1-2. Соске ваљани те сикава верно мангипе јекх јекхеске?

ИСИ амен шукар причине те сикава верно мангипе јекх јекхеске. Кола тане несаве лендар? Приметин сар акала библиска изреке одговоринена ко акава пучибе: „Ма дозволин о верно мангипе хем и верност те мукхен тут... тегани ка аракхе милост англо Девел хем англо мануша хем ка ове пенџардо сар гоѓавер мануш“. „О мануш со иси ле верно мангипе керела шукарипе коркори песке.“ „Кој родела и праведност хем о верно мангипе ка аракхел живото“ (Изр. 3:3, 4; 11:17, фус.; 21:21).

² Акала изреке спомнинена трин причине соске ваљани те сикава верно мангипе. Прво, кеда сикаваја верно мангипе оваја скапоцена англо Девел. Дујто, кеда сикаваја верно мангипе кераја шукарипе аменге. На пример, кераја позорало амаро амалипе е јаверенцар. Хем трито, кеда сикаваја верно мангипе ка добина берекетија ки иднина хем вечно живото. Чаче иси амен шукар причине те шуна е Јеховаскоро совет: „Сикавен верно мангипе хем милост јекх јекхеске“ (Зах. 7:9).

3. Башо кола пучиба ка кера лафи ки акаја статија?

³ Ки акаја статија ка одговорина ко штар пучиба. Каске ваљани те сикава верно мангипе? Со шај те сикљова таро лил Рут башо сикајбе верно мангипе? Сар шај авдиве те сикава верно мангипе? Хем, сави корист иси околен со сикавена верно мангипе?

4. Сар шај те сикава верно мангипе сар о Јехова? (Марко 10:29, 30)

⁴ Сар со дикхлем ки англуни статија, о Јехова сикавела пло верно мангипе — мангипе со приврзинела ле хем трајнела вечно — само околенге со мангена ле хем служинена леске (Дан. 9:4). Амен мангаја те постапина „сар о Девел, сар лескере мангле чхаве“ (Еф. 5:1). Адалеске, амен мангаја те бајрара амаро верно мангипе хем и приврзаност спрема амаре духовна пхраља хем пхења. (Читин Марко 10:29, 30.)

5-6. Башо со обично користинела пе о лафи „верност“?

⁵ Сигурно ка сложине тут кај кобор пошукар хаљоваја сој тано верно мангипе, добором пошукар ка шај те сикава ле амаре пхраленге хем пхењенге. Те шај пошукар те хаљова со значинела верно мангипе, те дикха сар о мануша обично хаљовена о лафи верност. Те дикха јекх пример.

 ⁶ Ако некој бершенцар керела бути ки јекх фирма, обично леске вакерела пе кај тано верно хем буќарно работнико. Ама, ов на керела адатхе бути адалеске со мангела е директорен или и фирма. Те шај те керел адатхе бути, ов ни на ваљани те запознајнел лен или те сложинел пе секогаш е фирмакере одлукенцар. Уствари, ов керела адатхе бути само соске добинела плата. Хем ка продолжинел те керел адатхе бути џи ки пензија, освен ако на аракхела пошукар платими бути.

7-8. а) Со поттикнинела некас те сикавел верно мангипе? б) Соске ка кера лафи башо несаве стихија таро лил Рут?

⁷ И разлика машкар и верност сој спомними ко  шовто пасус хем о верно мангипе тане о мотивија. Таро саве мотивија сикавѓе верно мангипе е Девлескере слуге ко пурано време? Ола сикавѓе верно мангипе на адалеске со мора сине, него адалеске со ленгоро вило теринела лен сине ко адава. Размислин башо е Давидескоро пример. Лескоро вило поттикнинѓа ле те сикавел верно мангипе пле мангле амалеске е Јонатанеске, иако е Јонатанескоро дад мангела сине те мударел ле. Пало бут берша откеда муло о Јонатан, о Давид понадари да сикавѓа верно мангипе е Јонатанескере чхавеске е Мефивостееске (1. Сам. 20:9, 14, 15; 2. Сам. 4:4; 8:15; 9:1, 6, 7).

