1. Со шај изненадинѓа тут кеда прво пути мангљан те вакере о шукар хабери тари Библија е јаверенге?

ДАЛИ сетинеа тут ко моменти кеда халиљан кај аракхљан о чачипе тари Библија? Бут сине туке локхо те хаљове са адава со сикљовеа сине латар. Мислинѓан кај секова јекх ка мангел те прифатинел о буќа коленде со ту почминѓан те верујне. Сиан сине уверимо кај о шукар хабери тари Библија ка дел лен побахтало живото акана, хем бут шужи надеж баши иднина (Пс. 119:105). Адалеске, ту вакерѓан са те амаленге хем те фамилијаке башо чачипа со сиклиљан лен. Ама со уло? Сиан сине изненадимо адалеске со бут џене одбинѓе те шунен адава со вакерѓан ленге.

2-3. Ко е Исусескоро време, со мислинена сине побаро дело таро мануша баши лесте хем башо адава со вакерела сине?

² На ваљани те ова изненадиме кеда о јавера одбинена о хабери со проповединаја ле. Ко е Исусескоро време побаро дело таро мануша одбинѓе те шунен ле, иако керела сине чудија коленцар со сикавела сине кај иси ле е Девлескири поддршка. На пример, о Исус воскреснинѓа е Лазаре — јекх чудо кова со лескере противникија нашти сине те вакерен кај на случинѓа пе. Сепак о еврејска верска водачија на прифатинѓе е Исусе сар Месија. Ола чак мангле те мударен е Исусе хем е Лазаре (Јован 11:47, 48, 53; 12:9-11).

³ О Исус џанља кај бут мануша ка одбинен те верујнен кај ов тано о Месија (Јован 5:39-44). Несаве манушенге со сине ученикија таро Јован Крстител, ов вакерѓа: „Бахтало тано окова, со нане те аракхел причина, те спотакнинел пе мандар“ (Мат. 11:2, 3, 6, фус.). Соске бут џене одбинѓе е Исусе?

4. Со ка дикха ки акаја статија?

⁴ Ки акаја хем ки следно статија, ка дикха некобор причине,  соске бут џене таро прво веко на верујнѓе ко Исус. Исто аѓаар, ка дикха соске бут џене авдиве дозволинена те овен спотакниме. А сој најважно, ка сикљова соске шај те овел амен зорали вера ко Исус која со ка поможинел аменге те на спотакнина амен.

5. Соске некој шај мислинѓе кај о Исус нашти те овел о пророкујмо Месија?

⁵ Бут мануша на прифатинена сине е Исусе адалеске со џанена сине коте барило. Ола признајнѓе кај о Исус сине бут шукар Учители хем кај керела сине чудија. Ама, ленге ов само сине јекхе чороле столарескоро чхаво. Хем ов сине таро Назарет, диз колаке со бут мануша мислинена сине кај нане добором важно. Чак о Натанаел, кова со покасно уло е Исусескоро ученико, ко почеток вакерѓа: „Шај ли нешто шукар те икљол таро Назарет?“ (Јован 1:46). Е Натанаелеске шај на свиџинела пе сине бут и диз коте со живинела сине о Исус. Или шај мислинѓа ко пророштво сој пишимо ко Михеј 5:2, коте со вакерела кај о Месија ваљани сине те овел бијамо ко Витлеем, а на ко Назарет.

6. Со шај сине те поможинел е манушенге ко е Исусескоро време те хаљовен кај ов тано о Месија?

⁶ Со вакерела и Библија? О пророко о Исаија пророкујнѓа кај е Исусескере душмања нане те интересинен пе бут башо е Месијаскоро потекло (Иса. 53:8). А бут буќа башо лескоро потекло сине пророкујме. Ако адала мануша одвојнена песке сине време те истражинен повише информацие башо акава, ола ка дознајнен сине кај о Исус сине бијамо ко Витлеем хем кај ов потекнинела таро цари о Давид (Лука 2:4-7). Значи о Исус сине бијамо ко тхан со сине пророкујмо ко Михеј 5:2. Тегани, со сине о проблеми? О мануша бут сигате осудинѓе ле. На сине лен са о информацие хем адалеске ола спотакнинѓе пе.

