„Ме сиум лаџутни“, вакерела и Сара, *„хем на сиум бут сигурно ки манде. Адалеске на осетинава ман шукар кеда сиум манушенцар кола сој превише сигурна ки песте хем кола со нане обѕирна. Ама, кеда сиум некасаја сој тано понизно хем со на хољанела сигате, осетинава ман слободно. Шај те керав лафи асавке манушеа башо мле чувствија хем те вакерав леске со мучинела ман. Мле паше амала тане асавке.“

Таро акала лафија е Саракере дикхела пе кај, ако на хољанаја сигате, о јавера мануша ка манген те овен амала аменцар. О Јехова тано бахтало кеда на хољанаја сигате. Лескоро Лафи поттикнинела амен: „Ма хољанен сигате“ (Кол. 3:12). Со значинела те на хољанел пе сигате? Сар о Исус сикавѓа акаја особина? Хем сар шај акаја особина те поможинел аменге те ова побахтале?

О мануш со на хољанела сигате сикавела кај мангела о мир. Ов понашинела пе е јаверенцар љубезно хем ачховела смиримо кеда случинена пе леске буќа со шај те нервиринен ле.

Ки Библија, о грчко лафи преведимо сар „те на хољанел пе сигате“ користинела пе те опишинел јекхе диво грасте кова со сине дресиримо те овел питомо. Иако о грас уло питомо, адава на значинела кај нашавѓа пли сила. Ов панда тано силно, ама адалеске со стрпливо сине дресиримо ов уло питомо. Слично, о мануш со на хољанела сигате тано силно адалеске со успејнела те контролиринел пли несовршено природа хем аѓаар шај те овел ко мир е јаверенцар.

Шај мислинеа туке: „Ме сиум мануш со хољанела сигате“. Адалеске со живинаја ко свето коте со бут мануша нане љубезна хем тане нестрплива, шај чаче те овел аменге пхаро те на хољана сигате (Рим. 7:19). Адалеске, мора те трудина амен те развина акаја особина. Е Јеховаскоро свети дух ка поможинел аменге те ова са поодлучна те успејна ко адава (Гал. 5:22, 23). Соске врединела те трудина амен те на хољана сигате?

Ако на хољанаја сигате, о мануша ка осетинен пе шукар узи аменде. Исто сар и Сара, која со сине цитирими поупре, осетинаја амен шукар кеда сием некасаја со на хољанела сигате. О Исус денѓа бут шукар пример башо адава хем сар те овел пе љубезно (2. Кор. 10:1). Чак о чхаве мангена сине те овен узи лесте иако на пенџарена ле сине (Мар. 10:13-16).

 Адава со на хољанаја сигате заштитинаја хем амен хем околен сој околу аменде. Ако на хољанаја сигате, тегани нане те реагирина бизо те размислина (Изр. 16:32). Аѓаар, нане те мучинела амен и совест сар со би мучинела амен сине ако поврединѓем некас, посебно околен со мангаја лен. Освен адава, ка контролирина амен хем нане те повредина е јаверен, а адава ка овел ленге заштита.

Иако сине ле баре одговорностија хем бут обврске, о Исус на хољанела сине сигате е манушенге. Џикоте сине теле ки Пхув, бут џене сине ко крајо е силенцар хем сине оптовариме, хем ваљани сине некој те охрабринел лен. Сигурно бут утешинѓе пе кеда о Исус вакерѓа: „Авен ки манде... соске ме сиум кротко хем понизно ко вило“ (Мат. 11:28, 29).

Со шај те поможинел аменге те ова сар о Исус? Прво, ваљани те проучина е Девлескоро Лафи те шај те дикха сар понашинѓа пе е манушенцар хем со керѓа ко пхаре ситуацие. А пало адава, кеда ка ова ко ситуацие коте со ка овел аменге пхаро те на хољана сигате, ваљани те трудина амен те постапина сар о Исус (1. Пет. 2:21). Те дикха трин буќа со поможинѓе е Исусеске те на хољанел сигате.

О Исус сине понизно ко вило. Ов баши песте вакерѓа кај на хољанела сигате хем кај тано понизно ко вило (Мат. 11:29). Ки Библија, акала дуј особине тане спомниме заедно соске тане поврзиме (Еф. 4:1-3). Соске вакераја акава?

Ако сием понизна, нане те мислина кај сием бут важна хем нане те ова бут осетлива. Сар постапинѓа о Исус околенцар со неправедно критикујнена ле сине кај тано „халано хем пијаница“? Адалеске со сине понизно, ов смирено вакерѓа кај „и мудрост дикхела пе таро лакере постапке“ (Мат. 11:19). Пле примереа сикавѓа кај ола на сине ко право.

Ако некој, бизо те мислинел, вакерела туке нешто баши тли раса, пол или потекло, соске на трудинеа тут те на хољане сигате? О Питер, јекх старешина со служинела ки Јужноафриканско Република, вакерела: „Кеда некој ка вакерел нешто со ка нервиринел ман, пучава ман: ’Со би керела сине о Исус ки акаја ситуација?‘“ Ов понадари вакерела: „Сиклиљум те на мислинав кај сиум бут важно“.

О Исус џанља кај о мануша нане совршена. Иако лескере ученикон сине лен шукар намера, понекогаш на успејнена сине те постапинен исправно соске на сине совршена. На пример, и рат англедер о Исус те овел мудардо, о Петар, о Јаков хем о Јован на успејнѓе те ден ле и емоционално поддршка со ваљанѓа леске. Сепак, о Исус сикавѓа кај хаљовела лен. Ов вакерѓа: „О духо, чаче, тано спремно, ама о тело тано слабо“ (Мат. 26:40, 41). Адалеске со сине свесно кај ола нане совршена, на хољанела сине пле апостоленге.

