1-2. а) Соске е неве брачна парен ваљани те овел лен доверба ко Јехова? (Псалм 37:3, 4) б) Башо со ка кера лафи ки акаја статија?

ДАЛИ панда хари планиринеа те кхуве ко брако, или сигенде кхувѓан ко брако? Сигурно едвај аџикереа те уживине ко шужо живото тле партнереа, коле со бут мангеа. Џанѓола пе, ко брако ка овен предизвикија хем сар нево брачно пари мора те анен бут важна одлуке. О начин сар реагиринена ко адала предизвикија хем сар анена одлуке бут ка влијајнел упро адава дали ка овен понадари да бахтале или на. Ако иси тумен доверба ко Јехова, ка анен мудра одлуке, тумаро брако ка овел позорало хем ка овен панда побахтале. Ако на применинена е Девлескоро совет, најверојатно ка овен тумен пхарипа ко брако кола со ка анен туменге проблемија хем адалеске нане те овен бахтале. (Читин Псалм 37:3, 4.)

² Иако акаја статија главно керела лафи башо неве брачна парија, ки лате исто ка дикха предизвикија коленцар со шај те соочинен пе са о брачна парија. Ка овен истакниме о поуке со шај те сикљова лен таро верна џувља хем мурша со живинѓе ко пурано време. Акала библиска примерија сикавена амен поуке кола со шај те применина лен ко различна подрачја ко живото хем ко амаро брако. Исто аѓаар, ка дикха со шај те сикљова таро несаве брачна парија таро амаро време.

3-4. Саве предизвикија шај те овен е неве брачна парен?

³ Несаве мануша поттикнинена е неве брачна парен те живинен сар са о јавера мануша. На пример, о родителија хем и фамилија шај те керен ленге притисок те овел лен со посигате чхаве. Или о амала хем и фамилија шај те поттикнинен лен те кинен песке кхер хем те срединен ле.

⁴ Ако на пазинена, о неве брачна парија шај те анен одлуке кола со ка чхивен лен ко баро борчи. Тегани, хем о ром хем и ромни, веројатно ка ваљани те керен бут бути те шај те платинен о борчи. Шај ка ваљани те керен добором бут бути со нане те овел лен више време баши пли лично студија, баши Фамилијарно рат хем баши служба. Ола шај чак те пропуштинен состанокија те шај те заработинен повише паре или те на нашавен пли бути. Ако керена адава, тегани пропуштинена бут шуже прилике те шај те бајрарен пли служба башо Јехова.

5. Со сикљовеа таро Клаус хем тари Мариса?

⁵ О искуство сикавела кај ако концентриринаја амен ко материјална буќа нане те ова бахтале. Акава исто аѓаар халиле о Клаус хем и Мариса. * Кеда леле пе, о солдуј керена сине бут бути те шај те овел лен удобно живото, ама адава на керѓа лен те овен бахтале. О Клаус вакерела: „Ко материјално поглед сине амен бут, ама на сине амен нисаве духовна целија. Уствари, амаро живото сине комплицирано хем стресно“. Шај тумен да приметинѓен кај о материјална буќа на керена тумен бахтале. Ако адава тано аѓаар, ма обесхрабринен тумен. Адава со ка дикхен е јаверенгоро шукар пример шај те поможинел туменге те керен о потребна промене. Најангле, те дикха со шај о рома те сикљовен таро Цари о Јосафат.

6. Сар о цари о Јосафат применинѓа о совет сој пишимо ко Изреки 3:5, 6 кеда соочинѓа пе јекхе баре проблемеа?

⁶ Тумен о рома, дали понекогаш туменге пхаро те исполнинен тумаре одговорностија? Ако тано аѓаар, шај бут те сикљовен таро цари о Јосафат. Сар цари, о Јосафат сине одговорно башо е народоскоро шукарипе. Сар успејнѓа те исполнинел акаја бари одговорност? Ов денѓа пестар са те шај те заштитинел е народо. Керѓа о дизја ки Јуда те овен побезбедна хем кхединѓа бари војска која со сине повише таро 1.160.000 војникија (2. Лет 17:12-19). Покасно, о Јосафат соочинѓа пе баре проблемеа. Јекх бари војска таро Амонција, Моавција хем мануша таро планинско подрачје таро Сеир, заканинѓе пе леске, лескере фамилијаке хем лескере народоске (2. Лет. 20:1, 2). Со керѓа о Јосафат? Ов родинѓа помош таро Јехова хем сила. Постапинѓа баш спрема о начело со аракхљола ко Изреки 3:5, 6. (Читин.) Е Јосафатескири понизно молитва сој пишими ко 2. Летописи  20:5-12, сикавела аменге кобор бари доверба сине ле ко Јехова. Сар одговоринѓа о Јехова ки е Јосафатескири молитва?

