1. Котар џанаја кај о Јехова мангела те овел аменцар паше?

 О ЈЕХОВА мангела те ова леа паше (Јак. 4:8). Ов мангела те овел амаро Девел, Дад хем Амал. Ов одговоринела ко амаре молитве хем поможинела амен кеда накхаја таро пхаре времија. Хем преку пли организација сикавела амен хем заштитинела амен. Ама со ваљани те кера те шај те ова леа паше?

2. Сар шај те ова паше е Јеховаја?

² Шај те ова паше е Јеховаја аѓаар со ка молина амен леске, ка читина лескоро Лафи хем хор ка размислина башо адава. Кеда кераја адава бајрола амаро мангипе хем ценење спрема лесте. Поттикниме сием те ова леске послушна хем те да ле и слава која со заслужинела ла (Отк. 4:11). Со повише запознајнаја е Јехова добором повише ка овел амен доверба ки лесте хем ки организација преку колате со поможинела амен.

3. Сар пробинела о Сатана те одвојнел амен таро Јехова, ама со ка поможинел аменге никогаш те на цида амен таро Девел хем лескири организација? (Псалм 31:13, 14).

³ Ама о Сатана пробинела те одвојнел амен таро Јехова, посебно кеда иси амен проблемија. Сар керела адава? Аѓаар со хари похари пробинела те уништинел амари доверба ко о Јехова хем ки лескири организација. Ама амен шај те борина амен против лескере нападија. Кеда амари вера тани силно хем амари доверба ко Јехова тани цврсто, тегани нане те цида амен таро амаро Девел хем лескири организација. (Читин Псалм 31:13, 14.)

4. Башо со ка кера лафи ки акаја статија?

⁴ Ки акаја статија ка дикха трин предизвикија со шај те  авен таро свето хем секова јекх лендар шај те слабонкерел амари доверба ко Јехова хем лескири организација. Сар шај акала предизвикија те одвојнен амен таро Јехова? Хем со шај те кера те шај те спротивставина амен е Сатанаске?

5. Сар шај о проблемија те слабонкерен амари доверба ко Јехова хем ки лескири организација?

⁵ Понекогаш иси амен проблемија соске противинела пе аменге и фамилија или ачховаја бизи бути. Сар шај асавке проблемија те слабонкерен амари доверба ки е Јеховаскири организација хем те циден амен лестар? Кеда несаво проблеми трајнела повише време, шај те нашава амари надеж хем те ова разочариме. О Сатана искористинела асавке прилике те шај те чхивел амен те сумнина амен ко е Јеховаскоро мангипе. Ов мангела те мислина кај о Јехова или лескири организација тане крива башо амаре муке. Нешто слично случинѓа пе несаве Израелцонге ко Египет. Ко почеток ола верујнѓе кај о Јехова бичхалѓа е Мојсее хем е Ароне те ослободинел лен таро ропство (2. Мој. 4:29-31). Ама покасно кеда о фараони денѓа лен попхари бути, ола кривинѓе е Мојсее хем е Ароне башо пумаре проблемија аѓаар со вакерѓе: „Тумен керѓен о фараони хем лескере слуге те мрзинен амен, хем тумен денѓен лен мачи ко вас те мударен амен“ (2. Мој. 5:19-21). Ола кривинѓе е Девлескере верна слуген. Кобор жално! Ако туте да повише време иси ту проблемија, сар шај понадари да те овел тут доверба ко Јехова хем ки лескири организација?

6. Со сикљоваја таро Авакум башо адава сар те истрајна ко проблемија? (Авакум 3:17-19).

