1. Која тани и најшукар одлука која со шај некој те анел ла?

БУТ пути о одлуке со анена о родителија бершенцар влијајнена упро чхаве. Ако анена лошна одлуке, е чхавен ка овел лен проблемија. Ама, ако анена мудра одлуке, поможинена пумаре чхавенге те овел лен бахтало живото. Џанѓола пе, о чхаве да мора те анен шукар одлуке. И најшукар одлука со некој шај те анел ла тани те служинел амаре небесно Дадеске, е Јеховаске, кова со грижинела пе аменге (Пс. 73:28).

2. Кола шукар одлуке анѓа о Исус хем лескере родителија?

² Е Исусескере родителија — о Јосиф хем и Марија — сине одлучна те поможинен пумаре чхавенге те служинен е Јеховаске. О одлуке со анѓе лен сикавѓе кај адава сине ленге најважно ко живото (Лука 2:40, 41, 52). О Исус да анѓа шукар одлуке со поможинѓе леске те исполнинел пли улога ки е Јеховаскири намера (Мат. 4:1-10). Кеда барило, о Исус сине шукар, верно хем храбро мануш. Секова родители со мангела е Јехова би дичинела пе сине хем би овела сине бахтало асавке чхавеа!

3. Кола пучиба ка дикха ки акаја статија?

³ Ки акаја статија ка дикха акала пучиба: Кола шукар одлуке анѓа о Јехова кеда керела пе лафи башо Исус? Со шај о родителија те сикљон таро одлуке со анѓе о Јосиф хем и Марија? Хем со шај те сикљон о терне христијања таро одлуке со анѓа лен о Исус?

4. Која важно одлука анѓа о Јехова башо пло Чхаво?

⁴ О Јехова биринѓа бут шукар родителија е Исусеске (Мат. 1:18-23; Лука 1:26-38). О искрена лафија е Маријакере кола тане пишиме ки Библија сикавена кобор бут мангела сине е Јехова хем лескоро Лафи (Лука 1:46-55). А о начин сар реагиринѓа о Јосиф ко е Јеховаскере упатствија сикавела кај мангела сине е Девле хем спремно сине те угодинел леске (Мат. 1:24).

5-6. Со мукхља о Јехова те доживинел лескоро Чхаво?

⁵ Приметин кај о Јехова на биринѓа о Исус те бијанѓовел ки барвали фамилија. И жртва со денѓе о Јосиф хем и Марија откеда бијандило о Исус сикавела кај сине чороле (Лука 2:24). Шај е Јосифе сине ле тикни работилница паше узо пло кхер ко Назарет коте со керела сине бути сар столари. Лен сигурно на сине бут материјална буќа, посебно ако лаја ко предвид кај сине лен најхари ефта чхаве (Мат. 13:55, 56).

⁶ О Јехова заштитинѓа пле Чхаве таро несаве опасностија, ама на заштитинѓа ле таро са о проблемија (Мат. 2:13-15). На пример, несаве таро лескере најпашутне на верујнена сине ки лесте. О Исус сигурно сине бут разочаримо со ко почеток чак некој тари лескири фамилија на прифатинѓе ле сар о Месија (Мар. 3:21; Јован 7:5). Освен адава, сигурно сине леске бут пхаро кеда муло лескоро очуво о Јосиф. Акава значинела сине кај, сар најпхуредер чхаво, ов мора сине те керел и бути со керела ла сине о Јосиф (Мар. 6:3). Кеда барило, о Исус леља и одговорност те грижинел пе пле фамилијаке. Најверојатно мора сине те керел бут бути те шај те издржинел пле фамилија. Адалеске ов бут шукар џанела сине со значинела те ове уморно ко крајо таро јекх пхаро хем напорно диве.

7. а) Кола пучиба ка поможинен е брачно партнеренге те преиспитинен пе дали шукар грижинена пе пле чхавенге? б) Сар о стихија таро Изреки 2:1-6 поможинена е родителенге те воспитинен пумаре чхавен?

⁷ Ако сиен ко брако хем мангена те овен тумен чхаве, пучен тумен: „Дали сием понизна мануша кола со мангена е Јехова хем лескоро Лафи? Дали о Јехова би биринела сине амен те грижина амен башо јекх скапоцено нево живото?“ (Пс. 127:3, 4). Ако сиен више родителија, пучен тумен: „Дали сикавава  мле чхавен кај тано бут важно те овен буќарне?“ (Проп. 3:12, 13). „Дали керава са со шај те заштитинав лен таро разна опасностија ко кола со шај те аракхљовен ко е Сатанаскоро свето?“ (Изр. 22:3). Нашти те заштитине тле чхавен таро са о проблемија со шај те овен лен. Ама, шај хари по хари те спремине лен башо проблемија со ка авен хем те сикаве лен те роден совет таро е Девлескоро Лафи. (Читин Изреки 2:1-6.) На пример, ако некој таро тле пашутне чхинавела те служинел е Јеховаске, поможин тле чхавенге те хаљовен тари Библија соске тано важно те ачховен верна е Јеховаске (Пс. 31:23). А ако мерела некој таро најпашутне, сикав тле чхавенге библиска стихија со ка поможинен ленге те икљон ко крајо е дукхаја хем те аракхен утеха хем мир (2. Кор. 1:3, 4; 2. Тим. 3:16).

