1. Соске о Исус молинѓа е Јехова те аракхел лескере ученикон?

КИ ПОСЛЕДНО рат таро пло живото ки Пхув, о Исус размислинѓа башо са о предизвикија со ка овен лескере ученикон. Адалеске со мангља пле ученикон, ов молинѓа пле Даде те аракхел лен таро о Лошно (Јован 17:14, 15). О Исус џанља кај откеда ка иранел пе ко небо, о Сатана о Бенг понадари да ка боринел пе против са окола со мангена те служинен е Јеховаске. Јасно тано кај е Јеховаскоро народо ваљани сине те овел заштитимо.

2. Соске шај те ова сигурна кај о Јехова ка одговоринел ко амаре молитве?

² О Јехова одговоринѓа ки е Исусескири молитва адалеске со мангела сине пле Чхаве. Кеда даја амендар са те кера е Јеховаскири волја, ов амен да ка мангел хем ка одговоринел ко амаре молитве кеда родаја лестар помош хем заштита. О Јехова тано јекх љубезно Дад хем адалеске понадари да ка грижинел пе пле чхавенге. Ако на керела аѓаар, адава нане те анел чест лескере анавеске, или ка руминел лескоро углед.

3. Соске авдиве ваљани аменге е Јеховаскири заштита?

³ Аменге ваљани е Јеховаскири заштита сар никогаш англедер. Адалеске со о Сатана сине фрдимо таро небо, ов „бут тано хољамо“ (Отк. 12:12). Ов керѓа несаве мануша те мислинен кај служинена е Девлеске кеда прогонинена амен (Јован 16:2). А јавера, кола со на верујнена ко Девел, прогонинена амен адалеске со сием поразлична таро мануша ко свето. Бизи разлика соске прогонинена амен о мануша, амен на ваљани те дара. Соске? Адалеске со е Девлескоро Лафи вакерела: „О Господари тано верно хем ов ка дел тумен сила хем ка заштитинел тумен таро окова сој Лошно“ (2. Сол. 3:3). Сар заштитинела амен о Јехова? Те дикха дуј начинија сар керела адава.

4. Спрема Ефешаните 6:13-17, со денѓа амен о Јехова те шај те заштитинел амен?

⁴ О Јехова денѓа амен јекх воено опрема која со шај те заштитинел амен таро е Сатанаскере нападија. (Читин Ефешаните 6:13-17.) Акаја духовно воено опрема шај целосно те заштитинел амен. Ама, ка заштитинел амен само ако понадари да ураваја секова дело тари опрема. Те дикха со претставинела секова дело тари адаја опрема.

5. Сој тано о појас е чачипаскоро, хем соске ваљани те пхирава ле?

⁵ О појас е чачипаскоро претставинела о чачипа со аракхљовена ко е Девлескоро Лафи, ки Библија. Соске ваљани те пханда амен адава појас? Те шај те заштитина амен таро Сатана кова сој тано „о дад е ховајбаскоро“ (Јован 8:44). Ов више милје берша ховавела хем „завединела цело свето“ (Отк. 12:9). Ама, о чачипа со аракхљовена ки Библија заштитинена амен хем на мукхена те ова заведиме. Сар пхираваја адава симболично појас? Амен кераја адава аѓаар со сикљоваја о чачипа башо Јехова, аѓаар со обожавинаја ле духоја хем чачипаја хем аѓаар со мангаја ко са те ова поштена (Јован 4:24; Еф. 4:25; Евр. 13:18).

6. Сој тано о оклоп тари праведност, хем соске ваљани те урава ле?

⁶ О оклоп тари праведност претставинела е Јеховаскере праведна мерилија. Соске ваљани те чхива аменге ко колин акава оклоп? Исто сар со јекх оклоп заштитинела е војникоскоро дословно вило, аѓаар о оклоп тари праведност заштитинела амаро симболично вило таро лошно влијание акале лошно светоскоро (Изр. 4:23). О Јехова очекујнела амендар те манга ле хем те служина леске цело вилеа (Мат. 22:36, 37). Адалеске о Сатана пробинела те чхинавел амен те кера адава аѓаар со керела те манга о буќа таро лескоро свето — буќа со о Јехова мрзинела лен (Јак. 4:4; 1. Јов. 2:15, 16). Хем ако адаја тактика на успејнела, тегани ка користинел прогонство те шај силаја те чхивел амен те кера нешто со на мангела о Јехова.

7. Сар ураваја о оклоп тари праведност?

⁷ Амен ураваја о оклоп тари праведност аѓаар со прифатинаја е Јеховаскере мерилија башо адава сој тано исправно, а сој погрешно, хем аѓаар со живинаја спрема адала мерилија (Пс. 97:10). Несаве шај мислинена кај е Јеховаскере мерилија ограничинена амари слобода. Ама, ако чхинаваја те применина о библиска начелија ко амаро живото, тегани ка ова сар јекх војнико кова со ки сред војна икалела пло оклоп адалеске со мислинела кај тано пхаро. Кобор неразумно би овела сине адава! Ако мангаја е Јехова, тегани лескере заповедија нане те овен аменге пхаре, него ка спасинен амаро живото (1. Јов. 5:3).

