1. Која важно одлука ваљани те анен са о мануша?

 САРИНЕ авдиве ваљани те анен јекх бут важно одлука — дали ка поддржинен е Јехова сар Најбаро Владетели или ка поддржинен лескере најбаре душмане, е Сатана е Бенге. Нашти те ачховел пе машкарал, мора те биринел пе страна. Тари одлука со ка анен ла ка зависинел дали ка живинен вечно, или на (Мат. 25:31-33, 46). Ки „бари неволја“ ола ка овен обележиме или те преживинен или те овен уништиме (Отк. 7:14; 14:9-11; Езек. 9:4, 6).

2. а) Со охрабринела амен о Евреите 10:35-39 те кера? б) Сар шај о лил Откровение те поможинел аменге?

² Читин Евреите 10:35-39. Ако одлучинѓан те поддржине е Јехова сар Владетели, ту анѓан мудро одлука. Акана едвај аџикереа те поможине е јаверенге те анен и исправно одлука. Те шај те поможине ленге шај те користине о информацие таро лил Откровение. Акава бут шужо лил откринела аменге со ка случинел пе околенцар со противинена пе е Јеховаске, ама исто аѓаар истакнинела сар ка наградинел околен со верно поддржинена ле. Шукар ка овел те проучина акала важна чачипа. Адава ка поможинел аменге те ова одлучна понадари да те служина е Јеховаске. Исто аѓаар, шај те користина адава со сиклилем те шај те поможина е јаверенге те анен и исправно одлука хем те икерен пе ки лате.

3. Со ка дикха ки акаја статија?

³ Ки акаја статија ка добина одговор ко акала пучиба: Со аџикерела околен со поддржинена е Јехова сар Владетели?  А тари јавер страна, со ка случинел пе околенцар со одлучинѓе те поддржинен е лоле ѕверо кова сој опишимо ко лил Откровение?

4. Коле група дикхела о апостол Јован заедно е Исусеа ко небо?

⁴ Ки јекх визија, о апостол Јован дикхела дуј групе кола со поддржинена е Јеховаскоро владибе хем кола со добинена берекети вечно те живинен. Ки прво група иси 144.000 верна слуге (Отк. 7:4). Ола тане ленде тари пхув те шај те керел пе влада, или Царство ко небо е Исусеа. Заедно леа ка владинен упри пхув (Отк. 5:9, 10; 14:3, 4). Ки визија о Јован дикхела сар терѓона е Исусеа ки небесно планина Сион (Отк. 14:1).

5. Со ка случинел пе панда хари е помазаниконцар кола сој тане панда џивде ки пхув?

⁵ Таро време е апостоленгоро па џи акана бут милја мануша тане бириме те овен дело таро 144.000 (Лука 12:32; Рим. 8:17). Ама е Јованеске сине вакердо кај само јекх остаток, или јекх тикно број, ка овен џивде ки пхув ко последна диве. Акава остаток ка добинел о конечно печати таро Јехова англедер те почминел и бари неволја (Отк. 7:2, 3; 12:17). Пало адава, ко јекх моменти кратко англедер и војна Армагедон адава остаток ка овел лендо ко небо те шај те овел заедно околенцар таро 144.000, кола со ачхиле верна џи ко пло мерибе. Адари ка владинен заедно е Исусеа ко е Девлескоро Царство (Мат. 24:31; Отк. 5:9, 10).

6-7. а) Коле јавере група дикхела о Јован, хем со џанаја баши лате? б) Соске о солдуј групе ваљани те интересинен пе башо 7 поглавје таро лил Откровение?

⁶ Откеда о Јован дикхља јекхе небесно група, ов акана дикхела јекхе баре мноштво коле со никој нашти те гејнел ле (Отк. 7:9, 10). Со џанаја баши акаја група? Е Јованеске сине вакердо: „Ола тане адала со авена тари бари неволја, со тховѓе пле шеја хем парнарѓе лен ко рат е Бакхрескоро“ (Отк. 7:14). Откеда ка преживинен и бари неволја, акава баро мноштво мануша ка живинел ки пхув хем ка уживинел ко бут шуже берекетија (Пс. 37:9-11, 27-29; Изр. 2:21, 22; Отк. 7:16, 17).

⁷ Бизи разлика дали сием бириме те џа ко небо или те ачхова ки пхув, дали дикхаја амен ко адава сој пишимо ко 7 поглавје таро Откровение? Би ваљани те дикха амен. Адава ка овел возбудливо време е Девлескере слугенге таро солдуј групе! Ка ова бут бахтале со биринѓем те поддржина е Јехова сар владетели. Со јавер вакерела аменге о лил Откровение баши бари неволја? (Мат. 24:21).

8. Сар ка почминел и бари неволја, хем сар ка реагиринен бут мануша?

