1-2. Која тани јекх причина соске ваљани те интересина амен башо лил Откровение?

 ДАЛИ некој денѓа тут те дикхе лескоро албум сликенцар? Џикоте дикхеа о слике, повише таро адала џене на џанеа лен. Ама ки јекх слика ачховеа хем дикхеа ла пошукар. Соске? Адалеске со ту сиан ки лате. Џикоте дикхеа ла, пробинеа те сетине тут кеда хем коте сликинѓен тумен. Исто аѓаар, пробинеа те дикхе кој адала сој тане туја ки слика. Адаја слика туке посебно интересно.

² О лил Откровение тано сар адаја слика. Соске? Најхари таро дуј причине. Прво, акава библиско лил сине пишимо аменге. Ко прво стихо таро акава лил пишинела: „Откровение таро Исус Христос, кова со денѓа ле о Девел, те сикавел пле робонге о буќа со ка случинен пе панда хари“ (Отк. 1:1). Значи акава лил нане са е манушенге, него само аменге, е Девлеске слугенге. Сар Девлескоро народо на ваљани те изненадинел амен адава со сием дело таро пророштво со исполнинела пе ко акава лил, јавере лафенцар дикхаја амен „ки слика“.

3-4. Спрема о лил Откровение, кеда ка исполнинен пе акала пророштвија, хем сар ваљани те влијајнел адава упро секова јекх амендар?

³ И дујто причина соске ваљани те интересина амен башо акала пророштвија тани о време кеда ка исполнинен пе. Башо адава време, о Јован вакерѓа: „Водимо таро  свети дух, аракхлиљум ко е Господарескоро диве“ (Отк. 1:10). О Јован пишинѓа акала лафија околу 96 берш а.е., кеда „е Господарескоро диве“ сине панда бут дур (Мат. 25:14, 19; Лука 19:12). Ама, спрема о библиска пророштвија адава диве почминѓа ко 1914 берш, кеда о Исус уло Цари ко небо. Таро адава берш почминѓе те исполнинен пе о пророштвија таро Откровение коте сој вклучимо е Девлескоро народо. Оја, амен авдиве живинаја ко е „Господарескоро диве“!

⁴ Адалеске со живинаја ко акава важно време, амен ваљани посебно те шуна о љубезно совет сој пишимо ко Откровение 1:3: „Бахтало тано окова со читинела ко гласо хем окола со шунена о лафија таро акава пророштво хем со икерена пе ко адава со пишинела ки лесте, соске паше тано о време кеда ка исполнинел пе“. Значи, ваљани те читина ко гласо, те шуна о лафија таро акава пророштво хем те икера амен ко адава. Кола тане несаве таро адала лафија коленде со ваљани те икера амен?

5. Сар о лил Откровение сикавела кобор тано важно те трудина амен те обожавина е Јехова ко прифатливо начин?

⁵ Таро прво поглавје таро Откровение, дознајнаја кај о Исус џанела са со случинела пе ко собрание (Отк. 1:12-16, 20; 2:1). Адава шај те дикха ле таро пораке со бичхалѓа лен ко ефта собранија ки Мала Азија. Ко адала пораке ов денѓа конкретна упатствија те шај те поможинел е христијаненге таро прво веко те трудинен пе те обожавинен е Јехова ко прифатливо начин. Хем адала пораке важинена са е Девлескере слугенге авдиве да. Која тани и поука аменге? Амаро водачи, о Исус Христос, бут шукар џанела ки сави духовно состојба сием. Ов водинела амен, заштитинела амен хем дикхела са со случинела пе. Ов џанела со ваљани те кера те шај понадари да те ова прифатлива англо е Јеховаскере јакхја. Те дикха саве упатствија денѓа лен коленде со ваљани те икера амен авдиве.

6. а) Спрема е Исусескере лафија ко Откровение 2:3, 4, саво проблеми сине е собрание ко Ефес? б) Сави поука сикљоваја таро акава?

