1. Кола пучиба шај пучаја амен?

ДАЛИ понекогаш секиринеа тут кеда размислинеа башо настанија со ка случинен пе? Сар на пример, о уништибе е ховавне религијакоро, о напад таро Гог таро Магог хем и војна Армагедон. Дали некогаш пучеа тут, кеда ка случинен пе акала страшна настанија, дали ме ка шај ме те ачховав верно? Ако але туке асавке мисле ки годи, бут ка поможинел туке адава со ка кера лафи башо е Исусескере лафија сој пишиме ко главно стихо тари акаја статија. О Исус вакерѓа пле учениконге: „Те на овел туменге пхаро ко вило. Верујнен ко Девел“ (Јован 14:1). И зорали вера ка поможинел аменге те ова храбра, бизи разлика со ка случинел пе.

2. Сар шај те кера позорали амари вера, хем со ка дикха ки акаја статија?

² Со шај те поможинел аменге те кера позорали амари вера те шај те издржина ко испитија со ка овен амен ки иднина? Адава со ка размислина сар постапинаја панда авдиве кеда амари вера тани испитими. Аѓаар ка џана ко кола подрачја таро амаро живото ваљани те кера позорали амари вера. Секова пути кеда истрајнаја ко несаво испит, амари вера овела позорали. Акава ка поможинел аменге те истрајна ко неволје со ка овен ки иднина. Ки акаја статија, ка дикха штар ситуацие коте со е Исусескере ученикија ваљани сине те сикавен повише вера. Пало адава, ка дикха сар шај амен да те истрајна ко слична предизвикија авдиве хем сар адава ка спреминел амен баши иднина.

3. Со поможинена аменге те хаљова о лафија со аракхљона ко Матеј 6:30, 33?

³ Нормално тано јекх поглавари те мангел те грижинел пе лескере фамилија те овел ла хајбаске, урајбаске хем тхан живибаске.  Ама, акава нане секогаш локхо те керел пе ко акава пхаро време. Ко несаве случаија, амаре пхраља хем пхења нашавѓе пумари бути, хем иако денѓе пестар са, нашти аракхле јавер бути. А јавера, мора сине те одбинен бути која со нане аменге е христијаненге. Кеда ка случинен пе асавке буќа, ваљани те овел амен бари вера кај о Јехова ка грижинел пе башо амаре фамилијарна потребе. О Исус јасно вакерѓа акава пле учениконге ки пли проповед ки гора. (Читин Матеј 6:30, 33.) Кеда сием цврсто увериме кај о Јехова нане те мукхел амен, тегани ка шај те концентририна амен ко буќа сој важна — о Царство. Џикоте дикхаја сар о Јехова грижинела пе башо амаре материјална потребе, ов ка овел аменге по реално хем амари вера ка овел позорали.

4-5. Со поможинѓа јекхе фамилијаке те на овел бут секирими башо материјална потребе?

⁴ Приметин сар јекх фамилија тари Венецуела дикхља сар поможинела ленге о Јехова кеда сине секириме башо пумаре материјална потребе. Англедер, и фамилија Кастро сине лен јекх фарма колатар со заработинена сине башо јекх скромно живото. Тегани, јекх банда али ки ленде, леле лендар и фарма хем бркинѓе лен адатхар. О дад, о Мигел, вакерела: „Акана кераја бути ки јекх тикни нива колаке со платинаја кирија. Секова диве почминава ле аѓаар со молинава ман е Јеховаске те дел амен адава со ваљани аменге адале дивеске“. О живото акале фамилијаке нане локхо. Ама ола редовно џана ко состанок хем ки служба, соске иси лен бари вера кај амаро мангло Дад ка грижинел пе ленге секова диве. И служба башо Јехова тани ленге ко прво тхан ко живото, хем о Јехова грижинела пе башо ленгере потребе.

⁵ Џикоте трајнела сине адава пхаро време, о Мигел хем лескири ромни концентриринена пе сине те дикхен сар о Јехова поможинела ленге. Понекогаш, о Јехова користинѓа пхрален хем пхењен те шај те ден лен о потребна буќа хем те поможинен е Мигелеске те аракхел бути. А понекогаш, о Јехова преку и подружница дела лен сине адава со ваљани ленге. О Јехова никогаш на мукхља лен. Адалеске, ола шај сине те дикхен сар ленгири вера бајрола сине са повише. Откеда спомнинѓе несави конкретно ситуација колате со о Јехова поможинѓа ленге, ленгири најбари чхај, и Хозелин, вакерела: „Бут тано охрабрувачко те дикхе е Јеховаскоро вас добором паше. Ов тано мло амал хем иси ман доверба кај ов секогаш ка поможинел манге“. Ој исто аѓаар вакерела: „О проблемија со доживинѓем лен сар фамилија спреминѓе амен башо попхаре испитија со ка овен амен ки иднина“.

