1-2. Со вакерѓа јекх писатели хем со ка дикха ки акаја статија?

АВДИВЕ милиоња мануша вакерена кај верујнена ко Исус, ама на прифатинена о буќа со ов сикавѓа лен (2. Тим. 4:3, 4). Уствари, јекх писатели вакерѓа: „Ако авдиве би овела сине јавер ’Исус‘ машкар аменде кова со вакерела о буќа ко начин сар со вакерѓа лен о Исус, дали ка отфрлина адале мануше исто сар со отфрлинѓе о мануша е Исусе англедер 2.000 берша? О одговор тано оја, ка отфрлина ле“.

² Бут мануша, ко прво веко, шунѓе е Исусе сар сикавела хем дикхле сар керела чудија, ама на верујнѓе ки лесте. Соске? Ки англуни статија, дикхлем штар причине соске о мануша спотакнинѓе пе таро адава со вакерѓа хем со керѓа о Исус. Акана те дикха панда штар причине. Исто аѓаар, ка дикха соске о мануша авдиве отфрлинена е Исусескере ученикон хем сар шај амен те на спотакнина амен.

3. Со керѓа о Исус со несаве спотакнинѓе пе?

³ Кеда о Исус сине ки Пхув ов дружинела пе сине различна манушенцар. Ов хала сине заедно е барваленцар хем е моќна манушенцар, ама повише таро пло време користинела сине те овел е манушенцар сој чороле хем мучиме. Ов исто аѓаар сине сочувствително околенцар со о јавера дикхена лен сине сар „грешникија“. Несаве мануша со дикхена пе сине сар праведна спотакнинена пе сине таро е Исусескере постапке. Ола пучле лескере ученикон: „Соске хана хем пиена е даночниконцар хем е грешниконцар?“ А о Исус одговоринѓа ленге: „Е састе манушенге на ваљани доктори, него е насваленге. Ме на аљум те викинав е праведна манушен,  него е грешникон те каинен пе“ (Лука 5:29-32).

4. Спрема о пророко о Исаија, со ваљани сине те очекујнен о Евреија башо Месија?

⁴ Со вакерела и Библија? Бут време англедер те авел о Месија, о пророко о Исаија вакерѓа баши лесте кај о свето нане те прифатинел ле. О пророштво вакерела сине: „Сине понижимо хем о мануша избегинена ле сине. Иранаја сине амаро шеро те на дикха лескоро муј. Сине понижимо хем на врединела сине аменге ништо“ (Иса. 53:3). О пророштво вакерела кај о Месија ка овел избегимо „таро мануша“, адалеске о Евреија таро прво веко ваљани сине те очекујнен кај о Исус ка овел отфрлимо.

5. Сар бут џене авдиве дикхена ко е Исусескере следбеникија?

⁵ Дали иси исто проблеми авдиве да? Оја. Бут свештеникија мангена те прифатинен сар членија ко пле цркве манушен сој тане важна, барвале хем колен со о свето дикхела лен сар мудра. Ола дозволинена асавке манушенге те овен дело тари ленгири црква иако керена буќа кола со о Јехова мрзинела лен. Адала религиозна водачија понижинена адален сој тане ревна е Јеховаске хем сој тане морално чиста, адалеске со повише мануша таро акава свето мислинена кај ола нане важна. Сар со вакерѓа о Павле о Девел прифатинела околен сој тане „понижиме е јаверендар“ (1. Кор. 1:26-29). Е Јеховаске, са лескере верна слуге тане скапоцена.

6. Со вакерѓа о Исус ко Матеј 11:25, 26, хем сар шај амен да те џа пало лескоро пример?

⁶ Сар шај те на спотакнина амен? (Читин Матеј 11:25, 26.) Ма дозволин те влијајнел упри туте адава сар дикхела о свето е Девлескере народо. Хаљов кај о Јехова користинела само е понизна манушен те керен лескири волја (Пс. 138:6). Хем, размислин башо адава кобор бут буќа ов керѓа преку о мануша коленге со о свето мислинела кај нане мудра хем интелегентна.

7. Соске о Исус вакерѓа е фарисеенге кај тане лицемерна, хем сар ола реагиринѓе?

