1-2. Објаснин сар несаве библиска начелија овена аменге поважна кеда менинена пе амаре околностија.

 КЕДА венчинена пе, о џамутро хем и бори внимателно шунена јекх библиско говор башо брако. О начелија сој спомниме ко говор на шунена лен прво пути. Ама таро адава диве адала начелија почминѓе те овен ленге панда поважна. Соске? Адалеске со акана ка применинен лен сар брачно пари.

² Слично тано кеда о ром хем и ромни овена родителија. Бершенцар шај шунѓе бут говорија башо адава сар те бајрарел пе чхавен. Ама акана о начелија со шунена лен почминѓе те овен ленге панда поважна. Акана ола ка ваљани те бајрарен пумаре чхавен. Адаја тани јекх бари одговорност! Џанѓола пе, кеда менинена пе амаре околностија, несаве библиска начелија овена аменге поважна. Адаја тани јекх причина соске е Јеховаскере слуге читинена и Библија хем хор размислинена башо адава „секова диве“ таро пумаро живото, сар со сине вакердо е Израелско царенге те керен адава (5. Мој. 17:19).

3. Башо со ка кера лафи ки акаја статија?

³ Тумен о родителија, иси тумен бари чест те сикавен тумаре чхавен башо Јехова. Ама нане доволно те вакерен ленге само несаве информацие башо Девел, него ваљани те поможинен ленге те манген ле таро вило. Сар шај те керен  адава? Ки акаја статија ка дикха штар библиска начелија кола со шај те поможинен е родителенге (2. Тим. 3:16). Исто аѓаар ка дикха сар несаве родителенге сине корисно адава со применинѓе о библиска начелија.

4. Кова тано јекх начело со шај те поможинел е родителенге те поможинен пумаре чхавенге те заманген е Јехова? (Јаков 1:5).

⁴ 1 начело: Роде водство таро Јехова. Молин е Јехова те дел тут и мудрост која со ваљани туке те шај те поможине тумаре чхавенге те заманген ле. (Читин Јаков 1:5.) Ов тано и најшукар личност со шај те дел тут совет, хем иси повише причине соске тано аѓаар. Те дикха дуј лендар. Прво, о Јехова тано о најискусно родители (Пс. 36:9). Хем дујто, о мудро совет со дела ле секогаш анела шукар резултати (Иса. 48:17).

5. а) Сар е Јеховаскири организација поможинела е родителенге? б) Сар сој сикавдо ко видеоклипи, со сиклиљан таро начин сар о пхрал хем и пхен Аморим воспитинѓе пумаре чхавен?

⁵ Преку пло Лафи хем пли организација, о Јехова дела бут духовно храна која со темелинела пе ки Библија хем која со шај те поможинел е родителенге те сикавен пумаре чхавен те заманген е Јехова (Мат. 24:45). На пример, шај те аракхе бут практична советија ки рубрика „Совети за семејствата“ која со некобор берша икљола сине ко печатимо издание ко списание Разбудете се!, а акана аракхљола ки амари интернет-страница. Исто аѓаар, бут видеоклипија тари амари интернет-страница шај те поможинен е родителенге те применинен е Јеховаскере советија џикоте бајрарена пумаре чхавен * (Изр. 2:4-6).

6. Со мислинела јекх дад баши помош со добинела ов хем лескири ромни тари е Јеховаскири организација?

⁶ Бут родителија вакерѓе кај тане благодарна баши помош која со о Јехова дела ла преку пли организација. Јекх дад кова со викинела пе Џо признајнела: „Те бајраре трине чхавен ко чачипе нане локхо. Ме хем ми ромни секогаш молинаја амен е Јеховаске баши помош, хем бут пути баш кеда ка ваљани аменге сине помош баши  јекх ситуација ка икљол сине несави статија или видеоклипи. Сине аменге навика секогаш те рода водство таро Јехова“. О Џо хем лескири ромни халиле кај акала статие хем видеоклипија поможинѓе ленгере чхавенге те овен попаше е Јеховаја.

7. Соске тано важно о родителија те ден пестар са те шај те ден шукар пример пумаре чхавенге? (Римјаните 2:21).

⁷ 2 начело: Де шукар пример. О чхаве дикхена са со керена ленгере родителија хем бут пути керена баш адава со дикхена. Џанѓола пе, нијекх родители нане совршено (Рим. 3:23). Ама о мудра родителија дена пестар са те овен шукар пример пумаре чхавенге. (Читин Римјаните 2:21.) Јекх дад башо чхаве вакерѓа: „Ола тане сар сунѓерија кола со упинена са“. Ов понадари вакерела: „Ола одма ка вакерен аменге кеда амен на кераја о буќа кола со сикаваја лен те керен“. Значи, ако мангаја амаре чхаве те манген е Јехова, тегани ваљани те дикхел пе кај амен бут мангаја е Јехова.