6. Сар шај те кере позорали тли вера кеда иси тут финансиска проблемија?

⁶ Ако иси тут финансиска проблемија, сигурно нане туке локхо. Ама, кобор хем те овен пхаре тле околностија, ту понадари да шај те користине акава време те шај те бајраре тли вера. Молин тут е Јеховаске џикоте читинеа о лафија е Исусескере сој пишиме ко Матеј 6:25-34, хем размислин баши ленде.  Размислин башо примерија таро амаро време кола со сикавена кај о Јехова грижинела пе околенге сој тане зафатиме ко теократска активностија (1. Кор. 15:58). Ако кереа аѓаар, ка бајраре тли доверба кај о Јехова ка грижинел пе туке исто сар со грижинѓа пе е јаверенге ко слична околностија. Ов на само со џанела со ваљани туке, него ов исто џанела сар те дел тут адава. Кеда дикхеа сар о Јехова поможинела туке ко живото, адава керела тли вера те овел по зорали хем тегани ка шај те издржине о побаре проблемија со ка авен ки иднина (Авак. 3:17, 18).

7. Спрема Матеј 8:23-26, сар јекх бари бура чхивѓа ко испит е апостоленгири вера?

⁷ Ки јекх прилика, кеда о Исус хем лескере ученикија сине ко море, ули јекх бари бура. (Читин Матеј 8:23-26.) О Исус користинѓа адаја прилика те шај те поможинел пле учениконге те хаљовен кај ваљани те керен позорали пумари вера. О бранија сине добором баре, со о броди почминѓа те пхерѓол пани, ама о Исус совела сине мирно. Кеда о ученикија дарандиле хем ваздинѓе е Исусе те шај те спасинел лен, ов вакерѓа ленге: „Соске дарана, добором ли хари вера иси тумен?“ О апостолија ваљани сине те хаљовен кај о Јехова бут локхе шај сине те заштитинел е Исусе хем околен со сине леа. Сави поука шај те сикљова таро акава? И зорали вера шај те поможинел аменге те издржина секоја бура, бизи разлика дали дословно или симболично.

8-9. Сар е Анелакири вера сине испитими, хем со поможинѓа лаке?

⁸ Размислин башо адава сар е Анелакири вера, јекх пхен таро Порторико која со нане ко брако, ули позорали откеда накхља таро јекх баро проблеми. Ој накхља тари јекх дословно бари бура. Лакере проблемија почминѓе ко 2017 берш, кеда о урагани Марија уништинѓа лакоро кхер хем пало адава нашавѓа пли бути. Ој вакерела: „Ко адала пхаре диве сиум сине бут секирими, ама сиклиљум те овел ман доверба ко Јехова аѓаар со молинава ман сине леске хем на мукхава сине о секирацие те перавен ман“.

⁹ И Анел вакерела кај и послушност исто аѓаар поможинѓа лаке те издржинел ко проблемија. Ој вакерела: „Адава со шунава сине о упатствија тари организација поможинѓа манге те ачховав смирими. О Јехова поможинѓа манге преку о пхраља хем о пхења. Ола охрабринѓе ман хем денѓе ман буќа кола со ваљани сине манге те шај преживинав“. Ој исто аѓаар вакерела: „О Јехова денѓа ман бут повише таро адава со очекујнѓум, хем ми вера ули панда позорали“.

10. Со шај те кере ако соочинеа тут баре бураја?

¹⁰ Дали соочинеа тут јекхе баре бураја? Шај иси тут проблемија адалеске со доживинѓан природно катастрофа. Или шај иси тут несаво сериозно насвалипе кова со пељарѓа тут хем на џанеа со те кере. Шај понекогаш секиринеа тут, ама ма мукх и секирација те керел те на овел тут доверба ко Јехова. Ов леа попаше аѓаар со ка молине тут леске таро вило.  Бајрар тли вера аѓаар со ка размислине сар о Јехова поможинѓа туке (Пс. 77:11, 12). Шај те ове сигурно кај ов нане те мукхел тут — ни акана а ни ки цели вечност.

11. Соске ваљани те ова одлучна те шуна околен со предводинена?

