Акава настан менинѓа мло живото соске поттикнинѓа ман те родав е Девле. Англедер те вакерав туменге со случинѓа пе панда ки адаја рат, мангава те раскажинав туменге некобор буќа со случинѓе пе манге сар чхаво кола со менинѓе мло размислибе хем кола со бајрарѓе и желба ки манде те родав е Девле.

Бијандиљум ко 1937 берш, ки Гесна, јекх рударско диз ки северно Франција. Таро мо дад, кова со сине рудари, сиклиљум кај ваљани те ова буќарне. Ов бут мангела сине и правда, хем адава поттикнинѓа ле те боринел пе башо правија е рударенгере кола со керена сине бути ко опасна условија. Те шај те поможинел ленге, ов сине члени ки јекх организација која со боринѓа пе башо правија е рударенгере хем учествујнела сине ко штрајкија. Исто аѓаар, сине разочаримо таро лицемерство со сикавена сине о свештеникија таро адава тхан. Иако бут лендар сине лен шукар живото, ола родена сине паре хем хајбе таро рударија колен со на сине лен бут башо живото. Ме дадеске, ленгоро понашибе сине бут одвратно хем адалеске никогаш  на сикавѓа ман баши религија. Уствари, никогаш на кераја сине лафи башо Девел.

Сар со бајровава сине, ме да почминѓум те мангав и правда, а те мрзинав и неправда. Јекх бути со бут сметинѓа манге, сине о предрасуде со сине буте манушен спрема о странција ки Франција. Ме кхелава сине фудбал е чхавенцар таро имигрантија хем сине манге шукар ко ленгоро друштво. Освен адава, ми дај сине тари Полска. Мангљум са о мануша те живинен ко мир хем те овен лен о иста правија.

Ко 1957 берш, гељум ки војска. Аѓаар аракхлиљум ко планине ко Алжир ки адаја рат со спомнинѓум ла поангле. Откеда викинѓум: „Девла, поможин манге!“, англи манде иклило јекх диво хер! Локхило манге кеда дикхљум кај на сине несаво душмани. Сепак, акава настан хем и цело војна поттикнинѓе ман посериозно те размислинав башо живото. Пучава ман сине: „Соске сием акате? Дали о Девел грижинела пе аменге? Дали некогаш ка овел чаче мир?“

Покасно кеда гељум кхере те дикхав ман ме родителенцар, запознајнѓум ман јекхе Јеховаскере сведокоја. Ов денѓа ман јекх Библија ки француско чхиб која со сине превод тари католичко црква. Кеда иранѓум ман ко Алжир почминѓум те читинав ла хем посебно свиџинѓе пе манге о лафија таро Откровение 21:3, 4, коте со пишинела: „Е Девлескоро шатори тано машкар о мануша... Хем ов ка косел секоја асвин таро ленгере јакхја, хем мерибе нане те овел више, ни жалибе, ни ројбе, ни дукха“. * Прво пути шунѓум асавке лафија. Пучљум ман: „Дали адава шај те овел чаче?“ Ко адава време на џанава сине скоро ништо башо Девел хем баши Библија.

Ко 1959 берш, кеда иранѓум ман тари војска, запознајнѓум е Франсоа, јекх Сведоко кова со сикавѓа ман бут библиска чачипа. На пример, ов сикавѓа манге тари Библија кај е Девле иси ле анав, Јехова (Пс. 83:18). О Франсоа објаснинѓа манге кај о Јехова ка анел правда ки Пхув хем ка керел ла рај. А исто аѓаар, ка исполнинел о лафија таро Откровение 21:3, 4.

Адала сикљојба сине бут логична хем погодинѓе ман ко вило. Ама исто аѓаар, сиум сине бут хољамо е свештениконге хем мангљум јавно те осудинав лен адалеске со сикавена е манушен буќа со нане ки Библија. Изгледа панда размислинава сине сар мо дад хем мангљум те боринав ман против и неправда. На мангљум те аџикерав, мангљум одма те керав нешто!

