1. Ко со поттикнинела амен о Јехова?

Е ЈЕХОВАСКЕ тано бут важно о верно мангипе (Оси. 6:6). Ов охрабринела пле слуген те дикхен ки акаја особина исто сар лесте. Преку пло пророко о Михеј, амаро Девел поттикнинела амен „те манга о верно мангипе“ (Мих. 6:8, фус.). Ама, англедер те кера адава ваљани те џана сој тано о верно мангипе.

2. Сој тано вклучимо ко верно мангипе?

² Сој тано о верно мангипе? Окова со иси ле асавко мангипе мангела е јавере добором бут со нане те чхинавел те мангел ле хем ка ачхол верно тари лескири страна. Акава израз бут пути користинела пе башо е Девлескоро мангипе спрема о мануша, ама исто аѓаар башо мангипе со сикавена о мануша машкар песте. О Јехова тано најбаро пример башо сикајбе верно мангипе. Ки акаја статија, ка кера лафи башо адава сар о Јехова сикавела верно мангипе е манушенге. Ки следно статија ка дикха сар амен шај те џа пало е Јеховаскоро пример аѓаар со ка сикава верно мангипе јекх јекхеске.

3. Со откринѓа о Јехова е Мојсееске баши песте?

³ Кратко откеда о Израелција иклиле таро Египет, о Јехова откринѓа е Мојсееске нешто башо пло анав хем пле особине. Ов вакерѓа леске: „Јехова! Јехова! Девел сој милостиво хем сочувствително, на хољанела сигате, пхердо тано верно мангипе хем чачипе, сикавела верно мангипе буте милја манушенге, простинела грешке, погрешна постапке хем грево“ (2. Мој. 34:6, 7). Акале бут шуже лафенцар о Јехова откринѓа  е Мојсееске јекх посебно аспекти таро пло верно мангипе. Сој тано адава?

4-5. а) Сар опишинѓа пе о Јехова? б) Башо кола пучиба ка кера лафи?

⁴ О Јехова на вакерела баши песте само кај иси ле верно мангипе, него кај тано „пхердо верно мангипе“. Јавера да библиска стихија сикавена аменге кај о Јехова тано пхердо верно мангипе. * Акала лафија секова пути спомнинена пе само башо Јехова, никогаш башо мануша. Адава со о Јехова бут пути вакерела баши песке кај тано пхердо мангипе сикавела кобор и леске важно акаја особина. Адалеске на ваљани те чудинел амен адава со о цари о Давид сине поттикнимо те вакерел: „О Јехова, тло верно мангипе ресела џи ко небо. Кобор тано скапоцено тло верно мангипе, о Девла! Ки сенка таро тле пака о мануша гаравена пе“ (Пс. 36:5, 7). Дали амен да исто сар о Давид бут ценинаја е Девлескоро верно мангипе?

⁵ Те шај пошукар те хаљова со значинела верно мангипе, те кера лафи башо дуј пучиба: Каске о Јехова сикавела верно мангипе? Хем сар шај те овел амен корист таро адава со о Јехова сикавела аменге верно мангипе?

6. Каске сикавела о Јехова верно мангипе?

⁶ Каске сикавела о Јехова верно мангипе? Ки Библија пишинела кај амен шај те манга несаве буќа, сар сој „о земјоделство“, „и мол хем о масло“, „и поука“, „о џандипе“ хем „и мудрост“ (2. Лет. 26:10; Изр. 12:1; 21:17; 29:3). Ама, о верно мангипе никогаш на сикавела пе буќенге, него само манушенге. Хем о Јехова на сикавела верно мангипе било каске, него само околенге сој тане паше амала леа. Амаро Девел тано верно пле амаленге. Ле иси ле бут шужи намера ленцар, хем никогаш нане те откажинел пе лендар.

7. Сар о Јехова сикавѓа мангипе са е манушенге?

