Ко тхан коте со живинаја сине, мо дад служинела сине сар старешина ки Обединето црква тари Канада. Адалеске секоја недела сабајле ов бичхалела сине ман хем ме пхења ки црква ки школа. Пало адава ко 11 о саати леа заедно џаја сине ки црква. А палоручко џаја сине ме дајаја ки дворана. Бут локхе шај сине те дикха и разлика машкар акала дуј религие.

Ми дај вакерела сине адава со сиклили тари Библија пле шукар амаленге о Боб хем и Марион Хачесон, кола со исто аѓаар прифатинѓе о чачипе. Ко 1958-то берш, о Боб хем и Марион леле ман пеа заедно пумаре трине чхавен ко меѓународно конгрес „Е Девлескири волја“ кова со икерѓа пе ко Њујорк хем трајнѓа офто диве. Кеда размислинава башо адава, хаљовава кај на сине ленге баш локхо те лен ман пеа. Ама адава конгрес сине манге јекх таро најшуже моментија ко мло живото.

Џикоте сиум сине тинејџери, живинаја сине ки фарма хем ме уживинава сине те грижинав ман е животненге. Размислинава сине те џав ко факултети башо ветеринарство. Ми дај вакерѓа акава јекхе старешинаске таро собрание. Ов љубезно сетинкерѓа ман кај живинаја ко „последна диве“ хем пучља ман сар адава со ка џав некобор берша ко факултети ка влијајнел упро мло амалипе е Јеховаја (2. Тим. 3:1). Адава разговор поттикнинѓа ман те на пишинав ман ко факултети.

 Панда на џанава сине со ка керав откеда ка завршинав е средно школаја. Иако секова викенд џава сине ки служба, на уживинава сине ки лате. А и пионерско служба на сине манге привлечно. Ко адава периоди, мо дад хем мо како кола со на сине сведокија охрабринена ман сине те керав полновремено бути ки јекх бари осигурително компанија ко Торонто. Адатхе мо како сине ки јекх бари позиција хем адалеске прифатинѓум и бути.

Ко Торонто, цело време керава сине бут бути хем дружинава ман сине манушенцар со на сине Сведокија. Адалеске на џава сине редовно ко состанокија хем ки служба. Ко почеток, живинава сине ко мло папо кова со на сине Сведоко, ама откеда ов муло мора сине те аракхав јавер тхан живибаске.

О Боб хем и Марион, кола со леле ман пеа ко конгрес 1958-то берш, сине манге сар родителија. Ола нудинѓе манге те живинав ки ленде хем поможинѓе манге духовно те напредујнав. Крстинѓуман ко 1960-то берш, заедно ленгере чхавеа е Џонеа. Ов почминѓа е пионерско службаја хем лескоро пример поттикнинѓа манде да те бајрарав мли служба. О пхраља таро собрание дикхле кај напредујнава хем пало несаво време именујнѓе ман те служинав сар надгледнико ко состанок кова со авдиве тано пенџардо сар Амаро живото хем служба.

Ко 1966-то берш, женинѓум ман јекхе пхењаја со викинела пе Ренди Берг, ој сине јекх ревносно пионерка која со бут мангела сине те служинел ко тхана коте со иси побари потреба. О покраинско надгледнико сикавѓа аменге лично интерес хем охрабринѓа амен те џа те служина ко собрание ки Орилија (Онтарио). Одма пакујнѓем амен хем селинѓем амен.

Кратко откеда реслем ки Орилија, ме да уљум пионери исто сар мли ромни. Лакири ревност бут сигате влијајнѓа упри манде! Откеда почминѓум цело вилеа те керав и служба, почминѓум те уживинав џикоте користинава сине и Библија хем осетинѓум и радост кеда дикхава сине сар о јавера хаљовена ла. Сине аменге баро благослов адава со шај сине те поможина јекхе бут шукар брачно пареске тари Орилија те керен промене ко  пло живото хем те почминен те служинен е Јеховаске.

Ки јекх посета ко Торонто, запознајнѓум е пхрале Арнолд Мек-Намара, кова со сине јекх таро одговорна пхраља ко Бетел. Ов пучља амен дали би мангаја те служина сар специјална пионерија. Ме одма одговоринѓум леске: „Оја, спремно сиум било кај те џав само на ко Квебек!“ Сине ман асавко размислување соске упри манде влијајнѓа о негативно стави е манушенгоро тари Канада кола со керена сине англиски лафи, спрема о мануша тари провинција Квебек коте со керела пе сине француски лафи. Ко адава време, о мануша протестиринена сине против и влада хем родена сине и провинција Квебек те овел независно тари Канада.

О Арнолд вакерѓа манге: „Моментално и подружница бичхалела специјална пионерија само ко Квебек“. Одма сложинѓум ман те бичхален амен адари. Ме англедер више џанава сине кај и Ренди мангела сине те служинел адари. Покасно, халиљум кај адаја сине јекх таро најшукар одлуке ко амаро живото!

