1. Спрема Матеј 24:9, соске на ваљани те ова изненадиме кеда о свето мрзинела амен?

О ЈЕХОВА керѓа амен те манга хем те ова мангле. Адалеске кеда некој мрзинела амен, осетинаја амен бут лошно хем шај чак дараја. На пример, и пхен Џорџина која со живинела ки Европа вакерела: „Кеда сине ман 14 берш ми дај почминѓа те мрзинел ман адалеске со служинава сине е Јеховаске. Осетинава ман сине отфрлими хем почминѓум те мислинав кај на сиум шукар мануш“. * Јекх пхрал кова со викинела пе Данило пишинела: „Дарандиљум хем осетинѓум ман понижимо кеда о војникија почминѓе те кхувен ман, те вреџинен ман хем те заканинен пе манге адалеске со сиум е Јеховаскоро сведоко“. Асавки омраза поврединела амен, ама на сием изненадиме. О Исус вакерѓа кај о мануша ка мрзинен амен. (Читин Матеј 24:9.)

2-3. Соске е Исусескере ученикија тане мрзиме?

² О свето мрзинела е Исусескере следбеникон. Соске? Адалеске со исто сар о Исус, амен да на сием дело таро свето (Јован 15:17-19). Иако сикаваја поштовање спрема о манушикане владе, амен одбинаја те обожавина ленде хем о симболија со преставинена лен. Амен обожавинаја само е Јехова хем поддржинаја е Девлескоро право те владинел упро мануша — право кова со о Сатана хем лескоро потомство на признајнена ле (1. Мој. 3:1-5, 15). Амен проповединаја кај само е Девлескоро Царство ка решинел о манушикане проблемија хем кај адава Царство панда хари ка уништинел са околен со противинена пе леске (Дан. 2:44; Отк. 19:19-21). Акава тано шукар  хабери е кротка манушенге, ама лошно хабери околенге сој лошна (Пс. 37:10, 11).

³ Исто аѓаар, о мануша мрзинена амен адалеске со живинаја спрема е Девлескере праведна мерилија. Акала мерилија скроз разликујнена пе таро акале светоскере румиме морална мерилија. На пример, бут мануша авдиве отворено одобринена о одвратна неморална постапке, сар со сине ко Содом хем Гомор, дизја кола со уништинѓа лен о Јехова (Јуда 7). Адалеске со икераја амен ко библиска морална начелија, бут мануша асана аменге хем вакерена кај на сием толерантна (1. Пет. 4:3, 4).

4. Саве особине поможинена аменге кеда о јавера мрзинена амен?

⁴ Со ка поможинел аменге те истрајна кеда о мануша мрзинена хем вреџинена амен? Ваљани те овел амен силно вера кај о Јехова ка поможинел аменге. Сар јекх штити, амари вера шај те ачхавел „са о јагале стреле е Лошноскере“ (Еф. 6:16). Ама, освен и вера ваљани аменге исто аѓаар мангипе. Соске? Адалеске со о мангипе „на хољанела локхесте“. Ов учхарела хем трпинела са о буќа со шај те дукхавен амен (1. Кор. 13:4-7, 13). Те дикха акана сар шај о мангипе спрема о Јехова, о мангипе спрема амаре пхраља хем пхења хем чак о мангипе спрема амаре душмања те поможинел аменге те истрајна кеда о јавера мрзинена амен.

5. Со шај сине о Исус те керел адалеске со мангела сине пле Даде?

⁵ И рат англедер те овел мудардо, о Исус вакерѓа пле верна следбениконге: „Мангава е Даде, адалеске керава аѓаар сар со заповединѓа манге о Дад те керав“ (Јован 14:31). Е Исусескоро мангипе спрема о Јехова денѓа ле сила те издржинел пхаре неволје со ваљани сине те случинен пе леске. Амаро мангипе спрема о Јехова шај те поможинел аменге ко исто начин.

6. Спрема Римјаните 5:3-5, сар е Јеховаскере слуге осетинена пе кеда мрзинела лен о свето?