7. Соске авдиве бут џене на прифатинена е Јеховаскере народо?

⁷ Дали иси исто проблеми авдиве да? Оја. Побаро дело таро е Јеховаскоро народо нане барвале или нане лен несави важно положба. Бут џене дикхена ки ленде сар обична мануша со нане лен бари школа (Дела 4:13). Несаве мануша мислинена кај е Јеховаскоро народо на ваљани те сикавел е јаверен баши Библија адалеске со на геле ки несави важно теолошко школа. Јавера мануша вакерена кај е Јеховаскере сведокија тане „американско религија“, ама о побаро дело таро е Јеховаскере сведокија на живинена ки Америка. А јавера мануша вакерена кај е Јеховаскере сведокија на верујнена ко Исус. Бершенцар о мануша вакерена кај е Јеховаскере слуге тане „комунистија“, „американска шпионија“ или „екстремистија“. Адалеске со шунена асавке информацие хем на џанена о чачипе башо е Јеховаскоро народо, бут мануша тане спотакниме хем на мангена те овен е Јеховаскере сведокија.

8. Спрема Дела 17:11, со ваљани те керен о мануша ако мангена те џанен кој тане е Девлескере слуге авдиве?

⁸ Сар шај некој те на спотакнинел пе? О мануша ваљани те трудинен пе те аракхен о точна информацие баши несави бути. О библиско писатели о Лука трудинѓа пе те керел баш адава. Ов трудинѓа пе внимателно те испитинел са таро почеток. Ов мангља адала мануша со читинена сине лескоро евангелие те овен сигурна ко адава со шунѓе башо Исус (Лука 1:1-4). О мануша тари пурани диз Верија сине слична сар о Лука. Кеда прво пути шунѓе о шукар хабери башо Исус, внимателно истражинѓе о хебрејска списија те шај те дикхен дали тано точно адава со шунѓе. (Читин Дела 17:11.) Ко слично начин, о мануша да авдиве ваљани те испитинен са о информацие. Ола мора  те спорединен адава со вакерела е Девлескоро народо адалеа со вакерела и Библија. Исто аѓаар, ваљани те проучинен со керѓа е Девлескоро народо ко амаро време. Ако шукар истражинена о информацие, нане те дозволинен о предрасуде или адава со вакерена о јавера те којрарел лен.

9. Со уло кеда о Исус одбинѓа те сикавел знако таро небо?

⁹ Несаве мануша ко е Исусескоро време на сине задоволна таро буќа со сикавела лен сине ов. Ола мангена сине нешто повише. Те шај те докажинел кај ов тано о Месија ола родинѓе лестар те сикавел „знако таро небо“ (Мат. 16:1). Изгледа ола родинѓе лестар адава адалеске со читинѓе о Даниел 7:13, 14, хем погрешно халиле ле. Ама, панда на сине о време о Јехова те исполнинел адава пророштво. Адава со сикавела лен сине о Исус ваљани сине те овел доволно те уверинел лен кај ов тано о Месија. Ама, кеда одбинѓа те сикавел ленге о знако со ола родинѓе, ола спотакнинѓе пе (Мат. 16:4).

10. Сар о Исус исполнинѓа адава со вакерѓа о Исаија башо Месија?

¹⁰ Со вакерела и Библија? О пророко о Исаија башо Месија вакерѓа: „Ов нане те викинел хем нане те ваздел пло гласо, лескоро гласо нане те шунѓол ко улице“ (Иса. 42:1, 2). О Исус керѓа пли служба ко јекх скромно начин. Ов на градинѓа баре храмија хем на уравѓа посебна религиозна шеја, а исто аѓаар на мангља о мануша те ден ле важна религиозна титуле. Џикоте судинена ле сине, о Исус одбинѓа те воодушевинел е царе е Ироде адалеа со ка керел чудо иако лескоро живото сине ки опасност (Лука 23:8-11). О Исус керѓа некобор чудија, ама лескири главно цел сине те проповединел о шукар хабери. Ов вакерѓа пле учениконге: „Адалеске аљум“ (Мар. 1:38).

11. Саво погрешно мислење иси несавен авдиве?

