ИСКУСТВО
Мангљум те керав бути е Јеховаске
ПОЗДРАВИНЃЕМ амен тари јекх тикни група мануша касте со посетинѓем паше узо гав Гранбори, кова со аракхљола скроз андре ки шума ко Суринам. Тегани гелем чамцоја преку и река Тапанахони. Покасно, џикоте накхаја сине ко тхан коте со о пани бут сигате џала сине, и перка таро мотори кхувѓа ки јекх карпа. Одма пало адава о англуно дело е чамцоскоро пело ко пани хем амен почминѓем те батина. Тари дар мо срце ка икљол сине. Иако сар покраинско надгледнико бершенцар више патујнава чамцоја, сепак на џанава сине те пливинав.
Ама англедер те вакерав со случинѓа пе пало адава, прво те вакерав туменге сар почминѓум е полновремено службаја.
Бијандиљум ко 1942 берш ко бут шужо карибско остров ко Курасао. Мо дад тано таро Суринам, ама ов селинѓа пе акате баши бути. Бут берша англедер те бијанѓовав, мо дад уло јекх таро прва Јеховаскере сведокија кола со крстинѓе пе ко Курасао. a Ов секова курко проучинела сине аменцар и Библија, иако понекогаш на мангаја сине те проучина. Кеда сине ман 14 берш цело фамилија селинѓем амен ко Суринам те шај мо дад те грижинел пе пле дајаке.
ШУКАР АМАЛА ПОМОЖИНЃЕ МАНГЕ
Ко Суринам почминѓум те дружинав ман терненцар таро собрание кола со ревно служинена сине е Јеховаске. Ола сине некобор берша побаре мандар хем служинена сине сар општа пионерија. Ленгере муја асана сине џикоте раскажинена сине саве искуствија сине лен ки служба. Пало состанокија, ме хем ме амала кераја сине лафи башо библиска теме. Понекогаш кераја сине адава џикоте бешаја сине аври хем дикхаја сине о ѕвезде. Акала амала поможинѓе манге те хаљовав со мангава ко живото, а адава тано те керав бути е Јеховаске. Адалеске крстинѓум ман кеда сине ман 16 берш. А ко 18 берш почминѓум е пионерско службаја.
СИКЛИЉУМ БУТ КОРИСНА ПОУКЕ
Сар пионери ко Парамарибо
Сар пионери сиклиљум бут поуке хем ола поможинѓе манге ки цело мли полновремено служба. На пример, и прво поука со сиклиљум ла сине кобор тано важно те обучинав е јаверен. Кеда почминѓум е пионерско службаја поможинѓа манге јекх мисионери со викинела пе Вилијам Ван Сајл. b Ов бут сикавѓа ман башо адава сар те керав ме теократска задаче. Ко адава време на сиум сине свесно кај бут ка ваљанел манге акаја обука. О следно берш уљум специјално пионери хем пало адава почминѓум те грижинав ман е групиценге кола со сине скроз андре ки шума ко Суринам. Бут ценинава и обука со денѓе ман о пхраља! Оттегани трудинѓум ман те џав пало ленгоро пример аѓаар со одвојнѓум манге време те обучинав е јаверен.
И дујто поука со сиклиљум ла сине кобор тано шукар те овел тут скромно ама бут шукар организиримо живото. Ко почеток таро секова масек, ме хем јекх јавер специјално пионери со служинела сине заедно манцар, планиринаја сине кола буќа ваљани аменге башо следна курке. Тегани, јекх амендар патујнела сине чак џи ки главно диз те шај те кинел адава со ваљани аменге. Ваљани сине шукар те пазина сар користинаја о џепарац хем шукар те користина о буќа со кинѓем лен те шај те ресен амен цело масек. Ако сигате трошинаја сине о буќа со сине амен, тегани ки шума сине бут пхаро те аракха некас со шај сине те поможинел аменге. Сигурно сиум кај адава со сиклиљум ко терне берша, те овел ман скромно ама бут шукар организиримо живото, поможинѓа манге понадари да те концентриринав ман ки служба башо Јехова цело мло живото.
И трито поука со сиклиљум ла сине кобор тано корисно те сикаве е манушен ки ленгири чхиб. Џикоте бариљум, сиклиљум те керав лафи ко холандски, англиски, папиаменто хем сранантонго (исто аѓаар пенџарди сар сранан) — и чхиб која со обично керела пе лафи ко Суринам. Ама дикхљум кај о мануша со живинена сине ки шума шунена сине повише о шукар хабери кеда проповединаја сине ки ленгири чхиб. Сине манге пхаро те керав лафи ко несаве таро акала чхибја сар сој и чхиб сарамакан коте со користинела пе уче хем ниска тонија. Ама исплатинѓа пе со трудинѓум ман те сикљовав адаја чхиб. Ко са адала берша шај сине те проучинав повише манушенцар соске шај сине те керав ленцар лафи ки ленгири чхиб.