8-9. Со сиклиљан таро адава со вакерѓе о Ендру хем и Ема?

⁸ Иси бут начинија сар о родителија шај те сикавен пумаре чхавен те манген е Јехова. Приметин со вакерѓа о Ендру, јекх пхрал коле со иси ле 17 берш: „Ме родителија секогаш сикавена манге сине кобор тано важно те молинав ман. Мо дад секоја рат молинела пе сине манцар, иако ме англедер више молинава ман сине коркори. Ме родителија секогаш вакерена аменге сине: ’Шај те керен е Јеховаја лафи секогаш кеда мангена‘. Адалеске и молитва ули манге бут важно. Акана нане манге пхаро те молинав ман хем те дикхав е Јехова сар Дад кова со бут мангела ман“. Тумен о родителија, ма бистрен кај тумаро мангипе башо Јехова шај бут те влијајнел упро тумаре чхаве.

⁹ Те дикха исто аѓаар е Емакоро пример. Лакоро дад гело песке кхералдан хем мукхља лен ко баро борчи кова со лакири дај мора сине те иранел ле. Ој вакерела: „Бут пути ми дај ачховела сине бизо паре, ама ој секогаш керела сине лафи башо адава сар о Јехова грижинела пе пле слугенге. Таро начин сар живинела сине пло живото, шај сине те дикхав кај верујнела сине ко адава. Ми дај икерела пе сине ко адава со сикавела ман сине“. Со шај амен те сикљова? О родителија шај те ден шукар пример чак ко пхаре ситуацие (Гал. 6:9).

10. Ко саве прилике шај сине бут израелција те керен лафи пумаре чхавенцар? (5. Мојсеева 6:6, 7).

¹⁰ 3 начело: Кер редовно лафи тле чхавенцар. О Јехова вакерѓа е Израелцонге таро пурано време редовно те сикавен пумаре чхавен баши лесте. (Читин 5. Мојсеева 6:6, 7.) Секова диве акале родителен сине лен бут прилике те керен пумаре чхавенцар лафи хем те поможинен ленге те заманген е Јехова. На пример, јекх терно израелцо шај саатенцар поможинела сине пле дадеске ко садибе хем ко кхедибе о плодија тари нива. Лескири пхен шај побаро дело таро диве поможинела сине пле дајаке те сивел, те плетинел хем околу јавера кхерутне буќа. Џикоте о родителија хем о чхаве керена сине заедно бути шај сине те керен башо бут важна теме лафи. На пример, шај сине те керен лафи башо адава кобор тано шукар о Јехова хем сар ов поможинела ленгере фамилијаке.

11. Ки која прилика о родителија шај те керен пумаре чхавенцар лафи?

¹¹ Авдиве о живото нане више сар со сине англедер. Ко бут пхувја о родителија хем о чхаве нашти те одвојнен време те накхен заедно. О родителија тане ки бути, а о чхаве тане ки школа. Адалеске о родителија  мора те трудинен пе те аракхен прилике те шај те керен пумаре чхавенцар лафи (Еф. 5:15, 16; Фил. 1:10). Јекх асавки прилика тани и Фамилијарно рат. Јекх терно пхрал кова со викинела пе Александар вакерела: „Мо дад секогаш одвојнела време баши Фамилијарно рат хем на дозволинела ништо те чхинавел амен те кера ла. Откеда завршинаја е проучибаја, кераја аменге лафи башо јавера да важна теме“.

12. Со на ваљани те бистрен о родителија џикоте икерена и Фамилијарно рат?

¹² Ако сиан родители, со шај те кере те шај тле чхаве те уживинен ки Фамилијарно рат? Шај тле чхавенцар те проучине амаро нево лил Ов бахтало засекогаш. Акава лил ка поможинел туке те овел тут шукар разговор тле чхавенцар. Ако мангеа тле чхаве те вакерен туке сар осетинена пе или саве проблемија иси лен, ма користин и Фамилијарно рат те критикујне лен хем те исправине лен. Хем пробин ма те нервирине тут сигате ако понекогаш тле чхаве вакерена буќа кола со нане ко склад е Библијаја. Наместо адава, ов благодарно со ола тане искрена туја хем вакерена туке сар осетинена пе, хем охрабрин лен понадари да те керен адава. Најшукар шај те поможине тле чхавенге кеда џанеа сар ола чаче осетинена пе.

13. Ко саве јавера прилике о родителија шај те поможинен пумаре чхавенге те овен попаше е Јеховаја?

