1. Со сикљоваја таро Проповедник 3:1, 7?

НЕСАВЕ амендар мангена те керен бут лафи, а јавера обично чутинена. Сар со дикхела пе таро главно стихо акале статијакоро, иси време кеда те керел пе лафи хем време кеда те чутинел пе. (Читин Проповедник 3:1, 7.) Понекогаш мислинаја аменге кај ка овел шукар несаве пхраља хем пхења те керен лафи повише, а јавера те керен лафи похари.

2. Кас иси право те чхивел мерилија башо адава кеда хем сар ваљани те кера лафи?

² И способност те кера лафи тани поклон таро Јехова (2. Мој. 4:10, 11; Отк. 4:11). Преку пло Лафи, ов поможинела аменге те хаљова сар шај те користина адава поклон ко исправно начин. Ки акаја статија ка дикха библиска примерија со ка поможинен аменге те проценина кеда тано шукар те кера лафи, а кеда те чутина. Исто аѓаар, ка дикха со мислинела о Јехова башо адава со вакераја е јаверенге. Прво, те дикха кеда ваљани те кера лафи.

3. Спрема Римјаните 10:14, кеда ваљани те ова спремна те кера лафи башо Јехова хем башо Царство?

³ Секогаш ваљани те ова спремна те кера лафи башо Јехова хем башо Царство (Мат. 24:14; читин Римјаните 10:14). Аѓаар џаја пало пример е Исусескоро. Јекх таро главна причине соске ало ки Пхув сине те вакерел е јаверенге о чачипе башо пло Дад (Јован 18:37). Ама, на смејнаја те бистра кај исто аѓаар важно тано сар кераја лафи. Адалеске, кеда кераја лафи е јаверенцар башо Јехова, мора те кера адава „љубезно хем те сикава хор поштовање“, хем ваљани те ова обѕирна спрема е јаверенгере чувствија  хем верувања (1. Пет. 3:15). Аѓаар ка шај те овел лен корист таро адава со вакераја ленге хем шај ка манген те џанен нешто повише башо Девел.

4. Спрема Изреки 9:9, сар шај амаре лафенцар те поможина е јаверенге?

⁴ О старешине на ваљани те мислинен пе дали те ден совет несаве пхралеске или пхењаке кеда адава ка ваљани. Џанѓола пе, ваљани те биринен о право време те керен леа лафи те шај те на чхивен ле ки незгодно ситуација. Шукар ка овел те керен леа лафи кеда ка овел коркори. О старешине секогаш трудинена пе кеда керена некасаја лафи ма те понижинен ле. Сепак, адава на чхинавела лен те сикавен леске несаве библиска начелија кола со шај те поможинен ле мудро те постапинел. (Читин Изреки 9:9.) Соске тано важно те ова храбра хем те кера отворено лафи кеда адава ваљани? Те дикха јекх лошно хем јекх шукар пример. О прво тано башо јекх мануш кова со ваљанѓа те укоринел пле чхавен, а о дујто тано баши јекх џувли со ваљанѓа храбро те керел лафи јекхе цареа кова со сине помазимо таро Јехова.

5. Ки која ситуација о Илиј чутинѓа кеда ваљанѓа те керел лафи?

⁵ Е првосвештенико е Илија сине ле дуј чхаве колен со мангела лен сине бут. Ама, лескере чхаве на поштујнена сине е Јехова. Лен сине лен важна одговорностија. Служинена сине сар свештеникија ко свето шатори. Ама, ола злоупотребинѓе пло авторитети, сикавѓе кај нане лен нисаво поштовање спрема о жртве кола со дена пе сине е Јеховаске хем бизи лаџ керена сине блуд (1. Сам. 2:12-17, 22). Спрема е Мојсеескоро закони, е Илијаскере чхаве заслужинена сине те мерен. Ама наместо адава, ов само љубезно укоринѓа лен хем дозволинѓа ленге понадари да те служинен ко свето шатори (5. Мој. 21:18-21). Сар дикхља о Јехова ко адава сар постапинѓа о Илиј ки акаја ситуација? Ов вакерѓа е Илијаске: „Соске сикавеа побари чест тле чхавенге него манге?“ Адалеске о Јехова одлучинѓа те мударел адале дује злобна манушен (1. Сам. 2:29, 34).

