1. Соске тано мудро те спремина амен башо катастрофе?

 АКО сием спремна башо нешто адава шај те спасинел амаро живото. На пример, кеда случинела пе несави катастрофа, о мануша сој спремна иси лен побаре шансе те преживинен хем те поможинен е јаверенге. Јекх хуманитарно организација тари Европа вакерела: „О шукар спремибе значинела живото“.

2. Соске ваљани те ова спремна баши бари неволја? (Матеј 24:44).

² И „бари неволја“ ка почминел таро јекх пути (Мат. 24:21). Ама акаја неволја ка овел поразлично таро бут јавера катастрофе адалеске со бут џене ка овен спремна. Котар џанаја адава? Отприлика 2.000 берша англедер, о Исус предупрединѓа пле следбеникон те спреминен пе башо адава диве. (Читин Матеј 24:44.) Ако сием спремна ка овел аменге полокхо те издржина ко адава пхаро време хем те поможина е јаверенге исто аѓаар те издржинен (Лука 21:36).

3. Сар и истрајност, о сочувство хем о мангипе ка поможинен аменге те ова спремна баши бари неволја?

³ Те дикха трин особине кола со ка поможинен аменге те ова спремна баши бари неволја. Со ка кера ако вакерела пе аменге те проповедина јекх оштро осуда хем окола со на верујнена противинена пе аменге? (Отк. 16:21). И истрајност ка поможинел аменге те ова послушна е Јеховаске хем те овел амен доверба ки лесте кај ка заштитинел амен. Со ка кера ако амаре пхраља нашавена нешто таро пумаре материјална буќа или палем ачховена бизо ништо? (Авак. 3:17, 18). О сочувство ка поттикнинел амен те поможина ленге. Со ка кера ако ваљани те живина заедно е пхраленцар несаво време адалеске со и коалиција таро са о народија нападинела амен? (Езек. 38:10-12). О силно мангипе ка поможинел аменге те накха таро адава пхаро време.

4. Сар сикавела и Библија кај мора понадари да те развина истрајност, сочувство хем мангипе?

⁴ Е Девлескоро Лафи охрабринела амен понадари да те развина истрајност, сочувство хем мангипе. На пример, ко Лука 21:19 вакерела: „Преку тумари истрајност ка спасинен тумаро  живото“. Ко Колошања 3:12 пишинела: „Уравен тумен ко сочувство“. Хем ко 1. Солунјања 4:9, 10 вакерела: „Тумен сиен сикавде таро Девел те манген тумен јекх јекхеа... Ама амен поттикнинаја тумен пхраљален те керен адава панда повише“. Са акала лафија сине пишиме е учениконге кола со више сине лен истрајност, сочувство хем мангипе, сепак ола ваљани сине те сикавен лен панда повише. Амен да ваљани те кера о исто. Те шај те кера адава, те дикха сар о прва христијања сикавѓе секоја јекх таро акала особине. Пало адава, ка дикха сар шај те џа пало пример адале христијаненгоро хем аѓаар те ова сигурна кај сием спремна баши бари неволја.

5. Сар о прва христијања успејнѓе те истрајнен ко неволје?

⁵ О христијања ко е Павлескоро време ваљани сине те сикавен истрајност (Евр. 10:36). Освен о проблемија со сине лен сар са е јавере манушен, ола мора сине те трпинен хем бут јавера да неволје. Бут џене лендар сине прогониме на само таро еврејска религиозна водачија хем таро римска властија, него исто аѓаар хем таро пумаре фамилие (Мат. 10:21). А понекогаш, ко собрание да ваљани сине те боринен пе против о отпадникија те шај те на влијајнен лошно ко собрание хем аѓаар те одвојнен лен (Апо. 20:29, 30). Сепак, адала христијања истрајнѓе (Отк. 2:3). Сар успејнѓе ко адава? Ола бут размислинена сине башо библиска примерија со сикавѓе истрајност, сар на пример башо Јов (Јак. 5:10, 11). Исто аѓаар, молинена пе сине баши сила (Апо. 4:29-31). Хем никогаш на бистерѓе кај о Јехова ка наградинел ленгири истрајност (Апо. 5:41).

6. Со керѓа и Мерита те шај те истрајнел ко противибе хем со ту сикљовеа таро адава?

