1. Со џанаја таро библиска пророштвија?

СО КА случинел пе е Јеховаскере народоја панда хари? Шај локхе те открина о одговор. О библиска пророштвија тане сар пенџерка колатар со шај те дикха несаве бут важна буќа кола со ка влијајнен упро сариненде. Јекх таро адала пророштвија поможинела аменге те хаљова со ка керен несаве таро најмоќна владе ки Пхув. Акава пророштво тано пишимо ко 11 поглавје таро лил Даниел. Ки лесте керела пе лафи башо дуј царија со противинена пе јекх јекхеске, хем башо адала царија вакерела пе кај тане северно хем јужно цари. Адалеске со побаро дело таро адава пророштво више исполнинѓа пе, шај те ова сигурна кај ка исполнинел пе о јавер да дело.

2. Сар со дикхаја тари 1. Мојсеева 3:15 хем таро Откровение 11:7 хем 12:17, кола важна буќа ваљани те овен амен ки годи кеда проучинаја е Даниелескоро пророштво?

² Те шај те хаљова о пророштво сој пишимо ко 11 поглавје таро лил Даниел, ваљани те овел амен ки годи кај керела лафи само башо владетелија или владе колен со сине лен директно влијание упро е Девлескоро народо. Иако е Девлескоро народо тано бут хари кеда ка спорединел пе са е народонцар ко свето, ола бут пути тане нападиме таро адала владе. Соске? Адалеске со и главно цел е Сатанаскири хем цело лескере светоскири тани те уништинен околен со служинена е Јеховаске хем е Исусеске. (Читин 1. Мојсеева 3:15 хем Откровение 11:7; 12:17.) Исто аѓаар, о пророштво таро Даниел мора те одговоринел е јавере пророштвонцар  таро е Девлескоро Лафи. Уствари, шај точно те хаљова адава со ов пророкујнѓа само ако спорединаја ле јавере стихонцар тари Библија.

3. Башо со ка кера лафи ки акаја хем ки следно статија?

³ Акана ка кера лафи башо Даниел 11:25-39. Ка дикха кој сине о северно хем о јужно цари таро 1870 џи ко 1991 берш, хем ка дикха соске ваљани те кера промене ко амаро хаљојбе ко акава дело таро пророштво. Ки следно статија ка кера лафи башо Даниел 11:40 — 12:1, хем поточно ка објаснина со сикавена адала стихија башо периоди таро 1991 берш џи ки војна Армагедон. Џикоте проучинеа акала дуј статие, ка овел шукар те дикхе и табела „О противничка царија ко време е крајоскоро“. Ама најангле те дикха сар шај те пенџара кој тане адала дуј царија таро акава пророштво.

4. Кола трин буќа поможинена аменге те џана кој тане о северно хем о јужно цари?

⁴ Ко почеток, е анавенцар северно хем јужно цари мислинела пе сине ко политичка силе кола со владинена сине ко територие сој северно хем јужно таро Израел. Котар џанаја адава? Приметин со вакерѓа о ангели е Даниелеске: „Аљум те шај те хаљове со ка случинел пе тле народоске“ (Дан. 10:14). Џи ки Педесетница 33 берш а.е., и нација Израел сине е Девлескоро народо. Ама, оттегани о Јехова јасно сикавѓа кај лескоро народо тане е Исусескере верна ученикија. Адалеске, побаро дело таро пророштво сој пишимо ко 11 поглавје таро лил Даниел, на мислинела пе ки израелско нација него ко е Христосескере следбеникија (Дела 2:1-4; Рим. 9:6-8; Гал. 6:15, 16). Различна владетелија или царствија сине о северно хем о јужно цари ко различна периодија. Сепак, са адале владетелен сине лен нешто заедничко. Прво, сине лен силно влијание упро е Девлескере слуге. Јавере лафенцар, или владинена сине ко територие коте со сине бут Девлескере слуге или прогонинена сине е Девлескере народо. Дујто, адалеа сар понашинена пе сине е Девлескере народоја сикавѓе кај мрзинена е чачутне Девле, е Јехова. Хем трито, солдуј царија боринена пе сине машкар песте баши власт.

