1-2. Саве проблеменцар боринена пе бут Сведокија?

О АПОСТОЛ Павле охрабринѓа е Тимотее, а исто аѓаар са е христијанен, те керен целосно пумари служба (2. Тим. 4:5). Адалеске амен шунаја е Павлескоро совет хем даја амаро најшукар ки служба башо Девел. Ама, понекогаш иси несаве предизвикија. Буте пхраленге хем пхењенге ваљани храброст те шај те проповединен (2. Тим. 4:2). На пример, размислин башо пхраља хем пхења кола со живинена ко пхувја коте о проповедибе тано ограничимо или чак забранимо. Ола проповединена иако шај ка овен чхивде ко затвор!

² Е Јеховаскоро народо мора те боринел пе различна проблеменцар хем адава шај те обесхрабринел ле. На пример, бут џене лендар мора те керен бут бути, те шај те грижинен пе башо основна потребе пумаре фамилиенге. Ола шај мангена те керен повише ки служба, ама нане лен сила ко крајо таро курко. Јавера шај бут хари те керен ки служба башо Девел, адалеске со иси лен хронично насвалипе или тане пхуре хем адалеске нашти икљовена кхералдан. Несаве осетинена пе кај на врединена ништо англо е Јеховаскере јакхја. Јекх пхен, која со викинела пе Марија, * вакерела: „Мора бут те боринав ман мле негативна чувствонцар хем адава керела ман те овав обесхрабрими. Тегани осетинава ман криво соске адава лела мло време хем сила тари служба“.

3. Со ка дикха ки акаја статија?

³ Бизи разлика саве тане амаре околностија, о Јехова шај те дел амен сила те икљова ко крајо амаре проблеменцар хем понадари да те служина леске најшукар со шај спрема амаре околностија. Англедер те дикха сар шај о Јехова те поможинел аменге, те дикха сар денѓа сила е Павлеске хем е Тимотееске те шај те керен пумари служба иако сине лен предизвикија.

4. Саве проблемија сине е Павле?

⁴ Е Павле сине ле бут проблемија. Леске посебно ваљани сине сила кеда сине мардо, каменујмо хем чхивдо ко затвор (2. Кор. 11:23-25). О Павле признајнѓа кај понекогаш боринела пе сине негативна чувствонцар (Рим. 7:18, 19, 24). Исто аѓаар, ле сине ле проблемија састипаја кова со сине сар „каро ко тело“, хем бут мангела сине о Девел те цидел лестар адава (2. Кор. 12:7, 8).

5. Со шај сине те керел о Павле иако сине ле проблемија?

⁵ О Јехова денѓа е Павлеске сила те шај понадари да те керел пли служба иако сине ле бут проблемија. Те дикха со керѓа о Павле. На пример, џикоте сине ко затвор ко јекх кхер ко Рим, ов ревно проповединела сине о шукар хабери е еврејско водаченге хем шај несаве службениконге да (Дела 28:17; Фил. 4:21, 22). Ов исто аѓаар, проповединела сине буте стражаренге хем са околенге со авена сине те посетинен ле (Дела 28:30, 31; Фил. 1:13). Ко исто време, о Девел користинѓа е Павле те пишинел писмија со поможинѓе е христијаненге ко адава време, а исто аѓаар поможинена аменге авдиве да. Исто аѓаар, е Павлескоро пример охрабринѓа е пхрален таро собрание ко Рим хем адалеске ола сине поспремна панда похрабро те објавинен е Девлескоро Лафи, бизо те даран (Фил. 1:14). Иако о Павле нашти керела сине кобор со мангела, ов ки пли ситуација керѓа пло најшукар со шај хем адалеа поможинѓа „те ширинел пе о шукар хабери“ (Фил. 1:12).

6. Спрема 2. Коринќаните 12:9, 10, со поможинѓа е Павлеске те керел пли служба?