8. Спрема 5. Мојсеева 6:6, 7, со мора сине те керен о Јосиф хем и Марија?

⁸ О Јосиф хем и Марија поможинѓе е Исусеске те овел ле е Девлескири милост соске шунѓе о советија со денѓа о Јехова е родителенге. (Читин 5. Мојсеева 6:6, 7.) Ола бут мангле е Јехова, хем најважно сине ленге те поможинен пумаре чхавенге да те овел лен асавко мангипе.

9. Кола важна одлуке мора сине те анен о Јосиф хем и Марија?

⁹ О Јосиф хем и Марија чхивѓе о духовна буќа ко прво тхан. Сигурно, ола секова курко џана сине ки синагога ко Назарет, а секова берш баши Пасха џана сине ко Ерусалим (Лука 2:41; 4:16). Шај џикоте сине ко друмо ола користинена сине о време те сикавен е Исусе хем е јавере чхавен баши историја е Јеховаскере народоскири, хем џикоте патујнена сине шај накхена сине таро тхана сој спомниме ко Списија. Џикоте и фамилија бајрола сине, сигурно на сине ленге локхо редовно те керен акава. Ама, о Јехова наградинѓа лен башо ленгоро трудо. Адалеске со о духовна буќа сине ленге најважна, сарине ки фамилија сине паше е Јеховаја.

10. Со шај те сикљовен о родителија таро Јосиф хем тари Марија?

¹⁰ Ако сиан родители, со шај те сикљове таро Јосиф хем тари Марија? Најважно тано о чхаве те дикхен кај тле лафенцар хем тле  постапкенцар мангеа е Јехова. О најскапоцено поклон со шај те де е чхавенге тано те поможине ленге те манген е Јехова. Јекх таро најважна буќа со ваљани те сикаве лен тани редовно те проучинен и Библија, те молинен пе, те џан ко состанокија хем те џан ки служба (1. Тим. 6:6). Џанѓола пе, ту мора те грижине тут тле чхавенге ко материјално поглед (1. Тим. 5:8). Ама ма бистре кај ленгоро паше однос е Девлеа — а на о материјална буќа — ка поможинел ленге те преживинен о крајо акале пуране светоскоро хем те кхувен ко е Девлескоро нево свето (Езек. 7:19; 1. Тим. 4:8).

11. а) Сар о совет таро 1. Тимотеј 6:17-19 шај те поможинел е родителенге те анен шукар одлуке џикоте бајрарена пумаре чхавен? б) Саве целија шај те чхивен туменге сар фамилија, хем саве награде ка добинен? (Дикх и рамка „ Саве целија ка чхиве туке?“)

¹¹ Кобор сием бахтале кеда дикхаја сар бут родителија анена шукар одлуке коленцар со поможинена пумаре чхавенге те овен паше е Јеховаја! Ола стално служинена е Јеховаске заедно. Сар фамилија заедно џана ко состанокија, ко конгресија хем редовно џана ки служба. Несаве фамилие чак џана те проповедине ко ретко обработиме подрачја. Јавера џана те посетинен о Бетел, или поможинена те градинен пе теократска објектија. Са акала фамилие керена жртве ко материјално поглед, хем сигурно нане ленге локхо. Ама, о Јехова великодушно наградинела лен башо ленгере жртве. (Читин 1. Тимотеј 6:17-19.) О чхаве со бајрона ко асавке фамилие бут пути понадари да икерена акала шукар духовна навике хем кеда бајрона на жалинена башо адава! * (Изр. 10:22).

12. Со мора сине те керел о Исус џикоте бајрола сине?

¹² Е Исусескоро Дад сој ко небо секогаш анела шукар одлуке, а исто аѓаар лескере родителија ки Пхув анѓе мудра одлуке. Ама, сар со бајрола сине, о Исус мора сине коркори те анел одлуке (Гал. 6:5). Исто сар сарине амен, ле да сине ле слободно волја. Шај сине те биринел те овел себично хем ма те керел е Девлескири волја. Наместо адава, ов одлучинѓа те ачхол паше е Јеховаја (Јован 8:29). Сар шај лескоро пример те поможинел е терненге авдиве?

13. Со биринѓа те керел о Исус панда сар чхаво?