7. Сар одговоринѓа о Јехова ки е Јосафатескири молитва?

⁷ О Јехова одговоринѓа е Јосафатеске преку јекх левити со викинела пе сине Јазиел. О Јехова вакерѓа: „Рединен тумен, терѓовен хем дикхен сар о Јехова ка спасинел тумен!“ (2. Лет. 20:13-17). Акава на сине јекх вообичаено начин сар те водинел пе јекх борба. Ама акала упатствија на денѓа лен несаво мануш, него о Јехова. Адалеске со сине ле бари доверба ко Девел, о Јосафат керѓа аѓаар сар со сине леске вакердо. Кеда ов хем о народо геле ки борба, на чхивѓа ко прво редо е највешта војникон, него е пеачен кола со на сине лен нисаво оружје. О Јехова икерѓа пе ко пло лафи со денѓа ле е Јосафатеске — ов побединѓа е душманен (2. Лет. 20:18-23).

8. Со шај о рома те сикљовен таро Јосафат?

⁸ Тумен о рома шај бут те сикљовен таро Јосафат. Иси тумен одговорност те грижинен тумен тумаре фамилијаке. Адалеске, дена тумендар са те шај те заштитинен лен хем те грижинен тумен ленге. Кеда иси тумен проблемија, шај мислинена кај сиен доволно способна коркори те решинен лен. Ама, на ваљани те овел тумен доверба ки тумари сила. Наместо адава, молинен тумен е Јеховаске баши помош кеда сиен коркори. Исто аѓаар, таро вило молинен тумен заедно тумаре ромњенцар. Роден водство таро Јехова аѓаар со ка проучинен и Библија хем о публикацие кола со авена тари е Девлескири организација, хем применинен о советија со аракхена лен адатхе. О јавера шај нане те сложинен пе туменцар кеда ка анен одлуке со темелинена пе ки Библија хем шај чак ка вакерен туменге кај сиен глупава. Шај ка вакерен туменге кај о паре хем о буќа со шај те кинен лен тане најшукар заштита тле фамилијаке. Ама ма бистрен е Јосафатескоро пример. Ле сине ле доверба ко Јехова хем адава сикавѓа ле пле постапкенцар. О Јехова на мукхља адале верно мануше, а нане те мукхел ни тумен (Пс. 37:28; Евр. 13:5). Со јавер шај те керен о брачна парија те шај те овел лен бахтало живото?

9. Со шај те вакера башо пророко о Исаија хем лескири ромни?

⁹ О Исаија хем лескири ромни чхивѓе и служба башо Јехова ко прво тхан ко пумаро живото. Ов сине пророко хем шај лескири ромни да пророкујнела сине, соске ки Библија тани спомними сар „пророчица“ (Иса. 8:1-4). Сар брачно пари ола концентриринѓе пе ки служба башо Јехова. Ола денѓе бут шужо пример е брачна паренге авдиве!

10. Сар адава со о брачна парија ка проучинен о пророштвија тари Библија ка поттикнинел лен те керен повише ки служба башо Јехова?

¹⁰ О брачна парија авдиве шај те џан пало пример со денѓа ле о Исаија хем лескири ромни, аѓаар со ка керен са со шај ки служба башо Јехова. Ола шај те бајрарен пумари доверба ко Јехова, аѓаар со заедно ка проучинен о библиска пророштвија хем ка размислинен сар секогаш исполнинена пе * (Тит 1:2). Ола шај те размислинен башо адава сар шај те поможинен те исполнинен пе несаве библиска пророштвија. На пример, шај те поможинен те исполнинел пе е Исусескоро пророштво кај о шукар хабери башо Царство ка проповединел пе ко цело свето англедер те авел о крајо (Мат. 24:14). Со повише уверинена  пе кај о Библиска пророштвија исполнинена пе, добором повише ка манген те бајрарен пумари служба башо Јехова.