¹¹ Со јавер шај те поможинел туке те истрајне ко неволје? Сар со вакерѓа и Анел, и послушност. Сикљов те овел тут доверба околенде касте со о Јехова хем о Исус иси лен доверба. Понекогаш, окола со предводинена шај те ден упатствија кола со шај те овен аменге хари чудна. Ама, о Јехова дела пло берекети околенге сој послушна. Тари Библија хем таро искуствија е верна слугенгоро џанаја кај и послушност спасинела животија (2. Мој. 14:1-4; 2. Лет. 20:17). Адалеске, размислин башо асавке примерија. Аѓаар, ка ове панда по одлучно те ове послушно ко упатствија тари организација акана хем ки иднина (Евр. 13:17). Хем тегани, нане те овел тут причина те дара тари најбари бура која со панда хари ка авел (Изр. 3:25).

12. Спрема Лука 18:1-18, сар и вера поможинела аменге те издржина и неправда?

¹² О Исус џанља кај и неправда ка чхивел ко испит лескере учениконгири вера. Те шај те поможинел ленге те истрајнен, ов вакерѓа ленге јекх споредба која сој тани пишими ко лил Лука. О Исус ки адаја споредба керѓа лафи баши јекх удовица која со упорно молинела сине јекхе неправедно судија баши правда. Ој сине сигурно кај лакири упорност ка исплатинел пе. Хем чаче, ко крајо о судија шунѓа ла. Со сикљоваја амен таро акава? О Јехова нане неправедно. Адалеске о Исус вакерѓа: „Нане ли о Девел те керел лескере бириме те добинен правда, окола со родена ле диве хем рат?“ (Читин Лука 18:1-8.) Пало адава о Исус вакерѓа: „Кеда ка авел о манушикано чхаво, дали ка аракхел асавки вера ки Пхув?“ Кеда доживинаја неправда, ваљани те сикава кај иси амен зорали вера сар адаја удовица, аѓаар со ка ова стрплива хем истрајна. Ако иси амен асавки вера, шај те ова сигурна кај порано или покасно, о Јехова ка поможинел аменге. Исто аѓаар, ваљани те верујна кај е молитва иси ла сила. Понекогаш, шај те добина одговор ко амаре молитве ко начин со на очекујнѓем ле.

13. Сар и молитва поможинѓа јекхе фамилијаке која со доживинѓа неправда?

¹³ Те дикха о искуство јекхе пхењакоро со викинела пе Веро, со живинела ки Демократско Република Конго. Ој, лакоро ром кова со нане е Јеховаскоро сведоко хем лакири чхај кола со сине ла 15 берш, мора сине те нашен таро пумаро гав соске сине нападимо таро војникија. Џикоте нашена сине, ачхавкерѓе лен јекх група таро војникија хем заканинѓе пе ленге кај ка мударен лен. Тегани и пхен Веро почминѓа те ровел. Те шај те смиринел ла, лакири чхај почминѓа ко гласо те молинел пе хем те користинел повише пути ки молитва е Јеховаскоро анав. Кеда  завршинѓа е молитваја, о команданти е војниконгоро пучља ла: „Чхаје, кој сикавѓа тут те молине тут?“ Ој вакерѓа: „Ми дај, аѓаар со користинѓа и најпенџарди молитва која со аракхљола ко Матеј 6:9-13“. Тегани о команданти вакерѓа: „Чхаје, ту хем те родителија шај те џан туменге, о Јехова тумаро Девел нека заштитинел тумен“.

14. Со шај те чхивел ко испит амари вера, хем со ка поможинел аменге те истрајна?

¹⁴ Асавке искуствија сикавена амен никогаш ма те бистра кобор тани важно и молитва. Ама со ако на добинеа одговор ко тле молитве одма или ко јекх посебно начин? Слично сар и удовица тари е Исусескири споредба, понадари да молин тут. Ов уверимо кај амаро Девел нане те мукхел тут хем кај ов ко право време хем ко пло начин ка одговоринел туке. Понадари да роде таро Јехова свети дух (Фил. 4:13). Ма бистре кај о Јехова панда хари ка дел тут добором баро берекети со ка бистре секоја неволја со доживинѓан ла. Џикоте о Јехова поможинела туке те издржине о баре проблемија, ту ка ове позорало те истрајне ко испитија со ка овен тут ки иднина (1. Пет. 1:6, 7).

15. Спрема Матеј 17:19, 20, саво пхарипе сине е апостолен?