Џанѓола пе, сине исто аѓаар ситуацие коте со лаџакерѓум ман. На пример, ки јекх прилика мангљум те пучав јекхе интересентка која со керела лафи ко сарамакан сар осетинела пе соске сине ла дукха ко воги. Ама наместо адава, пучљум ла дали тани кхамни! Шај те замислинен туменге кобор ој да лаџандили таро акава пучиба. Иако случинена пе сине манге асавке грешке, сепак трудинава ман сине те проповединав е манушенге ки ленгири чхиб.
ПРИФАТИНЃУМ ЈАВЕРА ДА ЗАДАЧЕ
Ко 1970 берш уљум покраинско надгледнико. Ко адава берш буте групиценге со сине ки шума сикавѓум преку проектори и презентација „Посетин о главно седиште е Јеховаскере сведоконгоро“. Те шај те реса џи ко пхраља хем пхења, ме хем несаве јавера пхраља користинѓем јекх чамцо. Ко амаро чамцо сине јекх генератор, бензини, лампе хем цело
опрема со ваљани сине аменге баши презентација. Те шај те сикава е јаверенге и презентација ваљани сине те ла цело амари опрема ки шума. Нешто со одма авела манге ки годи кеда размислинава башо адава тано кобор свиџинѓа пе е манушенге и презентација. Бут радујнѓум ман со шај сине те поможинав е јаверен те сикљон башо Јехова хем баши лескири организација. О духовна берекетија сине бут побаре тари било сави жртва со керѓум ла ки е Јеховаскири служба.ТРИН ШЕЛЕ ПХАНЛЕ КО ЈЕКХ
Ме хем и Етел кеда лелем амен септември ко 1971 берш
Иако сине манге јасно кај сар беќари полокхо тано те керав мли служба сепак мангљум те женинав ман. Адалеске почминѓум конкретно те молинав ман те аракхав ромни која со радосно ка служинел манцар ки акаја полновремено задача со на сине баш локхи. Пало јекх берш почминѓум те запознајнав ман јекхе специјално пионеркаја која со викинела пе Етел кола со сине ла самопожртвувано стави. И Етел панда таро тикнипе мангља те џал пало е апостол Павлескоро пример хем адалеске денѓа пестар са ки служба. Венчинѓем амен септември ко 1971 берш хем почминѓем заедно те служина ки покраинско служба.
И Етел барили ки јекх чороли фамилија хем адалеске на сине лаке проблеми те овел манцар ки патувачко служба ки шума. На пример, кеда спреминаја амен сине те посетина несаво собрание на лаја сине бут буќа аменцар. Тховаја сине амаре шеја ки река хем нанѓоваја сине атхе. Исто аѓаар, хаја сине са со ка спреминен о пхраља. На пример, хаја сине игуане, пиране или са со астарена сине ки шума или ки река. Кеда на сине лен чиние, хаја сине ко е бананенгере листија. Исто аѓаар бут пути хаја сине вастенцар. Ме хем и Етел осетинѓем кај адалеске со заедно кераја жртве ки служба башо Јехова, адава поможинѓа амен те ова трин шеле пханле ко јекх Проп. 4:12). Ништоске на би менинаја адава време со накхлем.
(Јекх диве кеда иранѓем амен тари посета доживинѓум баш адава со вакерѓум ко почеток таро мло искуство. Кеда реслем ко тхан коте со и река сигате џала сине, о чамцо батинѓа ко пани ама одма пало адава уштило упро пани. Сине амен среќа со уравѓем елекија спасибаске хем на пелем таро чамцо. Ама о чамцо пхердило пани. Фрдинѓем о хајбе таро тенџере те шај ленцар те икала о пани таро чамцо.
Адалеске со фрдинѓем са амаро хајбе манглем те астара мачхе. Ама на астарѓем нијекх мачхо. Тегани молинѓем амен е Јеховаске те дел амен хајбе адале дивеске. Одма пали молитва јекх пхрал астарѓа баро мачхо кова со сине доволно со панџе џененге те ха.
РОМ, ДАД ХЕМ ПОКРАИНСКО НАДГЛЕДНИКО
Пало панџ берш патувачко служба, и Етел хем ме добинѓем берекети со изненадинѓа амен — и Етел ачхили кхамни. Сиум сине радосно, иако на џанљум сар ка влијајнел адава упро амаро живото. Сине амен бари желба понадари да те ачхова ки полновремено служба. Ко 1976 берш, бијандило амаро чхаво о Етниел, пало дуј текваш берш бијандило амаро дујто чхаво, о Џовани.
