Кеда сине и Дујто светско војна мле родителија геле песке тари Естонија ки Германија, коте со бијандиљум. Откеда бијандиљум ола почминѓе те керен планија те џан ки Канада. Амаро прво кхер паше ки Отава (Канада) сине јекх шупа макхли киречи коте со аракхена пе сине кхајна. Сием сине бут чороле ама барем сине амен јаре сабалукоске.

Јекх диве але е Јеховаскере сведокија хем читинѓе ме дајаке таро Откровение 21:3, 4. Лаке добором свиџинѓа пе адава со почминѓа те ровел. Оттегани ми дај хем мо дад почминѓе те проучинен хем башо кратко време крстинѓе пе.

Ме родителија на џанена сине бут англиски, сепак бут замангле о чачипе. Мо дад керела сине пхари бути цело рат ки јекх фабрика коте со топинена пе сине металија ко Садбери (Онтарио), ама скоро секоја сабота лела сине ман хем ме потикне пхења е Силвија ки служба. Хем секова курко проучинаја сине и Стражарско кула сар фамилија. Ми дај хем мо дад поможинѓе манге те замангав е Јехова. Адалеске ко 1956 берш, кеда сине ман 10 берш, одлучинѓум те крстинав ман. Кеда хем те размислинав башо адава кобор мле родителија мангена сине е Јехова, адава поттикнинела ман понадари да те служинав леске.

Откеда завршинѓум и средно школа, почминѓе јавера буќа те интересинен ман. Мислинѓум манге кај ако овава пионери никогаш ка нашти те заработинав доволно паре те шај те остваринав мло суно — авионеа те џав ко јавера пхувја. Почминѓум те керав бути ки јекх радио станица коте со мукхава сине музика хем адаја бути бут свиџинела пе сине манге. Ама керава сине бути раќате хем адалеске бут пути нашти сине те џав ко состанокија а тари јавер страна почминѓум те дружинав ман околенцар со на мангена сине е Девле. Ама ко крајо, мли библиско школујми совест почминѓа те мучинел ман хем адава поттикнинѓа ман те керав промене.

Селинѓум ман ки диз Ошава (Онтарио). Атхе запознајнѓум е пхрале Реј Норман, лескере пхења е Леслија хем јавере пионерен. Ола керѓе шукар те осетинав ман. Адава со дикхљум кобор тане радосна поможинѓа ман палем те размислинав башо мле целија. Ола охрабринѓе ман те почминав е пионерско службаја хем ко септември 1966 берш ме уљум пионери. Сиум сине радосно хем уживинава сине ко мло живото. Ама тегани панда на џанава сине кај ка случинел пе манге нешто неочекувано.

Џикоте панда сиум сине ки средно школа, денѓум молба башо Бетел сој ко Торонто (Канада).  Хем покасно кеда уљум пионери викинѓе ман те служинав штар берш ко Бетел. Ама и Лесли бут свиџинела пе сине манге хем дарава сине кај ако џава ко Бетел никогаш више ка нашти те дикхав ла. Адалеске, бут молинѓум ман хем пхравѓум мло вило е Јеховаске. Ко крајо одлучинѓум те џав ко Бетел иако на сине манге са јекх со ка нашти те дикхав више е Леслија.

Ко Бетел керава сине бути ки перална а покасно сар секретари. Џикоте сиум сине ко Бетел, и Лесли ули специјално пионерка ки диз Гатино (Квебек). Ме често мислинава сине ки лате хем пучава ман сине дали анѓум исправно одлука. Ама тегани шунѓум нешто со бут радујнѓа ман. О Реј, е Леслијакоро пхрал, сине канимо те служинел ко Бетел. А сиум сине панда порадосно кеда шунѓум кај ов ка овел мло цимери. Адава керѓа палем те овав амал е Леслијаја. Ко крајо ме хем и Лесли лелем амен ко 27 февруари 1971 берш, баш ко последно диве тари мли Бетелско служба коте со сиум сине штар берш.