11. Со шај сине и Прискила хем о Акила те керен, хем соске?

¹¹ О терне брачна парија шај те сикљовен тари Прискила хем таро Акила — јекх еврејско брачно пари со живинела сине ко Рим. Ола шунѓе о шукар хабери башо Исус хем уле христијања. Сигурно сине задоволна пумаре животоја. Ама ленгоро живото таро јекх пути променинѓа пе кеда о императори о Клавдиј денѓа наредба са о Евреија те џан песке таро Рим. Размислин само со значинела сине адава баши Прискила хем о Акила. Ола мора сине те мукхен о тхан кова со шукар пенџарена ле сине, те аракхен јекх нево кхер хем палем те почминен те керен шаторија ко нево тхан. Дали о неве, пхаре околностија чхинавѓе лен те керен са со шај ки служба башо Јехова? Па, сигурно џанаја о одговор ко акава пучибе. Кеда селинѓе пе ко Коринт, о Акила хем и Прискила поможинѓе ко адава собрание хем соработинѓе е Павлеа те шај те охрабринен е пхрален хем е пхењен таро адава тхан. Пало несаво време, ола геле ко јавера дизја коте со сине побари потреба башо проповедибе (Дела 18:18-21; Рим. 16:3-5). Сигурно сине бут задоволна хем бахтале ко живото.

12. Соске ваљани јекх брачно пари те чхивел песке духовна целија?

¹² О брачна парија авдиве шај те џан пало пример тари Прискила хем о Акила аѓаар со ка чхивен о Царство ко прво тхан. О најшукар време кеда ваљани те керен лафи башо пумаре целија тано џикоте запознајнена пе. Кеда јекх пари чхивела песке духовна целија хем трудинела пе те исполнинел лен, тегани шај ко повише прилике те дикхел сар о Јехова поможинела лен ко ленгоро живото (Проп. 4:9, 12). Те дикха о пример таро Расел хем и Елизабет. О Расел вакерела: „Џикоте запознајнаја амен сине, кераја сине конкретно лафи башо амаре духовна целија“. И Елизабет вакерела: „Керѓем лафи башо акава, соске манглем те ова сигурна кај ки иднина нане те ана одлуке со ка циден амен таро амаре духовна целија“. Ленгере  околностија дозволинѓе ленге те служинен ко јавер тхан коте со сине побари потреба таро објавителија хем адалеске селинѓе пе ки Микронезија.

13. Спрема Псалм 28:7 саво ка овел о резултати ако иси амен доверба ко Јехова?

¹³ Сар о Расел хем и Елизабет, бут парија одлучинена те живинен едноставно живото те шај те овел лен повише време те проповединен хем те сикавен е јаверен башо шукар хабери. Кеда јекх пари чхивела песке духовна целија хем заедно трудинена пе те исполнинен лен, ка овел лен бут шукар резултатија. Ка дикхен сар о Јехова грижинела пе ленге, ленгири доверба ки лесте ка бајрол хем ка овен чаче бахтале. (Читин Псалм 28:7.)

14. Сар о апостол Петар хем лескири ромни сикавѓе кај иси лен доверба ко ветување сој тано пишимо ко Матеј 6:25, 31-34?

¹⁴ О брачна парија шај исто аѓаар бут те сикљовен таро апостол Петар хем лескири ромни. Отприлика шов масек џи ко јекх берш, откеда прво пути запознајнѓа пе е Исусеа, ов ваљани сине те анел јекх важно одлука. Ов астарела сине мачхе те шај те грижинел пе пле фамилијаке. Адалеске, кеда о Исус викинѓа е Петаре те џал пали лесте, ов ваљани сине те лел ко предвид пле фамилијарна околностија (Лука 5:1-11). О Петар одлучинѓа те џал хем те проповединел е Исусеа. Адаја сине мудро одлука! Хем иси амен шукар причина те верујна кај е Петарескири ромни поддржинѓа адаја одлука. И Библија сикавела кај откеда о Исус воскреснинѓа, е Петарескири ромни несаво време патујнѓа пле ромеа (1. Кор. 9:5). Сигурно, адалеске со ој сине шукар христијанско ромни, о Петар шај сине слободно те дел совет башо рома хем башо ромња (1. Пет. 3:1-7). Јасно тано кај хем о Петар хем лескири ромни сине лен доверба ко е Јеховаскоро ветување кај ов ка грижинел пе ленге ако ола чхивена о Царство ко прво тхан ко пло живото. (Читин Матеј 6:25, 31-34.)