⁶ Вакер е Јеховаске ки молитва са со иси тут ко вило хем роде лестар помош. Е пророко е Авакуме сине ле бут проблемија. Јекх време шај сумнинела пе сине дали о Јехова грижинела пе леске. Адалеске ки молитва вакерѓа е Јеховаске сар осетинела пе. Ов вакерѓа: „Џи кеда Јехова ка родав помош, а ту нане те шуне ман?... соске дикхеа о муке?“ (Авак. 1:2, 3). О Јехова одговоринѓа ки искрено молитва пле верно слугаскири (Авак. 2:2, 3). Одкеда о Авакум размислинѓа башо адава сар о Јехова англедер спасинѓа пле народо, уло палем радосно. Ов уверинѓа пе кај о Јехова грижинела пе леске хем кај ка поможинел леске те истрајнел било саво проблеми. (Читин Авакум 3:17-19.) Со сикљоваја таро акава? Кеда иси тут проблемија молин тут е Јеховаске хем вакер леске сар осетинеа тут, пало адава роде лестар помош. Размислин башо адава сар о Јехова англедер поможинѓа туке. Ако кереа акава шај те ове сигурно кај о Јехова ка дел тут и сила со ваљани туке те шај те истрајне. Хем кеда ка дикхе сар поможинела туке, тли вера ка овел панда посилно.

7. Со мангља е Ширлијако пхрал те керел, хем со поможинѓа лаке те на нашавел пли вера ко Јехова?

⁷ Икер тли духовно рутина. Акава поможинѓа јекхе пхењаке со викинела пе Ширли. Акале пхења тари Папуа Нова Гвинеја сине ла бут проблемија. b Лакири фамилија сине чороли хем понекогаш на сине лен ни доволно хајбаске. Лакоро пхрал мангља те слабонкерел лакири доверба ко Јехова. Ов вакерѓа: „Ту вакереа кај поможинела тут е Девлескоро свети дух ама ме на дикхава нисави помош. И фамилија тани панда чороли. Нашавеа само тло време адале проповедибаја“. И Ширли признајнела: „Пучава ман сине дали о Девел чаче грижинела пе  аменге? Адалеске, одма молинѓум ман е Јеховаске хем вакерѓум леске са со мислинава сине. На чхинавѓум те читинав и Библија хем амаре публикацие хем понадари да проповединава сине хем џава сине ко состанокија“. Сигате халили кај о Јехова грижинела пе лакере фамилијаке, ола на ачхиле бокхале хем сине радосна. Ој вакерела: „Дикхљум сар о Јехова одговоринела ко мле молитве“ (1. Тим. 6:6-8). Ако икереа тли духовно рутина, ту да нане те дозволине о проблемија или о сумње те одвојнен тут таро Јехова.

8. Со шај те случинел пе е пхраленге со предводинена ки е Јеховаскири организација?

⁸ Преку медиумија или социјална мреже, амаре душмања ширинена ховајба или погрешна информацие башо одговорна пхраља ки Јеховаскири организација (Пс. 31:13). Несаве пхраља сине пханле хем обвиниме сар криминалција. Нешто слично случинѓа пе ко прво веко, кеда о апостол Павле сине погрешно обвинимо хем пханло. Сар реагиринѓе несаве христијања?

9. Сар реагиринѓе несаве христијања кеда о апостол Павле сине пханло?

⁹ Несаве христијања таро прво веко чхинавѓе те поддржинен е апостол Павле кеда сине пханло ко Рим (2. Тим. 1:8, 15). Соске? Шај лаџана сине таро Павле адалеске со о мануша дикхена ле сине сар криминалцо (2. Тим. 2:8, 9). Или шај дарана сине те на овен ола да прогониме. Бизи разлика која сине и причина, сигурно е Павлеске адава сине бут пхаро соске ов баши ленге накхља таро бут проблемија хем чак ризикујнѓа пло живото (Дела 20:18-21; 2. Кор. 1:8). Никогаш ма те ова сар окола со мукле е Павле кеда највише ваљанѓе леске. Со на ваљани те бистра кеда о пхраља со предводинена тане прогониме?

10. Со ваљани те овел амен ки годи кеда о одговорна пхраља тане прогониме?

