СТАТИЈА ПРОУЧИБАСКЕ 45
Сар о Јехова поможинела аменге те кера амари служба?
Ола сигурно ка џанен кај машкар ленде сине пророко (ЕЗЕК. 2:5)
ГИЛИ 67 Вакерен о шукар хабери!
БАШО СО КА КЕРА ЛАФИ a
1. Со шај те очекујна хем башо со шај те ова сигурна?
ЏИКОТЕ кераја амари служба шај те очекујна кај о мануша ка противинен пе аменге. А ки иднина акава веројатно ка случинел пе панда повише (Дан. 11:44; 2. Тим. 3:12; Отк. 16:21). Сепак, шај те ова увериме кај о Јехова ка дел амен и помош која со ваљани аменге. Соске? О Јехова секогаш поможинѓа пле слугенге успешно те завршинен пумари задача, бизи разлика кобор сине пхаро адава. Јекх асавко пример сине о Езекиел. Те дикха со случинѓа пе леске џикоте проповединела сине е Евреенге со сине робија ко Вавилон.
2. Со вакерѓа о Јехова башо мануша каске со проповединѓа о Езекиел, хем со ка дикха ки акаја статија? (Езекиел 2:3-6).
2 Саве манушенге ваљани сине о Езекиел те проповединел? О Јехова опишинѓа лен сар „дрска“, „зорале вилескере“ хем сар „бунтовникија“. Ола дукхавена повише таро каре хем тане поопасна таро шкорпие. Адалеске, о Јехова бут пути пхенѓа е Езекиелеске: „Ма дара!“ (Читин Езекиел 2:3-6.) О Езекиел шај сине успешно те керел пли служба адалеске со 1) о Јехова бичхалѓа ле, 2) добинѓа сила таро е Девлескоро духо хем 3) хранинѓа пе таро е Девлескере лафија. Сар поможинѓе леске акала трин буќа? Хем сар поможинена амен авдиве?
О ЈЕХОВА БИЧХАЛЃА Е ЕЗЕКИЕЛЕ
3. Кола лафија зајакнинѓе е Езекиеле, хем сар о Јехова уверинѓа ле кај поддржинела ле?
3 О Јехова вакерѓа е Езекиелеске: „Бичхалава тут“ (Езек. 2:3, 4). Сигурно акала лафија зајакнинѓе е Езекиеле. Соске? Веројатно о Езекиел сетинѓа пе кај о Јехова вакерѓа нешто слично е Мојсееске хем е Исаијаске кеда биринѓа лен сар лескере пророкија (2. Мој. 3:10; Иса. 6:8). Исто аѓаар, ов џанља сар о Јехова поможинѓа акале дује пророконге успешно те керен пумаре задаче. Адалеске, кеда о Јехова вакерѓа е Езекиелеске дуј пути „бичхалава тут“, тегани шај сине те овел ле доверба ко Јехова кај ов ка поддржинел ле. Акаја изјава аракхљола бут пути ко лил Езекиел: „Добинѓум јекх порака таро Јехова“ (Езек. 3:16). Хем бут пути пишинѓа: „Палем добинѓум порака таро Јехова“ (Езек. 6:1). Акава сикавела кај о Езекиел сине уверимо кај тано бичхалдо таро Јехова. Исто аѓаар, сар чхаво јекхе свештеникоскоро ов сигурно сиклило сар о Јехова секогаш поможинѓа пле пророконге. Е Исакоске, е Јаковеске хем е Еремијаске о Јехова вакерѓа: „Ме сиум туја“ (1. Мој. 26:24; 28:15; Ерем. 1:8).
4. Кола утешна лафија сигурно зајакнинѓе е Езекиеле?
4 Сар ка реагиринен бут Израелција ко адава со иси те вакерел о Езекиел? О Јехова вакерѓа: „О Израелција нане те манген те шунен тут, соске на мангена те шунен ман“ (Езек. 3:7). Адалеа со ка одбинен е Езекиеле, уствари ола ка одбинен е Јехова. Акала лафија уверинѓе е Езекиеле кај адава со о мануша нане те манген те шунен ле, на значинела кај нане успешно ки пли задача сар пророко. О Јехова исто аѓаар уверинѓа ле кај кеда ка исполнинел пе и осуда со објавинѓа ла, о мануша „ка џанен кај машкар ленде сине пророко“ (Езек. 2:5; 33:33). Сигурно акала утешна лафија денѓе ле и сила со ваљани леске те керел пли служба.
О ЈЕХОВА БИЧХАЛЕЛА АМЕН
Исто сар о Езекиел, џанаја кај о Јехова тано аменцар кеда соочинаја амен проблеменцар хем противибаја (Дикх ко пасусија 5-6)
5. Спрема Исаија 44:8, котар добинаја сила?
