Ко акала стихија тане спомниме ења христијанска особине: „О особине со авена таро свети дух тане: мангипе, радост, мир, стрпливост, љубезност, шукарипе, вера, те на хољанел пе сигате хем самоконтрола“. Ама, на ваљани те мислина кај акала тане о единствена шуже особине со е Девлескоро духо шај те поможинел аменге те развина лен.

Приметин со пишинѓа о апостол Павле ко англуне некобор стихија: „О постапке е грешно телоскере тане... блуд, мелалипе, безобразно понашибе, идолопоклонство, спиритизам, душманлуко, акошиба, љубомора, холи, сериозна несогласувања, поделбе, секте, завист, претерано пијбе, распуштена забаве хем јавера слична буќа“ (Гал. 5:19-21). О Павле шај сине те спомнинел јавера да „постапке е грешно телоскере“, сар окола сој спомниме ко Колошаните 3:5. Ко слично начин, откеда спомнинѓа ења особине со авена таро духо, ов вакерѓа: „Нане закони против асавке буќа“ (Гал. 5:23). Значи, е Павле на сине ле намера те спомнинел са о шуже особине кола со о свети дух шај те поможинел амен те развина лен хем те сикава лен.

Акава шај те дикхел пе исто аѓаар таро лескоро писмо џи ко собрание ко Ефес, коте со пишинѓа: „Тари светлина авела секова шукарипе, праведност хем чачипе“ (Еф. 5:8, 9). Иако и праведност хем о чачипе нане спомниме сар особине со авена таро свети дух, ола тане спомниме сар особине со авена тари светлина заедно е шукарипаја. А о шукарипе тано особина со авела таро свети дух. Акава сикавела кај о свети дух шај исто аѓаар те керел ки аменде праведност хем чачипе.

Ко слично начин, о Павле поттикнинѓа е Тимотее те трудинел пе те развинел „праведност, верност спрема о Девел, вера, мангипе, истрајност, хем те на хољанел сигате“ — шов шуже особине (1. Тим. 6:11). Само трин лендар (и вера, о мангипе хем те на хољанел пе сигате) тане спомниме сар особине со авена таро духо. Ама, џанѓола пе, е Тимотееске ваљани сине свети дух те развинел о јавера да особине со спомнинѓа о Павле: праведност, верност спрема о Девел хем истрајност. (Споредин Колошаните 3:12; 2. Петрово 1:5-7.)

Ко крајо, шај те вакера кај ко Галатите 5:22, 23 нане спомнимо цело списако особиненцар со ваљани те овен е христијанен. Точно, е Девлескоро духо шај те поможинел аменге те развина хем те сикава о ења особине сој спомниме сар особине со авена таро свети дух. Ама, ваљани те развина јавера да особине ако мангаја те ова зрела христијања хем те урава и „неви личност која сој керди спрема е Девлескири волја ки чачутни праведност хем верност“ (Еф. 4:24).