8. Со значинена о лафија „уравен ко пре и спремност те проповедина о шукар хабери“?

⁸ О Павле исто аѓаар поттикнинела амен те урава ко пре и спремност те проповедина о шукар хабери башо мир. Адава значинела кај ваљани секогаш те ова спремна те проповедина о шукар хабери башо Царство. Кеда вакераја е јаверенге баши библиско порака, тегани амари вера овела позорали. Амен сием охрабриме кеда дикхаја сар е Јеховаскоро народо ки цело Пхув користинела секоја прилика те проповединел. На пример, ола проповединена ки бути или ки школа, кеда џана таро кхер ко кхер или ко деловна подрачја, кеда џана те пазаринен, кеда џана те посетинен некас тари фамилија со нане сведоко, или кеда керена лафи некасаја со пенџарена пе, па чак кеда нашти те икљовен кхералдан таро несаве причине. Ако тари дар чхинаваја те сведочина, тегани ка ова сар јекх војнико кова со ки војна икалела  пле сандале. Аѓаар, локхесте би поврединела сине пле пре хем ка овел леске попхаро те бранинел пе кеда о јавера ка нападинен ле. Исто аѓаар, ка нашти те овел послушно ко наредбе таро пло заповеднико.

9. Соске ваљани те пхирава о баро штити е веракоро?

⁹ О баро штити е веракоро претставинела и вера со иси амен ко Јехова. Амен верујнаја кај ов ка исполнинел са пле ветувања. Адаја вера ка поможинел аменге те ачхава са о јагале стреле е Лошноскере. Соске ваљани те пхирава адава баро штити? Адалеске со ов заштитинела амен те шај те на ова заведиме таро сикљојба е отпадниконгоро хем те на ова обесхрабриме кеда о мануша критикујнена амари вера. Бизи вера нане те овел амен и сила те ова послушна е Јеховаске кеда о јавера керена аменге притисок те на шуна ле. Тари јавер страна, секова пути кеда одбинаја те кера нешто со на мангела о Јехова, ки бути или ки школа, сикаваја кај пхираја амаро штити (1. Пет. 3:15). Исто аѓаар, секова пути кеда одбинаја шукар платими бути која со спречинела амен те да амаро најшукар ки служба е Јеховаске, сикаваја кај пхираваја амаро штити (Евр. 13:5, 6). Хем секова пути кеда служинаја е Јеховаске иако иси амен противибе, сикаваја кај амари вера заштитинела амен (1. Сол. 2:2).

10. Сој тано о шлеми е спасибаскоро, хем соске мора те пхирава ле?

 ¹⁰ О шлеми е спасибаскоро претставинела и надеж со дела амен о Јехова — и надеж кај ов ка наградинел са околен со керена лескири волја хем кај чак ако мераја ов ка воскреснинел амен (1. Сол. 5:8; 1. Тим. 4:10; Тит 1:1, 2). Исто сар о шлеми со заштитинела сине е војникоскоро шеро, и надеж башо спасение заштитинела амаре мисле. Сар керела адава? Адаја надеж поможинела аменге те концентририна амен ко е Девлескере ветувања хем те на обесхрабрина амен таро амаре проблемија. Сар пхираваја адава шлеми? Амен кераја адава аѓаар со трудинаја амен амаре мисле те овен ко склад е Девлескере мисленцар. На пример, амен на надинаја амен ко барвалипе со нане сигурно, него надинаја амен ко Девел (Пс. 26:2; 104:34; 1. Тим. 6:17).

11. Сој тано о мачи е духоскоро, хем соске ваљани те користина ле?

¹¹ О мачи е духоскоро претставинела е Девлескоро Лафи, и Библија. Адава мачи иси ле моќ те чхинел таро корено са о ховајба хем те ослободинел е манушен таро ховавне сикљојба хем о штетна навике (2. Кор. 10:4, 5; 2. Тим. 3:16, 17; Евр. 4:12). Амен сикљоваја шукар те користина адава мачи преку амаро лично проучибе хем преку и обука со добинаја ла тари е Јеховаскири организација (2. Тим. 2:15). Освен со дела амен и духовно воено опрема, о Јехова заштитинела амен ко јавер да моќно начин. Сар керела адава?

12. Со јавер да ваљани аменге, хем соске?

¹² Јекх искусно војнико џанела кај нашти коркори успешно те боринел пе против јекх бари војска. Ваљани леске помош таро јавера војникија. Слично аѓаар, амен да нашти коркори успешно те борина амен против о Сатана хем лескере следбеникија. Адалеске ваљани аменге и помош таро амаре пхраља хем пхења. О Јехова денѓа амен ко цело свето милиоња пхраља хем пхења со шај те поможинен аменге (1. Пет. 2:17).

