О АРХЕОЛОЗИЈА ко пурано Вавилон аракхле бут пеке цигле кола со користинена пе сине те градинел пе и диз. Спрема о археолого Роберт Колдевеј, асавке цигле керена пе сине ко печке со сине „аври тари диз“, коте со и глина сине шукар хем коте со сине бут грмушке тхарибаске јаг.

О археолозија аракхле доказија со сикавена кај о вавилонска службеникија користинена сине адала печке те керен страшна буќа. О Пол-Ален Болиу кова сој професори баши асирско историја хем чхиб ко универзитети ко Торонто (Канада) вакерела: „Некобор вавилонска документија сикавена кај о цари нарединѓа окола со нане леске послушна хем на поштујнена о света буќа те овен фрдиме ки печка хем те овен тхарде“. На пример, ко јекх документи таро време кеда сине цари о Навуходоносор пишинела: „Уништин лен, тхар лен, пек лен... ки печка... нека тхабљон ки јаг хем нека уштел баро облако таро чуро“.

Акава опишинела о настанија сој пишиме ки Библија ко лил Даниел 3 поглавје. Спрема адава историско извештај, о цари о Навуходоносор керѓа јекх баро златно кипи ки долина Дура која со сине авријал тари диз Вавилон. Кеда о трин терне Евреија — о Седрах, о Мисах хем о Авденаго — одбинѓе те поклонинен пе англо кипи, о Навуходоносор хољанѓа хем нарединѓа те таќарен и печка „ефта пути посилно“ таро со сине нормално хем о трин Евреија те овен фрдиме „ки печка коте со тхабљола бари јаг“. Ама јекх моќно ангели спасинѓа лен таро мерибе (Дан. 3:1-6, 19-28).

О цигле со сине аракхле ко Вавилон исто аѓаар потврдинена кај и Библија тани точно. Ко бут цигле иси лафија коленцар со славинела пе е царе. Ки јекх лендар пишинела: „О Навуходоносор, о Цари таро Вавилон... И Палата, која со ме о баро цари градинѓум ла... Мле потомција нека владинен ки лате засекогаш“. Акава тексти тано бут слично е лафенцар сој пишиме ко Даниел 4:30, коте со о Навуходоносор фалинела пе: „Нане ли акава о баро Вавилон кова со ме градинѓум ле ме силаја, те овел манге царско палата хем те сикавел кобор баро сиум ме?“