АМЕН сием увериме кај о Јехова водинела пле слуген ко акала „последна диве“ хем дела лен са со ваљани ленге ко духовно поглед (2. Тим. 3:1). Џанѓола пе, таро секова јекх амендар аџикерела пе те ова послушна ко лескоро водство. Џикоте сине ки пустина, о Израелција мора сине те овен послушна хем те керен нешто кеда ка шунен о звуко е трубенгоро. Ки несави смисла, амари да ситуација тани слично сар ленгири.

О Јехова заповединѓа е Мојсееске те керел дуј трубе таро ковимо сребро те шај те кхедел е народо хем те објавинел кај ваљани те циден (4. Мој. 10:2). О свештеникија ваљани сине те пхуден ко трубе ко различно начинија те шај о Израелција те џанен со ваљани те керен (4. Мој. 10:3-8). Авдиве е Јеховаскоро народо добинела упатствија ко повише начинија, ама ки акаја статија ка дикха само трин. Е Девлескере слуге шунена о звуко е трубенгоро ки симболично смисла кеда тане каниме ко баре конгресија, кеда о именујме надгледникија тане каниме те добинен обука хем кеда ваљани те применинен пе несаве организациска упатствија хем те керен пе промене ко собранија.

Кеда о Јехова мангља о „цело народо“ те кхедел пе ко влези таро свето шатори, ки источно страна, о свештеникија пхудена сине ко солдуј трубе (4. Мој. 10:3). Са о племија, кола со сине околу о свето шатори ко штар групе, шунена сине о звуко таро трубе. Окола со сине паше веројатно шај сине те овен адатхе посигате. О јавера со сине подур шај ваљани сине ленге повише време. Бизи разлика сар сине, о Јехова мангља сарине те кхеден пе те шај те шунен лескере упатствија хем те овел лен корист.

Авдиве нане свето шатори коте со ваљани те кхеда амен, ама организиринена пе побаре конгресија коленде со е Девлескоро народо тано канимо. Ко адала конгресија тане вклучиме о регионална конгресија хем јавера посебна настанија, коте со добинаја бут важна поуке хем упатствија. Ко разна пхувја, са е Јеховаскере слуге шунена и исто програма. Ко асавко начин, сарине со прифатинена и покана тане бахтале сој тане кхедиме заедно е Девлескере бахтале народоја. Несаве мора те патујнен подур. Сепак, окола сој тане присутна ко акала настанија свесна тане кај врединела о труд со дена.

Шај ли акала настанија те користинен изолириме групенге? Адалеске со иси современо технологија, буте џенен лендар шај те овел лен корист тари исто програма, па чак те осетинен кај тане дело таро адала конгресија. На пример, кеда јекх претставнико таро главно седиште посетинѓа о Бенин, и подружница пренесинѓа и програма џи ко Арлит (Нигер), рударско диз ки пустина Сахара.  И програма дикхле панџ пхраља хем пхења, хем 16 интересентија. Иако сине дур таро тхан коте со сине о конгрес, ола осетинѓе пе сар јекх сариненцар со сине ко адава настан, коленгоро вкупно број сине 44.131. Јекх пхрал пишинѓа: „Таро вило мангаја те вакера туменге овен састе бут со пренесинѓен и програма. Адава панда јекх пути сикавѓа аменге кобор бут мангена амен“.

Кеда о свештеникија ко Израел ка пхуден сине само ки јекх труба, англо свето шатори ваљани сине те кхеден пе само о „поглаварија сој чхивде упро некобор милја мануша“ (4. Мој. 10:4). Адари о Мојсеј шај сине те дел лен о потребна советија хем упатствија. Адава поможинѓа ленге те грижинен пе башо одговорностија. Те ове сине јекх таро адала поглаварија, нане ли сине те кере са те шај те ове адари хем те овел тут корист таро адала упатствија?

Авдиве, о старешине нане „поглаварија“ а ни на господаринена упро стадо кова сој ленге дендо таро Девел (1. Пет. 5:1-3). Ама, сигурно дена пестар са те шај те грижинен пе е пхраленге хем е пхењенге. Адалеске, спремно прифатинена и покана те добинен повише обука, на пример, ки Школа башо именујме пхраља. Џикоте трајнела и програма, о старешине тане обучиме те керен пумаре собраниска задаче панда пошукар. Адава поможинела ленге ко духовно поглед, ама исто аѓаар сариненге ко собрание. Чак ако на сиан сине ки несави таро акала школе, најверојатно сине тут корист тари обука со добинѓе ла о пхраља со сине адари.

Понекогаш о свештеникија ко Израел ваљани сине те пхуден ки труба аѓаар со ка шунѓол сине звуко со менинела пе. Акава сине знако кај о Јехова мангела цело логори те преместинел пе ко јавер тхан (4. Мој. 10:5, 6). Иако акава керела пе сине ко бут организиримо начин, саринендар родела пе сине посебно трудо. Понекогаш несаве Израелцонге на сине баш са јекх. Соске?

Несаве шај мислинена сине кај о звуко башо преселибе тано бут често хем изненадено. И Библија вакерела: „Понекогаш о облако ачхола сине тари рат џи ко сабај“. Ама, понекогаш цидена сине пало „дуј диве, јекх масек, или повише време“ (4. Мој. 9:21, 22). Уствари, кобор пути мора сине те преместинел пе о логори? Ки 4. Мојсеева, 33 поглавје, тане спомниме околу 40 тхана коленде со о Израелција ачхиле.

Ко несаве случаија о Израелција ачховена сине ко тхана коте со сине сенке. Акава сигурно сине ленге бут шукар, соске ола патујнена сине преку јекх „бари хем страшно пустина“ (5. Мој. 1:19). Адалеске, несаве шај сине ко искушение те мислинен кај о нево тхан ка овел полошно.

Кеда о логори цидела сине ко друмо, несавенге шај сине пхаро стрпливо те аџикерен те авел ленгоро редо те циден. Иако шунена сине о звуко со менинела пе, нашти сине сарине те циден ко исто моменти. Адава звуко сине знако кај ваљани те циден о племија Јуда, Исахар хем Завулон кола со сине тари источно страна (4. Мој. 2:3-7; 10:5, 6). Откеда ка циден сине, о свештеникија пхудена сине дујто пути те шај те ден знако те циден о племија со сине тари јужно страна. О свештеникија пхудена сине ки труба панда дуј пути, са џикоте цело логори на цидела сине ко друмо.

Шај туке да на сине са јекх кеда сине керди несави организациско промена. Или, шај мислинѓан кај иси бут изненадена промене. Шај свиџинѓа пе туке о начин сар керена пе сине англедер несаве буќа хем на мангеа те менинен пе. Бизи разлика сави сине и причина, шај сине испитими тли стрпливост, хем шај ваљанѓа туке време те прилагодине тут ки промена. Ако трудинаја амен те кера адава со аџикерела пе амендар, веројатно ка хаљова кај адава тано башо амаро шукарипе хем о Јехова ка дел берекети башо асавко стави.

Ко е Мојсеескоро време, о Јехова водинѓа некобор милиоња муршен, џувлен хем чхавен преку и пустина. Бизи лескири грижа хем водство, ола нане сине те преживинен. Авдиве, амен преживинаја ко духовно поглед адалеске со водинела амен о Јехова. Ов поможинела амен те ова леа панда попаше хем те овел амен зорали вера. Адалеске, сарине те ова одлучна те да са амендар те ова послушна исто сар о верна Израелција кола со спремно шунѓе о звуко е трубенгоро!