⁸ Шај бут те сикљова башо верно мангипе ако дикхаја несаве делија таро библиско лил Рут. Саве поуке шај те сикљова башо верно мангипе таро личностија сој спомниме ко акава лил? Сар шај те применина адала поуке ко амаро собрание? *

9. Соске и Ноемина мислинѓа кај о Јехова сине против лате?

⁹ Ко лил Рут, читинаја баши Ноемина, лакири бори и Рут хем башо Вооз, мануш кова со поштујнела сине е Девле хем сине фамилија е Ноеминакере ромеске. Адалеске со сине баро чоролипе ко Израел, и Ноемина, лакоро ром хем ленгере дуј чхаве селинѓе пе ко Моав. Џикоте сине адари, е Ноеминакоро ром муло. Пало адава лакере дуј чхаве женинѓе пе, ама пало несаво време ола да муле (Рут 1:3-5; 2:1). Акала трагедие керѓе и Ноемина те на мангел више те живинел. Лакири мука сине добором бари со мислинела песке сине кај о Јехова тано против лате. Приметин коле лафенцар опишинѓа пле чувствија спрема о Девел: „О Јехова ваздинѓа пло вас против манде... о Семоќно керѓа мло живото бут керко“. Ој понадари вакерѓа: „О Јехова  иранѓа пе против манде хем о Семоќно анѓа манге неволја“ (Рут 1:13, 20, 21).

10. Сар реагиринѓа о Јехова ко е Ноеминакере лафија?

¹⁰ Сар реагиринѓа о Јехова ко е Ноеминакере лафија? Ов на иранѓа пло думо е Ноеминаке. Наместо адава, ов сикавѓа лаке сочувство. О Јехова хаљовела кај „и мука шај те керел јекхе мудро мануше те делинѓовел“ (Проп. 7:7). Е Ноеминаке ваљани сине помош те шај те дикхел кај о Јехова на мукхља ла. Сави помош денѓа ла о Девел? (1. Сам. 2:8). Ов поттикнинѓа е Рута те сикавел верно мангипе е Ноеминаке. И Рут спремно хем љубезно поможинѓа пле сасаке те на овел добором обесхрабрими хем те дикхел кај о Јехова панда мангела ла. Со сикљоваја тари Рут?

11. Соске бут љубезна пхраља хем пхења трудинена пе те поможинен околенге сој тане тажна хем обесхрабриме?

¹¹ О верно мангипе поттикнинела амен те поможина околенге сој тане тажна хем обесхрабриме. Исто сар и Рут со на мукхља е Ноемина, о љубезна пхраља хем пхења авдиве спремно ачховена околенцар таро собрание кола сој тажна хем разочариме. Ола мангена пумаре пхрален хем пхењен, хем спремна тане те керен са со шај те шај те поможинен ленге (Изр. 12:25; 24:10). О апостол Павле охрабринѓа амен те постапина аѓаар, кеда вакерѓа: „Утешинен околен сој разочариме, поможинен околенге сој слаба, овен стрплива сариненцар“ (1. Сол. 5:14).

12. Кова тано јекх таро најшукар начинија те поможинел пе јекхе обесхрабриме пхралеске или пхењаке?

¹² Бут пути, најшукар начин сар шај те поможина некаске сој обесхрабримо тано аѓаар со ка шуна ле хем ка вакера леске кобор бут мангаја ле. О Јехова дикхела кеда трудинеа тут те поможине лескере скапоцено бакхреске (Пс. 41:1). Ко Изреки 19:17 пишинела: „Кој сикавела шукарипе е чоролеске, дела заем е Јеховаске хем ов ка платинел леске башо адава со керела“.

13. Сар разликујнела пе сине и Рут тари Орфа, хем сар и Рут пле одлукаја сикавѓа верно мангипе? (Дикх и слика тари насловно страна.)

