БЕРШЕНЦАР о Израелција дена сине паре те шај те поддржинен о чачутно обожавибе. Ама, е Исусеске ко време о Евреија мора сине те платинен бут данокија кола со керѓе ленгоро живото те овел попхаро.

Те шај те поддржинел пе о свето шатори а покасно о храми, са о возрасна Евреија ваљани сине те платинен екваш сикел (дуј драхме). Ко прво веко, адава данок користинела пе сине те шај те ден пе жртве хем те одржинел пе о храми кова со градинѓа ле о Ирод. Несаве Евреија пучле е Петаре саво тано е Исусескоро стави баши акаја бути. Хари покасно о Исус вакерѓа е Петареске кај нане погрешно те платинел пе адава данок. Ов чак вакерѓа леске коте те аракхел адаја паричка колаја со ка платинел адава данок (Мат. 17:24-27).

Е Девлескоро народо мора сине исто аѓаар те платинел јавер да данок кова со викинела пе сине десеток (3. Мој. 27:30-32; 4. Мој. 18:26-28). Адава значинела сине кај мора те ден десеток таро са со ка кхеден сине таро пумаре ниве или тари пумари заработка. О религиозна водачија претеринена сине кеда родена сине таро народо те платинел десеток башо растенија, па чак башо ситна чајра, сар со сине о „нане, копар хем ким“. О Исус на вакерѓа кај сине погрешно те платинел пе десеток, ама вакерѓа кај о начин сар о книжникија хем о фарисеија применинена сине акава закони сине лицемерно (Мат. 23:23).

Ама, ко адава време о Евреија мора сине те платинен бут јавера да данокија е Римјаненге кола со владинена сине упри ленде. На пример, околен со сине лен пхув, мора сине те платинен о данок паренцар или производенцар. О мануша мора сине те платинен 20 џи ко 25 посто таро са о производија со добинена лен сине тари пхув. Исто аѓаар, секова Евреи ваљани сине те платинел данок баши песке лично. О фарисеија баш башо акава данок пучле е Исусе дали ваљани те платинел пе. Ов сикавѓа аменге сар ваљани те дикха ко платибе данок кеда вакерѓа: „Иранен е цезарескоро е цезареске, а е Девлескоро е Девлеске“ (Мат. 22:15-22).

Исто аѓаар, мора сине те платинел пе царина баши роба која со накхела сине тари несави област. Акава данок кхедела пе сине ко пристаништија, ко мостија, ко раскрснице, ко порте тари јекх диз или ко пазарија.

О данокија со ваљани сине те платинен о мануша е римско владаке сине бут пхаре. Спрема о римско историчари о Тацит, џикоте владинела сине о римско императори о Тибериј, ко е Исусескоро време, „и Сирија хем и Јудеја, молинена сине те платинен похари данок, соске сине ленге бут пхаро те платинен ле“.

Адава со керѓа попхаро те платинен пе акала данокија сине о начин сар кхедена пе сине. Адава со нудинела сине највише паре ки аукција добинела сине о право те кхедел данок. Ама, ов после лела сине јаверен те кхеден леске о данок хем секова лендар мангела сине те заработинел повише паре песке. Веројатно, е Закхеје сине ле асавке мануша кола со кхедена леске сине о данок (Лука 19:1, 2). Шај те хаљовел пе соске о мануша мрзинена сине околен со кхедена сине лендар данок.