1. Сар о лафија таро 2. Коринќаните 3:1-3 поможинена аменге те хаљова кобор бари чест тани те проучина некасаја хем те дикха сар крстинела пе? (Дикх и слика тари насловно страна.)

САР осетинеа тут кеда несаво интересенти таро тло собрание ка крстинел пе? Сигурно сиан бут бахтало! (Мат. 28:19). А ако ту проучинѓан леа, адава анела туке панда побаро бахталипе! (1. Сол. 2:19, 20). Кеда крстинела пе некој адава сикавела кобор трудинѓан тут ту хем о јавера таро собрание те поможинен леске те керел адава важно чекори. Ки несави смисла окола со крстинена пе тане сар „писмо препоракаја“ на само околеске со проучинѓа леа него цело собраниеске. (Читин 2. Коринќаните 3:1-3.)

2. а) Со ваљани те кера, хем соске? б) Сој тано библиско курси? (Дикх и фуснота.)

² Бахтале сием со дикхаја кај ко извештаија башо последна штар берша водинѓе пе 10 милиоња библиска курсија * ко цело свето. Ко секова таро адала берша, крстинена пе сине повише таро 280.000 мануша сар е Исусескере ученикија. Акава сикавела кај милиоња мануша касаја со проучинела пе и Библија панда на решинѓе те крстинен пе. Са џикоте о Јехова стрпливо дела прилика е манушенге те овен е Христосескере ученикија, амен мангаја те да амендар са те поможина ленге со посигате  те крстинен пе. О време сигате накхела! (1. Кор. 7:29а; 1. Пет. 4:7).

3. Со ка дикха ки акаја статија?

³ Адалеске со авдиве тано бут важно те поможина е манушенге те овен ученикија е Христосескере, о Водечко тело пучља е подружницен со шај те керел пе те шај те поттикнина е интересентен те крстинен пе. Ки акаја хем ки следно статија, ка дикха со шај те сикљова таро искусна пионерија, мисионерија хем покраинска надгледникија * (Изреки 11:14; 15:22). Ола објаснинѓе со шај те кера амен хем окола со проучинаја ленцар те шај те овел лен побари корист таро курси. Ки акаја статија ка дикха панџ буќа со секова интересенти ваљани те керел лен те шај хари по хари те ресел џи ко крштевање.

4. Башо со ваљани те ова свесна ако проучинаја некасаја англо удар?

⁴ Бут амаре пхраља хем пхења проучинена е манушенцар англо ленгоро удар. Иако ко акава начин некој шај те почминел те интересинел пе баши Библија, акала разговорија обично тане кратка хем шај на икерена пе секова курко. Те шај те бајрарен о интерес е станарескоро, несаве пхраља хем пхења пучена ле дали шај те добинен лескоро телефонско број, хем пало адава те јавинен пе леске или те пишинен леске несаве мисле тари Библија. Асавке разговорија шај те трајнен масеконцар. Дали о интересенти * чаче ка напредујнел хем ка крстинел пе ако ов на вложинела повише време хем труд те проучинел и Библија? Веројатно на.

5. Спрема Лука 14:27-33, кола споредбе е Исусескере шај те користинен аменге те шај те поможина адаленге со проучинена аменцар и Библија?

⁵ Ки јекх прилика, о Исус објаснинѓа со очекујнела пе некастар со мангела те овел лескоро ученико. Ов денѓа дуј споредбе. Јекх сине башо мануш со мангела те керел кула, а и дујто башо цари со спреминела пе сине баши војна. О Исус вакерѓа кај адава со мангела те керел и кула „прво мора те бешел хем те рачунинел о трошако те дикхел дали шај те завршинел ла“, а о цари „прво мора те бешел хем те советинел пе“ те шај те дикхел дали лескири војска успешно ка шај те боринел пе против о душмања. (Читин Лука 14:27-33.) О Исус џанља кај секој со мангела те овел лескоро ученико ваљани англедер шукар те размислинел башо са сој вклучимо ки адаја одлука. Те шај те поможина е интересентеске  те керел адава, ваљани те поттикнина ле те проучинел аменцар и Библија секова курко. Сар шај те кера адава?

6. Со би шај сине те кера те шај те поможина е интересентеске посигате те напредујнел?

⁶ Шај те почмине аѓаар со ка трудине тут те кере лафи е станареа хари повише време англо удар. Ки секоја посета, шај те керен лафи на само башо јекх, него башо дуј библиска стихија. Кеда о станари ка овел спремно те керел повише лафи, шај те пуче ле дали мангела те бешен негде хем те продолжинен и дискусија. Таро адава со ка одговоринел о станари, шај те дикхе кобор тано леске важно те проучинел и Библија. Те шај те поможине леске посигате те напредујнел, шај те пуче ле дали ка мангел те проучинел дуј пути ко курко. Ама, нане доволно само те проучинел пе јекх пути или дуј пути ко курко.