5. Дали сине северно хем јужно цари таро дујто веко а.е. џи ко крајо таро 19 веко? Објаснин.

⁵ Ко дујто веко а.е., ко чачутно христијанско собрание почминѓе те кхувен са повише ховавне христијања. Ола сикавена сине ховавне идее хем гаравена сине о чачипа таро е Девлескоро Лафи. Таро адава време па са џи ко крајо таро 19 веко, е Девле на сине ле пли организација ки Пхув. О ховавне христијања бариле сар диво чар хем адалеске сине бут пхаро те џанел пе кола сине о чачутне христијања (Мат. 13:36-43). Соске тано важно те џана акава? Адалеске со адава сикавела кај о северно хем о јужно цари нашти те овен царија или владе кола со сине ки власт таро дујто веко а.е. џи ки дујто половина таро 19 веко. Ко адава периоди на сине организирими група таро Девлескере слуге колен со шај сине те нападинен. * Ама, ко крајо таро 19 веко, о северно хем о јужно цари палем појавинѓе пе. Котар џанаја адава?

6. Кеда почминѓе е Девлескере слуге палем те организиринен пе сар група? Објаснин.

 ⁶ Таро 1870 берш, е Девлескере слуге палем почминѓе те организиринен пе сар група. Баш ко адава берш, о Чарлс Расел хем лескере соработникија керѓе јекх група башо проучибе и Библија. О пхрал о Расел хем лескере паше соработникија сине о пророкујмо гласнико кова со „чистинѓа о друмо“ англедер те почминел те владинел о месијанско Царство (Мал. 3:1). Палем сине организирими група која со служинела е Јеховаске ко исправно начин! Дали ко адава време сине светска силе ки Пхув колен со шај сине те овел лен силно влијание упро лескере слуге? Те дикха.

7. Кој сине о јужно цари скоро џи ко крајо тари Прво светско војна?

⁷ Џи ко 1870 берш, и Британија ули најбари империја ки Пхув, хем сине и најмоќно воено сила. Е Даниелескоро пророштво керела лафи баши јекх тикни шинг која со побединѓа јавере трине шинген. Адаја тикни шинг претставинела е Британија, а о јавера трин шинга претставинена е Франција, е Шпанија хем е Холандија (Дан. 7:7, 8). Скоро џи ко крајо тари Прво светско војна, и Британија сине о јужно цари. Ко адава исто време, о Соединета Американска Државе уле и најбарвали пхув ко свето хем почминѓе паше те соработинен е Британијаја.

8. Кој сине цело време о јужно цари џикоте трајнена о последна диве?

⁸ Џикоте трајнела сине и Прво светско војна, о САД хем и Британија керѓе воено сојуз хем уле бут моќна. Ко адава време, и Британија хем о Соединета Државе — кола со англедер сине британско колонија  — уле и англо-американско светско сила. Сар со пророкујнѓа о Даниел, акава „цари“ кхединѓа „посебно бари хем моќно војска“ (Дан. 11:25). Џикоте трајнена о последна диве, и англо-американско светско сила цело време тани о јужно цари. * Ама, кој сине о северно цари?

9. Кеда палем појавинѓа пе о северно цари, хем сар исполнинѓа пе о Даниел 11:25?

⁹ Ко 1871 берш, јекх берш откеда о Расел хем лескере соработникија керѓе пли група башо проучибе и Библија, палем појавинѓа пе о северно цари. Адава берш, о Ото фон Бизмарк спојнѓа некобор територие хем аѓаар уло о Германско Царство. О Пруско цари Вилхелм I уло о прво цари, хем ов биринѓа о Бизмарк те водинел адаја влада. * Сар со накхена сине о берша, и Германија ули колонијално сила. Ој владинела сине ко несаве пхувја ки Африка хем ко несаве островија ко Тихи Океан, хем пробинела сине те овел помоќно тари Британија. (Читин Даниел 11:25.) Е Германско Царство сине ле бут бари војска хем морнарица моќно скоро сар и Британско. Ки Прво светско војна, и Германија користинѓа адаја воено сила те боринел пе против пле душмања.