⁷ О Исус храбро осудинела сине е религиозна водачен таро адава време, адалеске со на сикавена сине е манушен те обожавинен е Јехова ко исправно начин. На пример, ов осудинела сине е лицемерна фарисеен кола со повише грижинена пе сине сар ка тховен пумаре васта него сар ка грижинен пе пумаре родителенге (Мат. 15:1-11). Е Исусескере ученикија сине изненадиме таро лескере лафија, адалеске ола пучле ле: „Дали џанеа кај о фарисеија вреџинѓе пе кеда шунѓе со вакерѓан?“ О Исус одговоринѓа ленге: „Секова растение со на садинѓа ле мло небесно Дад ка овел откорнимо. Мукхен лен. Ола тане короле водачија. А кеда короло ка водинел короле, о солдуј ка перен ки дупка“ (Мат. 15:12-14). Иако о религиозна водачија сине хољаме е Исусеске адалеске со вакерѓа адала буќа, о Исус на чхинавѓа те вакерел о чачипе.

8. Сар о Исус сикавѓа кај са о религиозна верувања нане прифатлива е Девлеске?

⁸ О Исус исто аѓаар откринѓа кај несаве религиозна сикљојба тане погрешна. Ов на вакерѓа кај са адава ко со верујнена о религие тано прифатливо е Девлеске. Наместо адава, ов вакерѓа кај бут мануша ка џан ко бувло друмо кова со ингарела ко уништување, а само некобор ка овен ко тесно друмо кова со ингарела ко живото (Мат. 7:13, 14). О Исус јасно вакерѓа кај несаве мануша ка вакерен кај служинена е Девлеске, ама уствари ола нане те служинен леске. Ов предупрединѓа: „Аракхен тумен таро ховавне пророкија, кола со авена туменде ко бакхране мортика,  а андралдан тане сар бокхале рува. Таро ленгере плодија ка пенџарен лен“ (Мат. 7:15-20).

9. Кола тане несаве ховавне сикљојба кола со откринѓа лен о Исус?

⁹ Со вакерела и Библија? О библиско пророштво вакерѓа кај о Месија ка овел ревно башо е Девлескоро кхер (Пс. 69:9; Јован 2:14-17). Адаја ревност поттикнинѓа е Исусе те откринел о ховавне религиозна сикљојба хем обичаија. На пример, о фарисеија верујнена сине кај и душа на мерела, а о Исус вакерѓа кај о муле совена (Јован 11:11). О садукеија на верујнена сине ко воскресение, ама о Исус воскреснинѓа пле амале е Лазаре (Јован 11:43, 44; Дела 23:8). О фарисеија верујнена сине кај о Девел пишинела е манушескири судбина, ама о Исус сикавела сине кај о мануш коркори шај те биринел дали ка служинел е Девлеске или на (Мат. 11:28).

10. Соске бут џене тане спотакниме таро амаре сикљојба?

¹⁰ Дали иси исто проблеми авдиве да? Оја. Бут џене спотакнинена пе адалеске со користинаја и Библија те сикава ленге кај несаве религиозна сикљојба тане погрешна. О свештеникија сикавена пумаре следбеникон кај о Девел казнинела е лошна манушен ко пекол. Ола користинена адава ховавно сикајбе те шај те контролиринен е манушен. Сар е Јеховаскере слуге, кола со обожавинена е Девле е мангипаскоро, амен откринаја адава ховавно сикајбе. О свештеникија исто аѓаар сикавена кај и душа на мерела. Ако акава сикајбе тано чаче, тегани никој на ваљани те воскреснинел. Амен докажинаја кај акава сикајбе нане тари Библија. Иако бут религие сикавена е манушен те верујнен ки судбина, амен сикаваја е манушен кај иси амен слободно волја хем кај секој шај те биринел дали ка служинел е Девлеске. Сар реагиринена о религиозна водачија кеда амен откринаја кај тане ховавне учителија? Често, ола тане бут хољаме!

11. Спрема е Исусескере лафија таро Јован 8:45-47, со родела о Девел пле народостар?

¹¹ Сар шај те на спотакнина амен? Ако мангаја о чачипе амен мора те верујна хем те шуна адава со вакерела о Девел. (Читин  Јован 8:45-47.) Спротивно таро Сатана, амен никогаш нане те отфрлина о чачипе. Амен никогаш нане те кера нешто со нане ко склад адалеа со верујнаја (Јован 8:44). О Јехова родела пле народостар те керен адава со керѓа о Исус, те „мрзинен о лошнипе“ хем те „икерен пе ко адава сој шукар“ (Рим. 12:9; Евр. 1:9).