¹¹ Дали иси исто проблеми авдиве да? Оја. Авдиве бут џене тане воодушевиме таро баре религиозна градбе сој тане бут скупо  украсиме, таро религиозна водачија со иси лен важна титуле хем таро церемоние со побаро дело таро мануша на џанена кај иси лен паганско потекло или значење. Ама, со сикљона о мануша башо Девел хем лескири намера кеда присуствујнена ко акала религиозна службе? Окола со авена ко амаре состанокија сикљовена со о Јехова родела амендар те кера хем сар те постапина според лескири волја. Амаре дворане тане чиста хем скромна тхана кола со нане скупо украсиме. Адала со предводинена на уравена посебна шеја хем нане лен важна титуле. Адава со сикаваја е манушен хем со верујнаја авела тари Библија. Сепак, бут џене авдиве спотакнинена пе адалеске со мислинена кај амаро начин сар обожавинаја е Девле тано бут едноставно хем адава со сикаваја нане адава со ола мангена те шунен.

12. Сар сој објаснимо ко Евреите 11:1, 6, ко со ваљани те градина амари вера?

¹² Сар шај те на спотакнина амен? О апостол Павле вакерѓа е христијаненге таро Рим: „И вера авела тари порака со шунаја, а и порака ширинела пе кеда керела пе лафи башо Христос“ (Рим. 10:17). Значи, амен градинаја амари вера адалеа со проучинаја и Библија, а на адалеа со учествујнаја ко религиозна церемоние со нане библиска, бизи разлика кобор изглединена шуже. Амен мора те градина зорали вера која со темелинела пе ко точно пенџарибе соске „бизи вера нашти те угодина е Девлеске“. (Читин Евреите 11:1, 6.) Адалеске, те шај те ова сигурна кај аракхлем о чачипе на ваљани аменге јекх посебно знако таро небо. Адава со внимателно ка проучина о библиска сикљојба тано доволно те уверинел амен кај иси амен о чачипе хем ка цидел амендар секоја сумња.

13. Соске бут џене осудинѓе е Исусе?

¹³ Ко е Исусескоро време, о ученикија таро Јован Крстител сине изненадиме адалеске со е Исусескере ученикија на постинена сине. О Исус објаснинѓа кај нане лен  причина те постинен соске ов панда сине џивдо (Мат. 9:14-17). Сепак, о фарисеија хем е Исусескере противникија осудинена ле сине адалеске со на икерела пе сине ко ленгере традицие. Ола хољанѓе кеда ов сасљарѓа несаве насвале манушен ко сабат (Мар. 3:1-6; Јован 9:16). Тари јекх страна ола дичинена пе сине те вакерен кај икерена о закони башо сабат, а тари јавер страна керена сине бизнис ко храми. Ола сине бут хољаме кеда о Исус осудинѓа лен башо адава (Мат. 21:12, 13, 15). Хем адала со сине ки синагога ко Назарет каске о Исус проповединѓа сине бут хољаме кеда о Исус користинѓа примерија тари израелско историја те сикавел ленге кај ола тане себична хем кај нане лен вера (Лука 4:16, 25-30). Бут џене спотакнинѓе пе таро Исус адалеске со ов на керѓа о буќа аѓаар сар ола со очекујнѓе (Мат. 11:16-19).

14. Соске о Исус осудинѓа о манушикане традицие кола со на сине ко склад е Девлескере Лафеа?

¹⁴ Со вакерела и Библија? О Јехова преку пло пророко о Исаија вакерѓа: „Акава народо дела ман чест само пле лафенцар хем славинела ман само пле мујеа, ама лескоро вило тано дур мандар, дарала мандар, адалеске со сиклило адава таро манушикане заповедија“ (Иса. 29:13). Е Исусе сине ле право кеда осудинѓа о манушикане традицие адалеске со ола на сине ко склад е Девлескере Лафеа. Адала кола со мислинѓе кај о правилија хем о традицие таро мануш тане поважна тари Библија, отфрлинѓе е Јехова хем е Месија кова со сине бичхалдо лестар.

15. Соске авдиве бут мануша на мангена е Јеховаскере сведокон?