Пало панџ курке курси баши француско чхиб, ме и Ренди хем панда јекх брачно пари гелем ко Римуски, кова сој дур 540 километрија североисточно таро Монтреал. Ваљани сине панда бут те шај те сикљова француски, адава дикхља пе посебно кеда читинѓум јекх известување. Наместо те вакерав кај ко конгрес ка авен бут пхраља тари Австрија ме вакерѓум кај ко конгрес ка авен бут птице ној.

Ко Римуски, освен амен о штар џене але панда штар јавера ревносна пхења кола со на сине ко брако хем и фамилија Хјубердоу пле дује чхаенцар. О пхрал хем и пхен Хјубердоу леле киријаја јекх баро кхер ефта собенцар хем са о пионерија со живинаја сине адатхе поможинаја сине те платинел пе и кирија. О кхер викинаја ле сине „Парно кхер“ соске сине ле парни фасада хем парне стубија. Обично адатхе живинаја сине 12 џи ко 14 џене. Адалеске со сием сине специјална пионерија, ме хем и Ренди џаја сине ки служба сабајле, палоручко хем раќате. Адалеске бут ценинаја сине адава со секогаш сине некој со авела аменцар ки служба, па чак кеда сине бут шудро раќате.

Добором бут улем паше адале пионеренцар со уле аменге сар фамилија. Понекогаш, тхараја сине јаг авријал хем заедно бешаја сине околу лате. А сине хем диве кеда заедно готвинаја сине. Јекх таро пхраља сине музичари хем адалеске сабота раќате бут пути гиљаваја хем кхелаја сине.

Ко Римуски о мануша мангена сине те шунен баши Библија! Сием сине бут радосна со панџе бершенге некобор џене касаја со проучинѓем и Библија крстинѓе пе, а ко собрание о број барило ко 35 објавителија.

И служба ко Квебек поможинѓа аменге те ова панда пошукар проповедникија. Шај сине те дикха сар о Јехова поможинела аменге ки служба хем сар грижинела пе башо амаре материјална потребе. Освен адава, сиклилем те манга е манушен таро француско дело, ленгири чхиб, хем ленгири култура, а адава поможинѓа аменге те манга о јавера да културе (2. Кор. 6:13).

Изненадено, тари подружница пучле амен дали шај те селина амен ки диз Тракади, која со аракхљола источно таро брего Нов Брансвик. На сине аменге локхо те прифатина соске само со потпишинѓем јекх договор башо јекх стани. А исто аѓаар сине ман договор те почминав те керав скратено време бути ки јекх школа. Освен адава, несаве  таро амаре интересентија само со уле објавителија хем ко адава периоди градинаја сине неви дворана.

Цело викенд молинѓем амен башо адава хем гелем те дикха о Тракади хем дикхлем кај бут разликујнела пе таро Римуски. Ама вакерѓем аменге ако о Јехова мангела те ова адари, ка џа. Испитинѓем е Јехова хем дикхлем сар ов цидела секоја пречка (Мал. 3:10). Адалеске со и Ренди сине паше е Јеховаја, сине самопожртвувано хем сине ла смисла башо хумор на сине аменге пхаро те селина амен.

Ко амаро нево собрание сине само јекх старешина о Роберт Рос. Ов хем лескири ромни и Линда, сине пионерија а откеда бијандило ленге о прво чхаво ола одлучинѓе те ачхон адатхе. Иако ваљани сине те грижинен пе пумаре чхавеске, ола сине гостопримлива хем ревна ки служба, а таро адава ме хем и Ренди сием сине бут охрабриме.

Откеда дуј берш служинѓем сар пионерија ко Тракади, палем случинѓа пе нешто изненадено — добинѓем покана те служина ки покраинско служба. Ефта берш служинѓем ко покраине коте со керела пе лафи ки англиско чхиб. А пало адава сием сине доделиме те служина ки јекх покраина ко Квебек коте со керела пе лафи ки француско чхиб. Амаро областно надгледнико ко Квебек, о Леонс Крепо, секогаш пофалинела ман сине башо мле говорија. Ама покасно секогаш пучела ман сине: „Со мислинеа, сар шај те говорија те овен панда попрактична?“ a Адава со сикавѓа манге лично интерес ко асавко начин поможинѓа манге мле говорија те овен попрактична, поконкретна хем полокхе хаљојбаске.