⁸ Сар со дикхлем ки претходно статија, о политичко систем панда хари ка нападинел е Баре Вавилоне — о светско царство тари ховавни религија (Отк. 17:16, 17). Тегани ка почминел и бари неволја. Ама, дали тегани бут мануша ка почминен те служинен е Јеховаске? На! Наместо адава, о 6 поглавје таро лил Откровение вакерела аменге кај ко адава време о мануша со на служинена е Јеховаске ка роден заштита таро политичко хем трговско систем таро акава свето кола сој тане споредиме планиненцар. Адалеске со адала мануша нане те поддржинен е Девлескере Царство, о Јехова ки ленде ка дикхел сар противникија (Лука 11:23; Отк. 6:15-17).

9. Сар ка разликујнел пе е Јеховаскоро народо јаверендар ки бари неволја, хем со ка случинел пе ленцар?

 ⁹ Е Јеховаскере верна слуге ка разликујнен пе јаверендар ко адава бут пхаро време кеда ка овел и неволја. Ола понадари да ка овен и единствено група мануша ки пхув кола со ка служинен е Јеховаске хем нане те манген те поддржинен „е ѕверо“ (Отк. 13:14-17). Адава бут ка хољанкерел околен со противинена пе е Јеховаске. Адалеске јекх коалиција таро са о народија ка нападинел е Девлескере слуген ки цело пхув. Акава напад ки Библија тано опишимо сар напад таро Гог таро Магог (Езек. 38:14-16).

10. Сар сој опишимо ко Откровение 19:19-21, сар ка реагиринел о Јехова ко напад со ка овел упро лескоро народо?

¹⁰ Сар ка реагиринел о Јехова ко акава опасно напад? Ов вакерела аменге: „Бут ка хољанав“ (Езек. 38:18, 21-23). Таро Откровение 19 поглавје дознајнаја со случинела пе понадари. О Јехова ка бичхалел пле Чхаве те заштитинел пле народо хем те побединел ленгере душманен. О „небесна војске“ коте сој о верна ангелија хем о 144.000, ка боринен пе заедно е Исусеа против о Гог таро Магог (Отк. 17:14; 19:11-15). Сар ка завршинел акаја војна? Са о мануша хем о организацие кола со противинена пе е Јеховаске ка овен целосно уништиме! (Читин Откровение 19:19-21.)

11. Кова тано јекх бут важно настан сој пишимо ко Откровение 19 поглавје?

¹¹ Замислин само сар ка осетинен пе о верна мануша ки пхув со ка преживинен о целосно уништување е Девлескере душманенгоро! Сарине сој ки пхув ка овен бут бахтале. Иако ко небо ка овел баро бахталипе кеда ка овел уништимо о Баро Вавилон, ка овел јекх јавер бути баши која со ка овен панда побахтале (Отк. 19:1-3). Адава тано јекх бут важно настан сој тано спомнимо ко лил Откровение — о бијав е Бакхрескоро (Отк. 19:6-9).

12. Спрема Откровение 21:1, 2, кеда ка почминел о бијав е Бакхрескоро?

¹² Кеда ка почминел о бијав? Са о 144.000 помазаникија ка овен ко небо кратко англедер те почминел и војна Армагедон. Ама, нане тегани те почминел о бијав е Бакхрескоро. (Читин Откровение 21:1, 2.) О бијав ка почминел откеда ка завршинел и војна Армагедон хем кеда ка овен цидиме са е Девлескере душмања (Пс. 45:3, 4, 13-17).

13. Со ка случинел пе ко бијав е Бакхрескоро?

¹³ Со ка случинел пе ко бијав е Бакхрескоро? Ко јекх дословно бијав, о ром хем и ромни кхувена ко брако. Слично, ко симболично бијав е Бакхрескоро, о цари о Исус Христос хем „лескири бори“, о 144.000, овена заедно. Адава важно настан воспоставинела јекх неви влада која со ка владинел 1.000 берша упри пхув (Отк. 20:6).

14-15. Солеа тане споредиме о 144.000 помазаникија ко Откровение 21 поглавје? (Дикх и слика ки насловно страна.)

¹⁴ Понадари, о 21 поглавје таро лил Откровение спорединела е 144.000 помазаникон јекхе бут шуже дизјаја која со викинела пе „нево Ерусалим“ (Отк. 21:2, 9). Акаја диз икерела пе упро 12 бара коте сој пишиме „о 12 анава таро 12 апостолија е Бакхрескере“. Соске сине акава посебно интересно е Јованеске? Адалеске со дикхља кај ко јекх таро адала бара сине пишимо лескоро анав. Адаја сине јекх бари чест! (Отк. 21:10-14; Еф. 2:20).