О Франсоа хем о јавера Сведокија колен со запознајнѓум, поможинѓе манге те контролиринав мли холи. Ола објаснинѓе манге кај сар христијања амен на ваљани те осудина е јаверен, него те поможина ленге аѓаар со ка вакера ленге о шукар хабери башо Царство. Адава керѓа о Исус хем заповединѓа пле учениконге да те керен (Мат. 24:14; Лука 4:43). Исто аѓаар, ваљанѓум те сикљовав те керав лафи е манушенцар љубезно хем тактично, бизи разлика ко со верујнена. И Библија вакерела: „О робо е Господарескоро на ваљани те акошел пе, него ваљани те овел љубезно сариненцар“ (2. Тим. 2:24).

 Сар со накхела сине о време, керѓум о потреба промене хем ко јекх покраинско конгрес ко 1959 берш крстинѓум ман сар јекх таро е Јеховаскере сведокија. Адатхе запознајнѓум јекхе терне пхења која со викинела пе Анжел хем која со бут свиџинѓа пе манге. Почминѓум некобор пути те џав ко лакоро собрание, хем ко 1960 берш, венчинѓем амен. Ој тани бут шукар ромни хем скапоцено поклон таро Јехова (Изр. 19:14).

Сар со накхена сине о берша, сиклиљум бут важна поуке таро мудра хем искусна пхраља. Јекх таро најважна поуке со сиклиљум тани кај, те шај успешно те кера несави задача, ваљани те ова понизна хем те применина о совет таро Изреки 15:22, коте со пишинела: „О планија успејнена кеда иси бут советникија“.

Ко 1964 берш, почминѓум те хаљовав кобор тане точна акала лафија. Ко адава берш, почминѓум те служинав сар покраинско надгледнико хем посетинава сине о собранија те шај те охрабринав е пхрален хем е пхењен хем те зајакнинав лен ко духовно поглед. Ама, сине ман само 27 берш хем на сине ман бут искуство. Адалеске керѓум грешке. Ама, трудинѓум ман те сикљовав лендар. А највише таро са, сиклиљум бут скапоцена поуке таро зрела хем искусна „советникија“.

Сетинава ман со случинѓа пе манге кеда сиум сине нево ки покраинско служба. Кеда посетинѓум јекх собрание ко Париз, јекх духовно зрело пхрал пучља ман дали шај кратко коркори те керел манцар лафи. Вакерѓум леске: „Оја“.

Ов пучља ман: „Луи, каске о доктори поможинела, е насваленге или е састенге?“

Одговоринѓум леске: „Е насваленге“.

Ов вакерѓа: „Ко право сиан. Ама ме дикхава кај ту повише време сиан адаленцар кола сој тане духовно састе, сар сој о собраниско надгледнико. Ко амаро собрание иси бут пхраља хем пхења кола сој тане обесхрабриме, неве или лаџутне. Ола ка охрабринен пе сине кеда би накхавеа сине ленцар повише време, или барем те џа сине ко ручко ки ленде“.

О совет со денѓа ман акава љубезно пхрал сине ко тхан. Свиџинѓа пе манге кобор баро мангипе сикавѓа спрема е Јеховаске бакхре. Иако сине манге пхаро те прифатинав кај керѓум грешка, одма почминѓум те применинав о совет. Бут сиум благодарно е Јеховаске башо асавке пхраља.

 Ко 1969 берш хем ко 1973 берш, сиум сине именујмо те надглединав о Одделение башо хајбе ко дуј меѓународна конгресија ко Париз. Ко конгрес со икерѓа пе ко 1973 берш хем кова со трајнѓа панџ диве, ваљанѓем околу 60.000 манушенге те грижина амен те овел лен хајбаске. На џанљум сар ка успејна те кера адава. Ама палем, о решение аракхлило ко Изреки 15:22 — роде совет таро мудра мануша. Адалеске родинѓум совет таро духовна зрела пхраља кола со керѓе бути хранаја. Несаве лендар сине касапија, земјоделција, готвачија хем набавувачија. Заедно успејнѓем те кера адаја пхари задача.

Ко 1973 берш, ме хем ми ромни сием сине каниме те служина ко Бетел ки Франција. Мли прво задача адатхе исто сине пхари. Ваљанѓум те аракхав начинија сар те бичхала литература амаре пхраленге ко Камерун, ки Африка, коте со сине забранимо о проповедибе таро 1970 берш џи ко 1993 берш. Палем, на џанљум сар ка керав адава. Веројатно приметинѓа адава о пхрал кова со надглединела сине о проповедибе ки Франција хем адалеске охрабринѓа ман е лафенцар: „Амаре пхрален ко Камерун иси лен бари потреба тари духовно храна. Ајде те хранина лен!“ Хем, адава керѓем.