6. Со сикљоваја таро Илиј?

⁶ Таро Илиј сикљоваја нешто бут важно. Ако дознајнаја кај несаво амал или некој тари фамилија пхагља е Девлескоро закони, мора те кера леа лафи башо адава хем те сетинкера ле ко е Јеховаскере мерилија. Пало адава мора те кера са со шај те добинел и помош со ваљани леске таро старешине кола сој денде таро Јехова (Јак. 5:14). На мангаја те ова сар о Илиј — те сикава побари чест несаве амалеске  или некаске тари фамилија него е Јеховаске. Ваљани аменге храброст те кера некасаја отворено лафи хем те вакера леске кај ваљани те променинел пе, ама врединела те трудина амен. Бут појавер таро Илиј, јекх Израелка со викинела пе сине Авигеја сикавѓа асавки храброст. Те дикха сар.

7. Соске и Авигеја керѓа лафи е Давидеа?

⁷ И Авигеја сине ромни јекхе барвале манушескири кова со викинела пе сине Навал. Џикоте гаравена пе сине таро цари о Саул, о Давид хем лескере мануша накхавѓе бут време е Навалескере пастиренцар хем аракхле лескере бакхрен таро чора. Дали о Навал сине благодарно башо адава? На. Кеда о Давид бичхалѓа пле манушен те роден лестар хари хајбе хем пани, о Навал хољанѓа бут хем почминѓа те вреџинел лен (1. Сам. 25:5-8, 10-12, 14). Само со шунѓа башо адава, о Давид одлучинѓа те мударел секоле мурше таро лескоро кхер (1. Сам. 25:13, 22). Сар шај сине те избегинел пе акава? И Авигеја халили кај акана тано време те керел лафи. Адалеске храбро иклили англо 400 мануша кола со сине бокхале, хољаме хем пхерде оружје те шај те керел лафи е Давидеа.

8. Со сикљоваја таро е Авигеакоро пример?

⁸ Кеда аракхља пе е Давидеа, и Авигеја керѓа леа лафи храбро, уверливо хем сикавѓа поштовање. Иако ни хари на сине криво башо проблеми, ој извининѓа пе леске. Сине ла доверба ко Јехова хем вакерѓа кај џанела кај о Давид тано шукар мануш хем кај ка постапинел исправно (1. Сам. 25:24, 26, 28, 33, 34). Исто сар и Авигеја, аменге да ваљани храброст те кера лафи некасаја кеда дикхаја кај почминѓа те џал ко погрешно друмо (Пс. 141:5). Точно тано кај кеда кераја лафи мора те сикава поштовање, ама исто аѓаар мора те ова храбра. Кеда мангипаја даја некаске о совет со ваљани, сикаваја кај сием леске чачутне амала (Изр. 27:17).

9-10. Со на ваљани те бистрен о старешине кеда дена совет е јаверенге?

 ⁹ Посебно е старешинен мора те овел лен храброст те керен лафи околенцар ко собрание кола со постапинена погрешно (Гал. 6:1). О старешине понизно признајнена кај ола да тане несовршена хем кај јекх диве шај ленге да ка ваљани совет. Ама, ола на мукхена адава те чхинавел лен те ден укор кеда ваљани (2. Тим. 4:2; Тит 1:9). Кеда дена некаске совет, ола трудинена пе те керен леа лафи тактично хем стрпливо. Ола мангена пле пхрале хем адава мангипе поттикнинела лен те поможинен леске (Изр. 13:24). Ама, најважно тано ленге те ден чест е Јеховаске аѓаар со ка икерен лескере мерилија хем ка заштитинен о собрание (Дела 20:28).

