1. Соске бут мануша тане буниме?

АВДИВЕ иси бут религие со вакерена кај тане христијанска хем кај обожавинена е Девле ко исправно начин. Адалеске на сием изненадиме со бут мануша тане буниме! Ола пучена пе: Дали иси само јекх чачутни религија или са о религие тане прифатлива е Девлеске? Дали лично сием увериме кај сар е Јеховаскере сведокија сикаваја о чачипе, хем кај амаро обожавибе тано о единствено начин со прифатинела ле о Јехова? Шај ли чаче те ова сигурна ко адава? Те дикха акана о јасна доказија.

2. Спрема 1. Солуњаните 1:5, соске о Павле сине уверимо кај аракхља о чачипе?

² О Павле сине бут уверимо кај аракхља о чачипе. (Читин 1. Солуњаните 1:5.) Лескоро верување на темелинела пе сине ко чувствија, него ов хор проучинела сине е Девлескоро Лафи. Ов верујнела сине кај „цело лил авела таро Девел“ (2. Тим. 3:16). Хем со дознајнѓа? Ко списија о Павле аракхља јасна доказија кај о Исус сине о ветимо Месија, доказија со о еврејска религиозна водачија отфрлинѓе. Акала лицемерна водачија вакерена сине кај сикавена е манушен о чачипе башо Девел, а уствари керена сине буќа со о Девел мрзинела лен (Тит 1:16). Различно лендар, о Павле на биринела сине ко кола делија таро е Девлескоро Лафи ка верујнел. Ов сине спремно те сикавел хем „целосно те керел е Девлескири волја“ (Дела 20:27).

3. Дали ваљани те овел амен о одговорија ко са о пучиба те шај те ова цврсто увериме? (Дикх исто аѓаар и рамка „ Е Јеховаскере делија хем мисле — ’добором бут со нашти те гејнен пе‘“.)

 ³ Несаве мислинена кај и чачутни религија мора те одговоринел ко са о пучиба, чак ко адала пучиба коленге со нане одговор ки Библија. Дали шај те очекујна нешто асавко? Те дикха е Павлескоро пример. Ов поттикнинѓа е христијанен те „испитинен са“ те шај те уверинен пе кај адава тано чаче, ама ов исто аѓаар признајнѓа кај иси бут буќа со ов на хаљола лен сине (1. Сол. 5:21). Ов вакерѓа кај на џанаја са „соске акана дикхаја лико ки ајна која со на дела јасно слика“ (1. Кор. 13:9, 12). О Павле на халило са хем амен да на хаљоваја са. Ама ов халило о основна чачипе башо Јехова. Ов џанела сине доволно те шај те овел уверимо кај аракхља о чачипе!

4. Сар шај те ова панда поувериме кај амен аракхлем о чачипе, хем со ка дикха башо чачутне христијања?

⁴ Јекх начин сар шај те ова панда поувериме кај аракхлем о чачипе тано ако спорединаја е Исусескоро обожавибе адалеа со керена е Јеховаскере сведокија авдиве. Ки акаја статија, ка дикха кај о чачутне христијања 1) отфрлинена о идолопоклонство, 2) поштујнена е Јеховаскоро анав, 3) мангена о чачипе хем 4) вилестар мангена пе.

5. Со сикљоваја таро Исус башо адава сар ваљани те обожавина е Девле, хем сар шај те применина адава со ов сикавѓа амен?

⁵ Адалеске со о Исус бут мангела е Јехова, сар ко небо аѓаар ки Пхув, обожавинела сине само ле (Лука 4:8). Ов сикавѓа пле следбеникон те керен о исто. Ни о Исус ни лескере верна ученикија на користинѓе ликија ко пумаро обожавибе. Адалеске со о Девел тано духо, никој нашти те керел нешто со личинела сар лесте (Иса. 46:5). Ама со  ако некој керела ликија таро мануша со мислинела кај тане светција хем молинела пе ленге? Ки дујто таро деш заповедија о Јехова вакерѓа: „Ма кер туке резбимо лико ни било со јавер со личинела сар адава со иси упре ко небо или теле ки пхув. На смејнеа те клањине тут ленге“ (2. Мој. 20:4, 5). Окола со мангена те керен е Девлескири волја хаљовена кај ов на мангела ола те обожавинен јавере идолен.

6. Пало каскоро пример џана е Јеховаскере сведокија авдиве кеда керела пе лафи башо обожавибе?

⁶ О историчарија вакерена кај о прва христијања обожавинена сине само е Девле. На пример, о лил Историја е христијанско црквакири вакерела кај о прва христијања на би прифатинена сине и идеја те користинен пе ликија ко тхана обожавибаске. Авдиве, е Јеховаскере сведокија џана пало пример е христијаненгоро таро прво веко. Амен на молинаја амен англо ликија таро „светција“ или ангелија, на молинаја амен чак ни е Исусеске. На поздравинаја о знаме хем на кераја ништо со ка сикавел кај обожавинаја било сави држава. Бизи разлика сар ка реагиринен о јавера, амен сием одлучна те шуна е Исусескере лафија: „Е Јехова тле Девле обожавин ле хем само леске служин“ (Мат. 4:10).