7. Сар шај шукар те спремине тут англедер те проучине е интересентеа?

⁷ Бут тано важно шукар те спремине тут англедер те проучине е интересентеа. Шај те почмине аѓаар со ка читине о материјали со ваљани заедно те разглединен ле хем те пхраве о библиска стихија. Дикх кола тане о главна мисле. Размислин башо наслов тари лекција, о поднасловија, о пучиба, о стихија коте со пишинела „читин“, о слике а исто аѓаар о видеоклипија кола со шај те поможинен е интересентеске пошукар те хаљол и тема. Пало адава, адалеа со ка размислине башо потребе е интересентескере, размислин англедер сар шај те објаснине леске о информацие ко едноставно хем јасно начин те шај полокхе те хаљовел лен хем те применинел лен (Неем. 8:8; Изр. 15:28а).

8. Со сикљоваја таро е Павлескере лафија сој тане пишиме ко Колошаните 1:9, 10 башо адава кобор тано важно те молина амен амаре интересентенге?

⁸ Џикоте спреминеа тут, молин тут е Јеховаске башо интересенти хем башо лескере потребе. Молин тут о Јехова те поможинел туке те сикаве е интересенте тари Библија ко начин со ка ресел џи ко лескоро вило. (Читин Колошаните 1:9, 10.) Трудин тут те проценине кола буќа шај те овен леске пхаре те хаљовел лен или те прифатинел лен. Ма бистре кај тли цел тани те поможине леске те крстинел пе.

9. Сар шај те поможине е интересентеске те спреминел пе башо проучибе? Објаснин.

⁹ Надинаја амен кај, ако редовно проучинела и Библија, о интересенти ка ценинел адава со керѓа о Јехова хем о Исус, хем ка мангел  те сикљовел нешто повише (Мат. 5:3, 6). Те шај те овел ле целосно корист таро проучибе, о интересенти ваљани те концентриринел пе ко адава со сикљола. Те шај те поможине леске ко адава, објаснин кобор тано важно те спреминел пе англедер те проучинен, аѓаар со англедер ка читинел о материјали хем ка размислинел сар шај те применинел адава со сиклило. Сар шај те поможине леске те спреминел пе? Заедно спреминен јекх поглавје или јекх лекција те шај те сикаве леске сар те керел адава. * Објаснин леске сар шај те аракхел о директно одговор таро пучибе, хем сикав леске сар адава со ка бележинел само о главна лафија или изразија ка поможинел леске те сетинел пе ко одговор. Пало адава, замолин ле те дел одговор пле лафенцар. Аѓаар ка шај те дикхе кобор шукар хаљовела о материјали. Ама, шај те поттикнине е интересенте те керел панда нешто.

10. Соске тано важно о интересенти те читинел и Библија секова диве, хем сар шај те овел ле најбари корист таро читибе и Библија?

¹⁰ Освен со проучинела секова курко туја, е интересентеске ка користинел ако секова диве керела несаве буќа коркори. Ов ваљани те комунициринел е Јеховаја. Сар? Аѓаар со ка шунел е Јехова хем ка керел леа лафи. Шај те шунел е Девле аѓаар со ка читинел и Библија секова диве (Ис. Нав. 1:8; Пс. 1:1-3). Сикав леске сар те користинел о „Распоред башо читибе и Библија“ кова со шај те печатинел пе тари амари интернет-страница. * Џанѓола пе, те шај те поможине леске те овел ле најбари корист таро читибе и Библија, поттикнин ле шукар те размислинел башо адава со сикљола башо Јехова хем сар те применинел ко пло живото адава со читинела (Дела 17:11; Јак. 1:25).

11. Сар о интересенти ка сикљовел исправно те молинел пе е Јеховаске, хем соске тано важно често те керел адава?

¹¹ Охрабрин е интересенте те керел е Јеховаја лафи аѓаар со ка молинел пе секова диве. Сар шај те кере адава? Таро вило молин тут е Девлеске англедер те проучинен хем пало проучибе, хем спомнин е интересенте ко тле молитве. Џикоте шунела тле молитве, ов ка сикљовел сар искрено хем таро вило те молинел пе е Јеховаске хем те бичхалел пле молитве е Исусеске ко анав (Мат. 6:9; Јован 15:16). Адава со секова диве ка читинел и Библија (ка шунел е Јехова) хем ка молинел пе (ка керел лафи е Јеховаја) сигурно ка  поможинел леске те овел попаше леа (Јак. 4:8). Ако иси ле асавки навика, о интересенти духовно ка напредујнел хем ка мангел те дел лафи е Јеховаске кај ка служинел леске хем ка крстинел пе.

12. Сар шај те поможине е интересентеске те овел паше амал е Јеховаја?