¹³ Тумен о родителија, роден прилике ко теко е дивескоро те шај те поможинен тумаре чхавенге те овен паше е Јеховаја. На ваљани те сикавен лен башо амаро мангло Девел само кеда проучинена ленцар и Библија. Приметин со вакерѓа јекх дај која со викинела пе Лиса: „Поможинѓем амаре чхавенге преку о створиме буќа пошукар те запознајнен е Јехова. На пример, кеда амаро џукел керела сине нешто смешно хем амаре чхаве ка асан, тегани амен вакераја сине ленге кај амаре Створителе иси ле смисла башо хумор хем кај мангела о живото исто сар амен со мангаја ле“.

14. Соске тано важно о родителија те поможинен пумаре чхавенге те биринен шукар амала? (Изреки 13:20).

¹⁴ 4 начело: Поможинен тумаре чхавенге те биринен шукар амала. Е Девлескоро Лафи јасно вакерела кај амаре амален шај  те овел лен или шукар или лошно влијание упри аменде. (Читин Изреки 13:20.) Дали џанена касаја дружинена пе тумаре чхаве? Дали одвојнѓан време те запознајне ленгере амален? Сар шај те поможинен тумаре чхавенге те дружинен пе околенцар со мангена е Јехова? (1. Кор. 15:33). Шај те керен адава аѓаар со ка канине несаве духовно зрела пхрален те овен туменцар заедно ко несаве фамилијарна активностија (Пс. 119:63).

15. Со шај те керен о родителија те шај те поможинен пумаре чхавенге те аракхен песке шукар амала?

¹⁵ Те дикха о искуство јекхе дадескоро кова со викинела пе Тони. Ов вакерела со керѓа ов хем лескири ромни те шај те поможинен пумаре чхавенге те аракхен шукар амала: „Бершенцар ме хем ми ромни канинаја сине различна пхрален хем пхењен хем адава бизи разлика ки која возраст сине. Хаја сине заедно маро хем икераја сине и Фамилијарно рат. Акава тано јекх бут шукар начин те шај пошукар те запознајна околен со мангена е Јехова хем сој тане бахтале со служинена леске. Бут сием бахтале со шај сине те канина покраинска надгледникон, мисионерен хем јаверен те авен ко амаро кхер. Ленгоро искуство, и ревност хем о самопожртвувано стави бут влијајнѓе упро амаре чхаве хем поможинѓа ленге те овен паше е Јеховаја“. Тумен о родителија, овен одлучна те поможинен тумаре чхавенге те аракхен песке шукар амала.

16. Со ако тло чхаво вакерела кај на мангела те служинел е Јеховаске?

¹⁶ Со ако јекх таро тле чхаве вакерела кај на мангела те служинел е Јеховаске, иако ту бут трудинѓан тут? Ма мислин кај ту сиан криво. Сар сариненге, о Јехова денѓа тле чхавенге да слободно волја — и способност те биринен дали ка служинен леске или на. Ако тло чхаво одлучинѓа те цидел пе таро Јехова, ма нашав тли надеж, шај јекх диве ка иранел пе. Сетин тут ки споредба башо бунтовно чхаво (Лука 15:11-19, 22-24). Адава терно мануш керѓа бут лошна буќа, ама ко крајо иранѓа пе. Некој шај те вакерел: „Ама адава сине само парамис.  Дали мло чхаво шај чаче те иранел пе ко Јехова?“ Оја, шај! Баш акава случинѓа пе јекхе тернеске со викинела пе Или.

17. Сар охрабринела тут е Илискоро искуство?

¹⁷ О Или башо пле родителија вакерела: „Ола бут трудинѓе пе те сикавен ман те мангав е Јехова хем и Библија. Ама кеда уљум тинејџери почминѓум те бунинав ман“. О Или почминѓа те живинел дволично живото хем на мангела сине те прифатинел и помош таро пле родителија те шај те овел паше е Јеховаја. Откеда гело песке кхералдан, почминѓа те керел панда полошна буќа. Ама понекогаш керела сине лафи јекхе амалеа башо Јехова. О Или вакерела: „Со повише керава сине леа лафи башо Јехова добором повише размислинава сине башо Девел“. Пало несаво време о Или иранѓа пе ко чачипе. * Замислин кобор бахтале сине лескере родителија со трудинѓе пе те сикавен ле панда таро тикнипе те замангел е Јехова (2. Тим. 3:14, 15).

18. Сар дикхеа ко родителија кола со бут трудинена пе те сикавен пумаре чхавен те заманген е Јехова?

¹⁸ Туменге е родителенге тани денди јекх бут бари предност — те бајрарен неве слуге е Јеховаске (Пс. 78:4-6). Адава нане локхо, хем адалеске мангаја искрено те пофалина тумен башо тумаро баро трудо те поможинен тумаре чхавенге. Ако понадари да дена тумендар са те поможинен тумаре чхавенге те заманген е Јехова хем те сикавен лен те овел леске послушна, шај те овен сигурна кај амаро небесно Дад ка овел бахтало (Еф. 6:4).