7. Кола разлике иси машкар е Јеховаскере сведокија хем о јавера религие?

⁷ Авдиве несаве религиозна водачија тане позната или бут влијателна, адалеске бут мануша мангена те слединен лен. Ола тане добором воодушевиме лендар со дикхена ки ленде сар девела. Џана ко ленгере цркве, кинена ленгере лила, хем дена бут паре ленге или е организациенге кола со ола поддржинена лен. Несаве верујнена ко секова лафи со ка вакерен. Ола тане добором воодушевиме лендар сар ка пхене дикхена е Исусе англи песте. Ама окола со обожавинена е Јехова ко исправно начин на џана пало мануша. Иако поштујнаја околен со предводинена, амен прифатинаја адава со о Исус сикавѓа амен: „Сарине тумен сиен пхраља“ (Мат. 23:8-10). На обожавинаја е манушен, бизи разлика дали тане религиозна водачија или политичка владетелија. Хем на поддржинаја ленгере активностија хем целија. Наместо адава, амен сием неутрална хем одвојме таро свето. Ко са акава амен сием бут поразлична таро са о јавера религие со вакерена кај тане христијанска (Јован 18:36).

8. Котар џанаја кај о Јехова мангела лескоро анав те овел прославимо хем сарине те џанен ле?

⁸ Ки јекх прилика о Исус молинѓа пе: „Мо Дад прославин тло анав“. О јехова лично одговоринѓа таро небо ки адаја молитва хем ветинѓа кај ка прославинел пло анав (Јован 12:28). Џикоте сине ки Пхув, о Исус прославинѓа пле Дадескоро анав (Јован 17:26). Адалеске, разумно тано те очекујнел пе кај е чачутне христијаненге тано чест те користинен е Девлескоро анав хем те вакерен ле е јаверенге.

9. Сар о христијања таро прво веко сикавѓе кај поштујнена е Девлескоро анав?

⁹ Ко прво веко а.е., кратко откеда сине кердо о христијанско собрание, о Јехова „почминѓа те кхедел манушен таро јавера народија со ка пхиравен лескоро анав“ (Дела 15:14). Адале христијаненге сине бари предност со шај сине те користинен е Девлескоро анав хем те вакерен ле е јаверенге. Ола користинена сине е Девлескоро анав ки служба хем кеда пишинена сине о библиска лила. * Аѓаар, ола сикавѓе кај  тане народо башо е Девлескоро анав (Дела 2:14, 21).

10. Саве доказија иси кај е Јеховаскере сведокија тане народо башо е Јеховаскоро анав?

¹⁰ Дали е Јеховаскере сведокија тане народо башо е Јеховаскоро анав? Те дикха о доказија. Авдиве бут религиозна водачија керѓе са само те шај те гаравен е Девлескоро лично анав. Ола цидинѓе ле таро пумаре библиска преводија, а ко несаве случаија забранинѓе те користинел пе ко ленгере цркве. * Јасно тано кај само е Јеховаскере сведокија поштујнена е Девлескоро анав сар со ваљани. Амен највише кераја е јаверенцар лафи башо е Девлескоро анав тари било која јавер религиозно група. Адалеске, даја амендар са, те шај те живина спрема амаро анав — Јеховаскере сведокија (Иса. 43:10-12). Печатинѓем повише таро 240 милиоња примерокија таро Превод Нов свет е Библијакоро, кова со користинела е Јеховаскоро анав ко тхана котар со о јавера преводија цидинѓе ле. Исто аѓаар, иси амен библиска публикацие кола со користинена е Јеховаскоро анав ко повише таро милја чхибја.

11. Сар о христијања таро прво веко сикавѓе кај мангена о чачипе?

¹¹ О Исус мангела сине о чачипе, јавере лафенцар о чачипе башо Девел хем баши лескири намера. Ов живинѓа спрема адава  чачипе, хем вакерѓа ле е јаверенге (Јован 18:37). Е Исусескере следбеникија исто аѓаар бут мангле о чачипе (Јован 4:23, 24). Уствари, о апостол Петар башо христијанство вакерѓа кај тано о „друмо е чачипаскоро“ (2. Пет. 2:2). Адалеске со бут мангена сине о чачипе, о христијања таро прво веко отфрлинѓе о религиозна идее, традицие хем о лично мислење кола со на сине спрема о чачипе (Кол. 2:8). Слично, авдиве о чачутне христијања трудинена пе те живинен спрема о чачипе аѓаар со пазинена ленгоро верување хем о начин сар живинена те темелинел пе ко е Девлескоро Лафи (3. Јов. 3, 4).

