О Јехова дела сине сила акале ревна проповедниконге. Ко адава берш о број таро колпортерија, или пионерија, барило таро 225 ко 350. Освен адава, повише таро 8.000 објавителија прво пути денѓе извештај баши служба ко главно седиште. О Јехова денѓа лен берекетија адалеа со бут мануша сикавѓе интерес баши ленгири порака.

Ко 21 март 1920 берш, о Џозеф Ратерфорд, кова со ко адава време водинела сине о дело башо Истражувачија е Библијакере, икерѓа о говор е насловеа „Милиоња кола со акана живинена никогаш нане те мерен“. О Истражувачија денѓе пестар са те шај те канинен со шај повише манушен ко акава настан. Ола леле ки кирија јекх таро најбаре театрија ко Њујорк Сити, хем успејнѓе те делинен околу 320.000 покане.

Але повише мануша него со очекујнѓе. О театар, кова со шај сине те приминел само 5.000 манушен, сине пхердо џи ко последно тхан, а околу 7.000 мануша нашти сине те кхувен. Спрема и Стражарско кула акава сине „јекх таро најуспешна состанокија со икерѓе о Истражувачија е Библијакере“.

О Истражувачија е Библијакере сине пенџарде сар мануша со објавинена кај „милиоња кола со акана живинена никогаш нане те мерен“. Ко адава време, ола на халиле кај и порака башо Царство ка ваљани те проповединел пе ки побари мера. Сепак, сикавѓе бари ревност. И Ида Олмстед, која со почминѓа те џал ко состанокија таро 1902 берш, вакерѓа: „Џанлем кај е манушен аџикерена баре берекетија, хем никогаш на пропуштинѓем те вакера адава шукар хабери околенге со аракхаја лен сине ки служба“.

Те шај те обезбединел пе духовно храна, о пхраља таро Бетел почминѓе коркори те печатинен несаве таро амаре публикацие. Леле и потребно опрема хем чхивѓе ла ки јекх зграда со леле ла ки кирија ко Бруклин (Њујорк), која со сине паше узо Бетел.

О Лео Пел хем о Валтер Кеслер але те служинен ко Бетел ко јануари 1920 берш. О Валтер вакерѓа: „Кеда реслем о надгледнико тари печатница дикхља амен хем вакерѓа аменге: ’Иси тумен јекх саати текваш џи ко ручко‘. Денѓа  амен задача те пхирава кутие лиленцар таро подруми џи упре“.

О Лео вакерѓа со уло о тајсутно диве: „Амари бути сине те чистина о ѕидија таро прво спрати ки зграда. Адаја сине и најмелали бути со некогаш керѓум ла. Ама, адалеске со адава кераја сине башо Јехова, на сине аменге пхаро“.

Башо само некобор курке, ревна доброволција почминѓе те печатинен и Стражарско кула. Ки печатарско машина ко прво спрати сине печатиме 60.000 примерокија таро издание таро 1 февруари 1920 берш. Ко исто време ко подруми ки исто зграда о пхраља чхивѓе панда јекх печатарско машина со чхивѓе лаке анав „воено броди“. Кратко пало адава почминѓа те печатинел пе о списание Златно веко почминдор таро издание таро 14 април 1920 берш. Јасно сине кај о Јехова денѓа лен берекети башо ленгоро труд.

Е Јеховаскоро народо палем сине ко јекхипе хем ревно проповединела сине. Ама, несаве Истражувачија е Библијакере мукхле и организација кеда сине о пхаро периоди таро 1917 џи ко 1919 берш. Сар шај сине те поможинел пе ленге?

Ки Стражарско кула таро 1 април 1920 берш, иклили и статија е насловеа „Те живина ко мир“. Ки лате вакерела сине ленге: „Увериме сием кај са адала со мангена те шунен е Јехова ка бистрен о пуране грешке хем ка овен ко јекхипе лескере народоја те шај заедно те проповединен“.

Бут џене прифатинѓе акала лафија. На пример, акаја статија поможинѓа јекхе брачно пареске кола со сине Истражувачија е Библијакере те хаљовен кај керѓе грешка адалеске со на проповединѓе повише таро јекх берш. Ола одлучинѓе палем ревно те служинен е Јеховаске. Уствари, са акале објавителен аџикерела лен сине бари бути.

Ко 21 јуни 1920 берш, о Истражувачија е Библијакере почминѓе јекх акција ки која ваљани сине те ден о лил И тајна тани открими * кобор  со шај повише манушенге. Ачхиле бут примерокија таро акава лил адалеске со сине забранимо ко 1918 берш.