⁶ О Павле џанља кај са со керѓа ки служба башо Јехова на керѓа ле пле силаја, него е Девлескере силаја. Ов вакерѓа кај е Девлескири сила „целосно сикавела пе“ кеда сием слаба. (Читин 2. Коринќаните 12:9, 10.) Преку пло свети дух, о Јехова денѓа е Павлеске сила те керел пли служба, иако сине ле прогонство, сине пханло хем сине ле јавера проблемија.

7. Саве проблемија о Тимотеј ваљанѓа те накхавел те шај те керел пли служба?

⁷ Е Тимотееске, кова со сине е Павлескоро потерно соработнико, исто аѓаар ваљанѓа леске сила таро Девел те шај те керел пли служба. О Тимотеј џала сине е Павлеа ко мисионерска патувања. Освен адава, о Павле бичхалѓа ле ко јавера да патувања  те посетинел хем те охрабринел е пхрален ко јавера собранија (1. Кор. 4:17). О Тимотеј шај мислинѓа кај нане добором способно башо адава. Хем, шај адалеске о Павле вакерѓа леске: „Никој на ваљани те на поштујнел тут адалеске со сиан терно“ (1. Тим. 4:12). Адава време е Тимотее сине ле „каро ко тело“ — често сине насвало (1. Тим. 5:23). Ама, о Тимотеј џанља кај е Јеховаскоро свети дух ка дел ле сила те шај те проповединел о шукар хабери хем те служинел пле пхраленге (2. Тим. 1:7).

8. Сар о Јехова дела сила пле народоске авдиве?

⁸ Авдиве о Јехова дела пле народоске „сила која со накхавела и нормално“ те шај понадари да те служинен леске верно (2. Кор. 4:7). Те дикха штар буќа преку коленде о Јехова зајакнинела амен хем поможинела аменге те ачхова верна леске: и молитва, и Библија, амаре пхраља хем пхења хем амари служба.

9. Сар шај те поможинел аменге и молитва?

⁹ Зајакниме преку и молитва. Ко Ефешаните 6:18, о Павле охрабринела амен те молина е Девле „ки секоја прилика“. О Девел ка одговоринел ко амаре молитве, адалеа со ка поможинел аменге. О Џони, кова со живинела ки Боливија, осетинѓа сар о Јехова поможинѓа леске кеда сине ле некобор проблемија. Лескири ромни хем лескере родителија ко исто време сериозно насвалиле. Бут сине леске пхаро ко исто време те грижинел пе башо секоле јекхескере потребе. Лескири дај мули, хем ваљани сине бут време те накхел те шај лескири ромни хем лескоро дад те сасљон. Кеда размислине башо адава пхаро време, о Џони вакерела: „Кеда сиум сине бут секиримо, секогаш поможинела манге сине адава со молинава ман сине е Јеховаске хем со објаснинава леске сине сар осетинава ман“. О Јехова денѓа е Џониске сила те шај те издржинел. О Роналд, јекх старешина ки Боливија, дознајнѓа кај лескере даја иси ла рако. Пало јекх масек ој мули. Со поможинѓа леске ко адава пхаро периоди? Ов вакерела: „Кеда молинава ман е Јеховаске вакерава леске са со иси ман ко вило хем са со осетинава. Џанава кај ов хаљовела ман пошукар таро било ко јавер, чак ме коркори нашти добором шукар те хаљовав ман“. Понекогаш мислинаја кај нашти те издржина амаре проблемија хем на џанаја башо со те молина амен. Ама, о Јехова мангела те молина амен леске, чак кеда аменге пхаро те објаснина сар осетинаја амен (Рим. 8:26, 27).

10. Сар со пишинела ко Евреите 4:12, соске тано бут важно те читина и Библија хем те размислина баши лате?

