Секова берш бут скапоцена бакхре палем иранена пе ко собрание. Замислин само кобор тано баро о „бахталипе ко небо“ кеда секова јекх иранела пе (Лука 15:7, 10). Ако палем иранѓан тут шај те ове сигурно кај о Исус, о ангелија хем о Јехова тане бут бахтале башо адава. Ама, џикоте палем градинеа тло амалипе е Јеховаја, шај те овен тут несаве предизвикија. Кола тане несаве таро адала предизвикија, хем со шај те поможинел туке?

Буте џенен иси лен негативна чувствија чак откеда иранѓе пе ко собрание. Шај хаљовеа сар осетинела пе сине о цари о Давид. Иако сине простиме лескере гревија, ов вакерѓа: „Мле гревија леле мли сила“ (Пс. 40:12; 65:3). Откеда некој ка иранел пе ко Јехова, ов шај понадари да бершенцар те осетинел пе криво хем те лаџал. И Изабел, сине исклучими повише таро 20 берш. * Ој вакерела: „Бут сине манге пхаро те прифатинав кај о Јехова шај те простинел манге“. Ако обесхрабринеа тут шај палем духовно те пере (Изр. 24:10). Ма дозволин адава те случинел пе туке.

А јавера мислинена кај нашти те керен адава со ваљани те шај палем те овен амала е Јеховаја. Откеда сине палем ирамо, о Антон вакерѓа: „Мислинава сине кај бистерѓум со значинела те живине сар е Јеховаскоро сведоко“. Адалеске со осетинена пе аѓаар, несаве лендар на вклучинена пе ко са о духовна активностија.

На пример, кеда некаскоро кхер тано бут оштетимо тари јекх бура, ов шај те обесхрабринел пе кеда ка размислинел башо адава кобор бути аџикерела ле хем кобор време ваљани те трошинел те шај палем те керел о кхер. Слично, ако тло амалипе е Јеховаја сине оштетимо адалеске со керѓан несаво сериозно грево, шај мислинеа кај ваљани те трошине бут време хем  трудо те шај палем те градине тли духовност. Ама на сиан коркори, иси тут помош!

О Јехова вакерела: „Авен те расчистина о буќа машкар аменде“ (Иса. 1:18). Ту више бут трудинѓан тут, те шај те средине о буќа. Хем о Јехова бут мангела тут башо адава. Размислин само, адалеске со иранѓан тут ко Јехова, ов шај те користинел тут сар пример те шај те докажинел кај о Сатана тано ховавно (Изр. 27:11).

Адалеа со иранѓан тут, ту више уљан попаше е Јеховаја хем ов ветинела туке кај ов да ка овел туја паше (Јак. 4:8). Шукар тано адава со јавера шај те дикхен кај палем иранѓан тут ко собрание. Ама, ваљани те кере нешто повише. Ваљани понадари да те бајраре тло мангипе башо тло Дад хем амал, о Јехова. Сар шај те кере адава?

Трудин тут те чхиве туке разумна целија. Веројатно тло духовно темели — о основна буќа со сиклиљан лен башо Јехова хем баши иднина — нане оштетимо. Ама, ка ваљани палем те градине шукар христијанска навике машкар кола сој, редовно те џа ки служба, ко состанокија хем те дружине тут е пхраленцар хем е пхењенцар. Размислин башо акала целија.

Кер редовно лафи е Јеховаја. То Дад хаљовела кај ако повише време осетинеа тут криво, ка овел туке пхаро те молине тут леске (Рим. 8:26). Сепак, „истрајн ки молитва“ хем вакер е Јеховаске кај бут мангеа те ове лескоро амал (Рим. 12:12). О Андреј вакерела: „Осетинава ман сине бут криво хем лаџава сине, ама пали секоја молитва сине манге пошукар хем сине ман андруно мир“. Ако на џанеа башо со те молине тут, размислин башо молитве со вакерѓа лен о цари о Давид кеда каинѓа пе. Ола аракхљовена ко Псалм 51 хем 65.

Проучин редовно и Библија. Акава ка хранинел тут духовно хем ка поможинел туке те бајраре тло мангипе спрема о Јехова (Пс. 19:7-11). О Фелипе вакерела: „Главно бути соске пељум духовно хем разочаринѓум е Јехова, сине адаја со на сине ман духовна навике. На мангљум те керав и исто грешка. Адалеске одлучинѓум те аракхав мли духовност аѓаар со редовно ка проучинав“. Ту да шај те кере о исто. Ако ваљани туке помош баши несави тема проучибаске, шај те пуче несаве зрело амале те поможинел туке.

Градин палем тло амалипе е пхраленцар хем е пхењенцар. Несаве со иранена пе ко собрание дарана кај о јавера нане те дикхен шукар ки ленде. И Лариса признајнела: „Бут лаџава сине, осетинава ман сине сар те пхене поврединѓум хем разочаринѓум е пхрален хем е пхењен. Аѓаар осетинава ман сине бут време“. Ов уверимо кај о старешине хем о јавера мангена те поможинен туке палем те ове духовно јако. (Дикх и рамка „ Со шај о старешине те керен?“) Ленге тано бут мило со иранѓан тут хем ола мангена те ове бахтало (Изр. 17:17).

Сар шај те ове попаше е собраниеа? Џа ко са о состанокија хем редовно учествујн ки служба. Сар ка поможинел туке акава? О Феликс вакерѓа: „О собрание сине бахтало кеда иранѓум ман. Осетинава ман сине ценимо. Сарине ола поможинѓе манге палем те овав дело таро собрание, те дикхав кај о Јехова простинѓа манге хем те дикхав англе“. (Дикх и рамка „ Со шај ту те кере?“)

О Сатана понадари да ка керел туке буре ко живото те шај те пељарел тут џикоте палем градинеа тло амалипе е Јеховаја (Лука 4:13). Ов спремно аѓаар со панда акана ка кере позорало тло духовно кхер.

Пле бакхренге о Јехова ветинѓа: „Ка родав околен со нашавдиле, ка иранав околен со геле дур, ка пхандав о ране околенгере сој повредиме хем ка дав сила околенге сој слаба“ (Езек. 34:16). О Јехова поможинѓа буте џененге со пеле духовно. Ов сигурно кај ов туке да мангела те поможинел понадари да те кере са позорало тло амалипе леа.