Сиум сине присутно ко крштевање ки река Тапанахони паше узо Годо Холо ко источно Суринам — 1983
Адалеске со ко адава време сине бари потреба ко Суринам и подружница дозволинѓа манге понадари да те овав ки покраинско служба. Џикоте о чхаве сине панда тикне денѓе ман те посетинав само некобор собранија. Аѓаар шај сине некобор курке ко масек те служинав сар покраинско надгледнико, а о јавера курке таро масек служинава сине сар пионери ко собрание коте со сиум сине доделимо. И Етел хем о чхаве авена сине манцар кеда посетинава сине о собранија со сине паше, ама кеда џава сине дур ки шума башо посете хем конгресија тегани џава сине коркори.
Сар покраинско надгледнико, бут пути патујнава сине чамцоја те шај те ресав ко дур собранија
Ваљани сине шукар те организиринав ман те шај те грижинав ман башо са мле одговорностија. Трудинава ман сине те икера амари Фамилијарно рат секова курко. А кеда посетинава сине о собранија ки шума, и Етел икерела сине и Фамилијарно рат. Ама бут пути кераја сине о буќа сар фамилија. Исто аѓаар редовно одвојнаја сине време баши рекреација. Некогаш кхелаја сине несаве игре, а некогаш џаја сине ко несаве интересна тхана. Бут пути ачховава Изреки 31:15. Ој уштела сине рано сабајле те шај заедно сар фамилија те читина е дивескоро стихо хем те керел аменге сабалуко. Бут сиум благодарно со иси ман самопожртвувано ромни хем која со секогаш поможинела манге те исполнинав мле одговорностија.
сине касно раќате те шај те спреминав ман башо мле собраниска задаче. А и Етел тани баш сар и вредно ромни сој опишими коСар родителија, денѓем амендар са те шај амаре чхаве те манген е Јехова хем и служба. Манглем амаре чхаве те овен ки полновремено служба, ама на баши аменге него адалеске со ола мангена. Секогаш вакераја сине ленге сар и полновремено служба ка керел лен радосна. Ама исто аѓаар вакераја сине ленге саве предизвикија сине амен хем сар о Јехова сине цело време аменцар те поддржинел амен. Исто аѓаар трудинаја амен сине амаре чхавен те овел лен друштво со чхивена е Јехова ко прво тхан.
О Јехова денѓа амен са со ваљани аменге сар фамилија. Џанѓола пе, сар поглавари ме секогаш трудинѓум ман те дав мло дело. Адава со служинава сине ки шума сар специјално пионери сикавѓа ман те штединав паре те шај покасно те лав адава со ка ваљани аменге. Ама понекогаш иако кераја сине са со ваљани, на сине амен секогаш о потребна буќа. Ко адала прилике дикхљум сар о Јехова поможинела аменге. На пример, таро 1986 џи ко 1992 берш, ко Суринам сине граѓанска немирија хем посебно ко адава време сине бут пхаро те овен тут о основна буќа. Ама чак тегани о Јехова грижинѓа пе аменге (Мат. 6:32).
КЕДА РАЗМИСЛИНАВА БАШО МЛО ЖИВОТО
Таро лево ко десно: Ме хем ми ромни и Етел
Амаро побаро чхаво о Етниел хем лескири ромни и Натали
Амаро чхаво о Џовани хем лескири ромни и Кристал
Цело живото о Јехова грижинѓа пе аменге хем поможинѓа амен те ова радосна хем задоволна. О чхаве сине аменге баро берекети хем чест сине аменге те воспитина лен те служинен е Јеховаске. Бут радујнаја амен со посветинѓе пумаро живото ки полновремено служба. Хем о Етниел хем о Џовани сине ки школа која со акана викинела пе Школа башо полновремена објавителија, хем акана заедно пумаре ромњенцар служинена ко Бетел ко Суринам.
Иако акана ме хем и Етел сием пхуре амен панда служинаја сар специјална пионерија. Хем добором сием зафатиме со панда нане ман време те сикљовав те пливинав. Ама нане манге криво башо ништо. Кеда размислинава башо мло живото, мислинава кај адава со сар терно одлучинѓум те керав бути ки полновремено служба башо Јехова сине и најшукар одлука со џи акана анѓум ла.
b О искуство „Реалноста ги надмина моите очекувања“ таро Вилијам Ван Сајл шај те аракхел пе ко Разбудете се! таро 8 јануари 2000 берш, стр. 24-27.