1. Со шај авела аменге ки годи кеда размислинаја баши некасте сој милостиво?

КЕДА размислинаја башо несаво милостиво мануш, шај мислинаја некасте сој љубезно, сочувствително хем дарежливо. Исто аѓаар шај авела аменге ки годи е Исусескири споредба башо милостиво Самарјани. Акава мануш со сине тари јавер нација „сикавѓа милост“ е Еврееске со сине нападимо таро чора. Е Самарјанеске „пело жал“ башо акава Евреи хем љубезно грижинѓа пе леске (Лука 10:29-37). Акаја споредба истакнинела јекх бут шужи особина амаре Девлескири — и милост. Ој тани само јекх дело таро е Девлескоро мангипе, хем ов сикавела ла аменге ко бут начинија секова диве.

2. Ко саво јавер начин шај те сикавел пе милост?

² Иси панда јекх начин сар шај те сикавел пе милост. Јекх милостиво мануш шај те одлучинел те на казнинел некас со ваљани те овел казнимо. О Јехова посебно ко акава начин сикавѓа аменге милост. О псалмисти вакерѓа: „На постапинела аменцар спрема амаре гревија“ (Пс. 103:10). Ама ко јавера ситуацие о Јехова строго укоринела околе со грешинѓа.

3. Башо кола пучиба ка добина одговор ки акаја статија?

³ Ки акаја статија, ка одговорина ко трин пучиба: Соске о Јехова сикавела милост? Шај ли те дел пе строго укор а сепак те сикавел пе милост? Хем со ка поможинел аменге те сикава милост? Те дикха сар е Девлескоро лафи одговоринела ко акала пучиба.

4. Соске о Јехова сикавела милост?

⁴ О Јехова мангела те овел милостиво. О апостол Павле пишинѓа кај о Девел тано „барвало ки милост“. Ко акава  контекст, о Павле керела сине лафи кај о Девел тано милостиво соске дела небесно надеж пле несовршена слугенге, сој тане помазиме (Еф. 2:4-7). Ама о Јехова на сикавела милост само е помазаниконге. О псалмисти о Давид пишинѓа: „О Јехова тано шукар сариненцар, хем лескири милост дикхела пе ко са со керѓа“ (Пс. 145:9). Адалеске со о Јехова мангела е манушен, ов сикавела милост секогаш кеда дикхела кај иси причина те керел адава.

5. Котар џанела сине о Исус кај о Јехова тано милостиво?

⁵ Никој на џанела пошукар таро Исус кобор о Јехова мангела те сикавел милост. Ола сине бут време заедно ко небо англедер о Исус те авел теле ки Пхув (Изр. 8:30, 31). Ко бут ситуацие, ов дикхља сар лескоро Дад сикавѓа милост е грешна манушенге (Пс. 78:37-42). Ов бут пути керела сине лафи баши акаја шужи особина со иси лескере Даде.

6. Сави слика денѓа амен о Исус баши пле Дадескири милост?

⁶ Сар со спомнинѓем ки англуни статија, о Исус користинѓа јекх споредба башо јекх бунтовно чхаво, те шај те дел амен јекх слика башо адава кобор бут о Јехова мангела те сикавел милост. Ки споредба, о чхаво гело песке кхералдан хем трошинѓа пло имот аѓаар со живинѓа неморално (Лука 15:13). Пало несаво време, понизно халило пли грешка, каинѓа пе башо пле постапке хем иранѓа пе кхере. Сар реагиринѓа лескоро дад? О чхаво шај сине одма те дикхел пле дадескири реакција. О Исус вакерѓа: „Џикоте [о чхаво] панда сине дур, лескоро дад дикхља ле хем пело леске жал, прастандило, гушинѓа ле хем чуминѓа ле“. О дад на понижинѓа пле чхаве. Наместо адава, ов сикавѓа леске милост хем простинѓа леске хем палем приминѓа ле кхере. О бунтовно чхаво бут грешинѓа, ама лескоро дад простинѓа леске соске ов каинѓа пе. О милостиво дад тари споредба претставинела е Јехова. Аѓаар, о Исус ко јекх посебно начин сикавѓа пле Дадескири спремност те простинел е грешниконге кола со искрено каинена пе (Лука 15:17-24).

7. Сар е Јеховаскири милост сикавела кај ов тано бут мудро?

⁷ О Јехова сикавела милост адалеске со ов тано најмудро. Е Јеховаскири мудрост нане несави шудри особина, бизо чувствија. Наместо адава, и Библија вакерела кај „и мудрост со авела упралдан“, тани „пхерди милост хем шукар буќа“ (Јак. 3:17). Сар  јекх дад пхердо мангипаја, о Јехова џанела кај лескере чхавен ка овел лен корист тари лескири милост (Пс. 103:13; Иса. 49:15). И милост со авела таро Девел дела лен надеж баши иднина иако тане несовршена. Адалеске, е Јеховаскири бари мудрост поттикнинела ле те сикавел милост секогаш кеда дикхела кај иси причина те керел адава. Ама, о Јехова исто аѓаар џанела кеда ма те сикавел милост. Адалеске сој тано мудро, о Јехова никогаш на накхавела и граница тари милост ки попустливост.

