ЈЕКХ Евреи со викинела пе Мардохеј сине ле важно улога ко настанија сој пишиме ко библиско лил Естира. Ов керела сине бути ки Персиско царско палата. Акава сине ко почеток таро панџто веко а.а.е., „кеда владинела сине [о цари] о Ахасвер“ (Акава цари авдиве тано пенџардо сар Ксеркс I). О Мардохеј поможинѓа те откринел пе о атентати со мангле те керен е цареске. Адалеске со сине леске благодарно, о цари вакерѓа адава англо јавера те шај те џанен со керѓа о Мардохеј. Покасно откеда о Аман муло, јекх душмани е Мардохејескоро хем е јавере евреенгоро, о цари чхивѓа е Мардохее те овел главно са е кнезонге. Адалеске со сине упро са о кнезија, ов шај сине те анел закони колеа со спасинѓа е Евреен со сине ко Персиско царство те на овен мударде (Ест. 1:1; 2:5, 21-23; 8:1, 2; 9:16).

Несаве историчарија вакерѓе кај адава со пишинела ко лил Естира тано измислимо хем кај о Мардохеј никогаш на постојнѓа. Ама ко 1941 берш, о археолозија аракхле доказ кова со веројатно поддржинела адава со пишинела ки Библија башо Мардохеј. Со аракхле ола?

О историчарија откринѓе јекх персиско тексти кова со сине пишимо ко клинесто писмо хем колесте со аракхљола о анав Мардука (романе Мардохеј). Ов керела сине бути сар службенико, веројатно сар сметководители ки Суза. О Артур Унгнад, јекх експерти баши историја таро адава дело тари пхув, вакерѓа кај ко адава време „акава сине о прво пути те овел спомнимо о Мардохеј ко тхан кова со на сине дело тари Библија“.

Откеда иклило о извештај акале историчарескоро, јавера да историчарија почминѓе те превединен повише милја персиска текстија сој пишиме ко клинесто писмо. Машкар ленде сине тикне плоче тари глина кола со аракхлиле ко рушевине ки диз Персеполис. Акала плоче аракхле лен узо е дизјакере ѕидија ко тхан коте со чхивена сине скапоцена буќа. Ола тане таро време кеда владинела сине о Ксеркс I. Ола тане ки еламско чхиб хем ки ленде тане пишиме некобор анава кола со аракхљовена ко лил Естира. a

Ко некобор плоче таро персеполис тано пишимо о анав Мардука, хем кај ов служинела сине сар царско секретари ки палата ки Суза џикоте владинела сине о Ксеркс I. Ки јекх плоча пишинела сине кај о Мардука служинела сине сар преведувачи. Адава детали одговоринела адалеа со пишинела ки Библија башо Мардохеј. Ов сине чхивдо те служинел сар службенико е Ахасвереске (Ксеркс I) хем керела сине лафи најхари ко дуј чхибја. О Мардохеј редовно бешела сине ки порта ки царско палата ки Суза (Ест. 2:19, 21; 3:3). Акаја порта сине баро објекти коте со керена сине бути е палатакере службеникија.

Иси бут интересна сличностија машкар о Мардука сој спомнимо ко плоче хем о Мардохеј сој спомнимо ки Библија. Живинѓе ко исто време ки исто палата хем сине лен иста службена задаче ко иста тхана буќаке. Са акала сличностија сикавена кај веројатно о Мардука хем о Мардохеј сине о исто мануш.