1. Котар џанаја кај, кеда поможинаја е манушенге те овен е Христосескере ученикија, учествујнаја ко дело со спасинела животија?

КЕДА поможинаја е манушенге те овен е Христосескере ученикија, учествујнаја ко дело со спасинела животија! Котар џанаја адава? Кеда о Исус денѓа и заповед која тани пишими ко Матеј 28:19, 20, ов вакерѓа: „Џан хем керен ученикија... хем крстинен лен“. Кобор тано важно о крстибе? Ако мангаја те живина вечно, мора те крстина амен. Окола со мангена те крстинен пе ваљани те верујнен кај шај те овен спасиме само адалеске со о Исус денѓа пло живото сар жртва хем сине воскреснимо. Адалеске о Петар вакерѓа е пхраленге хем е пхењенге: „О крстибе... акана спасинела тумен да... преку о воскресение е Исус Христосескоро“ (1. Пет. 3:21). Спрема акава, кеда јекх нево интересенти крстинела пе, ов шај те надинел пе кај ка живинел вечно.

2. Спрема 2. Тимотеј 4:1, 2, сар ваљани те сикава е манушен?

² Те шај те кера ученикија, ваљани шукар те сикава е манушен. (Читин 2. Тимотеј 4:1, 2.) Соске? Адалеске со о Исус денѓа амен и заповед: „Џан хем керен ученикија... сикавен лен“. О апостол Павле поттикнинела амен те истрајна ко адава, соске аѓаар ка спасина хем амен хем околен со шунена амен. Е Павле сине ле шукар причина кеда вакерѓа: „Пазин шукар... сар сикавеа“ (1. Тим. 4:16). Адалеске со амари цел тани те поможина е манушенге те овен е Христосескере ученикија, ваљани те сикава лен ко најшукар начин.

3. Со ка дикха ки акаја статија?

 ³ Амен редовно сикаваја милиоња манушен башо чачипа со аракхљона ки Библија. Ама, сар со дикхлем ки англуни статија, амен мангаја те поможина повише џененге таро акала мануша те крстинен пе. Ки акаја статија, ка дикха панда панџ буќа со сарине амен ваљани те кера лен те шај те поможина е интересентенге те крстинен пе.

4. Соске на ваљани те кера бут лафи кеда сикаваја е интересентен? (Дикх хем и фуснота.)

⁴ Амен мангаја о библиска чачипа. Адалеске шај мангаја бут те кера лафи е манушенцар баши ленде. Ама, бизи разлика дали водинаја о Проучибе и Стражарско кула, о Проучибе и Библија ки дворана или библиско курси, на ваљани те кера бут лафи. Адалеске со амари цел тани те сикава е манушен тари Библија, ваљани те сикава самоконтрола хем те на вакера е интересентеске са со џанаја башо несаво библиско стихо или несави тема * (Јован 16:12). Размислин кобор буќа пенџареа сине тари Библија кеда крстинѓан ту хем кобор џанеа акана. Тегани шај халиљан само о основна библиска чачипа (Евр. 6:1). Ваљанѓе туке берша те сикљове адава со џанеа акана. Адалеске ма трудин тут таро јекх пути те сикаве е интересенте са адава со џанеа.

5. а) Спрема 1. Солуњаните 2:13, со мангаја те поможина е интересентеске те хаљовел? б) Сар шај те поттикнина е интересенте те керел повише лафи џикоте проучинаја леа?

⁵ Мангаја о интересенти те хаљовел кај адава со сикљовела тано таро е Девлескоро Лафи. (Читин 1. Солуњаните 2:13.) Сар шај те кера адава? Џикоте проучинена, охрабрин ле те керел лафи башо адава со сикљола. Наместо секогаш те објаснине леске о библиска стихија, пуч ле ов те вакерел сар халило о стихо. Поможин ле те хаљовел сар лично леске тано корисно е Девлескоро Лафи. Пуч ле пучиба те шај те дикхе сар хаљовела о стихија со читинела лен хем сар влијајнена упри лесте (Лука 10:25-28). На пример, пуч ле: „Сар акава стихо поможинела туке те дикхе јекх таро е Јеховаскере особине?“ „Сар шај те поможинен туке о буќа со сиклиљан лен акана тари Библија?“ „Со мислинеа башо адава со сиклиљан?“ (Изр. 20:5). Нане најважно кобор џанела о интересенти баши Библија, него дали мангела хем дали применинела адава со сикљовела.

6. Соске тано шукар те ла аменцар поискусна објавителен кеда проучинаја некасаја?

