1. Соске тано о Сатана сар ловџија?

Е ЛОВЏИЈА иси ле јекх цел — те астарел или те мударел несаве животно. Те шај те керел адава, ов користинела разна замке или стапице, сар адала со спомнинѓе е Јовескере ховавне утешителија (Јов 18:8-10). Со керела јекх ловџија те шај те астарел јекхе животно? Ов внимателно дикхела е животно. Коте џала? Со мангела? Која тани и најшукар стапице те астарел ле? О Сатана тано сар адава ловџија. Ов внимателно дикхела амен, коте џаја хем со интересинела амен. Пало адава, ов биринела стапица колаја со мислинела кај ка астарел амен кеда најхари очекујнаја. Ама, и Библија вакерела аменге кај чак ако астардилем ки замка, сепак шај те наша латар. Исто аѓаар, сикавела амен сар шај те избегина са адала замке.

2. Кола тане дуј таро најуспешна стапице со користинела о Сатана?

² Дуј таро е Сатанаскере најуспешна замке тане и гордост хем и алчност. * Повише милја берша о Сатана успешно користинела акала стапице. Ов тано сар окола со астарена чириклен, аѓаар со астарена лен ки стапица или заробинена лен ки мрежа (Пс. 91:3). Ама, амен не мора те ова астарде таро Сатана. Соске? Адалеске со о Јехова сикавела аменге саве тактике користинела о Сатана те шај те астарел е манушен (2. Кор. 2:11).

3. Соске о Јехова мукхља ки Библија те овен пишиме примерија таро мануша со уле горда хем алчна?

³ Јекх начин сар о Јехова предупрединела амен баши гордост хем алчност тано аѓаар со поттикнинела амен те сикљова  таро грешке со керѓе несаве таро лескере слуге. Ка дикха сар о Сатана успејнѓа те астарел ки замка чак несавен со служинѓе е Јеховаске бут време. Дали адава значинела кај нашти те наша тари гордост хем алчност? На. О Јехова мукхља те овен пишиме ки Библија акала примерија сар „предупредување аменге“ (1. Кор. 10:11). Ов џанела кај амен шај те сикљова таро предупредувачка примерија сар те избегина или те наша таро е Бенгескере замке.

4. Со шај те случинел пе аменге ако сием горда?

⁴ О Сатана мангела те ова горда. Ов џанела кај ако дозволинаја аменге те ова горда, ка ова сар лесте хем ка нашава и можност те добина о вечно живото (Изр. 16:18). Адалеске о апостол Павле предупрединѓа кај некој шај те овел превише гордо хем те добинел и исто осуда сар о Бенг (1. Тим. 3:6, 7). Адава шај те случинел пе секаске амендар, бизи разлика дали сием неве ко чачипе или служинаја е Јеховаске бут берша.

5. Спрема Проповедник 7:16, 20, сар некој шај те сикавел гордост?

⁵ О горда мануша тане себична. О Сатана пробинела те керел амен себична аѓаар со повише ка концентририна амен ки аменде, наместо ко Јехова, посебно кеда иси амен проблемија. На пример, дали некогаш некој кривинѓа тут башо нешто со на керѓан? Или, дали некој постапинѓа туја неправедно? О Сатана мангела те хољане е Јеховаске или те пхраленге. Хем ов мангела те мислине кај о проблеми шај те решине ле само ако кереа о буќа ко тло начин, наместо те шуне о водство со дела тут о Јехова ко пло Лафи. (Читин Проповедник 7:16, 20.)

6. Со шај те сикљова таро искуство е пхењакоро тари Холандија?