⁶ О мангипе спрема о Девел секогаш поможинѓа е Јеховаскере слугенге те истрајнен кеда иси лен прогонство. На пример, кеда о моќно еврејско судско совет заповединѓа е апостоленге те чхинавен те проповединен, о мангипе спрема о Девел поттикнинѓа лен повише те шунен е Девле него е манушен (Дела 5:29; 1. Јов. 5:3). Акава баро мангипе спрема о Девел поможинела амаре пхраленге те ачховен верна иако тане прогониме таро сурова хем моќна властија. Наместо те ова обесхрабриме, аменге тано чест те истрајна кеда о свето мрзинела амен. (Дела 5:41; читин Римјаните 5:3-5.)

7. Сар ваљани те постапина кеда некој тари амари фамилија противинела пе аменге?

⁷ О противибе тари амари фамилија шај те овел јекх таро најпхаро испит. Кеда дикхена кај мангаја те сикљова башо Јехова, некој тари фамилија шај мислинела кај сием заведиме. Јавера шај те мислинен кај делиндилем. (Споредин Марко 3:21.) Ола шај чак насилно те противинен пе аменге. Асавко противибе на ваљани те изненадинел амен. О Исус вакерѓа: „Е манушескере душмања ка овен лескере кхерутне“ (Мат. 10:36). Џанѓола пе, бизи разлика сар амари фамилија дикхела ки аменде, амен на мрзинаја лен. Наместо адава, кобор повише бајрола амаро мангипе спрема о Јехова, добором повише ка манга е манушен (Мат. 22:37-39). Ама, никогаш нане те чхинава те шуна о законија хем о начелија тари Библија само те шај те угодина е манушенге.

8-9. Со поможинѓа јекхе пхењаке те ачхол цврсто иако сине ла баро противибе?

⁸ И Џорџина, која со сине спомними по англе, шај сине те ачхол цврсто иако лакири  дај бут противинела пе сине лаке. Ој објаснинела: „Ме хем ми дај почминѓем заедно те проучина и Библија е Сведоконцар. Ама, пало шов масек, кеда мангљум те џав ко состанокија ми дај почминѓа те противинел пе манге. Дознајнѓум кај ој сине ко контакт е отпадниконцар, хем кеда керела сине манцар лафи користинела сине ленгере аргументија. Освен адава, вреџинела ман сине, цидела сине мле бала, марела ман сине хем фрдела сине мли литература. Откеда пхерѓум 15 берш крстинѓум ман. Ми дај мангља те чхинавав те служинав е Јеховаске аѓаар со чхивѓа ман ко доми башо проблематична чхаве. Несаве таро адала чхаве лена сине дрога хем сине криминалција. О противибе тано посебно пхаро кеда авела некастар со ваљани те мангел тут хем те грижинел пе туке“.

⁹ Со поможинѓа е Џорџинаке? Ој вакерела: „Ми дај почминѓа те противинел пе манге баш ко исто диве кеда завршинѓум те читинав цело Библија. Сиум сине целосно уверими кај аракхљум о чачипе хем адава керѓа ман те овав попаше е Јеховаја. Редовно молинава ман сине леске хем ов шунела ман сине. Кеда живинава сине ко адава доми, јекх пхен викинела ман сине ко пло кхер хем заедно проучинаја сине и Библија. Са адава време сиум сине охрабрими таро пхраља хем о пхења ки дворана. Керѓе ман дело таро пумаре фамилие. Сине манге јасно кај о Јехова тано посилно таро амаре противникија, бизи разлика кој тане ола“.

10. Сави доверба шај те овел амен ко Јехова?

¹⁰ О апостол Павле пишинѓа кај ништо нашти „те одвојнел амен таро е Девлескоро мангипе кова со сикавела ле аменге преку Христос Исус, амаро Господари“ (Рим. 8:38, 39). Иако несаво време шај ка овел аменге пхаро, о Јехова секогаш ка овел аменцар хем ка дел амен утеха хем сила. Сар со дикхлем таро е Џорџинакоро искуство, о Јехова исто аѓаар поможинел аменге преку амари скапоцено духовно фамилија.

11. Сар о мангипе со опишинѓа ле о Исус ко Јован 15:12, 13 поможинѓа лескере учениконге? Вакер јекх пример.