8. Со мора некогаш те керел пе, хем соске?

⁸ Те пхена кај несаво слуга е Девлескоро намерно одлучинела те живинел неморално живото. Сар ваљани амен те постапина? О Павле водимо таро Девел вакерѓа: „Чхинавен те дружинен тумен леа“ (1. Кор. 5:11). О грешникија со на каинена пе тане исклучиме таро собрание. Адава мора те керел пе, те шај те заштитинел пе о собрание хем те икерен пе е Јеховаскере света мерилија. Ама, несаве шај те мислинен кај ако некој тано исклучимо о Девел на сикавѓа леске милост. Дали адава тано точно? Те дикха.

9-10. Сар со пишинела ко Евреите 12:5, 6, соске шај те вакера кај сикавела пе милост кеда исклучинела пе некас? Вакер пример.

⁹ Кеда ко состанок известинела пе кај некој со мангаја ле „нане више јекх таро е Јеховаскере сведокија“, тегани амен сием бут тажна. Шај пучаја амен, дали мора сине те исклучинен ле? Дали е исклучибаја чаче сикавела пе милост? Оја. Кеда некаске дела пе укор адалеа сикавела пе мудрост, милост хем мангипе (Изр. 13:24). Дали шај о исклучибе те поможинел некаске те менинел пе хем те каинел пе? Оја шај. Бут џене со керена сине сериозна гревија, вакерена кај о исклучибе поможинѓа ленге те хаљовен кобор бут грешинѓе, те каинен пе, те менинен пло начин сар однесинена пе хем те иранен пе ко Јехова. (Читин Евреите 12:5, 6.)

¹⁰ Те дикха јекх пример. Јекх пастири приметинела кај јекх таро лескере бакхре насвалило. Ов џанела кај те шај те сасљарел е бакхре таро адава насвалипе, ваљани те одвојнел ле таро јавера бакхре. Ама, о бакхре нане животне со мангена те овен коркори. Дали акава значинела кај о пастири тано претерано строго хем лошно со одвојнела акале бакхре? Сигурно кај на. Ов џанела кај ако мукхела е насвале бакхре те овел машкар о јавера бакхре, тегани ола да ка насваљовен. Адалеа со одвојнела ле, ов заштитинела цело стадо. (Споредин 3. Мојсеева 13:3, 4.)

11. а) Ко саве начинија шај јекх исклучимо те овел споредимо јекхе насвале бакхреа? б) Со шај о исклучиме те керен хем сави помош шај те добинен?

¹¹ Кеда некој тано исклучимо, шај те споредина ле јекхе насвале бакхреа. Ов тано насвало ки духовна смисла (Јак. 5:14). Исто сар несаве физичка насвалипа со шај те овен бут заразна, слично о духовно насвалипа шај те овел бут заразно. Адалеске, ко несаве случаија окова сој духовно насвало мора те одвојнел пе, јавере лафенцар те овел исклучимо таро собрание. Асавко укор сикавела е Јеховаскоро мангипе спрема окола сој верна таро лескоро стадо, хем шај те поможинел е грешникоске те хаљол по грево хем те каинел пе. Џикоте тано исклучимо, шај те овел присутно ко состанокија, коте со шај духовно те хранинел пе хем палем те керел пли вера зорали. Ов понадари да шај те добинел литература која со шај те проучинел ла хем те дикхел о JW Broadcasting^®. Хем кеда о старешине ка дикхен кај ов керела промене, ола шај те ден ле совет хем те поможинен  леске те овел палем е Јеховаскоро сведоко. *

12. Сар шај о старешине те сикавен мангипе хем милост е грешникоске кова со на каинела пе?

¹² Важно тано те на бистра кај само окола со на каинена пе тане исклучиме. О старешине хаљовена кај акаја тани сериозно бути, хем кај мора шукар те размислинен англедер те одлучинен те исклучинен некас. Ола џанена кај о Јехова укоринела „добором кобор со ваљани“ (Ерем. 30:11). Ола мангена пумаре пхрален, хем на мангена те керен нешто колеа со ка анен ленге духовно штета. Ама, понекогаш сикавела пе мангипе хем милост аѓаар со ка исклучинен е грешнико.

13. Соске јекх христијани таро Коринт мора сине те овел исклучимо?