10. Сар исполнинѓа пе о Даниел 11:25б, 26?

¹⁰ О Даниел исто аѓаар пророкујнѓа со ка случинел пе е Германско Царствоја хем лескере војскаја. О пророштво вакерела кај о цари „нане те ачхол“. Соске? „Адалеске со против лесте ка керен лошна планија. Хем окола со ка хан ко лескоро астали ка керен те перел“ (Дан. 11:25б, 26а). Ко е Даниелескоро време, машкар окола со хана сине ки царско софра сине службеникија ки бари положба кола со служинена сине е цареске (Дан. 1:5). Ки касте мислинела акава пророштво? Ко службеникија со сине ки бари положба ки Германско влада, машкар коленде со сине е царескере генералија хем воена советникија. Акала мануша керѓе о цари те нашавел пли моќ хем аѓаар сине керди неви влада ки Германија. * О пророштво на само со пророкујнела кај ка перел акава царство, него исто аѓаар пророкујнела саво ка овел о резултати тари војна е јужно цареа. Башо северно цари вакерела пе: „Лескири војска ка овел ингарди тари поплава, хем бут џене ка овен мударде“ (Дан. 11:26б). Ки Прво светско војна, баш сар со сине пророкујмо, и германско војска сине победими хем бут џене сине мударде. Џи тегани, ки адаја војна сине мударде највише мануша тари било која војна англедер.

11. Со керѓе о северно хем о јужно цари?

¹¹ Ко Даниел 11:27, 28 тане опишиме буќа со ка случинен пе англедер те почминел и Прво светско војна. Адатхе вакерела кај о северно хем о јужно цари ка бешен „ко јекх астали“ хем „ка вакерен ховајба“. Исто аѓаар вакерела кај о северно цари ка кхедел „баро барвалипе“. Баш адава да уло. И Германија хем и Британија вакерена сине јекх јекхеске кај мангена мир, ама јасно сине кај ховавѓе кеда почминѓа и војна ко 1914 берш. Хем џи ко 1914 берш и Германија кхединѓа добором барвалипе, со  ули и дујто најбарвали пхув ко свето. Пало адава, сар со сине пророкујмо ко Даниел 11:29 хем ко прво дело таро 30 стихо, и Германија боринѓа пе против о јужно цари, ама сине победими.

12. Со керѓе о јужно хем о северно цари ки Прво светско војна?

¹² Таро 1914 берш, о солдуј царија понадари да боринена пе сине са повише машкар песте, ама хем е Девлескере народоја. На пример, ки Прво светско војна, и германско хем и британско власт прогонинена сине е Девлескере слуген кола со на мангена сине те боринен пе ки војна. Освен адава, и американско влада чхивѓа ко затвор околен со предводинена сине ки проповедничко активност. Акале прогонствоја исполнинѓа пе о пророштво сој пишимо ко Откровение 11:7-10.

13. Со керѓа о северно цари ко 1933 берш хем ки Дујто светско војна?

¹³ Пало адава, ко 1933 берш хем посебно ки Дујто светско војна, о северно цари бизи нисави милост нападинѓа е Девлескере слуген. Кеда о нацистија але ки власт ки Германија, о Хитлер хем лескере следбеникија забранинѓе и активност со керела ла сине е Девлескоро народо. О противникија мударѓе околу 1.500 Јеховаскере слуген хем некобор милје сине бичхалде ко концентрациона логорија. О Даниел пророкујнѓа кај ка случинел пе акава. Освен адава, о северно цари мељарѓа о светилиште хем чхинавѓа „и жртва со дела пе секова диве“ аѓаар со забранинѓа и проповедничко активност (Дан. 11:30б, 31а). О Хитлер, о водачи е нацистичко партијакоро, чак ветинѓа кај ка мударел секоле јекхе таро е Девлескере народо сој ки Германија.