⁶ Читин Откровение 2:3, 4. На смејнаја те нашава амаро прво мангипе спрема о Јехова. Е Исусескири порака џи ко собрание ко Ефес сикавела кај истрајнѓе хем кај иако сине лен предизвикија, на чхинавѓе те служинен е Јеховаске. Сепак, нашавѓе пумаро мангипе со сине лен ко почеток. Ола мора сине палем те заманген е Јехова сар англедер, те шај ленгоро обожавибе те овел прифатливо. Слично аѓаар, авдиве да мора те кера нешто повише него само те истрајна. Ваљани те истрајна таро исправна причине. Амаре Девлеске нане само важно со кераја, него исто аѓаар соске кераја адава. Амаре мотивија тане леске важна соске ов очекујнела те обожавина ле адалеске со бут мангаја ле хем сием благодарна леске (Изр. 16:2; Марко 12:29, 30).

7. а) Спрема Откровение 3:1-3, саво проблеми сине е собрание ко Сард? б) Со ваљани амен те кера?

⁷ Читин Откровение 3:1-3. Мора понадари да те ачхова џангавде. О пхраља хем о пхења таро собрание ко Сард сине лен јавер проблеми. Иако англедер сине духовно активна, ола чхинавѓе те керен адава. Адалеске о Исус вакерѓа ленге „те џангавѓовен“. Сави поука шај те сикљова таро акава? Џанѓола пе, о Јехова нане те  бистрел адава со керѓем (Евр. 6:10). Сепак, на ваљани те мислина кај адалеске со англедер керѓем доволно ки служба е Јеховаске акана на ваљани више те трудина амен бут ки служба. Иако шај амаре околностија менинѓе пе, ваљани понадари да те ачхова зафатиме ки „бути е Господареске“, хем те ачхова џангавде џи ко крајо (1. Кор. 15:58; Мат. 24:13; Марко 13:33).

8. Со сикљоваја таро е Исусескере лафија џи ко пхраља тари Лаодикија? (Откровение 3:15-17).

⁸ Читин Откровение 3:15-17. Мора те ова ревна хем те служина е Јеховаске цело вилеа. Е Исусескири порака џи ко пхраља тари Лаодикија истакнинела јекх јавер проблеми. Ола сине „млака“ ко ленгоро обожавибе. Адалеске со сине рамнодушна, о Исус вакерѓа ленге кај тане „жалибаске“. Ваљани сине ревно те служинен е Јеховаске (Отк. 3:19). Која тани и поука аменге? Ако нашавѓем амари ревност, ваљани те бајрара амаро ценење башо са о шукар буќа со керела лен о Јехова хем лескири организација (Отк. 3:18). Никогаш на ваљани те дозволина и желба башо удобно живото те чхинавел амен те чхива о духовна активностија ко прво тхан.

9. Спрема е Исусескири порака башо христијања ко Пергам хем Тијатира, сави опасност ваљани те избегина?

⁹ Мора те отфрлина е отпадниконгере сикајба. О Исус укоринѓа несавен таро Пергам адалеске со керѓе поделбе машкар о пхраља (Отк. 2:14-16). Ов пофалинѓа е пхрален тари Тијатира соске отфрлинѓе е „Сатанаскере хор буќа“ хем поттикнинѓа лен цврсто те икерен пе ко чачипе (Отк. 2:24-26). О духовно слаба христијања кола со почминѓе те џан пало ховавне сикљојба ваљани сине те каинен пе. Со сикљоваја амен таро акава? Мора те отфрлина секова сикљојба кова со нане ко склад е Јеховаскере размислибаја. О отпадникија шај ка сикавен пе сар асавке „со дарана таро Девел“, ама на живинена аѓаар (2. Тим. 3:5). Бут полокхо ка овел аменге те хаљова кола тане адала погрешна сикљојба хем те отфрлина лен ако шукар проучинаја е Девлескоро Лафи (2. Тим. 3:14-17; Јуда 3, 4).

10. Сави јавер поука шај те сикљова таро адава со о Исус вакерѓа е пхраленге хем е пхењенге таро Пергам хем Тијатира?