⁷ О Јехова сикавѓа мангипе са е манушенге. О Исус вакерѓа јекхе манушеске со викинела пе сине Никодим: „О Девел добором бут мангља е свето со денѓа пле единствено бијаме Чхаве, те шај секој со ка верујнел ки лесте те на овел уништимо него вечно те живинел“ (Јован 3:1, 16; Мат. 5:44, 45).

8-9. а) Соске о Јехова сикавела верно мангипе пле слугенге? б) Башо со ка кера акана лафи?

⁸ Сар со спомнинѓем англедер, о Јехова сикавела пло верно мангипе само пле слугенге — околенге сој тане паше леа. Акава шај те дикхел пе таро адава со вакерѓе ле о цари о Давид хем о пророко о Даниел.  На пример, о Давид вакерѓа: „Понадари да сикав тло верно мангипе околенге со пенџарена тут“. „Е Јеховаскоро верно мангипе тано вечно упро окола со дарана лестар“. А о Даниел вакерѓа: „Јехова, ту о чачутно Девел, сикавеа верно мангипе околенге со мангена тут хем со икерена тле заповедија“ (Пс. 36:10; 103:17; Дан. 9:4). Спрема акала лафија, о Јехова сикавела верно мангипе пле слугенге соске ола пенџарена ле, дарана лестар, мангена ле хем икерена лескере заповедија. О Јехова сикавела пло верно мангипе само околенге со служинена леске ко исправно начин.

⁹ Англедер те почмина те служина е Јеховаске, амен добинѓем о мангипе со о Јехова сикавѓа ле са е манушенге (Пс. 104:14). Ама, сар лескере слуге, амен исто аѓаар иси амен корист таро лескоро верно мангипе. Уствари, о Јехова уверинела пле слуген: „Мло верно мангипе нане те цидел пе тутар“ (Иса. 54:10). О Давид лично доживинѓа акава кеда вакерѓа: „О Јехова ка постапинел ко посебно начин околеа сој леске верно“ (Пс. 4:3). Ко со ваљани те поттикнинел амен адава со о Јехова посебно грижинела пе аменге? О псалмисти вакерѓа: „Окола сој мудра ка размислинен башо са адава. Хор ка размислинен башо буќа кола со о Јехова керела лен башо пло верно мангипе“ (Пс. 107:43). Акава шукар совет авела таро Јехова, адалеске акана ка кера лафи ко кола трин начинија о Јехова сикавела пло верно мангипе хем сар адава користинела аменге.

10. Сар поможинела аменге адава со џанаја кај е Јеховаскоро верно мангипе ачхола вечно? (Псалм 31:7)

¹⁰ Е Девлескоро верно мангипе ачхола вечно. Акава тано спомнимо 26 пути ко Псалм 136. Ко прво стихо пишинела: „Овен благодарна е Јеховаске, соске тано шукар — соске лескоро верно мангипе ачхола вечно“ (Пс. 136:1). Ко секова стихо таро 2 џи ко 26 повторинена пе о лафија „соске лескоро верно мангипе ачхола вечно“. Џикоте читинаја акала стихија таро Псалм, воодушевиме сием таро бут начинија сар о Јехова сикавела пло верно мангипе бизо те чхинавел. О лафија „соске лескоро мангипе ачхола вечно“ уверинена амен кај е Девлескоро  мангипе спрема лескоро народо на менинела пе. Кобор тано охрабрувачко адава со џанаја кај о Јехова на откажинела пе сигате таро пле слуге. Наместо адава, ов приврзинела пе околенцар со служинена леске хем ачхола ленцар посебно кеда иси лен проблемија. Сави корист иси амен? Адава со џанаја кај о Јехова ачхола аменцар, керела амен те ова бахтале хем дела амен и сила која со ваљани аменге те шај те икљова ко крајо е проблеменцар хем понадари те служина леске. (Читин Псалм 31:7.)

11. Спрема Псалм 86:5, со поттикнинела е Јехова те простинел?