Некобор пути патујнѓум ко пхувја кола сој тане узо Камерун те шај те аракхав ман е старешиненцар таро Камерун. Адала пхраља сине храбра хем мудра. Ола поможинѓе манге те аракхав начинија те бичхалав редовно литература е пхраленге хем е пхењенге ки ленгири пхув. О Јехова наградинѓа амаро трудо. Уствари, околу 20 берш, е пхраленге хем е пхењенге на фалинѓа нијекх број тари Стражарско кула хем Амари служба башо Царство со икљола сине секова масек.

Панда таро почеток кеда запознајнѓум ман е Анжелаја, дикхљум кај тани духовно. Кеда лелем амен, адава шај сине те дикхав панда повише.  Уствари, ко исто диве кеда венчинѓем амен, ој родинѓа мандар те молинав е Јехова баши амари желба те служина е Јеховаске најшукар со шај сар брачно пари. О Јехова одговоринѓа ки адаја молитва.

Исто аѓаар, и Анжел поможинѓа манге те овел ман повише доверба ко Јехова. На пример, кеда ко 1973 берш сием сине каниме те служина ко Бетел, мислинава ман сине дали те прифатина адаја задача соске бут мангава сине и покраинско служба. Ама, и Анжел сетинкерѓа ман кај денѓем лафи е Јеховаске кај ка служина леске цело живото, хем адалеске ваљани те прифатина секоја задача со добинаја ла тари лескири организација (Евр. 13:17). Ој сине ко право, хем адалеске гелем ко Бетел. Адава со ми ромни тани мудро, разумно хем мангела е Јехова, керѓа амаро брако те овел поцврсто хем поможинѓа аменге те ана шукар одлуке.

Акана кеда сием ко попхуре берша, и Анжел понадари да тани бут шукар ромни хем поддржинела ман. На пример, те шај те посетина о теократска школе, кола со побаро дело икерена пе ки англиско чхиб, ме хем и Анжел почминѓем те сикљова пошукар адаја чхиб. Ко адава сине вклучимо те џа ко собрание коте со керела пе лафи англиски, иако адава време сине амен околу 75 берш. Адалеске со сиум сине члени ко Одбор тари подружница ки Франција, сине манге пхаро те аракхав време те сикљовав англиски. Ама, и Анжел хем ме поможинѓем јекх јекхеске. Иако акана иси амен повише таро 80 берш, понадари да спреминаја амен башо состанокија хем ки англиско хем ки француско чхиб. Исто аѓаар, трудинаја амен кобор со шај те учествујна ко состанокија хем ки служба е собраниеа. О Јехова наградинѓа амаро трудо те сикљова и англиско чхиб.

Ко 2017 берш добинѓем јекх посебно берекети. И Анжел хем ме сием сине каниме те посетина и Школа башо членија таро одборија е подружниценгере хем ленгере ромња која со икерѓа пе ко Образовно центар ко Патерсон, Њујорк.

О Јехова тано о Најбаро Учители (Иса. 30:20). Адалеске сарине амен, хем терне хем пхуре, добинаја и најшукар обука! (5. Мој. 4:5-8). Мле јакхенцар дикхљум сар о терне кола со шунена е Јехова хем е зрела пхрален хем пхењен духовно напредујнена хем овена верна слуге е Јеховаске. О Изреки 9:9 сетинкерела амен: „Сикав е мудро мануше, хем ка овел панда помудро. Сикав е праведнико, хем ка џанел повише“.

Понекогаш, сетинава ман ки адаја страшно рат ко планине ко Алжир англедер 60 берш. Ни најхари на џанљум кај ка овел ман добором шужо живото. Сиклиљум бут таро јавера! О Јехова чаче денѓа манге хем е Анжелаке јекх бут шужо живото. Адалеске, решиме сием никогаш те на чхинава те сикљова таро амаро небесно Дад хем таро мудра хем зрела пхраља хем пхења кола со бут мангена ле.