⁶ Те дикха о пример јекхе пхењакоро тари Холандија, која со бут нервиринела пе сине башо е јаверенгере слабостија. Адалеске више на мангља те накхавел време адале манушенцар. Ој вакерѓа: „Осетинава ман сине коркори хем нашти сине те менинав мло стави спрема акала пхраља хем пхења.  Адалеске, вакерѓум ме ромеске те селина амен ко јавер собрание“. Тегани дикхља и програма таро JW Broadcasting^® башо март 2016 берш. Ки адаја програма сине несаве предлогија башо адава сар те дикха ко е јаверенгере слабостија. Ој акана вакерела: „Халиљум кај, наместо те трудинав ман те менинав е пхрален хем е пхењен таро собрание, ваљани ме те овав искрено хем понизно хем те размислинав башо мле грешке. И програма поможинѓа манге те концентриринав ман ко Јехова хем ко адава кај ле иси ле право те вакерел аменге со те кера“. Со сикљоваја таро акава? Кеда иси тут проблемија, понадари да размислин башо Јехова. Молин тут те поможинел туке те дикхе ко јавера аѓаар сар ов со дикхела. Тло небесно Дад дикхела ленгере слабостија, сепак спремно простинела ленге. Ов мангела ту да те кере аѓаар (1. Јов. 4:20).

7. Со случинѓа пе е цареске е Озијаске?

⁷ Адалеске со о цари о Озија тари Јуда уло гордо, на шунѓа о совет таро јавера хем керѓа нешто со на сине ле право ов те керел. О Озија сине бут успешно мануш. Побединѓа ко бут војне, градинѓа бут дизја хем сине ле бут фарме. И Библија вакерела: „О чачутно Девел поможинела леске сине“ (2. Лет. 26:3-7, 10). Ама, и Библија исто аѓаар вакерела: „Кеда уло силно, лескоро вило добором уло гордо со коркори песке керѓа лошнипе“. О Јехова англедер заповединѓа кај само е свештениконге сине дозволимо те тхарен темјани ко храми. Ама, о цари о Озија постапинѓа дрско аѓаар со ов кхувѓа ко храми те тхарел темјани. Е Јеховаске на свиџинѓа пе со керѓа адава гордо мануш хем адалеске казнинѓа ле лепраја. Е Озија сине ле лепра џи ко крајо таро пло живото (2. Лет. 26:16-21).

8. Спрема 1. Коринќаните 4:6, 7, со ка поможинел аменге те на ова горда?

⁸ Шај ли амен да те ова горда хем те пера ки стапица сар о Озија? Те дикха о пример е Хосескоро. Ов сине бут успешно бизнисмени кова со служинела сине сар старешина хем сине бут поштујмо ко собрание. Икерела сине говорија ко конгресија хем о покраинска нагледникија пучена ле сине башо совет. Ов признајнѓа: „Сине ман доверба ко мле способностија хем ко мло искуство, а на ко Јехова. Мислинѓум кај сиум зорало, адалеске на шунѓум е Јеховаскере предупредувања хем о совет“. О Хосе керѓа сериозно  грево хем сине исклучимо. Пало некобор берш сине палем ирамо. Ов акана вакерела: „О Јехова сикавѓа ман, кај и најважно бути тани те кера адава со родела амендар ов, а на те овел амен несави положба“. Никогаш ма те бистра кај секоја способност со иси амен хем секоја задача со добинаја ла ко собрание авела таро Јехова. (Читин 1. Коринќаните 4:6, 7.) Ако сием горда, о Јехова нане те користинел амен.

9. Со чхивѓа и алчност е Сатана хем е Ева те керен?

⁹ Кеда мислинаја ки алчност, шај прво со авела аменге ки годи тано о Сатана о Бенг. Сар јекх таро е Јеховаскере ангелија, е Сатана сигурно сине ле бут шуже одговорностија. Ама, ов мангља повише. Ов мангела сине нешто со припадинела само е Јеховаске — те обожавинен ле. О Сатана мангела те ова сар лесте. Адалеске пробинела те керел те на ова задоволна адалеа со иси амен. Акава прво пути пробинѓа те керел кеда керѓа лафи е Еваја. О Јехова мангипаја грижинѓа пе е Ева хем лакере роме те овел лен изобилство тари вкусно храна аѓаар со дозволинѓа ленге „те хан таро секова каш ки градина“, освен таро јекх каш (1. Мој. 2:16). Сепак, о Сатана чхивѓа е Ева те мислинел кај ој ваљани те хал баш таро адава каш кова со сине забранимо. И Ева на сине задоволно адалеа со иси ла. Ој мангља те овел ла повише. Амен џанаја џи ко со анѓа адава. И Ева грешинѓа хем ко крајо мули (1. Мој. 3:6, 19).