⁶ Амен да шај те истрајна ако редовно читинаја примерија баши истрајност тари Библија хем таро амаре публикацие хем ако хор размислинаја баши ленде. Акава поможинѓа е Меритаке, јекх пхен тари Албанија, те истрајнел кеда сине физички малтретирими тари пли фамилија. Ој вакерела: „Бут сиум сине охрабрими кеда читинѓум о извештај башо Јов. Иако цидинѓа бут муке, а на џанља кој керела леске адала проблемија, сепак вакерѓа: ’Са џикоте на мерава, нане те откажинав ман тари мли беспрекорност!‘ (Јов 27:5). Акава чхивѓа ман те размислинав баши мли ситуација хем халиљум кај мле проблемија тане бут тикне кеда ка спорединав лен е Јовескере мукенцар. Хем исто аѓаар ме џанава кастар авена мле проблемија, а о Јов на џанља“.

7. Чак ако ко моменти нане амен несаве баре проблемија, со ваљани те кера панда акана?

⁷ Шај исто аѓаар те ова поистрајна ако редовно молинаја амен е Јеховаске хем вакераја леске са со мучинела амен (Фил. 4:6; 1. Сол. 5:17). Иако шај ко моменти нане тут несаво баро проблеми, дали сепак молинеа тут е Јеховаске хем родеа лестар водство секова пути кеда сиан секиримо, бунимо или на џанеа со те кере? Ако секова диве родеа помош таро амаро Девел ко потикне проблемија, тегани сигурно кај ка кере адава кеда ка појавинен пе туке побаре проблемија ки иднина. Аѓаар ка шај те ове сигурно кај о Јехова џанела точно кеда те поможинел туке хем сар те керел адава (Пс. 27:1, 3).

8. Сар е Миракоро искуство сикавела кај адава со ка истрајна ко проблемија панда авдиве шај те поможинел аменге те истрајна ко проблемија со ка овен амен? (Јаков 1:2-4). (Дикх хем и слика).

⁸ Ако ачховаја верна е Јеховаске ко проблемија панда авдиве, побари тани и веројатност кај ка ачхова леске верна хем ки бари неволја (Рим. 5:3). Соске шај те вакера адава? Бут пхраља вакерена кај адава со истрајнѓе ко проблемија со сине лен англедер, поможинѓа ленге те истрајнен ко проблемија со појавинѓе пе ленге покасно. И истрајност бајрарѓа  ленгири вера ко Јехова кај ов тано спремно те поможинел ленге хем мангела те керел адава. А и вера поможинѓа ленге те истрајнен ко неволје со сине лен покасно. (Читин Јаков 1:2-4.) И Мира, јекх пионерка тари Албанија вакерела кај адава со англедер истрајнѓа ко проблемија поможинѓа лаке понадари да те истрајнел. Ој признајнела кај понекогаш мислинела сар ка пхене само ла иси ла добором бут проблемија. Ама тегани сетинела пе кобор бут о Јехова поможинѓа лаке хем поддржинѓа ла ко последна 20 берш хем адалеске вакерела песке: „Ачхов верно. Ма мукх са адала берша хем са адала борбе со добинѓан лен адалеске со о Јехова поможинѓа туке те перен ко пани“. Ту да шај те размислине башо адава сар о Јехова џи акана поможинѓа туке те истрајне. Ов уверимо кај ов дикхела секова пути кеда истрајнеа ко несаво проблеми хем кај ка наградинел тут башо адава (Мат. 5:10-12). Тегани кеда ка почминел и бари неволја ту више ка џане сар те истрајне хем адалеске ка шај те ове одлучно понадари да те истрајне.

9. Сар о пхраља тари сиријско Антиохија сикавѓе сочувство?

⁹ Те дикха со случинѓа пе кеда сине баро бокхалипе ки Јудеја. Откеда о пхраља тари сиријско Антиохија шунѓе башо адава, пело ленге жал башо пхраља ки Јудеја. Ама и жал или о сочувство теринѓа лен те керен нешто. Ола одлучинѓе секој спрема пле можностија те бичхален помош е пхраленге со живинена ки Јудеја (Апо. 11:27-30). Иако о пхраља тари Јудеја живинена сине бут дур, о христијања тари Антиохија мангле те поможинен ленге (1. Јов. 3:17, 18).

10. Ко кола начинија шај те сикава сочувство кеда амаре пхраља тане погодиме тари несави природно катастрофа? (Дикх хем и слика.)