¹⁰ Ма бистре соске сием прогониме хем кој  керела адава. Ко 2. Тимотеј 3:12 пишинела: „Сарине со мангена те живинен ко јекхипе е Христос Исусеа хем те обожавинен е Девле, ка овен прогониме“. Адалеске на ваљани те изненадина амен со о Сатана посебно нападинела е пхрален кола со предводинена. Ов мангела преку адала нападија те уништинел ленгири вера хем те даравкерел амен (1. Пет. 5:8).

11. Со шај те сикљова таро Онисифор? (2. Тимотеј 1:16-18).

¹¹ Понадари да поддржин е пхрален хем ачхов ленцар паше. (Читин 2. Тимотеј 1:16-18.) О Онисифор, јекх христијани таро прво веко постапинѓа поразлично таро несаве христијања кеда о Павле сине ко затвор. „Ов на лаџандило таро [е Павлескере] синџирија.“ Наместо адава, ов родинѓа ле хем кеда аракхља ле поможинѓа леске ко практично начин. Адалеа, о Онисифор ризикујнѓа пло живото. Со сикљоваја таро акава? На смејнаја те дозволина и дар таро мануш те чхинавел амен те поддржина амаре пхрален кола сој прогониме. Наместо адава ваљани те кера са со шај те поможина ленге (Изр. 17:17). Ваљани те сикава ленге мангипе хем те поддржина лен.

12. Со шај те сикљова таро амаре пхраља хем пхења тари Русија?

¹² Размислин башо пхраља хем о пхења тари Русија кола со поможинѓе пумаре пхраленге сој пханле. Кеда несаве пхралеске или пхењаке судинела пе, бут пхраља хем пхења авена ко судо те шај те поддржинен лен. Со сикљоваја таро акава? На ваљани те дара кеда амаре одговорна пхраља тане погрешно обвиниме, пханле или прогониме. Наместо адава молин тут ленге, грижин тут ленгере фамилијаке хем размислин сар шај практично те поможине ленге (Дела 12:5; 2. Кор. 1:10, 11).

13. Сар шај о негативна лафија те слабонкерен амари доверба ко Јехова хем ки лескири организација?

¹³ Некогаш шај некој тари фамилија, несаво колега или соученико те асал аменге или те критикујнел амен адалеске со проповединаја или живинаја спрема е Јеховаскере мерилија (1. Пет. 4:4). Ола шај те вакерен: „Ту сиан шукар мануш, ама тли религија тани бут строго хем старомодно“. Несаве шај те критикујнен амен башо адава сар постапинаја е исклучименцар хем те вакерен: „Сар шај те вакерен кај мангена е јаверен“. Асавке лафија шај те керен те сумнина амен. Шај те почмина те мислина аменге: „Дали о Јехова родела мандар превише? Дали лескири организација тани бут строго?“ Ако аракхеа тут ки асавки ситуација сар шај те ачхове паше е Јеховаја хем лескере организацијаја?

14. Сар ваљани те реагирина кеда о јавера критикујнена амен башо адава со живинаја спрема е Јеховаскере мерилија? (Псалм 119:50-52).

¹⁴ Ов одлучно те живине спрема е Јеховаскере мерилија. О Јов живинела сине спрема е Јеховаскере мерилија, иако јавера критикујнена ле сине. Јекх таро е Јовескере ховавне амала мангља те чхивел ле те мислинел кај е Девлеске нане важно дали ов ка икерел пе ко лескере мерилија или на (Јов 4:17, 18; 22:3). Ама о Јов на верујнѓа ко асавко ховајбе. Ов џанља е Јеховаскере мерилија башо исправно хем погрешно хем сине одлучно те живинел спрема ленде. На дозволинѓа о јавера те чхивен ле те постапинел погрешно (Јов 27:5, 6). Со сикљоваја таро акава? Ма дозволин башо критике те сумнине тут ко е Јеховаскере мерилија. Размислин башо тло живото, веројатно бут пути дикхљан кај тано пошукар те живине спрема е Јеховаскере мерилија. Адалеске,  ов одлучно те поддржине е организација која со поттикнинела амен те икера амен ко акала мерилија. Тегани бизи разлика кобор о мануша ка асан аменге амен никогаш нане те цида амен таро Јехова. (Читин Псалм 119:50-52.)

