1. Соске ваљани аменге мудрост со авела таро Девел? (Изреки 4:7).

 КЕДА ваљанѓан те ане несави важно одлука ту сигурно молинѓан тут баши мудрост, соске џанљан кај ваљанѓа туке адава (Јак. 1:5). О цари о Соломон пишинѓа: „И мудрост тани најважно“. (Читин Изреки 4:7.) Џанѓола пе, о Соломон на керѓа лафи баши било сави мудрост. Ов керѓа лафи баши мудрост која со авела таро Јехова (Изр. 2:6). Ама шај ли е Девлескири мудрост те поможинел аменге те икљова ко крајо е проблеменцар со иси амен авдиве? Оја шај. Ки акаја статија ка дикха сар.

2. Кова тано јекх начин сар шај те ова чаче мудра?

² Јекх начин сар шај те ова чаче мудра тано аѓаар со ка проучина хем ка применина о советија таро дуј мануша со сине бут мудра. Прво ка дикха е Соломонескоро пример. И Библија вакерела: „О Девел денѓа е Соломонеске бут бари мудрост хем проникливост“ (1. Цар. 4:29). Дујто, ка дикха е Исусескоро пример кова со сине о најмудро мануш со џи акана живинѓа ки пхув (Мат. 12:42). Баши леске сине пророкујмо: „Е Јеховаскоро духо ка овел упри лесте. Адалеске ов ка овел мудро, бут шукар ка хаљовел о буќа“ (Иса. 11:2).

3. Башо со ка кера лафи ки акаја статија?

³ О Девел денѓа е Соломонеске хем е Исусеске бари мудрост. Адалеске, ола шај сине те ден шукар советија башо буќа кола сој тане сариненге важна. Ки акаја статија ка дикха трин лендар кола со ка поможинен аменге те овел  амен урамнотежено стави башо паре, баши бути хем баши аменде.

4. Сави разлика сине машкар о Соломон хем о Исус кеда керела пе лафи башо материјална буќа?

⁴ О Соломон сине бут барвало хем сине ле луксузно живото (1. Цар. 10:7, 14, 15). А е Исусе сине ле скромно живото хем на сине ле пло кхер (Мат. 8:20). Ама е солдујен сине лен урамнотежено стави башо материјална буќа соске ленгири мудрост авела сине таро Јехова.

5. Саво урамнотежено стави сине е Соломоне башо паре?

⁵ О Соломон џанља кај о паре „тане заштита“ (Проп. 7:12). Е паренцар шај те кина буќа со ваљани аменге хем несаве буќа со мангаја те кина лен. Ама иако сине бут барвало, о Соломон халило кај иси бут буќа со тане поважна таро паре. На пример, ов пишинѓа: „Пошукар тано те бирине шукар анав, него баро барвалипе“ (Изр. 22:1). О Соломон исто аѓаар дикхља кај о мануша кола со мангена о паре обично нане добором бахтале е буќенцар со иси лен (Проп. 5:10, 12). Ов исто аѓаар предупрединѓа амен кај на ваљани те мислина кај о паре тане и најважно бути ко амаро живото, соске сигате шај те нашава лен (Изр. 23:4, 5).

6. Саво урамнотежено стави сине е Исусе башо материјална буќа? (Матеј 6:31-33).

⁶ Е Исусе сине ле урамнотежено стави башо материјална буќа. Ов уживинела сине ко хајбе хем ко пијбе (Лука 19:2, 6, 7). Ки јекх прилика керѓа јекх бут шужи мол хем адава сине лескоро прво чудо (Јован 2:10, 11). А ко диве кеда муло, сине уравдо скупо шеј (Јован 19:23, 24). Ама о Исус на дозволинѓа о материјална буќа те овен и најважно бути ко лескоро живото. Ов вакерѓа пле следбениконге: „Нијекх нашти те служинел дује господаренге. Нашти те служинен хем е Девлеске хем е барвалипаске“ (Мат. 6:24). О Исус сикавѓа амен кај ако родаја најангле о Царство, о Јехова ка  дел амен са сој аменге потребно. (Читин Матеј 6:31-33.)

7. Сар поможинѓа јекхе пхралеске адава со сине ле урамнотежено стави башо паре?

