1. Соске е Јеховаскере слуге понекогаш осетинена пе коркори?

ПОНЕКОГАШ сарине амен осетинаја амен коркори. Некастар акала чувствија накхена сигате. Ама, несаве осетинена пе повише време аѓаар. Понекогаш шај те осетина амен коркори чак кеда сием повише манушенцар. Шај некаске тано пхаро те аракхел песке амала ко нево собрание. Јавера кола сој паше бут пле фамилијаја, осетинена пе коркори кеда селинена пе дур лендар. Јаверенге бут фалинела те овен заедно пле мангленцар со муле. Несаве христијања, а посебно окола сој неве ко чачипе, осетинена пе коркори кеда тане отфрлиме или прогониме таро пле фамилие со на служинена е Јеховаске или таро амала со сине лен англедер.

2. Башо кола пучиба ка кера лафи?

² О Јехова џанела са баши аменде хем хаљовела амен. Кеда осетинаја амен коркори, о Јехова тано свесно башо адава хем мангела те поможинел аменге те икљова ко крајо асавке чувствонцар. Сар поможинела аменге о Јехова? Сар шај те поможина коркори аменге? Хем, сар шај те поможина е јаверенге ко амаро собрание со осетинена пе коркори? Те дикха о одговорија ко акала пучиба.

3. Сар о Јехова сикавѓа кај грижинела пе е Илијаске?

³ О Јехова искрено интересинела пе башо пле слугенгоро шукарипе. Ов тано паше секоле јекхеа амендар хем приметинела кеда сием тажна или кеда сием обесхрабриме  (Пс. 145:18, 19). Те дикха сар о Јехова грижинѓа пе пле пророкоске е Илијаске. Акава верно мануш живинѓа ко пхаро време тари израелско историја. Моќна мануша таро Израел кола со на мангле е Јехова, прогонинѓе лескере слуген хем посебно мангле те мударен е Илија (1. Цар. 19:1, 2). Исто аѓаар, о Илија мислинѓа кај тано единствено пророко со служинела е Јеховаске (1. Цар. 19:10). Хем, адава да шај керѓа ле те осетинел пе панда повише обесхрабримо. О Девел одма керѓа нешто те поможинел е Илијаске. О Јехова бичхалѓа јекхе ангеле те уверинел пле пророко кај ов нане коркори — сине панда јавера Израелција кола со верно служинена е Јеховаске (1. Цар. 19:5, 18).

4. Сар о стихија таро Марко 10:29, 30 сикавена кобор о Јехова грижинела пе адаленге со нашавѓе и поддршка тари пли фамилија или амала?

⁴ О Јехова џанела кај кеда биринаја те служина леске, несаве амендар ка ваљани те керен бут жртве. Јекх бути со нашаваја шај те овел и поддршка тари фамилија хем таро амала со на служинена е Јеховаске. Адалеске со шај сине секиримо, о апостол Петар пучља е Исусе: „Амен мукхлем са хем гелем пали туте. Со ка добина башо адава?“ (Мат. 19:27). О Исус љубезно уверинѓа пле ученикон кај ка добинен јекх бари духовно фамилија. (Читин Марко 10:29, 30.) Хем о Јехова, амаро небесно Дад, ветинела кај ка поможинел околенге со мангена те служинен леске (Пс. 9:10). Дикх несаве практична начинија сар шај те добине е Јеховаскири помош кеда осетинеа тут осамено.

5. Соске тано шукар те размислине башо адава сар о Јехова поможинела туке?

⁵ Размислин башо адава сар о Јехова поможинела туке (Пс. 55:22). Акава ка поможинел туке те овел тут исправно стави баши тли ситуација. И пхен Керол, * која со нане ко брако хем колакири фамилија нане ко чачипе, вакерела: „Кеда размислинава башо адава сар о Јехова поможинѓа манге те издржинав ко пхаро време, адава поможинела ман те дикхав кај на сиум коркори. Хем адава уверинела ман кај о Јехова секогаш ка поможинел манге“.

6. Сар шај о стихија таро 1. Петрово 5:9, 10 те охрабринен околен со осетинена пе коркори?

 ⁶ Размислин башо адава сар о Јехова поможинела е пхраленге хем е пхењенге со осетинена пе коркори. (Читин 1. Петрово 5:9, 10.) О Хироши, кова со бут берша сине коркори ко чачипе, вакерела: „Ко собрание, локхесте шај те дикхе кај секоле јекхе иси ле проблемија. Адава со џанаја кај сарине амен даја амаро најшукар те служина е Јеховаске, шај те охрабринел околен машкар аменде сој тане коркори ко чачипе“.

7. Сар поможинела туке и молитва?

⁷ Редовно молин тут, читин и Библија хем џа ко состанокија. Мора те вакере е Јеховаске точно сар осетинеа тут (1. Пет. 5:7). Те дикха о пример тари јекх терни пхен, и Масиел. Кеда одлучинѓа те служинел е Јеховаске, ој осетинѓа пе отфрлими тари пли фамилија. Ој вакерела: „Кеда осетинава ман сине коркори, јекх таро најважна буќа со поможинѓе манге сине те молинав ман е Јеховаске таро вило. Ов сине манге чаче Дад, хем секова диве молинава ман сине леске бут пути ко диве хем вакерава леске сине сар осетинава ман“.