¹⁰ Зајакниме преку и Библија. О Павле читинела сине о Списија те шај те добинел сила хем утеха, хем амен да шај те кера адава (Рим. 15:4). Џикоте читинаја е Девлескоро Лафи хем размислинаја баши лесте, преку пло свети дух о Јехова шај те поможинел аменге те хаљова сар и Библија шај те поможинел аменге ки амари ситуација. (Читин Евреите 4:12.) О Роналд, сој спомнимо поангле, вакерела: „Бахтало сиум со развинѓум навика секоја рат те читинав нешто тари Библија. Бут размислинава башо е Јеховаскере особине хем сар ов љубезно грижинела пе пле народоске. Акава поможинела манге палем те овел ман сила“.

11. Сар и Библија денѓа сила јекхе пхењаке со сине тажно?

¹¹ Кеда размислинаја башо адава со читинаја таро е Девлескоро Лафи адава ка поможинел аменге те овел амен исправно стави башо амаре проблемија. Те дикха сар и Библија поможинѓа јекхе пхењаке која со сине  бут тажно адалеске со муло лакоро ром. Јекх старешина денѓа ла предлог те читинел о извештај башо Јов, соске лестар шај те сикљол корисна поуке. Кеда керѓа адава, лакири прво реакција сине те критикујнел е Јове адалеске со погрешно размислинѓа. Ко пле мисле ој предупрединѓа ле: „Јов! Ма мислин само ко тле проблемија, ма ов негативно!“ Ама, тегани халили кај лакоро стави тано слично сар е Јовескоро. Адава поможинѓа лаке, те на концентриринел пе превише ко пле проблемија хем адава денѓа ла сила те икљол ко крајо е дукхаја со нашавѓа пле роме.

12. Сар о Јехова користинела е пхрален хем е пхењен те зајакнинел амен?

¹² Зајакниме преку о пхраља хем о пхења. Јавер начин сар о Јехова зајакнинела е христијанен тано преку о пхраља хем о пхења таро собрание. О Павле пишинѓа кај едвај аџикерела сине заедно те охрабринел пе пле духовна пхраленцар хем пхењенцар (Рим. 1:11, 12). И Марија, сој спомними поангле, мангела те овел пле пхраленцар хем пхењенцар. Ој вакерела: „О Јехова користинѓа пхрален хем пхењен, со чак на џанена сине башо мле проблемија. Ола вакерена сине нешто со охрабринела ман или бичхалена манге сине порака, а адава баш ваљани сине манге. Исто аѓаар, поможинѓа манге те керав лафи е пхењенцар со сине лен слична проблемија хем те сикљовав таро ленгоро искуство. О старешине секогаш керена те осетинав ман кај сиум скапоцено дело таро собрание“.

13. Сар шај те зајакнина амен јекх јекхеа ко состанокија?

¹³ Јекх таро најшукар тхана те охрабрина амен јекх јекхеа тане амаре состанокија. Кеда сиан ко состанок, трудин тут те охрабрине е јаверен адалеа со ка вакере ленге кај мангеа лен хем кај сиан благодарно башо адава со керена. На пример, англедер о состанок, јекх старешина кова со викинела пе Петар, јекхе пхењаке која сој тани коркори ко чачипе вакерѓа: „Бут тано охрабрувачко те дикха тут акате. Секогаш тле шове чхавен уравеа лен фино хем спреминеа лен башо коментарија“. Тари адаја благодарност пхердиле лакере јакхја асва хем вакерѓа: „Чаче ваљанѓа манге те шунав акава авдиве“.

14. Сар поможинела аменге и служба?

