О пророштвија ки акаја табела опишинена настанија кола со случинена пе ко исто време. Са акала пророштвија сикавена кај живинаја ко „време е крајоскоро“ (Дан. 12:4).

• Стихија Отк. 11:7; 12:13, 17; 13:1-8, 12

  Пророштво „О ѕверо“ владинела упри Пхув веконцар. Ко време е крајоскоро лескоро ефтато шеро ка овел повредимо. Покасно адава шеро ка сасљол хем „цели пхув“ ка џал пало ѕверо. Преку лесте о Сатана „ка боринел пе околенцар со ачхиле“ таро потомство „е џувљакоро“.

  Исполнибе Пало Потоп, појавинѓе пе владе кола со противинена пе сине е Јеховаске. Веконцар покасно, јекх таро адала владе која со викинела пе сине Британија нашавѓа бут тари пли моќ ки Прво светско војна. Палем ули силно кеда о Соединета државе хем ој уле сојузникија. Посебно ко време е крајоскоро, о Сатана користинела цело политичко систем те шај те прогонинел е Девлескере народо.

• Стихија Дан. 11:25-45

  Пророштво О северно хем о јужно цари ка боринен пе баши побари власт.

  Исполнибе И Германија хем и англо-американско светско сила боринена пе сине баши власт. Ко 1945 берш, о Советско Сојуз хем лескере сојузникија уле о северно цари. Ама, ко 1991 берш, о Советско Сојуз пело, хем сар со накхела сине о време, и Русија хем лакере сојузникија уле о северно цари.

• Стихија Иса. 61:1; Мал. 3:1; Лука 4:18

  Пророштво О Јехова ка бичхалел пле „гласнико“ те шај те „чистинел о друмо“ англедер те почминел те владинел о Месијанско Царство. Акава „гласнико“ ка почминел те објавинел „о шукар хабери околенге сој кротка“.

  Исполнибе Таро 1870 берш, о Чарлс Расел хем лескере соработникија почминѓе ревно те проучинен и Библија те шај те објаснинен со чаче ој сикавела. Ко 1881 берш, ола халиле кај тано бут важно е Девлескере слуге те проповединен. Почминѓе те објавинен статие сар со сине „Потребна тане 1.000 проповедникија“ хем „Помазиме те проповединен“.

• Стихија Мат. 13:24-30, 36-43

  Пророштво Јекх душмани ка сејнел диво чар ки нива гивеа. И диво чар сине мукхли те бајрол хем те учхарел о гив са џикоте на авела о време баши жетва. Тегани и диво чар ка овел одвојми таро гив.

  Исполнибе Таро 1870 берш, и разлика машкар о чачутне хем о ховавне христијања овела сине са појасно. Ко време е крајоскоро, о чачутне христијања кхедена пе ко собрание хем одвојнена пе таро ховавне христијања.

• Стихија Дан. 2:31-33, 41-43

  Пророштво О пре таро састрн хем глина тане дело таро јекх кипи сој кердо таро различна металија.

  Исполнибе И глина претставинела е обично народо колеа со владинела и Британија хем САД. Акава народо бут пути протестиринела против акала владе, хем аѓаар чхинавела акале владен целосно те користинен пли моќ.

• Стихија Мат. 13:30; 24:14, 45; 28:19, 20

  Пророштво „О гив“ ка почминел те кхедел пе ко „амбари“ хем упро „слуге“ ка овел чхивдо „о верно хем разборито робо“. О „шукар хабери башо Царство“ ка проповединел пе „ко цело свето“.

  Исполнибе Ко 1919 берш, о верно робо сине чхивдо упро е Девлескоро народо. Таро адава време о Истражувачија е Библијакере почминѓе те проповединен са повише. Авдиве е Јеховаскере сведокија проповединена ко повише таро 200 пхувја хем објавинена библиска публикацие ко повише таро 1.000 чхибја.

• Стихија Дан. 12:11; Отк. 13:11, 14, 15

  Пророштво О ѕверо е дује шингенцар вакерела е манушенге ки Пхув те керен „кипи е ѕвероскоро“, хем пало адава „дела живото е кипеске“.

  Исполнибе И Британија хем о Соединета Државе сине и главно причина со керѓа пе и Лига е народонгири. Јавера да пхувја сложинѓе пе хем кхувѓе ки акаја организација. Таро 1926 берш џи ко 1933 берш, о северно цари исто аѓаар сине члени ки акаја Лига. О мануша мислинѓе кај ој ка анел светско мир — нешто со шај те керел само е Девлескоро Царство. О мануша мислинена о исто башо Обединета нацие (ОН).

• Стихија Дан. 8:23, 24

  Пророштво Јекх „цари со дикхјола сурово“ ка „уништинел ко јекх чудесно начин“.

  Исполнибе И англо-американско светско сила мударѓа буте манушен хем керѓа бари материјално штета. На пример, ки Дујто светско војна, о Соединета Државе мукхле дуј атомска бомбе упри јекх пхув која со сине душмани ленге хем е Британијаке. Акалеа керѓе бари штета сар никогаш англедер.

• Стихија Дан. 11:31; Отк. 17:3, 7-11

  Пророштво „О лоло ѕверо“ е деше шингенцар ка икљол тари бездна хем ка овел о офтото цари. Ко лил Даниел башо акава цари тано вакердо кај тано „и одвратно бути која со уништинела“.

  Исполнибе Џикоте трајнела сине и Дујто светско војна, и Лига е народонгири сине целосно неактивно. Пали војна, и Организација ОН сине керди. Исто сар баши Лига е народонгири, о мануша башо ОН дена и чест која со ваљани те дел пе е Девлескере Царствоске. О ОН ка нападинен е религија.

• Стихија 1. Сол. 5:3; Отк. 17:16

  Пророштво О светска водачија ка објавинен „мир хем сигурност“, а „о деш шинга“ хем „о ѕверо“ ка нападинен „е блудница“ хем ка уништинен ла. Пало адава са о народија ка овен уништиме.

  Исполнибе О светска водачија ка вакерен кај анѓе мир хем сигурност. Пало адава, о нацие кола сој дело таро ОН ка уништинен е ховавне религијакере организациен. Акава ка овел о почеток тари бари неволја. Адаја неволја ка завршинел кеда о Исус ка уништинел цело свето е Сатанаскоро ко Армагедон.

• Стихија Езек. 38:11, 14-17; Мат. 24:31

  Пророштво О Гог ка нападинел „и пхув“ е Девлескере народоскири. Пало адава, о ангелија ка кхеден околен сој „бириме“.

  Исполнибе О северно цари хем о јавера светска владе ка нападинен е Девлескере народо. Откеда ка почминел акава напад, о помазаникија со ачхиле ка овен кхедиме ко небо.

• Стихија Езек. 38:18-23; Дан. 2:34, 35, 44, 45; Отк. 6:2; 16:14, 16; 17:14; 19:20

  Пророштво „О јавачи“ ко „парно грас“ ка анел „конечно победа“ адалеа со ка уништинел е Гоге хем лескере војска. „О ѕверо“ ка овел фрдимо ко „езеро тари јаг“, а јекх бар ка уништинел е баре кипе.

  Исполнибе О Исус, кова со владинела сар Цари ко е Девлескоро Царство, ка спасинел е Девлескере народо. О Исус, о 144.000 хем о ангелија ка уништинен е коалиција таро са о народија, јавере лафенцар о цело политичко систем е Сатанаскоро.