⁶ Кеда проучинеа некасаја, дали некогаш  леа туја поискусна објавителен? Ако кереа адава, шај те пуче лен дали шукар сикавеа е интересенте хем дали шукар користинеа и Библија. Мора те ове понизно ако мангеа те ове пошукар кеда сикавеа е јаверен (Споредин Дела 18:24-26.) Исто аѓаар, пуч е поискусно објавителе дали, спрема лесте, о интересенти хаљовела шукар адава со сикљола. Шај хем те пуче ле дали шај те проучинел е интересентеа јекх или дуј курке кеда ту на сиан адатхе. Аѓаар о интересенти ка шај редовно те проучинел хем ка хаљовел кобор тано важно адава. Ма мислин кај ов тано „тло“ интересенти хем кај никој јавер нашти те проучинел леа освен ту. Адалеске со о шукарипе е интересентескоро тано туке најважно таро са, ту мангеа те кере са со шај те поможине леске те сикљовел башо чачипе бизо те чхинавел.

7. Со ка поможинел е интересентеске те мангел адава со сикљола?

⁷ О интересенти ваљани те дикхел кај мангеа о чачипа тари Библија хем кај верујнеа ки ленде (1. Сол. 1:5). Тегани леске да ка овел поинтересно адава со сикљола. Ко несаве прилике шај те вакере леске несаве конкретна библиска начелија со поможинѓе лично туке. Аѓаар ка хаљол кај ки Библија иси практична советија со шај те поможинен леске да.

8. Со шај јавер те кере те шај те поможине е интересентеске, хем соске тано шукар те кере адава?

⁸ Џикоте проучинеа е интересентеа вакер леске башо несаве пхраља хем пхења со сине лен слична проблемија сар лескере хем успејнѓе те накхавен лен. Кеда џаја ки лесте шај те ле туја некас таро собрание со ка вакерел леске сар и Библија поможинѓа леске лично. Исто аѓаар, шај те аракхе охрабрувачка искуствија ки jw.org ки рубрика „И Библија менинела животија“. * Асавке статие хем видеоклипија шај те поможинен е интересентеске те хаљол кобор тано мудро те применинел о библиска начелија ко пло живото.

9. Сар шај те охрабрине е интересенте те вакерел пле фамилијаке или амаленге адава со сикљола?

⁹ Ако о интересенти тано ко брако, дали лескоро брачно партнери исто аѓаар проучинела и Библија? Ако на, вакер е брачно партнереске кај ов да шај те бешел туменцар кеда проучинена. Охрабрин е интересенте те вакерел пле фамилијаке или амаленге  адава со сикљола (Јован 1:40-45). Сар? Шај едноставно те пуче ле: „Сар би објаснинеа сине акава некаске тари тли фамилија?“ или „Кова библиско стихо би шај те користине те шај те докажине адава јекхе амалеске?“ Ко асавко начин ка поможине е интересентеске јекх диве ов да те сикавел е јаверен. Пало адава, кеда ка исполнинел о условија, шај те почминел те џал ки служба сар некрстено објавители. Шај те пуче е интересенте дали џанела некас со мангела те проучинел и Библија. Ако оја, одма контактирин адале мануше хем нудин леске те проучине леа и Библија. Сикав леске о видеоклипи Сар шај те сикљове тари Библија? *

10. Спрема 1. Солуњаните 2:7, 8, сар шај те џа пало е Павлескоро пример?

¹⁰ Мора те сикава кај искрено грижинаја амен околенге касаја со проучинаја. Ваљани те дикха ки ленде сар амаре идна пхраља хем пхења. (Читин 1. Солуњаните 2:7, 8.) Сигурно нане ленге локхо те откажинен пе таро амала со иси лен ко свето хем те керен са о потребна промене те шај те служинен е Јеховаске. Адалеске ваљани те поможина ленге те аракхен песке чачутне амала ко собрание. Ов амал е интересентеа аѓаар со ка накхаве леа време на само кеда проучинена, него ко јавера да прилике. Ако јавинеа тут леске ко телефони, ако бичхалеа леске јекх порака или ако џаја кратко ки лесте ко јавер да време, ка сикаве кај чаче грижинеа тут леске.

11. Со ваљани те аракхен о интересентија ко собрание, хем соске?

¹¹ Јекх изрека вакерела: „Ваљани цело гав те шај те бајрарел пе јекхе чхаве“. Амен шај те вакера: „Ваљани цело собрание те шај некој те овел е Исусескоро ученико“. Адалеске ваљани те поможина е интересентенге те запознајнен е јаверен ко собрание, кола со ка поможинен ленге те овен попаше е Јеховаја. Аѓаар ка овел лен прилика те дружине пе е Јеховаскере народоја кова со шај те поможинел ленге ко духовно хем ко емоционално поглед. Мангаја секова интересенти те хаљол кај сием бахтале сој тано аменцар хем кај тано дело тари амари духовно фамилија. Исто аѓаар, мангаја те осетинел пе шукар ко амаро христијанско пхралипе ко кова со иси мангипе. Тегани ка овел леске полокхо те чхинавел те дружинел пе е манушенцар со нане те поможинен леске те мангел е Јехова (Изр. 13:20). Ако лескере пуране амала избегинена ле, ов ка џанел кај шај те аракхел песке чачутне амала ки е Јеховаскири организација (Мар. 10:29, 30; 1. Пет. 4:4).