5 Амен да добинаја сила соске џанаја кај о Јехова бичхалѓа амен. Ов сикавела аменге чест адалеа со викинела амен пле „сведокија“ (Иса. 43:10). Адаја тани бари предност! О Јехова аменге да пхенела „ма даран“ исто сар со вакерѓа адава е Езекиелеске. Соске на ваљани те дара таро амаре противникија? Исто сар о Езекиел, амен да сием бичхалде таро Јехова хем иси амен лескири поддршка. (Читин Исаија 44:8.)
6. а) Котар џанаја кај о Јехова поддржинела амен? б) Со утешинела хем охрабринела амен?
6 О Јехова уверинела амен кај ка поддржинел амен. На пример, англедер те вакерел: „Тумен сиен мле Сведокија“, о Јехова вакерѓа: „Кеда ка накхе таро пајна, ме ка овав туја. Кеда ка накхе таро реке, нане те поплавинен тут. Кеда ка пхире преку и јаг, нане те тхабљове ни о пламено нане те тхарел тут“ (Иса. 43:2). Џикоте кераја амари служба понекогаш ка овен амен предизвикија кола сој сар поплаве хем ка соочина амен неволјенцар кола сој сар јаг. Ама чак ко асавке ситуацие амен понадари да проповединаја соске о Јехова поможинела аменге (Иса. 41:13). Исто сар е Езекиеле, аменде да бут џене одбинена ама адава на значинела кај на проповединаја шукар. Сием утешиме хем охрабриме адалеске со џанаја кај о Јехова тано задоволно кеда понадари да верно вакераја о хабери. О Павле вакерѓа: „Секој ка добинел награда спрема пло трудо“ (1. Кор. 3:8; 4:1, 2). Јекх пхен со служинела бут берша сар пионерка вакерела: „Бут сиум радосно адалеске со џанава кај о Јехова наградинела амаро трудо“.
О ЕЗЕКИЕЛ ДОБИНЃА СИЛА ПРЕКУ Е ДЕВЛЕСКОРО ДУХО
О Езекиел дикхља визија тари е Јеховаскири небесно кочија хем адава уверинѓа ле кај о Јехова ка поможинел леске те керел пли служба (Дикх ко пасус 7)
7. Кеда размислинела сине баши визија, сар влијајнела сине адава упро Езекиел? (Дикх и слика ки насловно страна.)
7 О Езекиел дикхља кобор моќно тано е Девлескоро духо. Ки јекх визија, ов дикхља сар о свети дух дејствујнела упро моќна ангелија хем сар поможинела те движинен пе о баре тркалакија тари небесно кочија (Езек. 1:20, 21). Сар реагиринѓа о Езекиел? Ов пишинѓа: „Кеда дикхљум адава фрдинѓум ман ки пхув“. О Езекиел сине добором воодушевимо со пело теле ки пхув (Езек. 1:28). Секогаш кеда размислинела сине баши адаја визија сигурно ов сине бут охрабримо хем уверимо кај е Јеховаскере свети духоја шај те керел пли служба.
8-9. а) Со случинѓа пе е Езекиелеске кеда о Јехова заповединѓа леске те уштел? б) Сар о Јехова понадари да зајакнинѓа е Езекиеле баши лескири пхари задача?
8 О Јехова заповединѓа е Езекиелеске: „Манушикано чхаво, ушти ко пре те шај те керав туја лафи“. Адаја заповед хем е Девлескоро духо денѓе леске и сила со ваљанѓа леске те шај те уштел. О Езекиел пишинѓа: „О духо кхувѓа ки манде хем керѓа те уштав ко пре“ (Езек. 2:1, 2). Ки цели пли служба о Езекиел сине водимо таро е Јеховаскоро „вас“, јавере лафенцар лескоро свети дух (Езек. 3:22; 8:1; 33:22; 37:1; 40:1). Е Девлескоро духо денѓа ле и сила баши задача со добинѓа ла — те проповединел околенге сој „зорале шерескере хем зорале вилескере“ (Езек. 3:7). О Јехова вакерѓа е Езекиелеске: „Керѓум тло муј зорало исто сар ленгоро хем тло чекат зорало сар ленгоро. Керѓум тло чекат сар дијаманти, позорало таро бар. Ма дара ни таро ленгере лафија ни лендар“ (Езек. 3:8, 9). Сар те пхене о Јехова вакерѓа леске: „Ма дозволин е манушенгири тврдоглавост те обесхрабринел тут. Ме ка дав тут сила“.