¹¹ И рат англедер те мерел, о Исус потсетинѓа пле ученикон те манген пе јекх јекхеа. (Читин Јован 15:12, 13.) Ов џанља кај о самопожртвувано мангипе ка поможинел ленге те ачховен ко јекхипе хем те издржинен и омраза со сикавела ленге сине о свето. Те дикха  о пример таро собрание ко Солун. Панда таро почеток кеда уло адава собрание, о пхраља хем о пхења сине прогониме. Ама, ола уле пример башо адава со верно истрајнѓе хем башо мангипе со сикавѓе (1. Сол. 1:3, 6, 7). О Павле охрабринѓа лен понадари да те сикавен мангипе чак ки побари мера (1. Сол. 4:9, 10). О мангипе ваљани сине те поттикнинел лен те утешинен адален сој разочариме хем те поддржинен адален сој слаба (1. Сол. 5:14). Ола шунѓе е Павлескере советија хем адалеске ко пло дујто писмо, кова со пишинѓа ле јекх берш покасно, о Павле шај сине те вакерел ленге: „О мангипе со иси тумен јекх јекхеске са повише бајрола“ (2. Сол. 1:3-5). Ленгоро мангипе поможинѓа ленге те издржинен пхарипа хем прогонствија.

12. Сар амаре пхраља хем пхења тари јекх пхув коте со сине војна, сикавѓе мангипе јекх јекхеске?

¹² Те дикха о искуство е Данилоскоро, сој спомнимо по англе, хем лескере ромњакоро. Кеда и војна ресља ки ленгири диз, ола понадари да џана сине ко состанокија, проповединена сине кобор со шај хем делинена сине о хајбе пумаре пхраленцар хем пхењенцар. Јекх диве, вооружиме војникија але ки ленде кхере. О Данило вакерела: „Ола родена сине те откажинав ман тари мли вера. Кеда одбинѓум, ола почминѓе те марен ман хем те даравен ман кај ка мударен ман аѓаар со пукајнѓе упро мло шеро. Англедер те џан, заканинѓе пе манге кај ка иранен пе те силујнен ме ромња. Ама, амаре пхраља сигате чхивѓе амен ко вози те џа ки јавер диз. Никогаш нане те бистрав о мангипе со сикавѓе аменге адала мангле пхраља. Хем кеда реслем ки јавер диз, о пхраља таро адава тхан денѓе амен хајбаске хем поможинѓе манге те аракхав бути хем тхан живибаске. Аѓаар после амен да шај сине те поможина е јавере Сведоконге со нашена сине тари војна“. Асавке искуствија сикавена аменге кај о христијанско мангипе шај те поможинел аменге те истрајна кеда о јавера мрзинена амен.

13. Сар о свети дух поможинела аменге те истрајна џикоте служинаја е Јеховаске чак кеда о мануша мрзинена амен?

¹³ О Исус вакерѓа пле следбениконге те манген пумаре душманен (Мат. 5:44, 45). Адава нане локхо. Ама, шај те кера адава адалеске со поможинела аменге е Девлескоро свети дух. Ко особине со авена таро свети дух тане вклучиме о мангипе, исто аѓаар  стрпливост, љубезност, шукарипе хем самоконтрола (Гал. 5:22, 23). Акала особине поможинена аменге те истрајна кеда о јавера мрзинена амен. Бут мануша чхинавѓе те противинен пе аменге адалеске со ленгоро ром, ромни, чхаве или комшија со служинена е Јеховаске сикавѓе акала шуже особине. Бут противникија уле чак амаре пхраља хем пхења. Ако туке пхаро те манге околен со мрзинена тут адалеске со служинеа е Јеховаске, молин тут башо свети дух (Лука 11:13). Хем ов целосно уверимо кај те ове послушно е Девлеске тано секогаш о најшукар (Изр. 3:5-7).

14-15. Сар о лафија таро Римјаните 12:17-21 поможинѓе е Јасминаке те сикавел мангипе пле ромеске иако бут противинела пе сине лаке?

¹⁴ Те дикха е Јасминакоро пример. Кеда ули јекх таро е Јеховаскере сведокија, лакоро ром мислинѓа кај завединѓе ла хем мангља те чхинавел ла те служинел е Девлеске. Ов вреџинела ла сине хем теринѓа е фамилија, јекхе религиозно водаче хем мануше со керела магие те заканинен пе лаке хем те обвининен ла кај ој растуринела пле фамилија. Лакоро ром чак вреџинѓа е пхрален џикоте трајнела сине јекх состанок. И Јасмина бут пути ровела сине адалеске со постапинена сине лаја бут грубо.