¹⁵ Дали иси исто проблеми авдиве да? Оја. Бут џене тане разочариме таро е Јеховаскере сведокија адалеске со на славинена ленцар заедно о прославе со нане ко склад е Библијаја, сар на пример о бијандо диве или о Божико. Јавера хољанена кеда е Јеховаскере сведокија на славинена ленцар о национална празникија или кеда на керена о обичаија парујбаске со нане ко склад е Библијаја. Адала со спотакнинена пе таро е Јеховаскере сведокија таро акала причине, шај чаче верујнена кај о Девел прифатинела ленгоро начин сар обожавинена ле. Ама, ола нашти те угодинен леске ако повише мангена о традицие таро акава свето наместо о чиста сикљојба со аракхљона ко е Девлескоро Лафи (Мар. 7:7-9).

16. Спрема Псалм 119:97, 113, 163-165, со мора те кера хем со мора те избегина?

¹⁶ Сар шај те на спотакнина амен? Ваљани бут те манга е Јеховаскере законија хем лескере начелија. (Читин Псалм 119:97, 113, 163-165.) Кеда мангаја е Јехова, ка отфрлина са о традицие со ов на прифатинела лен. Нане те дозволина ништо те овел поважно таро амаро мангипе спрема о Девел.

17. Со очекујнѓе бут Евреија те керел о Месија?

¹⁷ Несаве ко е Исусескоро време мангена сине промене ки влада. Ола очекујнена сине о Месија те ослободинел лен тари римско влада. Ама, кеда ола мангле те керен е Исусе ленгоро цари, ов одбинѓа (Јован 6:14, 15). О свештеникија хем о јавера дарана сине кај о Исус ка менинел и влада соске тегани о Римјања ка хољанен сине хем ка лен сине и моќ со денѓе лен. Адалеске со сине загрижиме баши политичко ситуација бут Евреија на прифатинѓе е Исусе.

18. Кола пророштвија тари Библија башо Месија на мангле те хаљовен бут мануша?

¹⁸ Со вакерела и Библија? Иако бут пророштвија вакерѓе кај о Месија ка овел силно Војнико, јавера пророштвија сикавена кај ов прво мора сине те мерел башо амаре гревија (Иса. 53:9, 12). Тегани соске е Евреен сине  лен погрешна очекувања башо Месија? Бут џене ко е Исусескоро време на мангле те хаљовен о пророштвија кола со на вакерена сине кај одма ка решинен пе ленгере проблемија (Јован 6:26, 27).

19. Кола погрешна очекувања керѓе те спотакнинен пе бут мануша авдиве?

¹⁹ Дали иси исто проблеми авдиве да? Оја. Бут џене авдиве спотакнинена пе адалеске со сием неутрална ки политика. Ола очекујнена амендар те гласина ко изборија. Ама, ако амен биринаја мануше те владинел аменцар, тегани одбинаја е Јехова (1. Сам. 8:4-7). О мануша исто аѓаар мислинена кај ваљани те градина школе хем болнице хем те кера јавера буќа со ка поможинен е манушенге. Ола спотакнинена пе адалеске со амен концентриринаја амен ко проповедибе, а на те решина о проблемија со иси ко свето.

20. Спрема адава со вакерѓа о Исус ко Матеј 7:21-23, со ваљани те овел аменге најважно?

²⁰ Сар шај те на спотакнина амен? (Читин Матеј 7:21-23.) Амен главно ваљани те концентририна амен те кера адава со заповединѓа аменге о Исус (Мат. 28:19, 20). На ваљани те дозволина и политика хем о проблемија таро акава свето те лен амаро внимание. Амен мангаја е манушен хем грижинаја амен башо ленгере проблемија. Ама, амен џанаја кај најшукар шај те поможина ленге адалеа со ка сикава лен башо е Девлескоро Царство хем ка поможина ленге те овен паше амала е Јеховаја.

21. Ко со ваљани те ова одлучна?

²¹ Ки акаја статија, дикхлем штар причине соске несаве мануша спотакнинѓе пе хем адалеске отфрлинѓе е Исусе ко прво веко, хем соске отфрлинена е Исусескере ученикон авдиве. Ама, дали ваљани само акала буќа те избегина? На. Ки следно статија, ка дикха панда штар јавера причине соске бут џене спотакнинена пе. Ваљани те ова одлучна те на спотакнина амен хем понадари да те овел амен зорали вера!