15. Соске несаве критикујнѓе е пхења?

¹⁵ Размислин баши Бриџит јекх пхен тари Индија. Лакири фамилија критикујнела ла сине соске тани сведоко. Кратко одкеда крстинѓа пе ко 1997 берш лакоро ром кова со на сине сведоко ачхило бизи бути. Адалеске ов, и Бриџит хем ленгере чхаја геле те живинен лескере родителенцар кола со сине ки јавер диз. Ама лакере проблемија на завршинѓе акате. Адалеске со лакоро ром сине бизи бути, ој ваљани сине те керел секова диве бути те шај те издржинел пле фамилија. Освен адава и најпаше дворана сине 350 километрија дур. Исто аѓаар о противибе тари е ромескири фамилија сине добором лошно со ваљанѓе те џан песке таро адава кхер. Тегани таро јекх пути лакоро ром муло, покасно јекх таро лакере чхаја кола со сине ла 12 берш мули таро рако. Жално тано со лакири фамилија вакерела сине кај и Бриџит тани криво башо са со случинѓа пе. Ола вакерѓе кај те на овел сине ој е Јеховаскоро сведоко са акала трагедие нане сине те случинен пе. Ама ла понадари да сине ла доверба ко Јехова хем ачхили паше лескере организацијаја.

16. Саве берекетија добинѓа и Бриџит адалеске со ачхили паше е Јеховаја хем лескере организацијаја?

¹⁶ Адалеске со и Бриџит живинела сине бут дур тари дворана јекх покраинско надгледнико поттикнинѓа ла те проповединел е манушенге коте со живинела хем те икерел о состанокија песте кхере. Ко почеток мислинѓа кај нашти те керел адава, ама сепак шунѓа е пхралескоро совет. Ој џала сине ки служба, икерела сине состанокија ко пло кхер хем редовно икерела сине и Фамилијарно рат пле чхаенцар. Саво сине о резултати? Ла сине ла бут библиска курсија хем бут џене лендар крстинѓе пе. Ко 2005 берш почминѓа те служинел сар општо  пионери. Ој сине наградими баши пли доверба ко Јехова хем пли верност ки организација. Лакере чхаја верно служинена е Јеховаске хем акана иси дуј собранија ко тхан коте со живинела. И Бриџит тани уверими кај о Јехова денѓа ла сила те издржинел ко пхарипе хем те истрајнел ко притисок тари фамилија.

17. Ко со ваљани те ова одлучна?

¹⁷ О Сатана мангела те мислина кај о Јехова ка мукхел амен кеда ка овен амен проблемија хем кај ако ачховаја ки е Јеховаскири организација, амаро живото ка овел по пхаро. О Сатана мангела те даравкерел амен кеда о пхраља со предводинена тане погрешно обвиниме, прогониме или пханле. Хем преку о критике ов мангела те слабонкерел амари доверба ко е Јеховаскере мерилија хем ки лескири организација. Ама амен шукар џанаја лескере лошна тактике хем нашти те ховавел амен (2. Кор. 2:11). Ов одлучно те отфрлине е Сатанаскере ховајба хем те ачхове верно е Јеховаске хем лескере организацијаке. Ма бистре, о Јехова никогаш нане те мукхел тут (Пс. 28:7). Адалеске ни ту ма дозволин ништо те одвојнел тут таро Јехова (Рим. 8:35-39).

18. Башо со ка кера лафи ки следно статија?

¹⁸ Ки акаја статија керѓем лафи башо предизвикија кола со шај те овен амен таро свето. Ама амари доверба ко Јехова хем лескири организација шај те овел чхивди ко испит таро предизвикија со авена таро собрание. Сар шај успешно те накхава адала предизвикија? Башо акава ка кера лафи ки следно статија.