¹⁰ Џи акана дикхлем кеда ваљани те кера лафи. Сепак, ко несаве ситуацие најшукар тано те на вакера ништо. Соске адава шај те овел понекогаш пхаро?

11. Која споредба користинѓа о Јаков, хем соске тани соодветно?

¹¹ Нане секогаш локхо те контролирина амари чхиб. О библиско писатели о Јаков користинѓа соодветно споредба башо акава. Ов пишинѓа: „Ако некој на грешинела ко лафија, ов тано совршено мануш, способно исто аѓаар те контролиринел пло цело тело“ (Јак. 3:2, 3). Ко акава стихо е лафеа „те контролиринел“ мислинела пе ко дизгиња. О дизгиња чхивена пе ко шеро хем ко муј е грастескоро. О јавачи користинела лен те шај те водинел ле или те ачхавкерел ле. Ако мукхела о дизгиња таро пло вас, нане те овел ле контрола упри лесте. Аѓаар, о грас шај те поврединел хем пес хем е јаваче. Слично, ако на контролиринаја амари чхиб, шај те кера бари штета. Те дикха некобор ситуацие ко кола со ваљани те контролирина амари чхиб хем те чутина.

12. Ки која ситуација ваљани те контролирина амари чхиб хем те чутина?

 ¹² Сар реагиринеа кеда несаво пхрал или пхен џанела доверлива информацие? На пример, ако дикхеа тут некасаја со живинела ки пхув коте со амаре активностија тане забраниме, дали сиан ко искушение те пуче ле сар керена о пхраља и служба адари? Сигурно на би кереа адава лошно намераја. Амен мангаја амаре пхрален хем мангаја те џана со случинела пе ленге. Освен адава, мангаја те ова конкретна кеда молинаја амен ленге. Сепак, акаја тани јекх ситуација колате со ваљани те контролирина амари чхиб хем те чутина. Ако сием упорна те дознајна несаве доверлива информацие некастар, на сикаваја мангипе — ни спрема лесте, ни спрема о пхраља хем о пхења кола со живинена ки адаја пхув, соске о информацие со ка откринел лен о пхрал шај те керен ленге проблемија. Сигурно никој амендар на би мангела те керел панда попхари и ситуација е пхраленгири хем е пхењенгири кола со живинена ко пхувја коте со амаре активностија тане забраниме. Ама исто аѓаар, ни јекх пхрал хем пхен кола со живинена ко адала пхувја на би ваљани те откринен деталија башо адава сар о Сведокија адари керена пли служба или о јавера христијанска активностија.

13. Спрема Изреки 11:13, со аџикерела пе таро старешине, хем соске?

¹³ Посебно о старешине мора те применинен о библиско начело таро Изреки 11:13 аѓаар со ка овен доверлива. (Читин.) Акава шај те овел пхаро, посебно ако јекх старешина тано женимо. Џанѓола пе кај о брачна парија тане попаше кеда често керена лафи хем вакерена пле најхор чувствија, мисле хем секирацие. Ама, јекх старешина тано свесно кај на смејнела те вакерел пле ромњаке информацие кола со некој таро собрание вакерѓа лен леске ки доверба. Ако керела адава, о пхраља нане више те верујнен леске хем нане те овел лен шукар мислење баши лесте. Околен со иси лен одговорностија ко собрание на смејнена те овен „дволична“ (1. Тим. 3:8). Јавере лафенцар, на смејнена те ховавен е јаверен или те оговоринен. Ако о старешина мангела пле ромња, нане те оптоваринел ла информациенцар кола со ој на ваљани те џанел.

14. Сар шај и ромни те поможинел пле ромеске кова сој старешина те на руминел пло углед?

¹⁴ И ромни да шај те поможинел пле ромеске те на руминел пло углед аѓаар со нане те керел леске притисок те вакерел лаке доверлива буќа. Кеда применинела акава совет, ој на само со поддржинела пле роме него исто аѓаар сикавела поштовање спрема адала со иси лен доверба ки лесте. А сој најважно, керела бахтало е Јехова адалеске со керела те овел мир хем јекхипе ко собрание (Рим. 14:19).