¹³ Пошукар ка хаљова о верно мангипе ако размислинаја башо адава со случинѓа пе е Ноеминаке откеда муло лакоро ром хем лакере дуј чхаве. Кеда и Ноемина шунѓа кај „о Јехова палем дикхља пле народо аѓаар со денѓа ле хајбаске“, ој одлучинѓа те иранел пе кхере (Рут 1:6). О солдуј бојра цидинѓе ко друмо лаја. Џикоте сине ко друмо, и Ноемина трин пути пробинѓа те убединел пле бојрен те иранен пе ко Моав. Со случинѓа пе? О извештај пхенела: „И Орфа чуминѓа пле саса хем гели песке. Ама и Рут ачхили лаја“ (Рут 1:7-14). Адалеа со иранѓа пе, и Орфа шунѓа е Ноемина, керѓа адава со очекујнела пе сине латар. Ама и Рут керѓа нешто повише таро адава. Ој да шај сине те џал песке, ама адалеске  со сине ла верно мангипе, одлучинѓа те ачховел е Ноеминаја колаке со ваљани сине помош (Рут 1:16, 17). Ој на керѓа адава адалеске со мора сине, него адалеске со мангела сине. И Рут сикавѓа верно мангипе. Сави поука шај те сикљова таро акава извештај?

14. а) Сави одлука анена бут пхраља хем пхења авдиве? б) Спрема Евреите 13:16, саве жртве мангела о Девел?

¹⁴ О верно мангипе керела повише таро адава со очекујнела пе. Авдиве, исто сар ко пурано време, бут пхраља хем пхења одлучинѓе те сикавен верно мангипе пумаре пхраленге, чак околенге со никогаш на запознајнѓе лен. На пример, кеда дознајнена кај случинѓа пе несави природно катастрофа, одма мангена те поможинен. Кеда некас таро собрание иси ле финансиска проблемија, одма дикхена сар шај те поможинен леске ко практична начинија. Слично сар о Македонција таро прво веко, ола керена повише таро адава со очекујнела пе лендар. Керена жртве аѓаар со дена „повише таро адава со шај“ те шај те поможинен пумаре пхраленге (2. Кор. 8:3). О Јехова тано бут бахтало кеда дикхела сар сикавела пе асавко верно мангипе. (Читин Евреите 13:16.)

15-16. Сар и Рут сикавѓа кај на мангља те откажинел пе?

¹⁵ Шај те сикљова бут шуже поуке ако дикхаја сар и Рут поможинѓа е Ноеминаке. Те дикха некобор.

¹⁶ Ма откажин тут. Кеда и Рут вакерѓа пле сасаке кај мангела те џал лаја ки Јуда, ко почеток и Ноемина на мангља те прифатинел. Ама и Рут на откажинѓа пе. Адалеске, кеда и Ноемина дикхља кај и Рут сине упорно те џал лаја, ој чхинавѓа те убединел ла те иранел пе (Рут 1:15-18).

17. Со ка поможинел аменге те на откажина амен сигате?

¹⁷ И поука аменге: Наместо те откажина амен те поможина околенге сој разочариме, ваљани те ова стрплива ленцар. Јекх пхен, колаке со ваљани охрабрување, ко почеток шај те на прифатинел амари помош. * Ама, о верно мангипе ка поттикнинел амен те да амендар са те шај те ачхова узи лате (Гал. 6:2). Надинаја амен кај ко крајо ка дозволинел те поможина лаке хем те утешина ла.

18. Со шај дукхавѓа е Рута?

¹⁸ Ма ле о буќа упри туте. Кеда и Ноемина хем и Рут ресле ко Витлеем, и Ноемина аракхља пе пле комшиенцар. Ој вакерѓа ленге: „Пхерде вастенцар гељум манге, ама о Јехова керѓа те иранав ман чуче вастенцар“ (Рут 1:21). Замислин само сар осетинѓа пе и Рут кеда шунѓа адала лафија тари Ноемина! Ој мукхља са пали песте, само те шај те ачхол е Ноеминаја. Рунѓа лаја, утешинѓа ла хем дивенцар пхирѓа лаја. Сепак, пало са акава, и Ноемина вакерѓа: „О Јехова керѓа те иранав ман чуче вастенцар“. Лакере лафија шај сине те хаљон пе сар ка пхене ој на ценинела ни хари са адава со керѓа и Рут, која со терѓола сине узи лате. И Рут веројатно осетинѓа пе бут повредими! Сепак ој ачхили е Ноеминаја.

19. Со ка поможинел аменге те ачхова узи некасте со накхела таро пхаро периоди?

¹⁹ И поука аменге: Несави пхен сој разочарими шај те вакерел нешто со ка поврединел амен, иако шај бут поможинѓем лаке. Ама трудинаја амен те на ла адала лафија упри аменде. Амен ачховаја узи амари пхен каске со ваљани помош, хем молинаја е Јехова те поможинел аменге те аракха начинија сар те утешина ла (Изр. 17:17).