12. Со случинела пе кеда о водечко тело хаљовела кај ваљани те керел промене ко несаво хаљојбе, хем соске керела акала промене?

¹² Е Јеховаскере сведокија на вакерена кај ола секогаш целосно хаљовена са тари Библија. Понекогаш, керѓе грешке ко начин сар објаснинѓе несаво библиско сикљојбе или ко начин сар организиринѓе о собранија. Ама адава на ваљани те изненадинел амен. И Библија вакерела кај лескоро народо ка хаљол пошукар о чачипе сар со ка накхел о време (Кол. 1:9, 10). О Јехова откринела о чачипе хари похари хем ваљани стрпливо те аџикера и светлина е чачипаскири те овел са посилно (Изр. 4:18). Кеда о водечко тело хаљовела кај ваљани те керел пе промена ко несаво хаљојбе или ко начин сар керена пе сине несаве буќа, ола одма керена адаја промена. Бут цркве авдиве керена промене ко пле сикљојба те шај те угодинен е манушенге хем те овен попаше е светоја. Ама е Јеховаскере сведокија керена промене те шај те овен попаше е Девлеа хем те обожавинен ле исто сар со обожавинѓа ле о Исус (Јак. 4:4). Амен на кераја промене адалеске со о мануша таро свето менинѓе пло стави, него адалеске со хаљоваја пошукар и Библија. Амен мангаја о чачипе! (1. Сол. 2:3, 4).

13. Која тани и најважно особина е чачутне христијаненгири, хем сар сикавена ла е Јеховаскере сведокија авдиве?

¹³ Таро са о особине со сине е христијанен ко прво веко, и најпенџарди особина со сине лен сине о мангипе. О Исус вакерѓа: „Таро адава сарине ка џанен кај сиен мле ученикија, ако иси тумен мангипе машкар туменде“ (Јован 13:34, 35). Авдиве е Јеховаскере сведокија таро цело свето уживинена ко чачутно мангипе хем јекхипе. Нијекх јавер организација нане сар аменде добором паше. Амен сием сар јекх фамилија, иако аваја тари различно култура или раса. Адава дикхела пе ко амаре конгресија хем состанокија. Акава поможинела аменге панда повише те ова увериме кај обожавинаја е Јехова ко јекх прифатливо начин.

14. Спрема Колошаните 3:12-14, кова тано јекх важно начин сар шај те сикава баро мангипе јекх јекхеске?

¹⁴ И Библија поттикнинела амен: „Те овел тумен баро мангипе јекх јекхеске“ (1. Пет. 4:8). Јекх начин сар сикаваја асавко мангипе тано аѓаар со простинаја аменге хем трпинаја амен јекх јекхеа. Исто аѓаар, родаја прилике те сикава дарежливост хем гостопримливост сариненге ко собрание, чак околенге кола со шај поврединѓе амен. (Читин Колошаните 3:12-14.) Асавко мангипе тано чаче о најбаро доказ башо чачутне христијања.

15. Ко саве јавера начинија амаро обожавибе тано сар е прва христијаненгоро?

¹⁵ Ко јавера да начинија амен обожавинаја е Јехова сар о христијања таро прво веко.  На пример, организириме сием ко слично начин сар адала христијања, иси амен покраинска надгледникија, старешине хем слуга помошникија (Фил. 1:1; Тит 1:5). Хем сар ленде, амен да поштујнаја е Јеховаскере законија башо секс хем брако, баши светост е ратескири хем мангаја те заштитина о собрание таро грешникија со на каинена пе (Дела 15:28, 29; 1. Кор. 5:11-13; 6:9, 10; Евр. 13:4).

16. Со сикљоваја таро лафија со аракхљовена ко Ефешаните 4:4-6?

¹⁶ О Исус вакерѓа кај бут џене ка вакерен кај тане лескере ученикија, ама нане сарине те овен чачутне христијања (Мат. 7:21-23). И Библија исто аѓаар вакерела кај ко последна диве бут џене само лафенцар ка вакерен кај „дарана таро Девел“ (2. Тим. 3:1, 5). Ама е Девлескоро Лафи јасно вакерела аменге кај иси само „јекх вера“ која сој прифатими таро Девел. (Читин Ефешаните 4:4-6.)

17. Кој џала пало Исус авдиве хем живинела спрема и чачутни вера?

¹⁷ Кој живинела спрема и чачутни вера авдиве? Дикхлем о доказија. Керѓем лафи башо пример обожавибаске кова со мукхља ле о Исус хем пало кова со геле о прва христијања. Иси само јекх одговор, адала тане е Јеховаскере сведокија. Која бари чест иси амен со сием дело таро е Јеховаскоро народо, хем со џанаја о чачипе башо Јехова хем баши лескири намера. Адалеске, понадари да ов цврсто уверимо кај аракхљан о чачипе.