¹⁰ На смејнаја те кера, те толеририна а ни те одобрина било сави врста неморал. Е пхрален таро Пергам хем тари  Тијатира сине лен јавер да проблеми. О Исус осудинѓа несавен таро собрание соске на отфрлинѓе о неморал (Отк. 2:14, 20). Која тани и поука аменге? Нашти те очекујна о Јехова те толериринел, јавере лафенцар те накхел преку несави неморално постапка, чак ако бершенцар служинаја леске хем иси амен бут одговорностија (1. Сам. 15:22; 1. Пет. 2:16). Ов очекујнела те икера амен ко лескере уче морална мерилија, бизи разлика кобор е светоскере мерилија овена полошна (Еф. 6:11-13).

11. Со сиклилем џи акана? (Дикх хем и рамка „ Поуке аменге“.)

¹¹ Со сиклилем џи акана? Дикхлем кај ваљани те да са амендар те шај амаро обожавибе те овел прифатливо е Јеховаске. Ако кераја нешто со ка керел амаро обожавибе те на овел више прифатливо, тегани ваљани одма те кера промене ко адава (Отк. 2:5, 16; 3:3, 16). Ама, о Исус спомнинѓа панда нешто ки пли порака џи ко собрание. Со сине адава?

12. Со шај те сикљова таро е Исусескере пораке џи ко собрание тари Смирна хем Филаделфија? (Откровение 2:10)

¹² Те дикха акана е Исусескере пораке џи ко собранија тари Смирна хем Филаделфија. Ов пхенѓа е пхраленге ма те даран таро прогонство, соске о Јехова ка наградинел лен ако ачхиле верна. (Читин Откровение 2:10; 3:10.) Која тани и поука аменге? Ваљани те очекујна кај ка овел амен прогонство хем те ова спремна те истрајна (Мат. 24:9, 13; 2. Кор. 12:10). Соске тано важно те на бистра акава?

13-14. Сар о настанија таро Откровение 12 поглавје влијајнѓе упро е Девлескоро народо?

¹³ О лил Откровение вакерела аменге кај е Девлескоро народо ка овел прогонимо ко е „Господарескоро диве“ — време ко кова со амен живинаја авдиве. Ко лил Откровение 12 поглавје пишинела кај сине војна ко небо одма откеда о Исус уло Цари. О Михаел, јавере лафенцар о Исус Христос, хем лескере ангелија боринѓе пе против о Сатана хем о демонија (Отк. 12:7, 8). Ки адаја војна, е Девлескере душмања сине победиме хем фрдиме теле ки пхув коте со керена бари штета е манушенге (Отк. 12:9, 12). Ама сар са акава влијајнела упро е Девлескоро народо?

¹⁴ О лил Откровение понадари вакерела аменге сар реагиринѓа о Сатана. Адалеске со нашти више те џал упре ко небо, ов икалела пли холи упро е Девлескере помазаникија сој тане ки пхув. Акала помазаникија тане претставникија е Девлескере Царствоскере хем ленге тани денди и задача те сведочинен башо Исус (Отк. 12:17; 2. Кор. 5:20; Еф. 6:19, 20) Сар исполнинѓа пе акава пророштво?

15. Кас претставинена о „дуј сведокија“ сој тане спомниме ко 11 поглавје таро лил Откровение, хем со случинѓа пе ленцар?

 ¹⁵ О Сатана чхивѓа е Девлескере душманен те нападинен е помазаникон кола со предводинена сине ки проповедничко активност. Адала пхраља ко лил Откровение сине претставиме „дује сведоконцар“ кола со сине мударде * (Отк. 11:3, 7-11). Ко 1918 берш, башо офто одговорна пхраља сине вакерде ховавне обвиненија хем адалеске сине осудиме ко бут берша затвор. Бут џене мислинѓе кај и задача акале помазаниконгири сине чхинавди.

16. Со случинѓа пе ко 1919 берш, ама со продолжинѓа о Сатана те керел таро адава време?