¹⁰ Амен да шај те сикава сочувство кеда дознајнаја кај амаре пхраља тане погодиме тари несави катастрофа. Амен сикаваја кај сием спремна одма те поможина аѓаар со пучаја е старешинен дали иси нешто со шај те кера, даја прилог башо активностија со керена пе ко цело свето или молинаја амен околенге сој погодиме таро природна катастрофе b (Изр. 17:17). На пример, ко 2020 берш повише таро 950 Одделија баши помош ко катастрофе добинѓе и задача те грижинен пе околенге со сине погодиме тари пандемија КОВИД-19. Бут сием благодарна са е пхраленге хем е пхењенге со поможинѓе ко адава периоди. Ола сикавѓе сочувство пумаре пхраленге аѓаар со денѓе лен материјална буќа, поможинѓе лен те ачховен духовно зорале хем ко несаве случаија реновиринѓе или палем градинѓе кхера хем дворане или конгресна сале. (Споредин 2. Коринќања 8:1-4.)

11. Сар адава со сикаваја сочувство анела чест амаре небесно Дадеске?

¹¹ Кеда амен сикаваја сочувство откеда случинела пе несави катастрофа, о јавера приметинена адава. На пример, ко 2019 берш о урагани Доријан уништинѓа јекх дворана ко Бахамија. Хем џикоте о пхраља палем градинена сине и дворана ола пучле јекхе мајсторе кова со на сине Сведоко кобор ка лел ако ов завршинела несави бути. О мајстори одговоринѓа ленге: „Ка керав бизо паре... мандар ка овел о материјали хем о алатија... Мангава те керав адава тумаре организацијаке соске сиум воодушевимо таро адава со дикхљум со керена тумаре амаленге“. Бут мануша на џанена е Јехова ама бут лендар дикхена со керена е Јеховаскере сведокија. Кобор бари чест иси амен те привлечна е манушен ко Јехова кова сој „барвало ки милост“ аѓаар со сикаваја сочувство е јаверенге (Еф. 2:4).

12. Сар адава со ка овел амен сочувство панда авдиве спреминела амен баши бари неволја? (Откровение 13:16, 17).

 ¹² Соске ки бари неволја ка ваљани те сикава сочувство? Адалеске со и Библија вакерела кај окола со на поддржинена е властен ка овел лен проблемија панда акана ама хем ки бари неволја. (Читин Откровение 13:16, 17.) Амаре пхраленге хем пхењенге шај ка ваљани помош те шај те овен лен о основна буќа. Кеда амаро Цари о Христос Исус ка авел те анел осуда, амен мангаја те аракхел амен сар сикаваја сочувство хем те канинел амен те наследина о Царство (Мат. 25:34-40).

13. Спрема Римјања 15:7, сар о прва христијања бајрарѓе пумаро мангипе машкар песте?

¹³ О прва христијања сине пенџарде пало ленгоро мангипе. Ама дали сине ленге локхо те сикавен мангипе? Те дикха саве разлике сине ко собрание ко Рим. Ко собрание сине Еврееја кола со таро тикнипе сиклиле те овен послушна ко е Мојсеескоро закони, ама машкар ленде сине хем мануша таро јавера нацие кола со таро тикнипе сине сикавде те верујнен ко нешто јавер. Несаве христијања веројатно сине робија, јавера сине слободна а шај несавен чак сине лен пле робија. Сар адала христијања понадари да сикавѓе мангипе јекх јекхеске иако сине лен асавке разлике? О апостол Павле поттикнинѓа лен те прифатинен пе јекх јекхеа. (Читин Римјања 15:7.) Со мангља те вакерел о Павле адалеа? О лафи сој преведимо сар „прифатинен“ значинела те ове некасаја љубезно или гостопримливо сар сој кеда приминеа некас ко тло кхер или кеда прифатинеа некас ко тло друштво. На пример о Павле вакерѓа е Филимонеске те прифатинел е Онисиме, јекх робо со нашља, аѓаар со љубезно ка доџакерел ле (Филим. 17). А и Прискила хем о Акила прифатинѓе е Аполо кова со на џанела сине добором бут башо христијанство сар ола, аѓаар со леле ле ки песте (Апо. 18:26). Наместо те дозволинен адала разлике те одвојнен лен, акала христијања учхарѓе о разлике хем прифатинѓе пе јекх јекхеа.

14. Сар и Ана хем лакоро ром сикавѓе мангипе е јаверенге?