Ко 1978-то берш, ко јекх меѓународно конгрес ко Монтреал е темаја „И вера со побединела“ сине ман јекх задача со никогаш нане те бистрав ла. Поможинѓум ко оддел хајбаске. Очекујнаја сине те авен околу 80.000 мануша, а ваљани сине те делина и храна ко појавер начин таро адава со керела пе сине англедер. Са сине нево, и опрема, о мени хем о начин сар спреминела пе сине о хајбе. Сине амен околу 20 баре фрижидерија, кола со понекогаш на функциониринена сине. О диве англедер те почминел о конгрес, нашти сине те кхува ко стадиони џи ки екваш и рат соске адава диве сине несаво спортско настан. Те шај те кера сабалуко мора сине те тхара о фурне панда англедер те пхравѓол о диве! Сием сине уморна, ама бут сиклиљум тари вредност, тари зрелост хем тари смисла башо хумор со сине е пхрален кола со поможинѓе. Добором улем паше, со џи авдиве сием амала.  Сине амен бари чест те ова дело таро адава историско конгрес ко Квебек, тхан коте со машкар ко 1940-то џи ко 1960-то сине баре прогонствија!

Ко амаре баре конгресија ко Монтреал, сине ман прилика бут те сикљовав таро јавера пхраља кола со исто аѓаар служинена сине сар надгледникија. Јекх берш надгледнико е конгресескоро сине о Дејвид Сплејн, кова со акана служинела ко Водечко тело. Ко јекх таро наредна конгресија, адаја задача сине доделими манге хем о Дејвид спремно соработинѓа.

Ко 2011 берш, откеда уживинѓем 36 берша ки покраинско служба, сиум сине викимо те служинав сар инструктори ки школа башо Собраниска старешине. Дује бершенге ме хем и Ренди суќем ко 75 различна креветија, ама врединела сине секоја жртва со керѓем ла. Ко крајо таро секова курко, о старешине сине бут благодарна соске дикхле кобор бут грижинела пе сине о Водечко тело баши ленгири духовност.

Покасно, уљум инструктори ки Школа башо полновремена објавителија. О ученикија бут пути осетинена пе сине уморна хем дарана сине дали ка ресен те керен пумаре задаче адалеске со сине лен пхердо распоред. Ваљани сине те бешен ки училница ефта саатија ко диве, ваљани сине исто околу трин саатија секова диве те спреминен пе башо тајсутно диве хем сине лен штар или панџ задаче кола со мора сине те спреминен секова курко. Ме хем о јавер инструктори вакераја ленге сине кај ка нашти те успејнен ако на родена помош таро Јехова. Никогаш нане те бистрав кобор сине изненадиме о ученикија кеда халиле кај адава со родинѓе е Јехова, поможинѓа лен те успејнен повише те керен него со мислинѓе песке.

Адава со ми дај сикавѓа лично интерес е јаверенге поттикнинѓа е интересентен те напредујнен чак поможинѓа ме дадеске те менинел пло стави башо чачипе. Трин диве откеда ми дај мули бут изненадинѓем амен кеда дикхлем амаре даде кај ало ко состанок те шунел јекх говор хем ов продолжинѓа о следна 26 берш те авел ко состанокија. Иако мо дад никогаш на крстинѓа пе, о старешине вакерѓе манге кај ов секова курко сине о прво со авела сине ко состанокија.

Ми дај сине бут шукар пример манге хем мле трине пхењенге. Ола заедно пумаре роменцар верно служинена е Јеховаске. Дуј лендар служинена ко Бетел — јекх тани ки Португалија а јекх ко Хаити.

Ме хем и Ренди акана служинаја сар специјална пионерија ко Хамилтон (Онтарио). Џикоте служинаја сине ки покраинско служба, уживинаја сине те џа е јаверенцар ко ленгере повторна посете хем ко библиска курсија. Ама акана радујнаја амен кеда дикхаја сар амаре интересентија духовно напредујнена. А сар оваја попаше е пхраленцар хем е пхењенцар таро амаро нево собрание, панда повише сием охрабриме кеда дикхаја сар о Јехова поможинела лен хем ко шукар хем ко лошно.

Кеда ка размислина башо време со накхља, бут ценинаја адава со о јавера сикавѓе аменге лично интерес. Адава поттикнинѓа амен да те сикава интерес е јаверенге, аѓаар со охрабринаја лен сине те служинен е Јеховаске најшукар со шај (2. Кор. 7:6, 7). На пример, ки јекх фамилија, и ромни, о чхаво хем и чхај сине ки полновремено служба. Адалеске пучљум е роме, дали некогаш размислинѓа ов да те служинел сар пионери. Ов одговоринѓа манге кај ов више поддржинела трине пионерен. Тегани пучљум ле: „Мислинеа ли кај ту шај пошукар те поддржине лен таро Јехова?“ Поттикнинѓум ле те осетинел и радост која со лескири фамилија осетинела ла. Пало шов масек ов да почминѓа е општо пионерско службаја.

Ме хем и Ренди ка продолжина те вакера „е следно генерацијаке“ башо е Јеховаскере „чудесна буќа“, хем надинаја амен кај ола да ка уживинен ки служба добором кобор со уживинѓем амен (Пс. 71:17, 18).