8. Сар поможинела туке о читибе и Библија хем о размислибе?

⁸ Редовно читин е Девлескоро Лафи хем размислин башо конкретна извештаија со истакнинена е Јеховаскоро мангипе спрема туте. И Бјанка, јекх пхен која со трпинела сине негативна коментарија тари пли фамилија, објаснинела: „Бут поможинела манге адава кеда читинава хем кеда размислинава башо библиска извештаија или искуствија таро е Јеховаскере слуге колен со сине лен слично ситуација сар мли“. Несаве христијања памтинена стихија сој тане бут утешна, сар на пример Псалм 27:10 хем Исаија 41:10. О јавера шунена аудио снимке таро материјали проучибаске кеда спреминена пе башо состанокија или кеда читинена и Библија. Адава поможинела ленге те на осетинен пе добором осамена.

9. Сар поможинена туке о состанокија?

⁹ Трудин тут те џа редовно ко состанокија. И програма ка охрабринел тут хем исто аѓаар, пошукар ка запознајне е пхрален хем е пхењен (Евр. 10:24, 25). И Масиел, сој спомними поангле, вакерела: „Иако сиум сине бут лаџутни, сиум сине одлучно те џав ко секова состанок хем те коментиринав. Адава поможинѓа манге те овав паше е пхраленцар хем е пхењенцар ко собрание“.

10. Соске тано важно те ова амала е верна пхраленцар хем пхењенцар таро собрание?

¹⁰ Ов амал е верна пхраленцар хем пхењенцар. Ов амал е манушенцар таро собрание со шај те сикљове лендар. Ола шај  те овен потерне тутар или попхуре или те авен таро јавера културе. И Библија вакерела аменге кај и мудрост шај те аракхел пе машкар о попхуре (Јов 12:12). А о попхуре да шај те сикљон таро верна терне ко собрание. О Давид сине бут потерно таро Јонатан, ама адава на чхинавѓа лен те овен паше амала (1. Сам. 18:1). О Давид хем о Јонатан поможинѓе јекх јекхеске те служинен е Јеховаске ко бут пхаре ситуацие (1. Сам. 23:16-18). И Ирина, јекх пхен која сој тани коркори ко чачипе, вакерела: „Амаре пхраља хем пхења шај чаче те овен аменге амари духовно фамилија. О Јехова шај те користинел лен те поможинен аменге кеда аменге потребно“.

11. Со мора те кере те шај те овен тут шукар амала?

¹¹ Шај нане локхо те кере туке неве амала, посебно ако лаџаја. И Ратна, јекх пхен која со прифатинѓа о чачипе иако сине ла противибе, признајнела: „Мора сине те прифатинав адава кај ваљани манге помош хем поддршка тари мли духовно фамилија“. Шај те овел пхаро те вакере некаске сар осетинеа тут. Ама, ако кереа адава, тегани адаја личност ка овел туја паше. Тле амала мангена те охрабринен тут хем те поддржинен тут, ама ту ваљани те вакере ленге сар шај те керен адава.

12. Сар шај и служба те поможинел туке те овен тут шукар амала?

¹² Јекх таро најшукар начинија те кере туке амала тано те џа е пхраленцар хем е пхењенцар ки служба. И Керол, која сој спомними поангле, вакерела: „Керѓум манге бут шукар амала адалеа со накхљум време е пхењенцар ки служба хем ко теократска активностија. О Јехова са акала берша поможинѓа манге преку акала амала. Секогаш тано шукар кеда о верна пхраља хем пхења тане амаре амала“. О Јехова користинела асавке амален те охрабринел тут кеда сиан обесхрабримо, сар на пример кеда осетинеа тут коркори (Изр. 17:17).

13. Сави одговорност иси саринен ко собрание?

¹³ Саринен иси амен одговорност те кера о собрание тхан коте со иси мангипе хем мир хем коте со никој на осетинела пе отфрлимо (Јован 13:35). Адава со кераја хем со вакераја шај бут те охрабринел е јаверен! Јекх пхен вакерела: „Кеда дознајнѓум о чачипе, о собрание уло мли фамилија. Бизи ленгири поддршка нашти сине те овав е Јеховаскоро сведоко“. Со шај те кере те шај те поможине околенге сој тане коркори ко чачипе те осетинен пе кај тане дело таро собрание?

14. Со шај те кере те шај овеа амал е невенцар ко собрание?

¹⁴ Кер ту о прво чекори те ове амал адаленцар сој неве. Шај те почмина аѓаар со љубезно ка доџакера е невен ко собрание (Рим. 15:7). Ама, мангаја те кера нешто повише таро адава само те поздравина лен. Сар со накхела о време, мангаја те ова ленцар попаше амала. Адалеске, ов љубезно хем сикав кај чаче грижинеа тут е невенге. Трудин тут те хаљове саве проблемија иси лен бизо те пуче лен пучиба со ка чхивен лен ки незгодно ситуација. Несавенге шај тано пхаро те вакерен сар осетинена пе, адалеске ма терин лен те керен лафи башо адава. Наместо адава, поможин ленге те вакерен сар осетинена пе аѓаар со ка поставине ленге тактична пучиба хем стрпливо шун ленгоро одговор. На пример, шај те пуче лен сар запознајнѓе о чачипе.