¹² Адава со сикљола ле о интересенти џикоте проучинела и Библија на ваљани те ачхол леске само ки годи, него ваљани те кхувел леске ко вило. Соске? Амаро вило, коте сој вклучиме амаре желбе, емоцие хем чувствија, поттикнинела амен те кера нешто. О Исус сикавела сине ко логично начин хем адалеске о мануша мангена сине те сикљовен лестар. Ама, ола џана сине пали лесте адалеске со лескере поуке ресена сине џи ко ленгоро вило (Лука 24:15, 27, 32). Е интересентеске, о Јехова ваљани те овел реално личност, некасаја со шај те овел паше хем те дикхел ле сар пло Дад, Девел хем амал (Пс. 25:4, 5). Џикоте проучинеа леа и Библија, истакнин кобор шуже особине иси е Девле (2. Мој. 34:5, 6; 1. Пет. 5:6, 7). Трудин тут те кере акава бизи разлика која тема проучинена. Поможин леске те хаљовел кобор баро мангипе, шукарипе хем сочувство сикавела о Јехова. О Исус вакерѓа кај „и најбари хем и прво заповед“ тани: „Манг е Јехова, тле Девле“ (Мат. 22:37, 38). Де тутар са те поможине е интересентеске те мангел е Јехова таро вило.

13. Сар шај те поможине е интересентеске те џанел повише башо е Јеховаскере особине?

¹³ Кеда кереа лафи е интересентеа, вакер леске соске мангеа е Јехова. Акава шај те поможинел леске те хаљол кај ов да ваљани те овел амал е Јеховаја хем те мангел ле (Пс. 73:28). На пример, дали ки публикација со проучинена ла или ко несаво стихо иси несави мисла со туке значинела бут хем откринела е Јеховаскоро мангипе, мудрост, правда или моќ? Спомнин адава е интересентеске хем вакер леске кај адаја тани јекх таро бут причине соске мангеа амаре небесно Даде. Ама, иси панда нешто со секова интересенти ваљани те керел те шај те крстинел пе.

14. Сар адава со пишинела ко Евреите 10:24, 25 башо состанокија шај те поможинел е интересентеске те напредујнел?

¹⁴ Сарине мангаја о интересентија те напредујнен хем јекх диве те крстинен пе. Јекх важно начин сар шај те поможина ленге тано те охрабрина лен те авен ко амаре состанокија.  О искусна објавителија вакерена кај о интересентија кола со одма почминена те авен ко состанокија сигате напредујнена (Пс. 111:1). Несаве објавителија објаснинена е интересентенге кај ко состанокија ка сикљовен бут јавера буќа баши Библија со нане те сикљовен ко библиско курси. Читин Евреите 10:24, 25 заедно е интересентеа, хем објаснин леске сави корист ка овел ле ако авела ко состанокија. (Читин.) Мукх леске о видеоклипи Со керела пе ки е Јеховаскере сведоконгири дворана? * Поможин леске те овел одлучно те на мукхел ни јекх состанок.

15. Сар шај те поттикнине е интересенте редовно те авел ко состанокија?

¹⁵ Со шај те кере ако јекх интересенти панда на авела ко состанок или авела само понекогаш? Ов воодушевимо џикоте вакереа леске со сиклиљан сигенде ко состанок. Кеда ка дикхел сар осетинеа тут, адава шај те поттикнинел ле те мангел те авел. Де ле и Стражарско кула или о Листија спремибаске кола со ко моменти разглединена пе ко состанокија. Сикав леске башо со ка керел пе лафи ко јавер состанок, хем пуч ле со би овела леске најинтересно. Адава со ка дикхел хем ка шунел ко прво состанок сигурно ка овел бут пошукар таро адава со џи акана дикхља хем шунѓа ко јавера тхана коте со кхедена пе јавера религие (1. Кор. 14:24, 25). Ка запознајнел јаверен кола сој тане шукар пример хем кола со ка поможинен леске те напредујнел хем те крстинел пе.

16. Сар ваљани те проучина е интересентенцар те шај те поможина ленге те крстинен пе, хем со ка дикха ки следно статија?

¹⁶ Сар ваљани те проучина е интересентенцар те шај те поможина ленге те крстинен пе? Шај те поможина секоле интересентеске те хаљовел кобор тано важно те проучинел секова курко хем секогаш шукар те спреминел пе башо адава. Исто аѓаар, мангаја те охрабрина ле те комунициринел е Јеховаја секова диве хем те овел леа паше амал. Мангаја те поттикнина ле те авел ко собраниска состанокија. (Дикх и рамка „ Со ваљани те керен о интересентија те шај те крстинен пе“.) Ама, сар со ка дикха ки следно статија, иси панда панџ буќа со шај те кера те шај те поможина е интересентенге те крстинен пе.