20. Котар и Рут добинѓа и потребно сила те шај те продолжинел?

 ²⁰ Охрабрин кеда дикхеа кај некаске ваљани адава. И Рут сикавѓа верно мангипе е Ноеминаке, ама лаке да ваљани сине охрабрување. О Јехова џанела сине адава хем адалеске поттикнинѓа е Воозе те охрабринел ла. О Вооз вакерѓа е Рутаке: „О Јехова нека наградинел тут башо адава со керѓан, хем о Јехова о Девел е Израелескоро, тело каскере пака аљан те гараве тут нека дел тут целосно плата“. И Рут сине бут утешими таро акала љубезна лафија. Адалеске, ој вакерѓа леске: „Ту утешинѓан ман хем тле лафенцар смиринѓан тле слугинка“ (Рут 2:12, 13). О Вооз охрабринѓа е Рута ко време кеда ваљани сине лаке адава хем адава денѓа ла сила те на откажинел пе.

21. Сар сој пишимо ко Исаија 32:1, 2, сар грижинена пе о љубезна старешине?

²¹ И поука аменге: Понекогаш околенге со сикавена верно мангипе е јаверенге, исто аѓаар ваљани охрабрување. О Вооз пофалинѓа е Рута кеда приметинѓа кобор љубезно сине ој е Ноеминаја. Авдиве да, о старешине пофалинена е пхрален хем е пхењен ко собрание кеда приметинена сар ола поможинена е јаверенге. Кеда добинена пе асавке пофалбе ко право време, тегани о пхраља хем о пхења добинена и сила која со ваљани ленге те шај те на откажинен пе. (Читин Исаија 32:1, 2.)

22-23. Сар менинѓа пе е Ноеминакоро стави, хем соске? (Псалм 136:23, 26)

²² Откеда накхља несаво време, о Вооз сикавѓа дарежливост аѓаар со денѓа хајбаске е Рутаке хем е Ноеминаке (Рут 2:14-18). Сар реагиринѓа и Ноемина? Ој вакерѓа: „Те дел ле берекети о Јехова, кова со на чхинавела те сикавел верно мангипе хем е џивденге хем е муленге“ (Рут 2:20а). Таро акава дикхаја кај  е Ноеминакоро стави бут менинѓа пе! Англедер ој ровиндор вакерѓа: „О Јехова противинѓа пе манге“. Ама акана ој бахтали вакерела: „О Јехова на чхинавѓа те сикавел пло верно мангипе“. Со анѓа џи ко адава и Ноемина те менинел пло стави?

²³ И Ноемина почминѓа те дикхел е Јеховаскоро вас ко пло живото. О Јехова користинѓа е Рута те шај те поможинел лаке џикоте иранѓа пе ки Јуда (Рут 1:16). И Ноемина исто аѓаар дикхља е Јеховаскоро вас кеда о Вооз, јекх таро ленгере „откупителија“, љубезно поможинѓа ленге * (Рут 2:19, 20б). Сигурно мислинѓа песке: „Акана хаљовава кај о Јехова никогаш на мукхља ман. Ов сине манцар цело време!“ (Читин Псалм 136:23, 26.) И Ноемина сигурно сине бут благодарно адалеске со и Рут хем о Вооз на откажинѓе пе латар! Шај те замислина аменге само кобор сине бахтале о со трин џене башо адава.

24. Соске мангаја понадари да те сикава верно мангипе амаре пхраленге?

²⁴ Со сиклилем башо верно мангипе таро лил Рут? О верно мангипе поттикнинела амен те на откажина амен сигате таро амаре пхраља хем пхења кола со накхена таро пхаро периоди. Исто аѓаар, поттикнинела амен те кера жртве те шај те поможина ленге. О старешине ваљани те охрабринен околен со сикавена верно мангипе е јаверенге. Амен сием бут бахтале кеда дикхаја сар окола со ваљани ленге помош, добинена духовно сила те служинен палем е Јеховаске (Дела 20:35). Ама, која тани и најважно причина соске понадари да сикаваја верно мангипе? Адалеске со мангаја те кера бахтало е Јехова хем те џа пало лескоро пример, кова сој „пхердо верно мангипе“ (2. Мој. 34:6; Пс. 33:22).