 ¹⁵ Нијекх диз на изглединела сине сар акаја диз. Лакири главно улица сине таро чисто злато, о 12 порте сине таро бисерија, о ѕидија хем о темелија сине украсиме скапоцена баренцар хем лакоро облик сине сар јекх совршено коцка (Отк. 21:15-21). Ама, о Јован приметинела кај нешто фалинела. Дикх со вакерела аменге о Јован: „Ки диз на дикхљум храми соске лакоро храми тано о Јехова, о Семоќно Девел, хем о Бакхро. Е дизјаке на ваљани сине ни о кхам, ни и месечина те ден светло соске е Девлескири слава дела ла светло, а лакири светилка сине о Бакхро“ (Отк. 21:22, 23). Окола сој дело таро нево Ерусалим ка овен узо Јехова (Евр. 7:27; Отк. 22:3, 4). Адалеске о Јехова хем о Исус тане о храми ки адаја диз.

16. Со ка случинел пе е манушенцар џикоте владинела е Девлескоро Царство 1.000 берша?

¹⁶ О помазаникија ка овен бут бахтале ако размислинена баши акаја диз. Ама окола со иси лен надеж те живинен ки пхув ваљани исто аѓаар те интересинен пе баши акаја диз. Џикоте трајнена о 1.000 берша коте со ка владинел е Девлескоро Царство, о нево Ерусалим ка анел баре берекетија ки пхув. О Јован дикхела кај акала берекетија тхавдена сар „река коте со иси пани е животоскоро“. Хем таро солдуј стране тари река иси „кашта е животоскере“ кола со дена листија башо „сасљарибе е народонгоро“ (Отк. 22:1, 2). Тегани са о мануша со ка живинен ка овел лен прилика те овел лен корист таро адала подготовке. Ко крајо, са о послушна мануша ка овен совршена. Тегани, нане више те овел насвалипе, ни дукх, хем нане више те овел ројбе (Отк. 21:3-5).

17. Спрема Откровение 20:11-13, кас ка овел корист џикоте владинела о Царство 1.000 берша?

¹⁷ Кас ка овел корист таро акала шуже подготовке? О прва со ка овел лен корист тано о баро мноштво кова со ка преживинел о Армагедон хем са о чхаве со ка бијанѓовен ко нево свето. Ама ко Откровение 20 поглавје иси исто аѓаар ветување кај ка воскреснинен о муле. (Читин Откровение 20:11-13.) О „праведна“ кола со ачхиле верна џи ко пло мерибе ка воскреснинен теле ки пхув заедно околенцар сој „неправедна“, адала тане окола со на сине  лен прилика те дознајнен нешто башо Јехова (Дела 24:15; Јован 5:28, 29). Дали адава значинела кај сарине ка воскреснинен? На. Окола со одбинѓе те служинен е Јеховаске џикоте сине џивде нане те воскреснинен. Лен сине лен више прилика ама пле животоја сикавѓе кај на мангена те живинен ко рај ки пхув (Мат. 25:46; 2. Сол. 1:9; Отк. 17:8; 20:15).

18. Со ка случинел пе ки пхув ко крајо таро 1.000 берша?

¹⁸ Ко крајо таро 1.000 берша, са окола со ка живинен ки пхув ка овен совршена. Нане више упри никасте те влијајнел е Адамескоро грево кова со наслединѓем ле (Рим. 5:12). О последице таро е Адамескоро грево ка овен целосно цидиме. Хем адалеске са окола сој ки пхув ка овен „палем џивде“, соске ко крајо таро 1.000 берша ка овен совршена (Отк. 20:5).

19. Соске ваљани те овел јекх последно испит?

¹⁹ Џанаја кај о Исус сар совршено мануш ачхило верно е Девлеске чак кеда о Бенг искушинѓа ле. Ама дали са о совршена мануша ка ачховен верна кеда о Сатана ка искушинел лен? Секоле јекхе ка овел ле прилика те докажинел пли верност е Јеховаске кеда о Сатана ка овел ослободимо тари бездна ко крајо таро 1.000 берша (Отк. 20:7). Окола со ка ачховен верна ко последно испит ка добинен вечно живото хем конечно ка уживинен ки чачутни слобода (Рим. 8:21). А окола со ка бунинен пе против о Јехова, ка овен уништиме засекогаш заедно е Бенгеа хем лескере демоненцар (Отк. 20:8-10).

20. Сар осетинеа тут кеда размислинеа башо интересна пророштвија таро лил Откровение?

²⁰ Сар осетинеа тут откеда кратко разглединѓем о лил Откровение? Дали дикхеа тут ко акала пророштвија? На поттикнинела тут ли акава е јаверен да те викине заедно аменцар те обожавинен е Јехова ко чисто начин? (Отк. 22:17). Откеда керѓем лафи башо буќа со ка случинен пе ки иднина сигурно сием поттикниме те вакера о лафија со вакерѓа лен о апостол Јован: „Амин! Ава, Господаре Исус!“ (Отк. 22:20).