¹⁵ Ки дворана е Јасминакири духовно фамилија дела ла сине утеха хем сила. О старешине поттикнинѓе ла те применинел о лафија со аракхљона ко Римјаните 12:17-21. (Читин.) Ој вакерела: „Сине манге пхаро. Ама, молинѓум ман е Јеховаске те поможинел манге хем керѓум са те шај те применинав адава со вакерела и Библија. Адалеске, кеда мо ром намерно фрдела сине чик ки кујна, ме чистинава ла сине. Кеда вреџинела ман сине, ме одговоринава сине љубезно. Хем кеда сине насвало, ме грижинава ман сине леске“.

16-17. Со сикљовеа таро е Јасминакоро пример?

¹⁶ И Јасмина сине наградими со сикавѓа мангипе пле ромеске. Ој вакерела: „Ме роме почминѓа те овел ле повише доверба ки манде соске џанља кај секогаш ка вакерав адава сој чаче. Ов почминѓа те шунел ман хем те сикавел манге поштовање кеда кераја сине лафи баши религија хем ветинѓа кај нане те керел манге више проблемија. Акана ов охрабринела ман те џав ко состанокија. Амаро брако тано бут пошукар хем кхере иси амен мир. Надинава ман кај мо ром ка прифатинел о чачипе те шај заедно те служина е Јеховаске“.

¹⁷ Е Јасминакоро пример сикавела кај о мангипе „са учхарела... ко са надинела пе, са трпинела“ (1. Кор. 13:4, 7). И омраза шај те овел бут моќно хем те дукхавел, ама о мангипе  тано бут посилно. О мангипе ковљарела о вило околенгоро со противинена пе аменге. Кеда сикаваја мангипе, кераја бахтало е Јеховаскоро вило. Иако о противникија шај понадари да те мрзинен амен, сепак шај те ова бахтале. Соске?

18. Соске шај те ова бахтале кеда о јавера мрзинена амен?

¹⁸ О Исус вакерѓа: „Бахтале сиен кеда о мануша мрзинена тумен“ (Лука 6:22). Амен на биринѓем те ова мрзиме хем на уживинаја кеда сием прогониме баши амари вера. Тегани, соске шај те ова бахтале кеда о јавера мрзинена амен? Те дикха трин причине. Прво, кеда истрајнаја, о Девел тано задоволно амендар (1. Пет. 4:13, 14). Дујто, амари вера тани испитими хем овела позорали (1. Пет. 1:7). Хем трито, ка добина јекх скапоцено награда — вечно живото! (Рим. 2:6, 7).

19. Соске о апостолија сине бахтале откеда сине марде каштенцар?

¹⁹ Кратко откеда о Исус воскреснинѓа, о апостолија доживинѓе о бахталипе башо кова со ов керѓа лафи. Ола сине бахтале, иако сине марде каштенцар хем сине ленге забранимо те проповединен. Соске сине бахтале? Адалеске со сине „достојна те овен лаџакерде башо [е Исусескоро] анав“ (Дела 5:40-42). Ленгоро мангипе спрема ленгоро Господари сине побаро него и дар со сине лен таро ленгере душмања. Хем ола сикавѓе пумаро мангипе адалеа со понадари да проповединѓе о шукар хабери „бизо те чхинавен“. Бут пхраља авдиве понадари да верно служинена иако иси лен пхарипа. Ола џанена кај о Јехова нане те бистрел адава со керена хем о мангипе со сикавена башо лескоро анав (Евр. 6:10).

20. Со ка дикха ки следно статија?

²⁰ О свето ка мрзинел амен са џикоте на авела лескоро крајо (Јован 15:19). Ама, на ваљани те дара. Сар со ка дикха ки следно статија, о Јехова ка дел сила хем ка заштитинел пле верна манушен (2. Сол. 3:3). Адалеске, понадари да те манга е Јехова, те манга амаре пхрален хем пхењен хем чак те манга амаре душманен. Кеда шунаја акава совет, ка ова ко јекхипе хем амари вера ка овел позорали. Ка ана чест е Јеховаске хем ка докажина кај о мангипе тано посилно тари омраза.