12. Соске ваљани те вакера е интересентеске кобор тано важно те дел лафи е Јеховаске кај ка служинел леске хем те крстинел пе?

¹² Кер лафи отворено е интересентеа башо адава кобор тано важно те дел лафи е Јеховаске кај ка служинел леске хем те крстинел пе. Уствари, амари главно причина соске проучинаја леа тани јекх диве ов да те овел е Исусескоро крстимо ученико. Откеда некобор масекија редовно ка проучина е интересентеа, а посебно кеда ка почминел те авел ко состанокија, ов ваљани те хаљол кај мангаја те поможина леске те служинел е Јеховаске хем те овел лескоро Сведоко.

13. Кола буќа ваљани те керел о интересенти те шај те крстинел пе?

¹³ Иси некобор буќа со јекх интересенти ваљани те керел ако мангела те крстинел пе. Сар прво, ваљани те пенџарел е Јехова, те мангел ле хем те овел ле вера ки лесте (Јован 3:16; 17:3). Пало адава, о интересенти ваљани те овел амал е Јеховаја хем е пхраленцар хем е пхењенцар ко собрание (Евр. 10:24, 25; Јак. 4:8). Сар со накхела о време, о интересенти чхинавела те керел буќа со на мангела лен о Девел хем каинела пе башо лошна буќа со керѓа лен (Дела 3:19). Освен адава, лескири вера ка поттикнинел ле те керел лафи е јаверенцар башо чачипе (2. Кор. 4:13). Ко крајо, дела лафи е Јеховаске кај ка служинел леске хем крстинела пе ко пани (1. Пет. 3:21; 4:2). Адава тано бут радосно диве сариненге! Џикоте о интересенти керела акала буќа те шај те крстинел пе, често пофалин ле хем охрабрин ле понадари да те керел акала буќа.

14. Сар шај те дикхе дали јекх интересенти духовно напредујнела?

¹⁴ Ваљани те ова стрплива кеда поможинаја е интересентеске те пхерел о условија те крстинел пе. Ама, ваљани те дикха дали иси ле желба те служинел е Јеховаске. Дали дикхеа кај трудинела пе те шунел е Исусескере заповедија или само мангела те џанел интересна буќа тари Библија?

15. Со ка сикавел дали о интересенти тано спремно крстибаске?

¹⁵ Редовно размислин башо адава сар напредујнела о интересенти. На пример, дали вакерела со осетинела башо Јехова? Дали молинела пе леске? (Пс. 116:1, 2). Дали уживинела џикоте читинела и Библија?  (Пс. 119:97). Дали редовно џала ко состанокија? (Пс. 22:22). Дали керела о потребна промене ко пло живото? (Пс. 119:112). Дали почминѓа те керел лафи пле фамилијаја или пле амаленцар башо адава со сиклило? (Пс. 9:1). А најважно таро са, дали мангела те овел е Јеховаскоро сведоко? (Пс. 40:8). Ако о интересенти на керела промене ко несаве таро акала буќа, трудин тут тактично те дознајне која тани и причина, а пало адава кер леа лафи ко јекх љубезно ама отворено начин. *

16. Кеда ваљани те чхинаве те проучине некасаја?

¹⁶ Те шај те проценине дали ваљани понадари да те проучине е интересентеа, редовно пуч тут: „Дали о интересенти спреминела пе башо проучибе? Дали мангела те авел ко состанокија? Дали панда иси ле лошна навике? Дали панда тано члени тари несави ховавни религија?“ Ако о одговор тано оја, понадари да те проучинел пе асавке манушеа, тано сар те сикаве те пливинел некас со на мангела те сапанѓовел! Ако о интересенти на ценинела адава со сикљола хем на мангела те керел промене, дали врединела понадари да те проучине леа?

17. Спрема 1. Тимотеј 4:16, со мора сарине амен те кера?

¹⁷ Адалеске со сериозно хаљоваја е Исусескири заповед те кера ученикија, мангаја те да са амендар те шај те поможина е интересентенге те крстинен пе. Адалеске кеда сикаваја лен користинаја и Библија хем сием воодушевиме хем увериме џикоте кераја адава. Охрабринаја лен те аракхен песке амала ко собрание. Исто аѓаар, поможинаја ленге те чхивен песке цел те ден лафи е Јеховаске кај ка служинен леске хем те крстинен пе, хем редовно размислинаја сар напредујнена ко духовно поглед. (Дикх и рамка „ Сар шај те поможине е интересентеске те крстинел пе“.) Бут сием бахтале со шај те учествујна ко акава проповедничко дело со спасинела животија! Те ова одлучна те да са амендар те шај те поможина е интересентенге те исполнинен о условија те крстинен пе.