10. Сар и алчност ули замка е цареске е Давидеске?

¹⁰ Адалеске со о цари о Давид уло алчно, ов бистерѓа адава со денѓа ле о Јехова, сар сој о барвалипе, о углед хем и победа упро бут душмања. Иако о Давид сине свесно кај е Девлескере поклонија сине бут повише него со шај те гејнел лен, сепак ко јекх моменти ов бистерѓа со денѓа ле о Јехова (Пс. 40:5). Више на сине задоволно адалеа со иси ле. Ов мангља повише. Иако е Давиде сине ле некобор ромња, ов почминѓа те мангел те овел јекхе џувљаја која со више сине ко брако јавереа, нешто со о Јехова вакерѓа кај тано погрешно. Адаја џувли сине и Витсавеа, а лакоро ром сине о Урија о Хетејцо. О Давид постапинѓа себично аѓаар со сине ле сексуална односија е Витсавеаја хем ој ачхили кхамни. Адава со керѓа о Давид сине бут лошно, ама пало адава ов керѓа нешто со сине панда полошно. Ов керѓа те  овел мудардо о Урија! (2. Сам. 11:2-15). Со мислинѓа песке о Давид? Дали мислинѓа кај о Јехова на дикхља адава? Иако о Давид служинѓа е Јеховаске бут време, ов уло алчно хем адава анѓа леске бут муке. Пало адава, о Давид признајнѓа пло грево хем каинѓа пе. Сине бут благодарно со о Јехова простинѓа леске! (2. Сам. 12:7-13).

11. Спрема Ефешаните 5:3, 4, со ка поможинел аменге те борина амен против и алчност?

¹¹ Со сикљоваја таро е Давидескоро пример? Сикљоваја кај шај те борина амен против и алчност ако ачховаја благодарна е Јеховаске башо са со денѓа амен. (Читин Ефешаните 5:3, 4.) Амен мора те ова задоволна адалеа со иси амен. Кеда почминаја те проучина и Библија е манушенцар, амен шај сикаваја лен те размислинен баши јекх шукар бути со о Јехова денѓа лен хем те овен леске благодарна. Ако некој керела адава секова диве ко курко, адава значинела кај ов молинѓа пе башо ефта различна буќа (1. Сол. 5:18). Дали ту да кереа аѓаар? Ако размислинеа башо са адава со керѓа туке о Јехова, адава ка поможинел туке те ове благодарно. Хем ако сиан благодарно, ка ове задоволно адалеа со иси тут. А кеда сиан задоволно, нане те ове алчно.

12. Со керѓа о Јуда адалеске со уло алчно?

¹² Адалеске со о Јуда Искариот уло алчно, ов керѓа нешто бут лошно хем издајнѓа е Исусе. Ама, о Јуда на сине секогаш лошно мануш (Лука 6:13, 16). О Исус биринѓа ле те овел апостоли. Е Исусе сине ле доверба ки лесте, адалеске чхивѓа ле те овел одговорно баши кутија е паренцар. О Исус хем о апостолија користинена сине адала паре те шај те учхарен пумаре трошакија ки служба. Адава сине сар о доброволна прилогија со авдиве дена пе баши активност со керела пе ко цело свето. Ама пало несаво време, о Јуда почминѓа те чорел, иако бут пути шунѓа е Исусескере предупредувања баши алчност (Мар. 7:22, 23; Лука 11:39; 12:15). О Јуда игнориринѓа адала предупредувања.

13. Кеда о Јуда сикавѓа кај уло алчно?