¹⁵ О Исус вакерѓа пле учениконге кај и вера ка поможинел ленге те накхавен о пхарипе. (Читин Матеј 17:19, 20.) Ки јекх прилика, ола нашти сине те икален јекхе демоне таро мануш, иако ко јавера случаија адава успешно керѓе ле. Коте сине о проблеми? О Исус вакерѓа ленге кај ваљани ленге повише вера. Ов вакерѓа кај ако иси лен доволно вера, ка шај те преместинен пхарипа кола сој баре сар планина! Авдиве, амен да шај иси амен пхарипа кола со дикхјона сар бари планина.

16. Сар и вера поможинѓа јекхе пхењаке со викинела пе Гејди те истрајнел откеда лакоро ром сине мудардо?

¹⁶ Размислин баши Гејди, јекх пхен тари Гватемала. Џикоте ој хем лакоро ром о Еди иранена пе сине таро состанок, несаве мануша мударѓе лакере роме. Сар лакири вера поможинѓа лаке те истрајнел, иако сине ла бут бари дукх? Ој вакерела: „И молитва поможинѓа манге те фрдав мло пхарипа е Јеховаске хем аѓаар сине ман андруно мир. Дикхава сар о Јехова грижинела пе манге преку мли фамилија хем преку о пхраља хем о пхења таро собрание. Адава со сиум зафатими ки служба поможинела манге те на овав добором тажно хем те на овав претерано секирими башо тајсутно диве. Откеда накхљум са акава халиљум кај, бизи разлика саво испит ка овел ман ки иднина, ка шај те истрајнав ки лесте соске поддржинена ман о Јехова, о Исус хем и организација“.

17. Со шај те кера ако иси амен проблеми кова со дикхјола сар јекх планина?

¹⁷ Дали тугујнеа адалеске со муло тутар некој паше? Одвојн туке време те кере позорали тли вера ки надеж башо воскресение, аѓаар  со ка читине библиска извештаија башо окола со воскреснинѓе. Дали туке жал адалеске со некој тари тли фамилија тано исклучимо? Проучин те шај те уверине тут кај е Девлескоро укор тано секогаш најшукар. Бизи разлика саво проблеми иси тут, дикх ко адава сар прилика те кере позорали тли вера. Пхрав е Јеховаске тло вило ки молитва. Наместо те циде тут, ачхов паше тле пхраленцар хем тле пхењенцар (Изр. 18:1). Учествујн ко активностија со ка поможинен туке те истрајне, чак ако џикоте кереа адава осетинеа бари дукх хем ровела пе туке (Пс. 126:5, 6). Понадари да читин и Библија, џа ко состанокија хем ки служба. Хем понадари да размислин башо бут шуже берекетија кола со о Јехова ветинѓа лен туке. Џикоте дикхеа сар о Јехова поможинела туке, тли вера ки лесте ка бајрол панда повише.

18. Со шај те кере ако приметинеа кај тли вера нане доволно зорали?

¹⁸ Ма обесхрабрин тут ако о неволје со сине тут, или со иси тут акана, сикавѓе туке кај тли вера нане доволно зорали. Дикх ко адава сар прилика те кере тли вера позорали. Исто сар о апостолија, ту да шај те роде таро Девел те дел тут „панда вера“ (Лука 17:5). Исто аѓаар, размислин башо примерија коленге со керѓем лафи ки акаја статија. Слично сар о Мигел хем и Јурај, размислин баши секоја ситуација кеда о Јехова грижинѓа пе туке. Слично сар и чхај тари Веро, хем сар и Анел, молин тут таро вило е Јеховаске, посебно кеда иси тут јекх баро проблеми. Хем сар и Гејди, дикх сар о Јехова шај те грижинел пе туке преку и фамилија хем преку о пхраља хем о пхења. Кеда дозволинеа е Јеховаске те поможинел туке те истрајне ко проблемија со иси тут акана, ка ове панда по уверимо кај ов ка поможинел туке те истрајне ко неволје со ка овен тут ки иднина.

19. Ко со сине сигурно о Исус, хем ко со шај ту те ове сигурно?

¹⁹ О Исус поможинѓа пле учениконге те дикхен коте ваљани ленге повише вера. Ама ов никогаш на сумнинѓа пе кај ола верно ка истрајнен ко испитија со ка овен лен ки иднина (Јован 14:1; 16:33). Ов сине сигурно кај јекх „баро мноштво мануша“ ка преживинен и бари неволја адалеске со иси лен зорали вера (Отк. 7:9, 14). Ка ове ли машкар ленде? Ту шај те ове, соске о Јехова сикавела аменге шукарипе кова со на заслужинаја ле. Адалеске, де тутар са те шај те користине секоја прилика те кере зорали тли вера панда авдиве! (Евр. 10:39).