И Библија на вакерела ништо башо адава. Ама, вакерела аменге несаве интересна деталија со шај влијајнѓе ки ленгири одлука.

Јекх ангели вакерѓа е Маријаке кај ка ачхол кхамни хем ка бијанел чхаве. Кеда о ангели вакерѓа лаке адава, и Марија хем о Јосиф живинена сине ко Назарет — јекх диз ки Галилеја (Лука 1:26-31; 2:4). Покасно, кеда иранѓе пе таро Египет, палем геле ко Назарет. О Исус барило адари хем адалеске викинена ле сине Назареќанцо (Мат. 2:19-23). Адалеске кеда спомнинаја и диз Назарет, мислинаја ко Исус, ко Јосиф хем ки Марија.

Ки Јуда живинела сине и Елисавета која со сине фамилија е Маријаке. Е Елисаветакоро ром сине о свештенико о Захарија хем ој бијанѓа е Јован Крстителе (Лука 1:5, 9, 13, 36). И Марија гели ко госто ки лате ки Јуда хем ачхили адари трин масек. Пало адава иранѓа пе ко Назарет (Лука 1:39, 40, 56). Адалеске и Марија џанела сине џинегде и околина тари Јуда.

Пало несаво време, о Цезар нарединѓа те керел пе попис. Адалеске о Јосиф гело таро Назарет ко Витлеем која со сине е „Давидескири диз“ хем спрема о пророштвија о Месија ваљани сине те бијанѓовел адатхе (Лука 2:3, 4; 1. Сам. 17:15; 20:6; Мих. 5:2). Откеда и Марија бијанѓа е Исусе, о Јосиф на родинѓа латар те цидел баро друмо те шај те иранен пе ко Назарет е бебеа. Ола ачхиле ко Витлеем, кова со сине ења километре дур таро Ерусалим. Аѓаар сине ленге полокхо те ингарен е бебе ко храми хем те ден жртва која со о Закони родела сине (3. Мој. 12:2, 6-8; Лука 2:22-24).

Англедер, е Девлескоро ангели вакерѓа е Маријаке кај лакоро чхаво ка наслединел о „престол е Давидескоро“ хем кај ка овел Цари. И Марија хем о Јосиф шај мислинѓе песке кај тано важно о Исус те бијанѓовел ки е Давидескири диз (Лука 1:32, 33; 2:11, 17). Шај мислинѓе песке кај ка овел пошукар те ачхон атхе хем те аџикерен са џикоте на овена сигурна која тани е Девлескири намера ленцар.

На џанаја кобор време ола сине више ко Витлеем кеда але о астрологија. Ама џанаја кај џи тегани о Јосиф хем и Марија живинена сине ко јекх кхер хем о Исус на сине више бебе него тикно чхаво (Мат. 2:11). Веројатно, ола на иранѓе пе ко Назарет него ачхиле ко Витлеем добором време со више осетинѓе пе сар кхере.

О Ирод нарединѓа те мударен са е мурше чхавен ко Витлеем со сине лен џи ко дуј берш (Мат. 2:16). Јекх ангели предупрединѓа е Јосифе башо адава хем адалеске ов хем и Марија заедно е Исусеа нашле ко Египет, са џикоте на муло о Ирод. Тегани о Јосиф заедно пле фамилијаја гело ко Назарет. Соске на иранѓе пе ко Витлеем? Адалеске со ко адава време ки Јудеја владинела сине е Иродескоро чхаво о Архелај, кова со сине бут лошно. Исто аѓаар, јекх ангели палем предупрединѓа е Јосифе кај тано опасно те иранел пе ко Витлеем. Ко Назарет е Јосифеске сине побезбедно те аракхел е Исусе хем те сикавел ле башо Девел (Мат. 2:19-22; 13:55; Лука 2:39, 52).

Најверојатно, о Јосиф муло англедер о мерибе е Исусескоро колеа со пхравѓа пе о друмо башо небесно живото. Адалеске шај те вакера кај о Јосиф ка воскреснинел ки пхув. Буте џенен ка овел лен прилика те запознајнен ле хем ка шај лестар те дознајнен повише деталија башо адава соске ов хем и Марија ачхиле ко Витлеем откеда о Исус бијандило.