¹⁶ О пророштво таро Откровение 11 поглавје исто аѓаар вакерела кај о „дуј сведокија“ ка овен ираме ко живото пало кратко време. Акава пророштво исполнинѓа пе ко јекх неочекувано начин одма о јавер берш откеда акала пхраља сине чхивде ко затвор. Ко март 1919 берш адала помазаникија сине ослободиме хем покасно на сине више нијекх обвинение против ленде. О пхраља палем почминѓе те предводинен ки проповедничко активност. Ама о Сатана на чхинавѓа те нападинел е Девлескере народо. Оттегани о Сатана почминѓа те прогонинел е Девлескере народо, а акава прогонство ко Откровение тано споредимо сар „река“ (Отк. 12:15). Чаче, са акава родела амендар „истрајност хем вера“ (Отк. 13:10).

17. Сави помош добинѓа е Девлескоро народо иако о Сатана нападинела лен сине?

¹⁷ О 12 поглавје таро лил Откровение вакерела кај е Девлескоро народо ка добинел помош котар со на очекујнела. Ко адава поглавје тано објаснимо кај „и пхув“ ка глтинел „е река“ таро прогонство (Отк. 12:16). Баш акава случинѓа пе. Понекогаш несаве поразумна мануша или организацие колен со иси несаво влијание ко е Сатанаскоро свето, сар сој о судско систем, сине тари е Девлескере народоскири страна хем поможинѓа ленге. Бут пути е Јеховаскере слуге побединѓе ко судска случаија колендар со добинѓе побари слобода. Сар користинѓе акаја слобода? Ола мудро  користинѓе секоја прилика те шај те керен и задача која со о Јехова денѓа ла аменге (1. Кор. 16:9). Сој тано вклучимо ки акаја задача?

18. Која тани амари најважно задача ко акала последна диве?

¹⁸ О Исус пророкујнѓа кај лескоро народо ка објавинел о „шукар хабери башо Царство“ ки цели пхув англедер те авел о крајо (Мат. 24:14). Џикоте керена адава ола ка добинен помош таро ангелија. Башо акава ко Откровение тано пишимо: „Хем дикхљум јекх јавер ангели сар летинела ко небо, хем ингарела о шукар хабери со ка ачховел вечно те вакерел ле околенге со живинена ки пхув — секоле нацијаке, племеске, чхибјаке хем народоске“ (Отк. 14:6).

19. Кова јавер хабери мора те проповединен окола со мангена е Јехова?

¹⁹ Освен о шукар хабери башо Царство, е Девлескоро народо ваљани те објавинел јавер да хабери. Ола исто аѓаар ваљани те поддржинен е ангеленгири задача која сој тани опишими таро 8 џи ко 10 поглавје ко лил Откровение. Акала ангелија објавинена повише неволје против окола со отфрлинена е Девлескере Царство. Адалеске, е Јеховаскере сведокија објавинена јекх хабери баши осуда, кова сој споредимо сар „кукудик хем јаг“ хем акава хабери откринела е Девлескири осуда против о различна делија таро е Сатанаскоро лошно свето (Отк. 8:7, 13). О мануша ваљани те џанен кај о крајо тано паше те шај те керен баре промене ко пло живото хем те преживинен о диве тари е Јеховаскири холи (Соф. 2:2, 3). Ама акава хабери на свиџинела пе буте џененге, адалеске ваљани те овел амен храброст те шај те објавина ле. Ки бари неволја, о последно хабери баши осуда ка овел панда подиректно (Отк. 16:21).

20. Башо со ка кера лафи ко следна дуј статие?

²⁰ Чаче ваљани те шуна „о лафија таро акава пророштво“ соске сием дело таро исполнување таро адава со пишинела ко лил Откровение (Отк. 1:3). Ама сар шај верно те истрајна ко прогонство хем понадари да те да амаро најшукар храбро те вакера о хабери? Дуј буќа шај те керен амен позорале: Прво, адава со вакерела аменге о лил Откровение башо е Девлескере душмања, хем дујто, о берекетија со ка добина лен ки иднина ако ачховаја верна. Башо акала дуј буќа ка кера лафи ко следна дуј статие.