⁷ Бут пхраља хем пхења сине лен корист адалеске со применинѓе е Јеховаскоро мудро совет башо паре. Те дикха е Даниелескоро пример кова со нане ко брако. Ов вакерела: „Кеда сиум сине тинејџери одлучинѓум о духовна буќа те чхивав ко прво тхан ко мло живото“. Адалеске со сине ле скромно живото, о Даниел шај сине те користинел пло време хем пле способностија те шај те керел бут различна буќа ки служба башо Јехова. Ов понадари вакерела: „Шај чаче те вакерав кај никогаш на каинѓум ман баши мли одлука. Џанѓола пе, џи акана сигурно шај сине бут те заработинав, ако о паре би овена сине и најважно бути ко мло живото. Ама тегани на би овена ман сине акала шукар амала со иси ман хем на би овава сине бахтало соске чхивава о Царство ко прво тхан. Нане паре ко свето со шај те меринен пе е берекетенцар кола со добинѓум лен таро Јехова“. Таро акава пример шај те дикха кај тано амаре шукарипаске ако концентриринаја амен ко духовна буќа наместо ко паре.

8. Котар џанаја кај е Соломоне сине ле урамнотежено стави баши бути? (Проповедник 5:18, 19).

⁸ О Соломон вакерѓа кај и бути шај те анел баро бахталипе, баши која со вакерѓа кај тани „поклон таро Девел“. (Читин Проповедник 5:18, 19.) Ов пишинѓа: „Тари секоја пхари бути со керела пе иси корист“ (Изр. 14:23). О Соломон керѓа таро искуство лафи соске сине бут буќарно. Ов керѓа кхера, ниве дракхенцар, градине хем езерија. Исто аѓаар керѓа дизја (1. Цар. 9:19; Проп. 2:4-6). Башо са адава ваљани сине те керел бут бути хем сигурно бут уживинела сине ко адава. Ама о Соломон џанља кај ако мангела те овел чаче бахтало ваљани те керел нешто повише. Адалеске, керѓа исто аѓаар бут буќа е Јеховаске. На пример, сине одговорно те градинел пе о храми башо Јехова. Адава проекти трајнѓа ефта берш! (1. Цар. 6:38; 9:1). Откеда о Соломон керѓа бут различна буќа халило кај и најважно бути тани те служинел пе е Јеховаске. Ов пишинѓа: „Адалеске, со шај те пхена ко крајо? Нека овел тут дар таро чачутно Девел хем икер лескере заповедија“ (Проп. 12:13).

9. Сар о Исус икерѓа урамнотежено стави баши бути?

⁹ О Исус сине бут буќарно. Англедер те почминел пле службаја, керела сине бути сар столари (Мар. 6:3). Сигурно лескере родителија бут ценинена сине со поможинела лен сине те грижинен пе пумаре баре фамилијаке. Бут џене мангена сине те кинен о буќа со керела лен сине о Исус соске ов керела лен сине совршено. О Исус сигурно уживинела сине ки пли бути. Иако керела сине пли бути бут шукар, ов одвојнела сине песке време башо духовна активностија (Јован 7:15). Покасно сар полновремено проповеднико, ов советинѓа околен со шунена ле сине: „Ма керен бути башо хајбе кова со руминѓовела, него башо хајбе со на руминѓовела хем анела вечно живото“ (Јован 6:27). Хем ко Проповед ки гора о Исус вакерѓа: „Кхеден туменге барвалипе ко небо“ (Мат. 6:20).

10. Саво проблеми шај те овел некас ки бути?

¹⁰ И мудрост со авела таро Девел поможинела аменге те овел амен урамнотежено стави баши амари бути. Сар христијања, поттикниме сием те кера вредно бути  хем те кера „шукарипе амаре вастенцар“ (Еф. 4:28). О газдија бут пути приметинена кај сием буќарне, чесна хем шај вакерена аменге кај ценинена амари бути. Адалеске шај те манга повише саатија те кера бути те шај амаре газда те овел ле шукар мислење башо е Јеховаскере сведокија. Ама ако кераја адава, шај нане те овел амен доволно време баши амари фамилија хем башо духовна активностија. Те шај те ова урамнотежена ка ваљани те кера несаве промене.

11. Со сиклило јекх пхрал баши бути?

¹¹ Јекх терно пхрал со викинела пе Вилијам дикхља кобор тано корисно те овел ле урамнотежено стави баши бути. Башо јекх старешина каске со англедер керела сине бути, вакерѓа: „[Акава пхрал] тано јекх бут шукар пример башо адава сар ваљани те дикхел пе ки бути. Ов тано буќарно хем адалеске тано ценимо таро лескере муштерие баши пли шукар бути. Ама ко крајо таро диве ов на размислинела више баши бути, него користинела пло време хем сила баши пли фамилија хем башо Јехова. Хем ов тано јекх таро најбахтале мануша со џанава“. *

12. Сар сикавѓа о Соломон кај сине ле урамнотежено стави баши песте, ама сар покасно менинѓа пе адава?