¹¹ Е Девлескоро верно мангипе поттикнинела ле те простинел. Кеда о Јехова дикхела кај јекх грешнико каинела пе хем кај чхинавела е лошна постапкенцар, лескоро верно мангипе поттикнинела ле те простинел леске. О псалмисти о Давид башо Јехова вакерѓа: „На постапинела аменцар според амаре гревија хем на иранела аменге адава со заслужинаја башо амаре грешке“ (Пс. 103:8-11). О Давид таро лично искуство џанља кобор пхаро товар шај те овел и лошно совест. Ама ов исто аѓаар дикхља кај о Јехова тано „спремно те простинел“. Со поттикнинела е Јехова те простинел? О одговор аракхљовела ко Псалм 86:5. (Читин.) Оја баш сар со вакерѓа о Давид ки молитва, о Јехова простинела соске тано пхердо верно мангипе спрема окола со родена лестар те простинел ленге.

12-13. Со шај те поможинел аменге ако претерано осетинаја амен крива башо гревија со керѓем лен англедер,?

¹² Кеда грешинаја, исправно тано — чак шукар тано — те осетина амен крива башо адава со керѓем. Адава шај те поможинел аменге те каина амен хем те испрајна амаре лошна постапке. Ама, несаве слуге е Девлескере претерано осетинена пе крива башо грешке со керѓе лен англедер. Ленгоро вило со осудинела лен вакерела ленге кај о Јехова никогаш нашти те простинел ленге — бизи разлика кобор каинена пе. Ако боринеа тут асавке чувствонцар, ка поможинел туке адава со ка хаљове кај о Јехова тано спремно те сикавел верно мангипе пле слугенге.

¹³ Сави корист иси амен? Иако сием несовршена, шај те овел амен чисто совест хем  бахтале те служина е Јеховаске соске о „рат е Исусескоро, лескере Чхавескоро, чистинела амен таро секова грево“ (1. Јов. 1:7). Ако сиан обесхрабримо баши несави несовршеност, сетин тут кај о Јехова тано спремно хем едвај аџикерела те простинел е грешникоске со каинела пе. Приметин сар о Давид поврзинѓа о верно мангипе е простибаја: „Сар сој о небо поучо тари пхув аѓаар тано баро лескоро верно мангипе спрема окола со дарана лестар. Кобор сој дур о исток таро запад добором дур ов цидела амендар амаре грешке“ (Пс. 103:11, 12). Чаче, о Јехова тано спремно дарежливо те простинел (Иса. 55:7).

14. Со вакерѓа о Давид башо начин сар е Девлескоро верно мангипе заштитинела амен?

¹⁴ Е Девлескоро верно мангипе заштитинела амен ко духовно поглед. О Давид ки пли молитва е Јеховаске вакерѓа: „Ту сиан мло тхан гарајбаске, ту ка аракхе ман таро неволје. Ка опколине ман бахтале гиљаја башо мло спасение... а околе со иси ле доверба ко Јехова тано опколимо таро лескоро верно мангипе“ (Пс. 32:7, 10). Ко библиско време, о дизја сине опколиме ѕидонцар кола со заштитинена сине е манушен таро душмања. Слично аѓаар, е Јеховаскоро верно мангипе тано сар јекх ѕидо околу аменде кова со дела амен духовно заштита таро опасностија кола со шај те руминен амаро амалипе леа. Освен адава, о Јехова привлекујнела амен ки песте адалеске со иси ле верно мангипе (Ерем. 31:3).

15. Сар е Јеховаскоро верно мангипе тано сар јекх тхан гарајбаске хем тврдина?