¹³ Сар чхаво о Исус биринѓа те овел послушно пле родителенге. Ов никогаш на одбинѓа те шунел ленгере советија хем те мислинел кај тано погоѓавер лендар. Наместо адава, и Библија вакерела кај сине ленге послушно (Лука 2:51). О Исус сериозно халило пли одговорност сар најпхуредер  чхаво. Сигурно бут трудинѓа пе те сикљовел о занати таро Јосиф те шај те грижинел пе пле фамилијаке.

14. Котар џанаја кај о Исус хор проучинела сине е Девлескоро Лафи?

¹⁴ Е Исусескере родителија веројатно вакерѓе леске кај бијандило преку чудо хем вакерѓе леске со шунѓе баши лесте таро е Девлескере гласникија (Лука 2:8-19, 25-38). Ама, адава на сине са. О Исус исто аѓаар коркори проучинела сине о света списија. Котар џанаја кај о Исус хор проучинела сине е Девлескоро Лафи? Џикоте сине панда тикно, о учителија таро Ерусалим чудинѓе пе кобор хаљовела сине о буќа хем сар одговоринела сине (Лука 2:46, 47). Кеда сине ле само 12 берш о Исус више сине уверимо кај о Јехова тано лескоро Дад (Лука 2:42, 43, 49).

15. Сар о Исус сикавѓа кај одлучинѓа те керел е Јеховаскири волја?

¹⁵ Кеда о Исус халило која тани лескири улога ки е Девлескири намера, ов одлучинѓа те прифатинел адаја задача (Јован 6:38). Џанља кај бут џене ка мрзинен ле. Иако адаја мисла на сине леске пријатно, ов сепак одлучинѓа те ачховел послушно е Јеховаске. Откеда крстинѓа пе ко 29 берш а.е., и најважно бути ко живото сине леске те керел адава со родела сине лестар о Јехова (Евр. 10:5-7). Чак џикоте мерела сине ко стубо мучибаске, о Исус сине одлучно џи ко крајо те керел и волја пле Дадескири (Јован 19:30).

16. Со шај о чхаве те сикљовен таро Исус?

¹⁶ Ов послушно тле родителенге. Исто сар о Јосиф хем и Марија, тле да родителија нане совршена. Сепак, о Јехова денѓа лен задача те воспитинен тут хем те заштитинен тут. Ако поштујнеа тле родителен хем ценинеа ленгере советија, ка „овел туке шукар“ (Еф. 6:1-4).

17. Спремна Исус Навин 24:15, која важно одлука ваљани те анен о терне?

¹⁷ Бирин каске ка служине. Ваљани коркори те уверине тут кој тано о Јехова, која тани лескири волја хем сар шај те кере ла ко тло живото (Рим. 12:2). Тегани ка шај те ане и најважно одлука — те служине е Јеховаске. (Читин Исус Навин 24:15; Проповедник 12:1.) Ако редовно читинеа хем проучинеа и Библија, тло мангипе спрема о Јехова ка бајрол хем тли вера ка овел панда посилно.

18. Која одлука ваљани те анен о терне, хем саво ка овел о резултати таро адава?

 ¹⁸ Одлучин те чхиве е Јеховаскири волја ко прво тхан ко тло живото. Е Сатанаскоро свето ветинела кај ако користинеа тле талентија баши тли корист, ка ове бахтало. Уствари, околен со иси лен материјална целија „анена песке бут дукха“ (1. Тим. 6:9, 10). Тари јавер страна, ако шунеа е Јехова хем одлучинеа те чхиве лескири волја ко прво тхан ко тло живото, „ка ове мудро“ хем ка ове успешно (Ис. Нав. 1:8).

19. Со на смејнена те бистрен о родителија?

¹⁹ Тумен сар родителија, ден тумендар са те шај те поможинен тумаре чхавенге те служинен е Јеховаске. Нека овел тумен доверба ки лесте, хем ов ка поможинел туменге те анен мудра одлуке (Изр. 3:5, 6). Ма бистрен кај упро тумаре чхаве повише влијајнела адава со керена него адава со вакерена. Адалеске, анен одлуке коленцар со ка поможинен тумаре чхавенге те овел лен е Јеховаскири милост.

20. Кола берекетија ка добинен о терне ако одлучинена те служинен е Јеховаске?

²⁰ Тернален, тумаре родителија шај те поможинен туменге те анен шукар одлуке. Ама, тумендар зависинела дали ка овен амала е Девлеа. Адалеске, џан пало е Исусескоро пример хем одлучинен те служинен тумаре небесно Дадеске со бут мангела тумен. Ако керена адава, панда акана ка овел тумен смисла ко живото хем ка уживинен (1. Тим. 4:16). А ки иднина, ка овел тумен о најбахтало живото!