12. Соске о начин сар муло о Исус керѓа бут Евреија те спотакнинен пе?

¹² Која сине и јавер причина соске несаве Евреија спотакнинѓе пе таро Исус? О Павле вакерѓа: „Амен проповединаја кај о Христос сине мудардо ко стубо, а е Евреенге адава сине бар сопкибаске“ (1. Кор. 1:23). Соске буте Евреенге сметинѓа о начин сар сине мудардо о Исус? Спрема ленде, адава со о Исус муло ко стубо керѓа те изглединел кај ов тано криминалцо хем грешнико, а на Месија (5. Мој. 21:22, 23).

13. Со на халиле окола со спотакнинѓе пе таро Исус?

¹³ Несаве Евреија со спотакнинѓе пе таро Исус, на халиле кај ов на сине криво, кај ов сине погрешно обвинимо хем кај леа постапинѓе неправедно. Адаленге со судинѓе е Исусе, на сине важно и правда. О судие таро Еврејско Судско совет сигате кхединѓе пе те осудинен ле хем на икерѓе пе ко закони (Лука 22:54; Јован 18:24). Наместо непристрасно те шунен о обвиненија хем о доказија против о Исус, адала судие чак мангле те аракхен „ховавно сведоштво против о Исус те шај те мударен ле“. Ама, на успејнѓе ко адава, адалеске о првосвештенико мангља те чхивел е Исусе те вакерел нешто погрешно те шај те вакерен кај ов тано криво. Адава сине против о закони (Мат. 26:59; Мар. 14:55-64). Исто аѓаар, откеда о Исус воскреснинѓа, акала неправедна судие платинѓе бут паре е римско војникон со аракхена сине лескоро гробо те шај те ховавен соске о гробо сине чучо (Мат. 28:11-15).

14. Со пророкујнѓа е Девлескоро Лафи башо е Месијаскоро мерибе?

¹⁴ Со вакерела и Библија? Иако ко е Исусескоро време бут Евреија на очекујнѓе о  Месија те мерел, дикх со вакерѓа јекх пророштво таро е Девлескоро Лафи: „Ов денѓа пло живото хем сине чхивдо машкар о грешникија. Ингарѓа о грево буте манушенгоро хем сине посреднико е грешниконге“ (Иса. 53:12). Адалеске, е Евреен на сине лен причина те спотакнинен пе кеда о Исус сине мудардо сар грешнико.

15. Саве обвиненија против е Јеховаскере сведокија керѓе несаве те спотакнинен пе?

¹⁵ Дали иси исто проблеми авдиве да? Сигурно! О Исус сине неправедно обвинимо хем осудимо, а о мануша авдиве исто адава керена е Јеховаскере сведоконге. Те дикха несаве примерија. Ки Америка машкар о 1930 берш џи ко 1950 берш, сине бут судска случаија коте со бранинела пе сине амари слобода те обожавина е Девле. Несаве судиен сине лен предрасуде спрема аменде. Ко Квебек (Канада) и црква хем и држава заедно соработинена сине те чхинавен амаре активностија. Бут објавителија сине пханле само адалеске со вакерена сине е манушенге башо е Девлескоро Царство. Ки нацистичко Германија, бут верна терне пхраља сине мударде. Ко последна берша бут таро амаре пхраља ки Русија тане обвиниме хем чхивде ко затвор адалеске со керена лафи баши Библија, а о властија башо акала активностија вакерѓе кај тане „екстремистична“. Чак о Свето писмо — превод Нов свет ки руско чхиб тано забранимо хем прогласимо сар „екстремистичко материјали“ адалеске со користинела о анав Јехова.

16. Сар сој истакнимо ко 1. Јованово 4:1, соске ваљани те на ова заведиме таро ховавне буќа сој тане вакерде башо е Јеховаскоро народо?