9 Пало адава, е Девлескоро духо цело време водинѓа е Езекиеле ки лескири служба. О Езекиел пишинѓа: „Е Јеховаскоро вас силно дејствујнела сине упри манде“. Ваљанѓа леске јекх курко те шај целосно те сикљол хем те хаљол о хабери со ваљани сине те објавинел ле те шај те овел уверимо џикоте проповединела (Езек. 3:14, 15). Тегани, о Јехова вакерѓа леске те џал ки јекх долина коте со „о духо кхувѓа ки лесте“ (Езек. 3:23, 24). Пало адава о Езекиел сине спремно те почминел пле службаја.
Е ДЕВЛЕСКОРО ДУХО ДЕЛА АМЕН И СИЛА СО ВАЉАНИ АМЕНГЕ
Со поможинѓа е Езекиелеске хем со шај те поможинел аменге те кера амари служба? (Дикх ко пасус 10)
10. Сави помош ваљани аменге те шај те проповедина хем соске?
10 Сави помош ваљани аменге те шај те кера амари служба? Те шај те одговорина ко акава, те дикха со случинѓа пе е Езекиелеске. Англедер те почминел пле службаја е Девлескоро духо денѓа ле и сила со ваљанѓа леске. Слично сар о Езекиел, те шај те проповедина ваљани аменге е Девлескоро свети дух. Соске? Адалеске со о Сатана боринела пе против аменде, те шај те чхинава е проповедибаја (Отк. 12:17). Сар мануша шај те мислина аменге кај о Сатана тано добором моќно со нашти те борина амен против лесте. Ама адалеа со џаја ки служба амен уствари побединаја ле (Отк. 12:9-11). Сар? Кеда проповединаја амен сикаваја кај на дараја таро е Сатанаскоро противибе. Секова пути кеда џаја ки служба амен побединаја е Сатана. Со хаљоваја таро адава со иако иси амен противибе амен шај понадари да те проповедина? Хаљоваја кај о Јехова дела амен и сила преку пло свети дух хем кај иси амен е Јеховаскири поддршка (Мат. 5:10-12; 1. Пет. 4:14).
11. Сар ка поможинел амен е Девлескоро духо, хем сар шај понадари да те добина ле?
11 Со јавер шај те хаљова таро адава со о Јехова ко симболично начин керѓа зорало е Езекиелескоро муј хем чекат? Е Девлескоро духо шај те дел амен сила која со ваљани аменге те шај те издржина било саво проблеми со ка овел амен ки служба (2. Кор. 4:7-9). Тегани, со ваљани те кера те шај понадари да те добина е Девлескоро духо? Ваљани редовно те молина амен башо духо хем те ова увериме кај о Јехова ка шунел амен. О Исус вакерѓа пле учениконге: „Молинен тумен... роден... кхувен“, тегани о Јехова „ка дел свети дух околенге со родена лестар адава“ (Лука 11:9,13; Дела 1:14; 2:4).
О ЕЗЕКИЕЛ ХРАНИНЃА ПЕ ТАРО Е ДЕВЛЕСКЕРЕ ЛАФИЈА
12. Спрема Езекиел 2:9-3:3, котар авела сине о свиток хем со пишинела сине ки лесте?
12 О Езекиел на добинѓа сила само таро е Девлескоро духо, него исто аѓаар таро е Девлескере лафија. Ки јекх визија о Езекиел дикхља вас со икерела свиток. (Читин Езекиел 2:9-3:3.) Котар ало адава свиток? Со пишинела ки лесте? Хем сар хранинѓа пе лестар о Езекиел? Те дикха. О свиток ало таро е Девлескоро престол, веројатно о Јехова користинѓа јекх таро штар ангелија колен со о Езекиел англедер дикхља лен, те дел ле о свиток (Езек. 1:8; 10:7, 20). Ко свиток сине е Девлескере лафија — јекх баро хабери баши осуда кова со о Езекиел ваљани сине те вакерел е бунтовно Израелцонге (Езек. 2:7). Акава хабери сине ко солдуј стране таро свиток.
13. Со вакерѓа о Јехова е Езекиелеске те керел е свитокоја, хем соске сине гудло?
13 О Јехова вакерѓа пле пророкоске те хал о свиток хем „те пхерел пло воги леа“. О Езекиел сине послушно хем хаља цело свиток. Со значинела акава дело тари визија? О Езекиел ваљани сине целосно те хаљол о хабери кова со ваљани сине те објавинел ле. Ваљани сине те овел дело лестар те шај те влијајнел ко лескере најхор чувствија, хем адава те поттикнинел ле те проповединел. Тегани случинѓа пе нешто со на очекујнѓа, ов халило кај о свиток „сине гудло сар авгин“ (Езек. 3:3). Соске? И чест те претставинел е Јехова сине леске гудли, или бут шужо искуство (Пс. 19:8-11). Ов сине благодарно со о Јехова биринѓа ле те служинел сар лескоро пророко.