14. Кој уло о северно цари пали Дујто светско војна? Објаснин.

¹⁴ Пали Дујто светско војна, о Советско сојуз уло о северно цари. Ов почминѓа те владинел упро баре територие кола со англедер сине е Германијакере. Слично сар о сурово нацистичко режим, о Советско сојуз прогонинела сине са околен со сине ленге поважно те служинен е чачутне Девлеске наместо е државаке.

15. Со керѓа о северно цари пали Дујто светско војна?

¹⁵ Кратко откеда завршинѓа и Дујто светско војна, о нево северно цари — о Советско сојуз хем лескере сојузникија — нападинѓа е Девлескере народо. Баш сар со пишинела ко пророштво таро Откровение 12:15-17, акава цари забранинѓа амари проповедничко активност хем палдинѓа бут милје Јеховаскере слуген ко Сибир. Ко лил Откровение, акава прогонство тано споредимо рекаја. Уствари, ко последна диве, преку о северно цари, о Сатана понадари да прогонинела е Девлескере слуген, ама никогаш на успејнѓа те чхинавел ленгири активност. *

16. Сар о Советско Сојуз исполнинѓа о пророштво таро Даниел 11:37-39?

¹⁶ Читин Даниел 11:37-39. Сар о северно цари на сикавѓа нисаво обѕир спрема „о Девел пле даденгоро“? О Советско сојуз мангља те уништинел о религие хем адалеске пробинѓа те лел и моќ таро традиционална верска институцие. Те шај те  керел адава, и советско влада панда таро 1918 берш почминѓа те анел одлуке кола со дозволинена сине е школенге те сикавен атеистичка идее. А ко саво начин акава северно цари славинѓа „е Девле е тврдиненгоро“? Те шај те бајрарел пли моќ, о Советско сојуз трошинѓа бут паре те шај те бајрарел пли војска хем те керел нуклеарно оружје. Ко крајо, о северно хем о јужно цари кхединѓе доволно оружје колеа со шај сине те мударен пе милијарде мануша!

17. Кас претставинела „и одвратно бути која со уништинела“?

¹⁷ О северно цари поддржинѓа е јужно царе ки јекх бут важно бути. Ола соработинена сине те шај те „чхивен и одвратно бути која со уништинела“ (Дан. 11:31). Акаја „одвратно бути“ претставинела е Обединета нациен.

18. Соске башо Обединета нацие вакерела пе кај тане „одвратно бути“?

¹⁸ Баши организација е Обединета нациенгири вакерела пе кај тани „одвратно бути“ соске вакерела кај шај те анел мир ко свето — нешто со шај те керел само е Девлескоро Царство. Освен адава, о пророштво вакерела кај и одвратно бути „уништинела“. Ки која смисла? О Обединета нацие ка нападинен хем ка уништинен са е ховавне религиен. (Дикх и рамка „О противничка царија ко време е крајоскоро“.)

19-20. а) Соске ваљани те џана о информацие со дикхлем лен џи акана? б) Кова пучибе ка овел одговоримо ки следно статија?

¹⁹ Ваљани те џана акала информацие адалеске со ола сикавена кај таро 1870 џи ко 1991 берш јекх дело таро е Даниелескоро пророштво башо северно хем о јужно цари исполнинѓа пе. Адалеске шај те ова сигурна кај ка исполнинел пе о јавер да дело таро акава пророштво.

²⁰ Ко 1991 берш, о Советско Сојуз пело. Тегани, кој тано о северно цари авдиве? Ки следно статија ка дикха о одговор таро акава пучибе.