Ме хем и Лесли добинѓем неви задача те служина ко јекх собрание коте со керела пе сине француско лафи ко Квебек. Пало несаве берша кеда сине ман 28 берш, сиум сине изненадимо кеда добинѓум доделба те служинав сар покраинско надгледнико. Мислинава сине кај сиум терно хем неискусно те шај те керав адаја задача ама о лафија таро Еремија 1:7, 8 бут охрабринѓе ман. Исто аѓаар, е Леслија сине ла некобор сударија хем сине ла проблеми сојбаја. Адалеске пучаја амен сине дали ка шај те служина ки покраинско служба. Сепак ој вакерѓа: „Ако о Јехова мангела те кера нешто соске те на пробина те кера адава?“ Амен прифатинѓем адаја задача колате со уживинѓем 17 берш.

Сар покраинско надгледнико сиум сине бут зафатимо хем адалеске на сине ман доволно време те овав мле ромњаја. Ама јекх диве сиклиљум кај ваљани те одвојнав време мле ромњаке. Јекх понеделник рано сабајле некој ѕвонинѓа аменге ко удар. Кеда пхравѓум о удар на сине никој атхе, англо удар сине само корпа ки која сине тикни черга бешибаске, овошје, кашкавали, багетија, мол, чаше хем јекх картичка која со на џанаја кастар тани хем пишинела: „Ингар тле ромња ко пикник“. А адава диве сине бут шужо, сине кхам. Ама ме ваљани сине те спреминав говорија хем адалеске вакерѓум е Леслијаке кај ка нашти те џа. Ој халили адава ама на сине лаке са јекх. Кеда бешљум те спреминав мле говорија ми совест почминѓа те мучинел ман. Сетинѓум ман ко стихо таро Ефешања 5:25, 28. Преку акава стихо о Јехова потсетинѓа ман кај ваљани те грижинав ман баши ме ромњакере чувствија. Молинѓум ман хем пало адава вакерѓум е Леслијаке: „Ајде ка џа!“ хем адава бут свиџинѓа пе лаке. Гелем ко јекх бут шужо тхан узи река, буљарѓем и черга хем адава диве сине јекх таро најшуже кола со накхавѓем лен заедно. Хем ко крајо палем успејнѓум те спреминав мле говорија.

Уживинаја сине ки покраинско служба хем амари покраина сине бут бари, почминела сине тари Британско Колумбија џи ко Њуфаундленд. Мо суно те патујнав ко јавера да пхувја акана уло чаче. Ме  мислинава ман сине те дав молба башо Гилеад ама на мангава сине те овав мисионери. Ко мисионерија дикхава сине сар посебна мануша хем мислинѓум кај на сиум добором шукар те шај ме да те овав мисионери. Тари јавер страна, дарава сине те на ова бичхалде ки јекх пхув ки Африка коте со иси насвалипе хем војне. Сине манге шукар ки Канада.

Таро 1992 берш, ко несаве пхувја со сине дело таро Советско Сојуз шај сине палем те проповединел пе. Адалеске пучле амен дали ка ова спремна те џа ки Естонија сар мисионерија. Сием сине изненадиме хем молинѓем амен башо адава. Ама палем мислинѓем аменге: „Ако о Јехова мангела те кера нешто, соске те на пробина те кера адава?“ Прифатинѓем и задача хем мислинѓум манге: „Шукар со на џаја ки Африка“.

Одма почминѓем те сикљова и естонско чхиб. Пало некобор масекија добинѓем неви доделба те служина ки покраинско служба ко адава тхан. Ваљани сине те посетина 46 собранија хем групе ко трин балтичка пхувја, исто аѓаар ко Калининград (Русија). А адава значинела сине кај ваљани те сикљова летонско, литванско хем руско чхиб. Адава на сине баш локхо те керел пе. Ама о пхраља хем о пхења бут ценинена сине амаро трудо хем адалеске поможинѓе амен. Ко 1999 берш ки Естонија сине пхравди подружница хем ме сиум сине замолимо те служинав ко одбор заедно е пхраленцар Томас Едур, Лембит Рејле хем Томи Кауко.

