут сием благодарна со о Јехова денѓа амен Првосвештенико со хаљола амаре слабостија хем кова со керела буќа „баши амари корист“ (Рим. 8:34; Евр. 4:15). Амен сием несовршена хем адалеске бизо е Исусескири жртва на би шај сине те молина амен е Девлеске. Сигурно сложинеа тут кај бизи разлика кобор хем те благодарина амен е Јеховаске никогаш нане те овел доволно башо скапоцено поклон со денѓа амен — пле мангле Чхаве!

13. И рат англедер те мерел, сар сикавѓа о Исус кај мангела пле ученикон?

¹³ И рат англедер те мерел, о Исус ки јекх бари молитва молинѓа пе Даде те аракхел лескере ученикон таро лошно (Јован 17:15). Адалеа о Исус сикавѓа кобор мангела лен. Ов џанља кај панда хари ка овел бут мучимо, сепак ов секиринела пе сине башо пле учениконгоро шукарипе.

14. Сар шај те сикава кај мангаја амаре пхрален хем пхењен?

¹⁴ Слично сар о Исус, амен на концентриринаја амен само ко амаре потребе. Наместо адава, редовно молинаја амен амаре пхраленге хем пхењенге. Кеда кераја аѓаар тегани шунаја е Исусескири заповед те манга амен јекх јекхеа хем сикаваја е Јеховаске кобор бут мангаја амаре пхрален хем пхењен (Јован 13:34). Ма те бистра кај амаре молитве поможинена е пхраленге. Е Девлескоро Лафи вакерела: „И молитва таро вило е праведникоскири иси ла бари сила“ (Јак. 5:16).

15. Соске ваљани те молина амен е пхраленге хем е пхењенге?

 ¹⁵ Ваљани те молина амен е пхраленге соске доживинена бут неволје. Шај те молина е Јехова те поможинел ленге те истрајнен кеда тане насвале, кеда доживинена природно катастрофа, кеда иси војна, кеда тане прогониме или кеда доживинена јавера пхарипа. Шај исто аѓаар те молина амен околе пхраленге со поможинена е јаверенге со накхена таро пхаро периоди. Шај ту лично џанеа некас со накхела таро пхаро периоди. Ка овел шукар те спомнина ле ко амаре молитве. Кеда молинаја е Јехова башо амаре пхраља сикаваја леске кај чаче мангаја лен.

16. Соске ваљани те молина амен околенге со предводинена?

¹⁶ О пхраља со предводинена ко собрание тане бут благодарна кеда спомнинаја лен ко амаре молитве соске амаре молитве поможинена ленге. О Павле џанела сине кај е јаверенгере молитве сине леске потребна. Ов пишинѓа: „Молинен тумен манге да, те шај о Девел те поможинел манге, кеда ка пхравав мо муј, храбро те проповединав и свето тајна башо шукар хабери“ (Еф. 6:19). Авдиве да иси бут вредна пхраља кола со предводинена. Амен сикаваја кај мангаја лен аѓаар со молинаја е Јехова те наградинел ленгоро трудо.

17-18. Кеда шај ка ваљани те молина амен англо јавера, хем со на ваљани те бистра?

¹⁷ Понекогаш шај ка ваљани те молина амен англо јавера. На пример, јекх пхен која со водинела јекх библиско курси шај ка вакерел е пхењаке сој лаја ки служба те молинел пе. Ама и пхен сој лаја ки служба шај на џанела шукар е интересентка хем адалеске шај ка мангел те молинел пе ко крајо таро курси. Аѓаар ка џанел пошукар со те вакерел баши интересентка кеда ка молинел пе.

¹⁸ Јекх пхрал шај ка ваљани те молинел пе ко состанок службаке или ко собраниско состанок. Е пхрален со иси лен и предност те молинен пе на ваљани те бистрен која тани и цел е состанокоскири. На ваљани преку и молитва те дел пе совет е собраниеске или известување. Обично,  башо состанокија тане одвиме панџ минутија баши гили хем баши молитва. Адалеске, о пхрал со ка молинел пе на ваљани те користинел „бут лафија“, посебно ко почеток таро состанок (Мат. 6:7).

19. Со ка поможинел аменге те ова спремна кеда ка авел е Јеховаскоро диве баши осуда?

¹⁹ Сар со авела е Јеховаскоро диве са попаше, и молитва ваљани те овел аменге са поважно ко амаро живото. О Исус истакнинѓа кобор тано важно акава кеда вакерѓа: „Ачховен џангавде, цело време молинен тумен таро вило те шај те нашен таро са адала буќа со ваљани те овен“ (Лука 21:36). Ако редовно молинаја амен, адава ка поможинел аменге те ачхова духовно џангавде хем аѓаар ка ова спремна кеда ка авел е Девлескоро диве баши осуда.

20. Сар шај амаре молитве те овен сар мирисливо темјани?

²⁰ Со дикхлем џи акана? Амен бут ценинаја и предност со шај те молина амен. О најважна буќа башо со ваљани те молина амен тане поврзиме е Јеховаскере намераја. Исто аѓаар, благодаринаја е Девлеске башо лескоро Чхаво, башо берекетија со ка анел о Царство хем молинаја амен башо амаре пхраља хем пхења. О Јехова исто аѓаар мангела те молина амен башо амаре физичка хем духовна потребе. Ако шукар размислинаја со ка вакера ко амаре молитве, сикаваја кај ценинаја акаја бут скапоцено предност. Амаре лафија ка овен сар мирисливо темјани кова сој угодно е Јеховаске (Изр. 15:8).