¹⁶ Сар шај те на спотакнина амен? Дознајн о фактија! Ки пли Проповед ки гора, о Исус предупрединѓа околен со шунена ле сине кај несаве „ка вакерен разна лошна, ховавне буќа против ленде“ (Мат. 5:11). Акала ховајба авена таро Сатана. Ов влијајнела упро о противникија те ширинен злобна ховајба башо окола со мангена о чачипе (Отк. 12:9, 10). Амен мора те отфрлина о ховајба со вакерена лен амаре противникија. Никогаш ма те дозволина асавке ховајба те даравен амен или те слабонкерен амари вера. (Читин 1. Јованово 4:1.)

17. Соске шај сине несаве те спотакнинен пе таро адава со случинѓа пе англедер е Исусескоро мерибе?

¹⁷ Кратко англедер те мерел јекх таро 12 апостолија е Исусескере издајнѓа ле. Јавер апостоли откажинѓа пе е Исусестар трин пути, хем са лескере апостолија мукхле ле коркори и рат англедер те мерел (Мат. 26:14-16, 47, 56, 75). О Исус на сине изненадимо. Ов чак пророкујнѓа кај ка случинел пе адава (Јован 6:64; 13:21, 26, 38; 16:32). Кеда случинѓе пе асавке буќа несаве шај сине те одлучинен те на овен е Исусескере ученикија хем те мислинен: „Ако е Исусескере апостолија понашинена пе аѓаар, ме на мангава те овав јекх лендар!“

18. Кола пророштвија исполнинѓе пе кратко англедер те мерел о Исус?

¹⁸ Со вакерела и Библија? Веконцар англедер, о Јехова откринѓа ко пло Лафи кај о Месија ка овел издајмо 30 сребрениконге (Зах. 11:12, 13). Адава со ка издајнел ле ка овел јекх таро лескере паше амала (Пс. 41:9). Исто аѓаар, о пророко о Захарија пишинѓа: „Кхув е пастире хем нека нашен о бакхре таро стадо“ (Зах. 13:7). Наместо те спотакнинен пе таро акала настанија, и вера е искрено манушенгири ваљани сине те овел позорали кеда дикхле сар исполнинѓе пе акала пророштвија упро Исус.

19. Со џанена о искрена мануша?

 ¹⁹ Дали иси исто проблеми авдиве да? Оја. Ко амаро време некобор пенџарде Сведокија, чхинавѓе те служинен е Јеховаске уле отпадникија хем пробинѓе јаверен да те циден пеа. Ола ширинена негативна извештаија, информацие со екваш тане точна хем ховајба башо е Јеховаскере сведокија ко новине, ко радио, ки телевизија хем ко интернет. Ама, о искрена мануша на спотакнинена пе таро адава. Наместо адава, ола џанена кај и Библија англедер пророкујнѓа кај ка случинен пе асавке буќа (Мат. 24:24; 2. Пет. 2:18-22).

20. Со ка поможинел аменге те на спотакнина амен таро адала со чхинавена те служинен е Јеховаске? (2. Тимотеј 4:4, 5).

²⁰ Сар шај те на спотакнина амен? Ваљани понадари да амари вера те кера зорали адалеа со редовно ка проучина, стално ка молина амен, хем ка ова зафатиме ки служба која со денѓа ла аменге о Јехова. (Читин 2. Тимотеј 4:4, 5.) Ако иси амен вера, тегани нане те дара кеда шунаја лошна информацие башо е Јеховаскере сведокија (Иса. 28:16). Амаро мангипе спрема о Јехова, спрема лескоро Лафи хем спрема амаре пхраља хем пхења ка поможинел аменге те на спотакнина амен таро адала со чхинавена те служинен е Јеховаске.

21. Иако бут мануша авдиве одбинена амари порака, ко со шај те ова сигурна?

²¹ Ко е Исусескоро време бут џене спотакнинѓе пе хем отфрлинѓе ле. Ама, бут јавера џене прифатинѓе ле. Машкар ленде сине најхари јекх члени таро еврејско Судско совет хем чак „бут свештеникија“ (Дела 6:7; Мат. 27:57-60; Мар. 15:43). Авдиве да милиоња мануша на спотакнинена пе. Соске? Адалеске со ола џанена хем мангена о чачипа со аракхљона ки Библија. Е Девлескоро Лафи вакерела: „Баро мир иси околен со мангена тло закони, ништо нашти те спотакнинел лен“ (Пс. 119:165).