Јекх пхен со викинела пе Менди сине ла навика те аракхел маане е јаверенге, ама акана трудинела пе те овел сар о Исус хем те на хољанел сигате. Ој вакерела: „Хаљовава кај сарине сием несовршена, хем адалеске трудинава ман те дикхав о шукар ко јавера, исто сар со керела о Јехова“. О Исус сикавѓа кај хаљовела е манушенгере слабостија хем сикавѓа ленге сочувство. Дали шај акава те поможинел туке да те на хољане сигате е јаверенге?

О Исус мукхља о буќа е Јеховаске ко васта. Џикоте сине ки Пхув, ов прифатинѓа кај ка постапинел пе леа неправедно. О мануша на хаљовена ле сине, мислинѓе кај на врединела ништо хем мучинѓе ле. Иако постапинена сине леа аѓаар, о Исус на хољанела сине сигате соске ов „мукхља о Судија кова со праведно судинела“ те грижинел пе леске (1. Пет. 2:23). О Исус џанља кај лескоро Дад сој ко небо ка поможинел леске те издржинел хем кај ко право време ка казнинел околен со постапинѓе леа неправедно.

Ако сием хољаме адалеске со некој сине неправедно аменцар, шај сигате те реагирина нервозно хем те кера полошно и ситуација. Адалеске, е Девлескоро Лафи сетинкерела амен: „Е манушескири холи на анела и праведност која со родела о Девел“ (Јак. 1:20). Чак ако иси амен право те хољана, и несовршеност шај те чхивел амен погрешно те реагирина.

Јекх пхен тари Германија со викинела пе Кети мислинела сине: „Ако коркори на бранинеа тут, никој јавер нане те бранинел тут“. Ама, кеда сиклили те овел ла доверба ко Јехова, ој менинѓа пе. Ој вакерела: „На осетинава више потреба секогаш те оправдинав ман. Трудинава ман те на хољанав сигате соске џанава кај е Јехова иси ле контрола упро са о буќа“. Чак ако трпинѓан несави неправда, ка успејне  те ачхове смиримо хем ма те хољане ако џаја пало пример е Исусескоро аѓаар со ка сикаве доверба ко Девел.

О Исус вакерѓа кај, ако мангаја те ова бахтале, на ваљани те хољана сигате. Ов вакерѓа: „Бахтале тане окола со на хољанена сигате“ (Мат. 5:5, фус.). Те дикха сар адава шај те поможинел аменге ко акала ситуацие.

Смиринела о стрес ко брако. О Роберти, јекх пхрал тари Австралија признајнела: „Ме ромњаке вакерѓум бут буќа со дукхавѓе ла, а кола со ни хари на мислинѓум лен. Ама откеда ки холи ка вакере нешто, адава нашти више те иране ле напалал. Бут сине манге жал кеда халиљум кобор бари дукх керѓум лаке“.

„Сарине амен бут пути грешинаја“ кеда кераја лафи, хем кеда вакераја нешто бизо те размислина адава шај те керел проблемија ко амаро брако (Јак. 3:2). Ко асавке ситуацие, адава со на хољанаја сигате шај те поможинел аменге те ачхова смириме хем те пазина со вакераја (Изр. 17:27).

О Роберти бут трудинѓа пе те сикљовел те контролиринел пе хем те овел смиримо. Саво сине о резултати? Ов вакерела: „Акана, секогаш кеда ме хем ми ромни на сложинаја амен, свесно трудинава ман шукар те шунав ла, те керав лафи бизо те хољанав сигате хем те ачховав смиримо. Акана накхаја бут пошукар таро англедер“.

Поможинела аменге те накха шукар е јаверенцар. Окола со сигате вреџинена пе ко крајо ачхона бизо амала. Ама ако на хољанаја, ка икера о јекхипе хем о мир (Еф. 4:2, 3). И Кети, која со сине цитирими англедер, вакерела: „Адалеске со трудинава ман те на хољанав сигате, иси ман похари незгодна ситуацие, иако несаве манушенцар нане секогаш локхо те икљовел пе ко крајо“.

Ка овел амен андруно мир. И Библија вакерела кај окола со на хољанена сигате иси лен „мудрост со авела упралдан“ хем тане смириме (Јак. 3:13, 17). Окова со на хољанела сигате иси ле мир ко вило (Изр. 14:30). О Мартини, кова со бут трудинѓа пе те развинел акаја особина, вакерела: „Акана на родава о буќа секогаш те керен пе сар ме со мангава, хем адалеске иси ман андруно мир хем сиум бахтало“.

Шај амен да ка ваљани бут те трудина амен те на хољана сигате. Јекх пхрал вакерела: „Те овав искрено, авдиве да случинела пе манге понекогаш те овав превише нервозно“. Ама, о Јехова кова со поттикнинела амен те на хољана сигате, ка поможинел аменге успешно те борина амен (Иса. 41:10; 1. Тим. 6:11). Ов ка керел амен зорале хем целосно ка обучинел амен (1. Пет. 5:10). Сар со ка накхел о време, исто сар о апостол Павле, амен да ка шај те џа пало е Исусескоро пример, кова со на хољанела сигате хем тано шукар (2. Кор. 10:1).