¹³ О Јуда сикавѓа кај тано алчно ки јекх ситуација кратко англедер о Исус те овел мудардо. О Исус хем лескере ученикија, а исто аѓаар и Марија хем лакири пхен и Марта, сине гостија ко Симон со сине ле лепра. Џикоте хана сине маро, и Марија уштили хем чхорѓа упро е Исусескоро шеро мирисливо масло кова со коштинела сине бут паре. О Јуда хем о јавера ученикија хољанѓе. О јавера ученикија шај мислинѓе песке кај адала паре ка овел сине пошукар те користинен пе ки служба. Ама, е Јуда сине ле јавер мотиви. Ов сине чор хем мангела сине те чорел паре тари кутија. Хем адалеске со о Јуда уло алчно, ов издајнѓа е Исусе добором паренге кобор со кинела пе сине јекх робо (Јован 12:2-6; Мат. 26:6-16; Лука 22:3-6).

14. Сар јекх брачно пари применинѓа о совет таро Лука 16:13?

¹⁴ О Исус сетинкерѓа пле следбеникон ко акава основно чачипе: „Нашти те служинен хем е Девлеске хем е барвалипаске“. (Читин Лука 16:13.) Акава важинела авдиве да. Те дикха сар јекх брачно пари тари Романија применинѓе е Исусескере лафија. Ола добинѓе понуда привремено те керен бути ки јекх побарвали пхув. Ола признајнена: „Сине амен баро кредити ки банка, хем прво мислинѓем кај акаја бути тани берекети таро Јехова“. Ама, адава сине замка. Ако прифатинена сине акаја бути, ка овел лен сине похари време те служинен е Јеховаске. Откеда читинѓе и статија „Ачхов верно цело вилеа“ ки Стражарско кула таро 15 август 2008 берш, *  ола анѓе одлука. Ола вакерена: „Ако селинаја амен сине ки јавер пхув те заработина повише паре, ка овел сине пхаро те служина е Јеховаске хем амаро амалипе леа нане сине те овел аменге и најважно бути ко амаро живото. Сием сине сигурна кај ка нашава амари духовност“. Адалеске, ола одбинѓе и понуда. Со случинѓа пе пало адава? О ром аракхља бути ки пумари пхув колаја со шај сине те учхарен о трошакија. И ромни вакерела: „О Јехова секогаш поможинела пле слуген“. Акава брачно пари тано бахтало со е Јехова керѓа пло Господари, а на о барвалипе.

15. Соске шај те ова сигурна кај шај те наша таро е Сатанаскере замке?

¹⁵ Со ваљани те кера ако приметинаја кај улем горда или алчна? Шај те променина амен. О Павле вакерѓа кај адала со о Бенг „астарѓа лен џивде“ ки замка шај те нашен латар (2. Тим. 2:26). Аѓаар керѓа о Давид. Ов шунѓа е Натанескоро совет, каинѓа пе со уло алчно хем палем уло амал е Јеховаја. Никогаш ма те бистра кај о Јехова тано посилно таро Сатана. Адалеске, ако прифатинаја е Јеховаскири помош, шај те наша тари секоја замка или стапица со поставинѓа ла о Бенг.

16. Со ка поможинел аменге те на пера ко е Сатанаскере замке?

¹⁶ Џанѓола пе, најшукар тано никогаш те на пера ко е Сатанаскере замке — те ова горда или алчна. Ко адава шај успејнаја само ако поможинела аменге о Девел. Ама, на ваљани те мислина кај амен сием добором бут силна хем кај адалеске никогаш нане те ова горда или алчна. Чак окола со служинѓе бут време е Јеховаске сепак уле горда или алчна. Адалеске, молин е Јехова секова диве те поможинел туке те преиспитине тле мисле хем тле постапке (Пс. 139:23, 24). Никогаш ма дозволин те ове гордо или алчно!

17. Со ка случинел пе панда хари амаре противникоске, е Бенгеске?

¹⁷ Бут милје берша, о Сатана тано ловџија. Ама панда хари, ов ка овел пханло хем пало адава уништимо (Отк. 20:1-3, 10). Амен едвај аџикераја те авел адава диве. Џи тегани, пазин тут таро е Сатанаскере замке. Трудин тут бут те на ове гордо или алчно. Ов решимо те противине тут е Бенгеске, хем ов ка нашел тутар (Јак. 4:7).