¹⁴ Амен да шај те сикава мангипе амаре пхраленге хем пхењенге аѓаар со ка прифатина лен ко амаро друштво. Адава веројатно ка поттикнинел лен ола да те сикавен аменге мангипе (2. Кор. 6:11-13). Те дикха о пример е Анакоро хем лакере ромескоро. Кратко откеда геле ки пли неви мисионерско доделба ки западно Африка, почминѓа и пандемија КОВИД-19 хем адалеске нашти сине те запознајнен пе лично е пхраленцар хем е пхењенцар. Сар ки асавки ситуација акава брачно пари шај сине те сикавел мангипе е пхраленге? Аѓаар со дикхена пе сине е пхраленцар преку видеоконференција хем вакерена ленге сине кобор бут би мангена те дикхен пе лично те шај те запознајнен пе ленцар. О пхраља сине бут благодарна башо мангипе со сикавѓе ленге о мисионерија хем адалеске ола да почминѓе те јавинен пе ленге хем те бичхален ленге пораке. Соске акава брачно пари трудинѓа пе те керел адава? И Ана вакерела: „Никогаш нане те бистрав е пхрален хем е пхењен кола со ко шукар хем ко лошно време сикавѓе манге хем мле фамилијаке мангипе хем ленгоро пример охрабринѓа ман ме да те сикавав е јаверенге мангипе“.

15. Сар е Ванесакоро пример поможинела тут те манге са е пхрален хем е пхењен? (Дикх хем и слика.)

¹⁵ Бут џене амендар тане ко собранија коте со иси пхраља хем пхења таро различна културе хем пхраља колен со иси лен различна карактерија. Ако концентриринаја амен ко ленгере шукар особине, адава ка поможинел амен панда повише те манга лен. Јекх пхен која со викинела пе Ванеса хем служинела ко Нов Зеланд сине лаке пхаро те овел ко шукар  односија несаве џененцар таро собрание. Ама тегани ој одлучинѓа те овел панда попаше околенцар со мислинела сине кај иси лен пхаро карактер. Адава поможинѓа лаке те дикхел со о Јехова мангела ки ленде. Ој вакерела: „Откеда мо ром уло покраинско надгледнико амен почминѓем те накхава време повише пхраленцар со иси лен различна карактерија хем адава со више англедер дружинава ман сине различно манушенцар поможинѓа ман те накхав ленцар шукар. Акана свиџинела пе манге адава со сием различна. Е Јеховаске да свиџинела пе адава, иначе на би привлечинела сине различна манушен те служинен леске ки јекх организација“. Кеда трудинаја амен те дикха ко јавера сар о Јехова со дикхела ки ленде тегани сикаваја кај мангаја лен (2. Кор. 8:24).

16. Соске ки бари неволја ка овел бут важно те манга амаре пхрален хем пхењен? (Дикх хем и слика.)

¹⁶ Ки бари неволја ка овел бут важно те манга амаре пхрален хем пхењен. Кеда ка почминел адаја неволја, сар о Јехова ка заштитинел амен? Те дикха со о Јехова вакерѓа пле народоске те керел кеда о пурано Вавилон сине нападимо. Ов вакерѓа: „Ајде, тумен со сием мло народо, кхувен ко тумаре собе коте со ка овен ко сигурно хем пханден о удара пали туменде, гаравен тумен хари џикоте накхела и холи“ (Иса. 26:20). Шај амен да ка ваљани те ова послушна ко акала лафија е Јеховаскере кеда ка авел и бари неволја. Акала „собе“ шај те претставинен амаре собранија. Џикоте трајнела и бари неволја о Јехова ветинела аменге кај ка заштитинел амен ако понадари да ачховаја ко јекхипе амаре пхраленцар хем пхењенцар. Адалеске, панда акана ваљани те да са амендар те манга амаре пхрален хем пхењен, а на само те трудина амен те ова ленцар шукар. Амаро живото шај те зависинел таро адава!

17. Со ка овел аменге локхо те кера ки бари неволја ако панда акана спреминаја амен?

¹⁷ „О баро диве е Јеховаскоро“ ка овел бут пхаро периоди са е манушенге (Соф. 1:14, 15). Адава значинела кај е Јеховаскере народоске да нане те овел локхо. Ама ако спреминаја амен панда акана ка шај те ачхова смириме хем те поможина е јаверенге. Аѓаар ка истрајна ко са о проблемија со ка овен амен. Хем кеда амаре пхрален ка овел лен несаво пхарипе, ка да амендар са те поможина лен аѓаар со ка сикава ленге сочувство хем ка да лен адава со ваљани ленге. Ако панда акана сикљоваја те манга амаре пхрален хем пхењен, нане те овел аменге пхаро те сикава ленге мангипе ки иднина. Тегани о Јехова ка дел амен вечно живото хем никогаш више нане те сетина амен ко са о катастрофе хем неволје со сине амен ко акава свето (Иса. 65:17).