14. Со поможинѓа е Езекиелеске те прифатинел пли задача?
14 Покасно, о Јехова вакерѓа е Езекиелеске: „Са о лафија со вакерава лен чхив лен туке ко вило хем шун шукар“ (Езек. 3:10). О Јехова вакерѓа леске адава те шај те трудинел пе те памтинел о лафија таро свиток хем хор те размислинел баши ленде. Кеда о Езекиел керѓа адава лескири вера ули позорали. Исто аѓаар, ко адава свиток сине јекх силно хабери кова со ваљани сине те вакерел пе е манушенге (Езек. 3:11). Кеда о Езекиел целосно халило е Девлескоро хабери хем верујнѓа ки лесте, ов сине спремно те почминел пле задачаја хем те завршинел ла. (Споредин Псалм 19:14.)
АМЕН ДА ШАЈ ТЕ ХРАНИНА АМЕН ТАРО Е ДЕВЛЕСКЕРЕ ЛАФИЈА
15. Со ваљани „те чхива аменге ко вило“ те шај те истрајна?
15 Те шај те истрајна ки амари служба, амен да ваљани понадари те хранина амен таро е Девлескере лафија. Ваљани „те чхива аменге ко вило“ са со вакерела аменге о Јехова. Авдиве о Јехова керела аменцар лафи преку и Библија. Сар шај те уверина амен кај е Девлескоро Лафи понадари да влијајнела упро амаре мисле, чувствија хем мотивија?
16. Со ваљани те кера, хем сар адава ка влијајнел упро амаро вило?
16 Амен сием ки шукар физичко состојба соске хаја редовно маро хем амаро тело обработинела адава хајбе. Ако мангаја те ова ки шукар духовно состојба, тегани ваљани редовно те проучина е Девлескоро Лафи хем хор те размислина башо адава. На мангаја те бистра и поука башо свиток. О Јехова мангела „те пхера амаро воги лескере Лафеа“, јавере лафенцар шукар те хаљова и Библија. Адава шај те кера ле молитваја, читибаја хем хор размислибаја. Ко почеток молинаја амен те шај е Девлескере мисле те влијајнен упро амаро вило. Пало адава читинаја јекх библиско стихо. Тегани хор размислинаја башо адава со читинаја. Со ка овел о резултати? Со повише размислинаја, добором повише ка хаљова е Девлескоро Лафи хем аѓаар амари вера ка овел позорали.
17. Соске тано бут важно хор те размислина башо адава со читинаја тари Библија?
17 Соске тано бут важно те читина и Библија хем хор те размислина башо адава? Адава шај те дел амен сила те шај те проповедина о хабери башо Царство акана, хем те објавина и осуда која со шај ка ваљани панда хари те вакера ла. Исто аѓаар, кеда размислинаја башо е Јеховаскере бут шуже особине, адава шај те керел те ова панда попаше леа. Тегани ка уживина ко нешто со ка овел аменге бут гудло — андруно мир хем задоволство (Пс. 119:103).
ПОТТИКНИМЕ СИЕМ ТЕ ИСТРАЈНА
18. Со ка ваљани те признајнен о мануша хем соске?
18 Амен на сием пророкија сар о Езекиел, ама сием одлучна понадари да те објавина и порака таро Јехова са џикоте на вакерела те чхинава адалеа. Кеда ка авел о време баши осуда тегани о мануша таро амаро подрачје нашти те вакерен кај на сине предупредиме или кај о Девел на дикхља лен (Езек. 3:19; 18:23). Наместо адава, ола ка хаљовен кај о хабери со проповединѓем сине таро Девел.
19. Со ка дел амен сила те шај те кера амари служба?
19 Со ка дел амен сила те шај те кера амари служба? О иста трин буќа со поможинѓе е Езекиелеске. Понадари да проповединаја соске џанаја кај сием бичхалде таро Јехова, кај е Девлескоро духо дела амен и сила со ваљани аменге хем кај хранинаја амен таро е Девлескоро Лафи. Адалеске со о Јехова поможинела аменге, сием поттикниме те кера амари служба хем „те истрајна џи ко крајо“ (Мат. 24:13).
ГИЛИ 65 Џа англе!
a О пророко о Езекиел сине успешно ки пли служба. Ки акаја статија ка дикха трин буќа со поможинѓе леске. Џикоте кераја лафи башо адава, ка ова панда поувериме кај о Јехова ка поможинел аменге те кера амари служба.