Запознајнѓем буте сведокон кола со англедер сине бичхалде ко Сибир. Иако сине ленге пхаро ко затвор хем сине дур таро пумаре фамилие ола ачхиле радосна хем сине ревна ки служба. Таро акава амен халилем кај шај те истрајна хем те ачхова радосна чак кеда иси амен пхаре околностија.

Са акала берша амен сием сине бут зафатиме хем адалеске и Лесли почминѓа бут сигате те уморинел пе. Ко почеток на халилем кај ој уморинела пе адалеске со иси ла насвалипе кова со викинела пе фибромијалгија. Адалеске почминѓем те размислина те ирана амен ки Канада. Кеда сием сине викиме те џа ки јекх школа ко Патерсон (Њујорк), мислинѓум кај ка нашти те џа. Ама откеда бут молинѓем амен башо адава одлучинѓем те џа. О Јехова благословинѓа амари одлука. Џикоте сием сине ки адаја школа и Лесли конечно добинѓа помош башо лакоро насвалипе. Адава поможинѓа амен те продолжина амаре активностенцар.

Откеда иранѓем амен ки Естонија, јекх рат ко 2008 берш јавинѓе пе аменге о пхраља таро главно седиште хем пучле амен дали сием спремна те служина ко Конго. Сиум сине шокиримо, посебно адалеске со ваљани сине те одговорина ленге одма о тајсутно диве. На вакерѓум одма е Леслијаке адалеске со џанљум кај нане те совел адаја рат. Ама ме сиум сине адава со на суќа соске цело рат молинава ман сине е Јеховаске хем вакерава сине леске соске дарава те џав ки Африка.

О тајсутно диве кеда вакерѓум е Леслијаке баши покана те служина ки Африка, алем ко исто заклучок: „О Јехова мангела те џа ки Африка. Котар ка шај те џана дали шај те кера адаја задача хем те  уживина ки лате ако на пробинаја адава?“ Аѓаар пало 16 берш ки Естонија, гелем ки Киншаса (Конго). И подружница адари сине ла бут шужо парко хем сине бут мирно тхан. Јекх таро прва буќа со и Лесли чхивѓа ки амари соба сине картичка која со аракхела ла панда откеда гелем аменге тари Канада. Ки лате пишинела сине: „Радујн тут ко тхан коте со сиан“. Откеда запознајнѓем е пхрален, почминѓем библиска курсија хем дикхлем кобор сием радосна ки мисионерско служба хем почминѓем те уживина ки лате. Пало адава сине амен чест те посетина о Бетелија ко 13 јавера африканска пхувја. Адава денѓа амен прилика те запознајна бут јавера културе. И дар со сине ман нашавдили хем сием сине бут благодарна е Јеховаске со бичхалѓа амен ки Африка.

Ко Конго прво пути дикхлем несаво хајбе сар на пример инсектија баши кола со мислинѓем кај никогаш ка нашти те ха лен. Ама кеда дикхлем кобор о пхраља уживинена ко адава хајбе, амен да пробинѓем хем свиџинѓа пе аменге.

Шај сине те џа ко источно дело тари пхув те шај те охрабрина амаре пхрален хем пхењен хем те ингара ленге несаве буќа со ваљанена ленге. Ко адала тхана о бунтовникија нападинена сине о гава хем поврединена сине е џувлен хем е чхавен. Бут пхраља хем пхења сине лен хари ко материјално поглед, сепак ленгири силно надеж башо воскресение, ленгоро мангипе спрема о Јехова хем ленгири послушност спрема и организација бут охрабринѓе амен. Ленгоро пример поттикнинѓа амен те размислина соске служинаја е Јеховаске хем панда повише те бајрара амари вера ки лесте. Несаве пхраља нашавѓе пумаре кхера хем пумаре ниве. Таро акава сиклиљум кај о материјална буќа шај бут сигате те нашавен пе хем кај о амалипе е Јеховаја тано о најбаро барвалипе со иси амен. Иако е пхрален хем е пхењен сине лен бут пхаре околностија сепак ретко жалинена пе сине. Ленгоро пример поттикнинѓа амен храбро те соочина амен е проблеменцар хем е насвалипаја.