13. Спрема Евреите 10:24, 25, сар поможинена аменге амаре состанокија?

¹³ Јекх начин сар добинаја помош тано аѓаар со присуствујнаја ко амаре состанокија. (Читин Евреите 10:24, 25.) Сарине понекогаш осетинаја амен обесхрабриме. Ама о состанокија шај те ден амен сила. Охрабриме сием кеда шунаја о коментарија таро амаре пхраља хем пхења. Ленгере библиска говорија хем приказија мотивиринена амен понадари да те служина е Јеховаске. Освен адава, осетинаја амен охрабриме кеда кераја ленцар лафи англедер хем пало состанок (1. Сол. 5:14). Исто аѓаар, амаре состанокија дена амен прилика те поможина е јаверенге, хем адава керела те ова бахтале (Дела 20:35; Рим. 1:11, 12). Амаре состанокија поможинена аменге ко јавера да начинија. Ки симболично смисла, ола поможинена аменге пошукар те користина амаре „воена“ вештине аѓаар со поможинена аменге пошукар те проповедина хем те сикава. На пример, сикљоваја сар делотворно те користина амаре главна публикацие службаке. Адалеске спремин тут шукар башо состанокија. Џикоте трајнела о состанок, шун внимателно хем пало состанок применин адава со сиклиљан. Ако кереа адала буќа, ту ка ове „шукар војнико е Христос Исусескоро“ (2. Тим. 2:3).

14. Сави јавер помош иси амен?

¹⁴ Исто аѓаар, иси амен поддршка таро милиоња моќна ангелија. Размислин башо адава со шај само јекх ангели те керел! (Иса. 37:36). А акана размислин со шај јекх моќно војска ангелија те керел. Нијекх мануш или демони нашти те побединел е Јеховаскере моќно војска. О Јехова тано Семоќно хем адалеске кеда ов тано аменцар амен  секогаш ка ова посилна таро амаре противникија, бизи разлика кобор џене тане (Суд. 6:16). Памтин акала буќа кеда некој таро тле колеге, соученикија или фамилија со нане е Јеховаскере сведокија обесхрабринена тут пумаре лафенцар или постапкенцар. Ма бистре, на сиан коркори ки акаја борба. Ту слединеа е Јеховаскоро водство хем адалеске ов поддржинела тут.

15. Спрема Исаија 54:15, 17, соске никој нашти те чхинавел е Девлескере народо те проповединел?

¹⁵ О свето колеа со владинела о Сатана иси ле бут причине те мрзинел амен. Амен на мешинаја амен ки политика хем на учествујнаја ко војне. Објавинаја е Девлескоро анав, проповединаја кај само лескоро Царство шај те анел аменге мир хем шунаја лескере праведна мерилија. Освен адава, откринаја е манушенге кај е светоскоро владетели тано ховавно хем убијцо (Јован 8:44). Хем, амен објавинаја кај е Сатанаскоро свето панда хари ка овел уништимо. Сепак, о Сатана хем лескере следбеникија никогаш нане те чхинавен амаро проповедничко дело. Наместо адава, амен ка кера са те шај понадари да те фалина е Јехова! Иако о Сатана тано моќно, ов на успејнѓа те чхинавел и порака башо Царство те проповединел пе е манушенге ки цело Пхув. Акава шај само те овел адалеске со иси амен е Јеховаскири заштита. (Читин Исаија 54:15, 17.)

16. Сар о Јехова ка заштитинел пле народо џикоте трајнела и бари неволја?

¹⁶ Со аџикерела амен ки иднина? Џикоте трајнела и бари неволја, о Јехова ка заштитинел амен ко дуј начинија. Прво, о Јехова ка заштитинел пле верна слуген кеда о царија е пхувјакере ка уништинен о Баро Вавилон, о светско царство е ховавне религијакоро (Отк. 17:16-18; 18:2, 4). Пало дава, ов ка заштитинел пле народо кеда ка уништинел са адава со ачхило таро е Сатанаскоро свето ко Армагедон (Отк. 7:9, 10; 16:14, 16).

17. Сави корист ка овел амен ако ачховаја паше е Јеховаја?

¹⁷ Кеда ачховаја паше е Јеховаја, тегани о Сатана нашти те керел аменге трајно штета. Уствари, ов тано адава со ка трпинел трајно штета (Рим. 16:20). Адалеске, урав цело воено опрема — хем никогаш ма икал ла тутар! Ма пробин коркори те борине тут против о Сатана хем лескоро свето. Поможин тле пхраленге хем пхењенге хем џа пало е Јеховаскоро водство. Ако кереа аѓаар, шај те ове сигурно кај тло мангло небесно Дад ка дел тут сила хем ка заштитинел тут (Иса. 41:10).