15. Со сикљовена таро Тиаго хем тари Естер?

¹⁵ Ако сиан више ко брако некобор берша, сар шај понадари те бајраре тли желба те шај те кере повише башо Јехова? Јекх начин тано аѓаар со ка читине о искуствија таро јавера брачна парија. На пример, шај те читине о статие тари рубрика „Тие се ставиле на располагање“. Асавке статие поможинѓе е Тијаго хем е Естера, јекх брачно пари таро Бразил, те бајрарен пумари желба те служинен повише коте со иси побари потреба таро објавителија. О Тиаго вакерела: „Кеда читинаја сине искуствија башо адава сар о Јехова поможинѓа пле слугенге ко амаро време, амен да исто аѓаар манглем те џа пало е Јеховаскоро водство хем те осетина лескири помош“. Пало несаво време ола селинѓе пе ко Парагвај, хем таро 2014 берш служинена ко португалско подрачје. И Естер вакерела: „О солдуј џене бут мангаја о стихо таро Ефешаните 3:20. Бут пути дикхлем сар исполнинена пе акала лафија ки служба“. Ко адава писмо џи ко Ефешања, о Павле ветинѓа кај о Јехова ка дел амен бут повише таро адава со родаја лестар. Бут пути амен коркори уверинѓем амен ко акала лафија!

16. Кастар шај те роден совет о терне брачна парија кеда размислинена башо пле целија?

¹⁶ О терне брачна парија шај те сикљовен таро е јаверенгоро искуство кола со сиклиле те овел лен доверба ко Јехова. Несаве брачна парија шај бершенцар служинѓе ки полновремено служба. Соске на родена лендар совет кеда размислинена башо тумаре целија? Акава тано панда јекх начин сар шај те  сикавен доверба ко Јехова (Изр. 22:17, 19). О старешине да шај те поможинен е терне брачна паренге те чхивен песке духовна целија хем те исполнинен лен.

17. Со случинѓа пе е Клаусеске хем е Марисаке, хем со шај те сикљова таро ленгоро искуство?

¹⁷ Понекогаш, иако шај те чхива аменге несаве целија ки амари служба, шај нане те икљол аѓаар сар амен со планиринѓем. Баш акава случинѓа пе е Клаусеске хем е Марисаке, колен со спомнинѓем лен англедер. Откеда сине трин берш ко брако, селинѓе пе ки подружница ки Финска те шај те служинен сар доброволција ки изградба. Ама дознајнѓе кај нашти те ачховен повише таро шов масек атхе. Ко почеток сине разочариме. Ама кратко пало адава, ола сине каниме те џан ко јекх курси ки арапско чхиб хем акана тане бахтале со шај те служинен ки јавер пхув ко подрачје коте со керела пе арапско лафи. Кеда и Мариса сетинела пе ко адава со случинѓа пе, ој вакерела: „Дарава сине те почминав те керав нешто сој нево хем те овел ман целосно доверба ко Јехова. Ама, дикхљум сар о Јехова секогаш поможинѓа аменге ко начинија со на очекујнѓем лен. Пало са акава, мли доверба ко Јехова барили панда повише“. Сар со дикхаја таро акава искуство, шај те овен сигурна кај о Јехова секогаш ка наградинел тумен ако иси тумен целосно доверба ки лесте.

18. Со шај те керен о брачна парија те шај понадари да те овел лен доверба ко Јехова?

¹⁸ О брако тано поклон таро Јехова (Мат. 19:5, 6). Ов мангела о брачна парија те уживинен ко адава поклон (Изр. 5:18). Тумен о терне брачна парија, дали размислинѓен со шај те керен тумаре животоја? Дали дена тумендар са те шај те сикавен е Јеховаске кобор сиен благодарна башо поклонија со денѓа тумен? Керен лафи е Јеховаја ки молитва, проучинен лескоро Лафи те шај те аракхен начелија со шај те применинен лен ки тумари ситуација. Пало адава, шунен о совет кова со дела тумен о Јехова. Шај те овен сигурна кај ка овел тумен шужо хем бахтало живото ако и служба башо Јехова туменге ко прво тхан!