Аџикерела амен сине јекх јавер предизвик. Сием сине замолиме те преселина амен ко Бетел ко Хонг Конг. Никогаш на замислинѓем аменге кај ка живина ки Азија. Ама кеда дикхлем сар о Јехова поможинела аменге ко са амаре задаче, прифатинѓем и  покана. Ко 2013 берш асвенцар ко јакхја поздравинѓем амен амаре мангле амаленцар хем сине аменге жал со ка мукха и Африка бизо те џана со аџикерела амен.

О Хонг Конг тани бари диз хем ки лате иси бут мануша, адава сине аменге бари промена. Ваљанѓем те сикљова и кинеско чхиб која на сине баш локхи. О пхраља љубезно доџакерѓе амен хем о хајбе атхе сине бут вкусно. Са повише бајрола сине и бути ки подружница ама сине скупо те кинел пе јавер тхан. Адалеске о Водечко тело анѓа јекх мудро одлука те бикинел пе побаро дело таро Бетел. Кратко пало адава, ко 2015 берш селинѓем амен ки Јужно Кореја хем продолжинѓем те служина адатхе. Атхе ваљанѓа те сикљова јавер пхари чхиб, иси амен панда бут те сикљова ама о пхраља хем о пхења охрабринена амен хем вакерена аменге кај са пошукар кераја лафи ки адаја чхиб.

Нане секогаш локхо те овен тут неве амала. Ама халилем кај ако амен кераја о прво чекори хем сикаваја гостопримство е јаверенге шај посигате те овен амен неве амала. Јавер бути со халилем тани кај амаре пхрален таро цело свето иси лен повише сличностија него разлике хем кај о Јехова керѓа амен аѓаар те шај те пхрава амаро вило хем те сикава мангипе е пхраленге хем е пхењенге (2. Кор. 6:11).

Дикхлем кај ваљани те прифатина е јаверен сар со прифатинела лен о Јехова хем те рода доказија башо е Јеховаскоро мангипе хем лескоро водство. Секова пути кеда сием сине обесхрабриме или кеда сумнинаја амен сине дали о јавера ка прифатинен амен, читинаја сине о охрабрувачка картичке хем писмија со денѓе амен о пхраља. Дикхаја сине сар о Јехова одговоринела ко амаре молитве аѓаар со уверинела амен сине ко лескоро мангипе хем дела амен сине сила.

Сар накхела сине о време ме хем и Лесли сиклилем кобор тано важно те накхава време заедно, бизи разлика кобор сием зафатиме. Сиклилем кај ваљани те аса башо амаре грешке посебно кеда сикљоваја неви чхиб. Исто аѓаар секоја рат трудинаја амен те благодарина амен е Јеховаске башо нешто шукар со случинѓа пе аменге ко адава диве.

Те овав искрено, мислинѓум манге кај никогаш ка нашти те овав мисионери или те живинав ки јавер пхув. Ама радосно сиум со сиклиљум кај са шај те керав ако поможинела ман о Јехова. Акава сетинкерела ман ко лафија таро пророко о Еремија: „Изненадинѓан ман, Јехова“ (Ерем. 20:7). Чаче, о Јехова денѓа амен бут шуже изненадувања хем благословија кола со нашти ни те замислина лен, чак исполнинѓа мо суно те патујнав авионеа. Са акала берша посетинѓем Бетелија ко панџ континентија хем аѓаар гелем ко тхана кола со сар тикно нашти сине ни те замислинав манге кај шај те џав ки ленде. Ко са амаре задаче со сине амен, бут сиум благодарно е Леслијаке адалеске со поддржинѓа ман хем сикавѓа спремно духо.

Никогаш на мангаја те бистра кај са со кераја, кераја адалеске со мангаја е Јехова. О благословија со иси амен акана тане само јекх тикно дело таро адава со ка добина ки иднина кеда ка живина вечно хем кеда о Јехова ка пхравел пло вас хем ка дел „са е манушенге хем е животненге адава со мангена“ (Пс. 145:16).