15. Сар шај о зрела христијања те поможинен е јаверенге ко собрание?

¹⁵ Сарине ко собрание духовно ка напредујнен кеда о зрела христијања, а посебно  о старешине, ка сикавен ленге интерес. И Мелиса, која со сине воспитими ко чачипе тари пли дај, вакерела: „Бут сиум благодарно е пхраленге кола со сине сар мле дада, кола со накхле манцар време хем грижинѓе пе манге. Секогаш кеда сине ма потреба те керав лафи, сине некој со шај сине те шунел ман“. О Маурицио, јекх терно пхрал, осетинѓа пе тажно хем коркори кеда о пхрал со проучинела сине леа уло неактивно. Ов вакерела: „О старешине сикавѓе кај грижинена пе манге хем адава бут поможинѓа манге. Редовно керена сине манцар лафи. Ола џана сине манцар заедно ки служба, вакерена манге сине духовна мисле таро пло лично проучибе и Библија, хем дружинаја амен сине ко слободно време заедно“. И Мелиса хем о Маурицио почминѓе те служинен е Јеховаске ки полновремено служба.

16-17. Ко кола практична начинија шај те поможина е јаверенге?

¹⁶ Поможин ко практична начинија (Гал. 6:10). О Лео, кова со служинела сар мисионери ки јекх пхув дур тари пли фамилија, вакерела: „Често адава со ваљани туке тано јекх тикни љубезно постапка ко право време. Сетинава ман ко јекх диве кеда керѓум собраќајка мле врдаја. Кеда ресљум кхере, сиум сине бут вознемиримо. Ама, тегани јекх брачно пари канинѓа ма ки песте ко јекх хајбе. На сетинава ман точно со халем, ама сетинава ман кај ола љубезно шунѓе ман. Ко крајо осетинѓум ман бут пошукар!“

¹⁷ Амен уживинаја ко теократска настанија, сар сој о конгресија, адалеске со шај те дружина амен е јаверенцар хем те кера лафи баши програма. Сепак и Керол, која сој спомними поангле, вакерела: „Посебно осетинава ман коркори ко конгресија, иако околу манде иси бут пхраља хем пхења. Често ола бешена заедно пле фамилијаја, адалеске кеда дикхава лен осетинава ман осамено“. Е јаверенге пхаро тано те џан ко конгресија прво пути откеда муло ленгоро брачно партнери. Дали џанеа некас со иси ле асавке предизвикија? Соске на канинеа ле кеда иси несаво теократско настан те бешел заедно тле фамилијаја?

18. Сар шај те применина о стихија таро 2. Коринќаните 6:11-13 кеда сикаваја гостопримливост?

¹⁸ Накхавен заедно време. Трудин тут те накхаве време различно пхраленцар хем пхењенцар, а посебно околенцар со осетинена  пе коркори. Амен мангаја те „ширина амаре виле“ посебно спрема ленде. (Читин 2. Коринќаните 6:11-13.) И Мелиса, која сој спомними поангле, сетинела пе: „Секогаш сием сине бут бахтале кеда о пхраља хем о пхења канинена амен сине те дружина амен заедно ленцар кхере ки ленде или негде заедно те патујна“. Дали иси некој ко тло собрание со шај те сикаве леске гостопримливост?

19. Ко кола ситуацие шај посебно ка ваљани те накхава време амаре пхраленцар хем пхењенцар?

¹⁹ Ко несаве ситуацие амаре пхраља хем пхења посебно ка ценинен ако накхаваја време ленцар. Кеда славинена пе празникија тари ховавни религија, несавенге шај пхаро тано со нашти те овен пумаре фамилиенцар. Јаверенге шај тано пхаро ко несаве посебна диве таро берш, сар на пример, о диве кеда муло некој кас со мангле. Ако нудинаја асавке пхраленге хем пхењенге те накхава ленцар време, амен сикаваја кај чаче грижинаја амен ленге (Фил. 2:20).

20. Сар шај е Исусескере лафија таро Матеј 12:48-50 те поможинен аменге кеда осетинаја амен коркори?

²⁰ Иси бут причине соске јекх христијани понекогаш шај те осетинел пе коркори. Ама, на ваљани никогаш те бистра кај о Јехова тано свесно башо асавке чувствија. Ов често користинела амаре пхрален хем пхењен те шај те грижинел пе аменге. (Читин Матеј 12:48-50.) Амен сикаваја кај сием благодарна башо собрание кеда трудинаја амен те поможина амаре пхраленге хем пхењенге. Бизи разлика сар понекогаш осетинаја амен, никогаш на сием коркори соске о Јехова секогаш тано аменцар!