Са о објавителија, а на само о колпортерија, сине каниме те учествујнен ки акаја акција. Ко Билтен * таро јуни 1920 берш пишинела сине: „Са о крстиме објавителија таро секова собрание кола со шај те учествујнен, спремно нека керен адава. Секова јекх нека чхивел песке сар цел те дел со повише примерокија таро лил“. О Едмунд Хупер вакерѓа кај ки акаја акција бут џене прво пути учествујнѓе ки служба таро удар ко удар. Ов вакерела: „Почминѓем те хаљова са о буќа сој тане вклучиме ко акава дело кова со накхавѓа адава со очекујнѓем“.

Џикоте сине и Прво светско војна е пхраленге сине бут пхаро те овен ко контакт е јаверенцар таро Истражувачија е Библијакере. О пхрал Ратерфорд мангља те охрабринел лен хем палем те организиринел о проповедибе. Адалеске, ко 12 август 1920 берш, заедно панда штаре пхраленцар цидинѓа ко друмо те потсетинел и Британија хем бут јавера пхувја.

Кеда о Ратерфорд посетинѓа и Британија, о Истражувачија е Библијакере икерѓе трин конгресија хем 12 состанокија баши јавност. Ко акала настанија сине присутна отприлика 50.000 мануша. Баши акаја посета ки Стражарско кула пишинела сине: „О пхраља сине охрабриме хем зајакниме. Сине бут бахтале адалеске со шај сине те дружинен пе хем те соработинен“. Ко Париз, о пхрал Ратерфорд икерѓа о говор „Милиоња кола со акана живинена никогаш нане те мерен“. Кеда почминѓа те керел лафи, и сала сине бут пхерди. Откеда завршинѓа о говор 300 мануша родинѓе те џанен нешто повише.

Ко наредна курке, о Ратерфорд хем о пхраља со сине леа посетинѓе и Атина, Каиро хем Ерусалим. Те шај те слединен о интерес со сине сикавдо ко акала тхана, о пхрал Ратерфорд формиринѓа подружница ки диз Рамала, која сој паше узо Ерусалим. Пало адава иранѓа пе ки Европа коте со формиринѓа и Централно-европско подружница ки Швајцарија колате со ваљани сине те печатинел пе литература.

Ко септември 1920 берш, о Истражувачија е Библијакере икалѓе о списание Златно веко  бр. 27. Ко акава специјално издание сине откримо о прогонство со доживинѓе ле ко 1918 берш. И печатарско машина керела сине бути диве рат, хем сине печатиме повише таро 4 милиоња примерокија.

Адала со читинѓе акава списание дознајнѓе башо необично случај е пхењакоро Ема Мартин. Ој служинѓа сар колпортери ко Сан Бернардино (Калифорнија). Ко 17 март 1918 берш, ој сине ко јекх тикно состанок со икерѓе о Истражувачија е Библијакере хем лаја сине трин пхраља — Е. Хам, Е. Соненбург хем Е. Стивенс.

Јекх таро присутна со сине ко адава состанок на сине ле цел те сикљовел тари Библија. Ов покасно признајнѓа: „Ко адава состанок сиум сине бичхалдо таро јавно обвинители. Ваљани сине те аракхав доказија“. Хем аракхља „о доказ“ со родинѓа ле — јекх примерок таро лил И тајна тани открими. Пало некобор диве, и пхен Мартин хем о трин пхраља сине уапсиме. Ола сине обвиниме кај пхагена о Закони баши шпионажа адалеа со дена сине е манушенге акава забранимо лил.

И Ема хем о пхраља сине прогласиме кај тане крива хем сине осудиме ко трин берш затвор. Откеда сине одбиме са ленгере жалбе, бичхалде сине ко затвор ко 17 мај 1920 берш. Ама, о буќа сигате менинѓе пе ко пошукар.

Ко 20 јуни 1920 берш, о пхрал Ратерфорд раскажинѓа ленгоро случај ко јекх конгрес ко Сан Франциско. О присутна, кола со сине шокириме кеда шунѓе сар постапинѓа пе акале христијаненцар, сложинѓе пе те бичхалел пе телеграма џи ко претседатели таро САД. Ола пишинѓе: „Амен сием увериме кај и госпоѓа Мартин тани неправедно обвиними кај пхагља о Закони баши шпионажа... Адава со о државна властија злоупотребинѓе пли положба те шај те астарен ла ки стапица, а пало адава те обвининен ла те шај те чхивен ла ко затвор тано лаџаво хем нечесно“.

Одма о јавер диве, о претседатели Вудро Вилсон поништинѓа и казна е пхењакири Мартин хем е пхраленгири Хам, Соненбург хем Стивенс. Аѓаар ало о крајо баши адаја неправедно осуда.

Ко крајо таро 1920 берш, е Истражувачен е Библијакере сине лен бут причине те овен бахтале. Ко главно седиште и бути бајрола сине са повише хем повише, а о чачутне христијања, сар никогаш англедер, објавинена сине кај е Девлескоро Царство тано решение башо манушикане проблемија (Мат. 24:14). Ко 1921 берш, о чачипе башо Царство понадари да вакерела пе сине ки панда побари мера.