¹⁴ Зајакниме преку и служба. Кеда проповединаја е јаверенге осетинаја амен шукар, бизи разлика дали о мануша шунена амен или на (Изр. 11:25). Јекх пхен, и Стејси, доживинѓа кобор сила шај те дел и служба. Кеда некој сине исклучимо тари лакири фамилија, ој сине бут тажно хем пучела пе сине: „Шај ли сине нешто те керав повише те шај те поможинав леске?“ И Стејси стално размислинела сине башо адава проблеми. Со поможинѓа лаке те икљовел ко крајо асавке пхаре ситуацијаја? И служба! Кеда проповединела сине, концентриринѓа пе ко мануша таро лакоро подрачје коленге со шај сине те поможинел. Ој вакерела: „Ко адава време, о Јехова денѓа манге јекхе интересентка која со сигате напредујнела сине. Адава бут охрабринѓа ман. И најбари бути со поможинѓа манге ко мло живото тани и служба“.

15. Со сикљовеа таро е Маријакере лафија?

¹⁵ Несаве шај мислинена кај нашти те керен бут ки служба, адалеске со ленгере околностија на дозволинена ленге. Ако осетинеа тут аѓаар, ма бистре кај о Јехова тано задоволно ако деа тло најшукар. Те дикха палем о пример е Маријакоро. Кеда селинѓа пе ко подрачје коте со керела пе лафи ки јавер чхиб, ој осетинѓа пе кај нашти бут те поможинел адатхе. Ој вакерела: „Несаво време, шај сине те дав само јекх едноставно коментари, те читинав јекх библиско стихо или те  дав јекх трактати ки служба“. Ој мислинела сине кај на сине добором шукар ки споредба е манушенцар кола со керена сине шукар лафи ки адаја чхиб. Ама, ој менинѓа пло размислибе. Ој почминѓа те хаљол кај о Јехова шај те користинел ла иако на керела шукар лафи ки адаја чхиб. Ој вакерела: „О библиска чачипа тане едноставна хем ола шај те менинен е манушенгере животија“.

16. Со шај те поможинел околенге со нашти икљовена таро кхер, ама мангена те проповединен?

¹⁶ О Јехова дикхела хем ценинела амари желба те проповедина, чак кеда нашти икљоваја таро кхер. Адалеске ов шај те поможинел аменге те сведочина околенге со грижинена пе аменге или е докторенге хем е медицинско сестренге. Ако спорединаја адава со кераја акана, адалеа со керѓем поангле, ка обесхрабрина амен. Ама, ако хаљоваја кај о Јехова поможинела аменге акана, ка овел амен сила која со ваљани аменге те издржина било сави неволја хем ка ова бахтале.

17. Спрема Проповедник 11:6, соске ваљани понадари да те проповедина иако на дикхаја одма несаве резултатија?

¹⁷ Амен на џанаја коте ка мукхел корено или коте ка бајрол о семе е чачипаскоро со сејнаја ле. (Читин Проповедник 11:6.) На пример и Барбара, јекх пхен која со иси ла повише таро 80 берш, редовно сведочинела преку телефони хем преку писмија. Ко јекх таро пле писмија чхивѓа и Стражарско кула таро 1 март, 2014 берш е темаја „Со керѓа о Девел баши туте“. * Бизо те џанел, ој бичхалѓа акава писмо јекхе брачно пареске кова со сине исклучимо. Ола читинена сине акава списание бут пути. О ром осетинела пе сине сар те пхене о Јехова директно керела леа лафи. Акава брачно пари почминѓа те авел ко состанокија хем пало повише таро 27 берш, ола уле палем дело таро собрание. Замислин кобор сине охрабрими хем зајакними и Барбара кеда дикхља позитивна резултатија таро лакоро писмо.

18. Со мора те кера те шај те добина сила таро Девел?

¹⁸ О Јехова дела амен бут буќа те шај те зајакнинел амен, сар сој и молитва, и Библија, амаре пхраља хем пхења хем амари служба. Ако користинаја акала буќа, амен сикаваја леске кај иси амен доверба ки лесте кај ов шај те поможинел аменге хем мангела те керел адава. Адалеске, секогаш те овел амен асавки доверба ко амаро небесно Дад, кова со бут мангела „те сикавел пли сила ки корист околенге со служинена леске цело вилеа“ (2. Лет. 16:9).