Дали џанљан?
Дали о мануша таро библиско време користинѓе о папирус те керен бродија?
О растение папирус
ПЕНЏАРДО тано кај о мануша таро пурано Египет пишинена сине ко материјали со сине кердо таро растение папирус. Исто аѓаар, о Гркија хем о Римјања пишинена сине ко папирус. * Ама, бут мануша на џанена кај о папирус на користинела пе сине само пишибаске, него исто аѓаар, лестар керена пе сине бродија да.
Макете таро дуј бродија кола со аракхле ки јекх египетско гробница
Англедер повише таро 2.500 берш, о пророко о Исаија пишинѓа кај о мануша кола со живинена „ко подрачје таро етиопска реке“ бичхалѓе „пратеникија преку море те накхен о пани броденцар таро папирус“. Исто аѓаар, покасно о Еремија пророкујнѓа кај, кеда ка нападинен о Вавилон, о Медијција хем о Персијција ка тхарен „о бродија тари папирусно трска“ те шај те чхинавен е Вавилонцон те нашен (Иса. 18:1, 2; Ерем. 51:32).
Адалеске со и Библија авела таро Девел, окола со проучинена ла нане изненадиме таро археолошка доказија кола со сикавена кај о папирус чаче користинела пе сине те керен пе бродија ко библиска времија (2. Тим. 3:16). Со сине откримо? О археолозија аракхле јасна доказија кола со потврдинена кај о Египќања керена сине бродија таро папирус.
САР КЕРЕНА ПЕ СИНЕ БРОДИЈА ТАРО ПАПИРУС?
Ко египетска гробнице аракхле цртиме хем резбиме слике ко ѕидо кола со сикавена сар о мануша кхедена папирус хем лестар керена бродија. О мануша чхинена сине о стеблија таро папирус, пхандена лен сине ки купа хем о купе пхандена сине заедно. О стебло таро папирус иси ле триаголно форма. Адалеске кеда пхандена пе заедно ола тане цврста хем стабилна. Ко јекх лил баши историја таро Египет вакерела пе кај несаве бродија таро папирус сине дугачка преку 17 метре, а ки ленде сине тхан башо 10 џи ко 12 весле тари секоја страна.
Резбими слика ко ѕидо сар керела пе броди таро папирус
СОСКЕ КЕРЕНА ПЕ СИНЕ БРОДИЈА ТАРО ПАПИРУС?
Ко Египет, о папирус бут бајрола сине ки долина коте со тхавдела сине и река Нил. Освен адава, локхо сине те керел пе бродија таро папирус. Чак кеда о мануша почминѓе те користинен каш те керен пе баре бродија, о рибарија хем о ловџије понадари да користинена сине о папирус те керен тикне бродија.
О бродија таро папирус користинена пе сине панда бут време. О грчко писатели Плутарх, кова со живинела сине негде ко почеток таро 2 веко а.е., вакерѓа кај несаве мануша панда керена сине бродија таро папирус.
^ пас. 3 О растение папирус бајрола ко мочуриште хем ко мирна реке со тхавдена бавно. Акава растение шај те бајрол џи ко 5 метре, а лескоро стебло ко почеток шај те овел широко 15 сантиметре.