¹⁵ О Давид користинела исто аѓаар јавер споредба те шај те сикавел сар о Девел заштитинела пле народо. Ов пишинѓа: „О Девел тано мло сигурно тхан гарајбаске, о Девел кова со сикавела манге верно мангипе“. Ов исто аѓаар башо Јехова вакерела: „Ов тано мло верно мангипе хем мли тврдина, мло сигурно тхан гарајбаске хем мло спасители, мло штити хем окова касте со гаравава ман“ (Пс. 59:17; 144:2). Соске о Давид спорединѓа е Јеховаскоро верно мангипе сар тхан гарајбаске хем сар тврдина? Бизи разлика коте живинаја, са џикоте сием лескере слуге, о Јехова ка заштитинел амен таро са со ваљани те шај те аракха амаро скапоцено амалипе леа. О 91 Псалм уверинела амен ки исто бути. О писатели таро акава Псалм вакерѓа: „Ка вакерав е Јеховаске: ’Ту сиан мло тхан коте со шај те гаравав ман, мли тврдина‘“ (Пс. 91:1-3, 9, 14). О Мојсеј користинѓа јекх слично споредба те шај те сикавел кај о Јехова заштитинела амен сар јекх тхан гарајбаске. Ов пишинѓа: „О Девел тано тхан гарајбаске панда таро пуране времија, лескере вечна васта тане тели туте“ (5. Мој. 33:27). Со сикавена аменге башо Јехова о лафија „лескере вечна васта тане тели туте“?

16. Ко кола дуј начинија дела амен о Јехова берекети? (Псалм 136:23)

¹⁶ Кеда о Јехова тано амаро тхан гарајбаске, осетинаја амен сигурна. Ама, понекогаш иси диве кеда сием обесхрабриме хем нане амен сила те терѓова ко пре. Со ка керел о Јехова ко асавке диве? (Читин Псалм 136:23.) Ов ка чхивел пле васта тели аменде, љубезно ка ваздел амен хем ка поможинел аменге палем те ушта ко пре (Пс. 28:9; 94:18). Сави корист иси амен? Адава со џанаја кај о Јехова секогаш поддржинела амен, поможинела аменге те на бистра кај ов дела амен берекети ко дуј начинија. Прво, бизи разлика коте живинаја џанаја кај о Јехова секогаш ка заштитинел амен. Дујто, амаро мангло небесно Дад бут грижинела пе аменге.

17. Ко со шај те ова сигурна адалеске со е Девле иси ле верно мангипе? (Псалм 33:18-22)

¹⁷ Сар со дикхлем англедер, кеда иси амен неволје, шај те ова сигурна кај о Јехова ка поддржинел амен те шај те ачхова леске верна (2. Кор. 4:7-9). О пророко о Еремија вакерѓа: „Башо е Јеховаскоро верно мангипе на мулем, соске лескири милост никогаш на завршинела“ (Плач 3:22). Шај те ова сигурна кај о Јехова секогаш ка сикавел аменге пло верно мангипе, соске и Библија вакерела: „Е Јеховаскири јакх тани упро окола со дарана лестар, упро окола со аџикерена лескоро верно мангипе“. (Читин Псалм 33:18-22.)

18-19. а) Со на ваљани те бистра? б) Со ка дикха ки следно статија?

¹⁸ Со на ваљани те бистра? Англедер те почмина те служина е Јеховаске, о Девел сикавѓа аменге мангипе сар са е манушенге ко цело свето. Ама сар лескере слуге, амен исто аѓаар иси амен корист таро лескоро верно мангипе. Адава мангипе поттикнинела ле те заштитинел амен пле вастенцар. Ов секогаш ка икерел амен паше узи песте хем ка исполнинел пли бут шужи намера аменцар. Ов мангела вечно те ова лескере амала (Пс. 46:1, 2, 7). Адалеске, бизи разлика саве неволје иси амен, о Јехова ка дел амен и сила со ваљани аменге те шај те ачхова леске верна.

¹⁹ Ки акаја статија дикхлем сар о Јехова сикавела верно мангипе пле слугенге, ама ов исто аѓаар амендар да очекујнела те сикава верно мангипе јекх јекхеске. Сар шај те кера адава? И следно статија ка керел лафи баши акаја важно тема.