ЏИ КО ефтато веко а.а.е., и Асирија ули и најбари империја ко свето. О Британско музеј ки пли интернет-страна пишинела кај ој астарела сине територија таро Кипар ко запад џи ко Иран ко исток, а несаво време чак о Египет. Лакири главно диз и Ниневија, сине и најбари диз ко свето. Сине ла бут шуже градине, баре палате хем баре библиотеке. О натписија ко ѕидија тари пурани Ниневија сикавена кај о цари о Асурбанипал, исто сар о јавера асирска царија, баши песте вакерела сине кај тано „цари е светоскоро“. Џикоте владинела сине ов, изглединела сине сар те пхене никој нашти те освојнел е Асирија хем е Ниневија.

Ама, кеда е Асирија сине ла најбари моќ, е Јеховаскоро пророко о Софонија пророкујнѓа: „[О Јехова] ка уништинел е Асирија, хем ка керел и Ниневија те овел пусто, хем шуки сар пустина“. О пророко о Наум исто аѓаар пророкујнѓа: „Чорен сребро, чорен злато! И диз тани чучи, пусто, уништими. Секова јекх со ка дикхел тут ка нашел тутар хем ка вакерел, ’И Ниневија тани уништими!‘“ (Соф. 2:13; Наум 2:9, 10; 3:7). Кеда шунѓе акала пророштвија, о мануша шај пучена пе сине: „Шај ли чаче те случинел пе акава? Шај ли некој те побединел е моќно Асирија?“ Е манушенге сине пхаро те верујнен ко адава.

Иако изглединела сине аѓаар, адаја моќно сила сине победими. Ко крајо таро ефтато веко а.а.е., о Вавилонција хем о Медијција, побединѓе е Асирија. Ко крајо, никој више на живинела сине ки Ниневија хем о мануша бистерѓе кај постојнела сине. Јекх публикација таро музеј баши уметност со аракхљола ко Њујорк, вакерела: „Ко крајо и диз сине учхарди хем о мануша баши Ниневија џанена сине само тари Библија“. Ки јекх интернет архива баши библиско археологија, пишинела кај џи ко почеток таро дешуофтото веко, „никој ни на џанља дали чаче постојнела сине и главно диз тари Асирија“. Ама ко 1845 берш, о археолого Остин Хенри Лерд почминѓа те рандел ко рушевине тари диз Ниневија. Атхе аракхле доказија кај и Ниневија чаче сине бари диз.

Адава со точно исполнинѓа пе о пророштво баши Ниневија бајрарела амари увереност кај о пророштво башо крајо таро авдисутне политичка владе исто аѓаар ка исполнинел пе (Дан. 2:44; Отк. 19:15, 19-21).