15. Со мислинѓа о Јехова башо е Јовескере трин амала, хем соске?

¹⁵ Таро библиско лил башо Јов шај те сикљова бут башо адава сар хем кеда ваљани те кера лафи. Откеда о Јов аракхлило ко повише пхаре ситуацие, ки лесте але штар мануша те шај те утешинен ле хем те ден ле совет. Ола бешле бут време узи лесте бизо те вакерен нијекх лафи. Ама, таро адава со вакерѓе ле трин лендар пало адава — о Елифаз, о Вилдад хем о Софар — јасно дикхела пе кај на користинѓе адава време те размислинен сар те поможинен е Јовеске него те докажинен кај ов коркори тано криво башо адава со случинѓа пе леске. Иако несаве ленгере изјаве сине точна, повише буќа со вакерѓе лен башо Јов хем башо Јехова сине или ховајбе или бизо чувствија. Ола кривинѓе е Јове кај тано лошно мануш (Јов 32:1-3). Сар реагиринѓа о Јехова? И Библија вакерела кај ов бут хољанѓа акале трине манушенге. Вакерѓа кај постапинѓе глупаво хем заповединѓа ленге те роден таро Јов те молинел пе ленге (Јов 42:7-9).

16. Со шај те сикљова таро лошна примерија со мукхле о Елифаз, о Вилдад хем о Софар?

 ¹⁶ Шај сикљоваја повише буќа таро лошна примерија со мукхле о Елифаз, о Вилдад хем о Софар. Прво, на ваљани те судина амаре пхрален (Мат. 7:1-5). Наместо адава, ваљани шукар те шуна лен англедер те вакера нешто. Само аѓаар ка шај те хаљова ленгири ситуација (1. Пет. 3:8). Дујто, кеда ка авел време те кера лафи, мора те ова обѕирна хем адава со ка вакера ленге мора те овел точно (Еф. 4:25). Хем трито, сикљоваја кај е Јеховаске тано бут важно адава со вакераја е јаверенге.

17. Со шај те сикљова таро Елиу?

¹⁷ О штарто амал со ало ко Јов сине о Елиу, кова со сине фамилија е Авраамеске. Џикоте о Јов хем о јавера трин керена сине лафи, о Елиу шунела сине. Дикхјола пе кај шукар пазинела сине ко адава со керена лафи соске ко крајо шај сине те дел сочувствително, ама искрено совет кова со поможинѓа е Јовеске те исправинел пло мислење (Јов 33:1, 6, 17). О Елиу сикавѓа кај најважно леске те славинел е Јехова, а на те ваздел песте или несаве јавере мануше (Јов 32:21, 22; 37:23, 24). Таро лескоро пример сикљоваја кај иси време кеда мануш ваљани те чутинел хем те шунел (Јак. 1:19). Освен адава, сикљоваја кај, кеда даја совет, најважно ваљани те овел аменге те да слава е Јеховаске, а на аменге.

18. Сар шај те сикава кај сием благодарна башо поклон таро Јехова?

¹⁸ Шај те сикава кај сием благодарна башо поклон таро Јехова, јавере лафенцар и способност те кера лафи, аѓаар со ка применина о библиска советија башо адава кеда хем сар ваљани те кера лафи. Водимо таро свети дух, о мудро цари о Соломон пишинѓа: „О лафија вакерде ко право време тане сар златна пхабаја ко сребрена чаре“ (Изр. 25:11). Ако шукар шунаја е јаверен хем ако размислинаја англедер те вакера нешто, амаре лафија ка овен сар адала златна пхабаја — скапоцена хем шуже. Тегани, бизи разлика дали кераја лафи хари или бут, амаре лафенцар ка зајакнина е јаверен хем ка кера бахтало е Јехова (Изр. 23:15; Еф. 4:29). Адава тано о најшукар начин те сикава е Девлеске кај сием благодарна башо адава поклон со денѓа амен!