¹² Кеда сине верно слуга е Јеховаске, е Соломоне сине ле урамнотежено стави баши песте. Кеда сине терно ов сине свесно башо пле границе хем адалеске родинѓа водство таро Јехова (1. Цар. 3:7-9). Кеда почминѓа те владинел, о Соломон џанља кај шај те овел гордо. Ов пишинѓа: „И гордост анела пропаст хем и вообразеност анела перибе“ (Изр. 16:18). Жално тано со покасно о Соломон на применинѓа о совет кова со ов коркори денѓа ле. Ов почминѓа те овел гордо хем те игнориринел е Девлескере упатствија. На пример, ко закони пишинела сине кај јекх цари на  ваљани сине те лел песке бут ромња, те шај те на цидел лескоро вило ко погрешно друмо (5. Мој. 17:17). О Соломон на сине послушно ко адава закони хем лела песке 700 ромња хем 300 наложнице колендар со бут на служинена сине е Јеховаске (1. Цар. 11:1-3). О Соломон шај мислинѓа песке кај адава нане те овел леске проблеми. Ама покасно мора сине те трпинел о последице адалеске со на шунѓа е Јехова (1. Цар. 11:9-13).

13. Со шај те сикљова ако размислинаја башо е Исусескоро понизно стави?

¹³ Е Исусе сине ле урамнотежено хем понизно стави баши песте. Англедер те авел ки пхув, о Исус керѓа бут шуже буќа ки служба башо Јехова. Ки Библија пишинела кај преку лесте тано кердо „са сој ко небо хем ки пхув“ (Кол. 1:16). Кеда крстинѓа пе о Исус веројатно сетинѓа пе ко буќа со керѓа лен кеда сине пле Дадеа (Мат. 3:16; Јован 17:5). Ама адава на керѓа те овел гордо. Наместо адава, никогаш на мангља те сикавел пе кај тано пошукар таро јавера. Ов вакерѓа пле учениконге кај на ало ки пхув те служинен леске, него ало те служинел хем те дел пло живото сар откупнина буте џененге (Мат. 20:28). Исто аѓаар, скромно признајнѓа кај нашти ништо те керел коркори пестар (Јован 5:19). Ов чаче сине бут понизно! О Исус мукхља аменге бут шукар пример пало кова со шај те џа.

14. Со шај те сикљова таро Исус башо адава сар те дикха ки аменде?

¹⁴ О Исус сикавѓа пле следбеникон те дикхен исправно ки песте. Ки јекх прилика ов уверинѓа лен: „Туменге чак секоја бал таро шеро тани гејми“ (Мат. 10:30). Акала лафија шај те утешинен амен посебно ако на дикхаја шукар ки аменде. Адава значинела кај амаро небесно Дад чаче интересинела пе аменге хем кај сием скапоцена англо лескере јакхја. Ако о Јехова дозволинела те служина леске хем мислинела кај ваљани вечно те живина ко лескоро свето, тегани нане амен право те сумнина амен ки лескири проценка.

15. а) Спрема јекх Стражарско кула, саво стави ваљани те овел амен баши аменде? б) Сар сој сикавдо ки слика тари 24 страна, саве берекетија шај те нашава ако превише концентриринаја амен ки аменде?

 ¹⁵ Околу 15 берш англедер, ки Стражарско кула сине пишимо кај ваљани те овел амен урамнотежено стави баши аменде: „Ма те дозволина те овел амен бут баро мислење баши аменде со ка почмина те ова горда. А тари јавер страна, на ваљани те мислина кај ни хари на врединаја. Наместо адава ваљани те овел амен урамнотежено стави баши аменде хем адава значинела те хаљова кај иси амен јака хем слаба стране. Јекх пхен вакерѓа: ’На сиум и најлошно личност ко свето, ама на сиум баш сјајно. Иси ман мле јака стране хем мле слаба стране сар са е јаверен‘“. * Шај јасно те дикха соске тано шукар те овел амен урамнотежено стави баши аменде.

16. Соске о Јехова дела амен мудро водство?

¹⁶ Преку пло Лафи, о Јехова дела амен мудро водство. Ов мангела амен хем мангела те ова бахтале (Иса. 48:17, 18). И најшукар одлука со шај те ана ла хем со ка керел амен чаче бахтале тани те чхива о духовна буќа ко прво тхан ко амаро живото. Ако кераја аѓаар, тегани нане те овен амен о проблемија со иси околен со чхивена о паре, и бути хем песте ко прво тхан. Сарине амен те ова одлучна те ова мудра хем те кера е Јехова бахтало! (Изр. 23:15).