Несаве пхраља хем пхења користинена и модерно технологија те шај те овен ко контакт пумаре фамилијаја или јавере Сведоконцар. Ама, џикоте користинена адаја технологија, о зрела христијања иси лен ки годи акава совет: „О гоѓавер мануш дикхела и опасност хем цидела пе, а о неискусно џала понадари хем трпинела о последице“ (Изр. 27:12).

Амен ценинаја адава со о Јехова мангела те заштитинел амен. Адалеске, на дружинаја амен околенцар со керена поделбе, сој тане исклучиме, хем со ширинена ховавне сикљојба (Рим. 16:17; 1. Кор. 5:11; 2. Јов. 10, 11). Несаве сој тане дело таро собрание шај на понашинена пе ко чесно начин (2. Тим. 2:20, 21). Акава иси амен ки годи кеда биринаја амаре амален. Ама, нане локхо те бирине шукар друштво ако комунициринеа ленцар само преку пораке.

Ваљани шукар те бирина амаре амален посебно кеда сием ко баре групе пишибаске. Несаве христијања сине вклучиме ко баре групе пишибаске, хем адава анѓа негативна последице. Сар шај јекх пхрал или пхен те пазинел ако ки јекх група тане вклучиме шел или милје џене? Нане шанса те џане саринен тари адаја група, кој тане ола хем сави тани ленгири духовно состојба. Ко Псалм 26:4 пишинела: „На дружинава ман е манушенцар со ховавена, хем на џава ко окола со гаравена саве тане“. Акава сикавела кај бут помудро тано те допишине тут само околенцар со лично џанеа лен.

Чак ки јекх потикни група, јекх христијани ваљани те пазинел кобор време трошинела пишибаске хем башо со керена лафи ки група. На ваљани те осетина амен должна те одговорина ки секоја порака бизи разлика башо со керела пе лафи или кобор време ка лел амендар. Ко пло прво писмо џи ко Тимотеј, о Павле пишинѓа кај иси поединција со оговоринена хем мешинена пе ко јаверенгере буќа (1. Тим. 5:13). Авдиве да, адава шај те керел пе преку електронска уредија.

Јекх зрело христијани нане те вакерел или те шунел критике или доверлива информацие башо јавера пхраља (Пс. 15:3; Изр. 20:19). Исто аѓаар, ов избегинела те ширинел или те шунел било сави информација со звучинела возбудливо или со нане потврдими (Еф. 4:25). Амен добинаја точна информацие хем извештаија со темелинена пе ки Библија тари амари интернет-страница jw.org хем таро амаре масекоскере емисие ко JW Broadcasting^®.

Несаве Сведокија користинена о електронска пораке те бикинен, те кинен, хем те рекламиринен несаве продуктија или те нудинен бути. Акала буќа тане бизнис, хем ваљани те овен одвојме таро обожавибе. О христијања со нане лен „мангипе спрема о паре“ никогаш нане те искористинен е пхрален те заработинен лендар паре (Евр. 13:5).

Дали шај преку пораке те родел пе те кхеда паре е пхраленге со иси лен несави потреба или доживинѓе несави катастрофа? Амен мангаја амаре пхрален хем интересинаја амен ленге, адалеске поможинаја лен хем охрабринаја лен (Јак. 2:15, 16). Ама, ако ко асавко начин кхедаја паре е пхраленге тегани е подружницаке хем е старешиненге ко собрание ка овел попхаро те поможинен ленге (1. Тим. 5:3, 4, 9, 10, 16). Сигурно никој амендар на мангела те истакнинел пе кај ов поможинѓа е пхраленге ко јекх посебно начин.

Амен мангаја те кера „са баши е Девлеске слава“ (1. Кор. 10:31). Адалеске кеда користинаја апликацие башо пишибе пораке или несави јавер технологија, те размислина башо опасностија хем те ова претпазлива.