¹³ Размислин сар постапинѓа о Павле јекхе грешникоја таро прво веко со на каинѓа пе. Јекх христијани таро Коринт живинела сине неморално пле дадескере ромњаја. Адава сине бут одвратно! О Павле џанља кај о Јехова англедер вакерѓа е Израелцонге: „Окова мануш со иси ле однос пе дадескере ромњаја, лаџакерела пе даде. О солдуј џене мора те овен мударде, коркори тане крива башо пумаро мерибе“ (3. Мој. 20:11). Џанѓола пе, о Павле нашти сине те вакерел е собраниеске те мударен адале мануше. Ама ов вакерѓа ленге те исклучинен ле. Адале манушескере неморална постапке влијајнѓе упро јавера таро собрание. Несаве лендар чак ни на дикхена сине ко адава сар сериозно грево! (1. Кор. 5:1, 2, 13).

14. Сар сикавѓа о Павле милост спрема о исклучимо мануш таро Коринт, хем соске? (2. Коринќаните 2:5-8, 11)

¹⁴ Несаво време покасно, о Павле шунѓа кај акава мануш керѓа баре промене. Ов чаче каинела пе сине! Иако акава мануш анѓа лаџ упро собрание, о Павле вакерѓа е старешиненге кај на мангела те овел леа претерано строго. Ов вакерѓа ленге: „Спремно простинен леске хем утешинен ле“. Приметин соске о Павле вакерѓа те керен адава: „Те шај те на перавел ле и бут бари жал“. О Павле жалинѓа акале мануше со каинѓа пе. Ов на мангља те дикхел акале мануше добором обесхрабримо тари жал башо адава со керѓа со ка чхинавел те родел те простинел пе леске. (Читин 2. Коринќаните 2:5-8, 11.)

15. Сар шај о старешине те овен строга ама сепак милостива?

 ¹⁵ Слично сар о Јехова, о старешине мангена те сикавен милост. Ола дена строго укор кеда адава тано потребно ама исто аѓаар сикавена милост секогаш кеда шај. Ако о старешине ни хари на укоринена околен со грешинена, тегани адава нане милост, него попустливост. Ама дали само о старешине ваљани те сикавен милост?

16. Спрема Изреки 21:13, сар ка постапинел о Јехова околенцар со на сикавена милост?

¹⁶ Са о христијања трудинена пе те овен милостива сар о Јехова. Соске? Јекх причина тани адаја со о Јехова нане те шунел околен со на сикавена милост е јаверенге. (Читин Изреки 21:13.) Никој амендар на мангела о Јехова те на шунел лескере молитве. Адалеске избегинаја те ова бут строга хем те на сикава милост. Наместо те ирана амаро думо кеда некој тано ки дукх, амен мора секогаш те ова спремна те шуна кеда о „чороло ка жалинел пе“. Слично аѓаар, трудинаја амен те применина и поука таро акала лафија: „Окова со нане милостиво спрема о јавера ка судинел пе леске бизи милост“ (Јак. 2:13). Ако понизно признајнаја кобор бут ваљани аменге милост, побари тани и веројатност кај ка сикава милост. Посебно мангаја те сикава милост кеда окола со грешинѓе каинена пе хем иранена пе ко собрание.

17. Сар о цари о Давид вилестар сикавѓа милост?

¹⁷ О библиска примерија шај те поможинен аменге те сикава милост хем те избегина те ова претерано строга. На пример, размислин башо цари о Давид. Ов бут пути вилестар сикавѓа милост. Иако о Саул мангља те мударел ле, о Давид сине милостиво спрема е Девлескоро помазимо цари. Ов никогаш на мангља те иранел леске лошнипаја или те повредине ле (1. Сам. 24:9-12, 18, 19).

18-19. Ко кола дуј ситуацие о Давид на сикавѓа милост?

¹⁸ Ама, о Давид на сине секогаш милостиво. На пример, о Навал кова со сине грубо мануш, вреџинѓа е Давиде хем на мангља те дел ле хајбаске хем лескере манушенге. Тегани о Давид бут хољанѓа хем мангља те мударел ле хем са е муршен таро лескоро кхер. Ама е Навалескири ромни, која со сине љубезно хем стрпливо, сигате реагиринѓа хем аѓаар о Давид на мударѓа е Навале хем лескере манушен (1. Сам. 25:9-22, 32-35).

¹⁹ Ки јекх јавер прилика, о пророко о Натан вакерѓа е Давидеске башо јекх барвало мануш кова со чорѓа пле чороле комшијаскере бакхре коле со бут мангела ле сине. Нервозно башо адава со шунѓа, о Давид вакерѓа: „Сар сој џивдо о Јехова, о мануш со керѓа адава заслужинела те мерел!“ (2. Сам. 12:1-6). О Давид џанела сине кај е Мојсеескоро закони вакерела ако некој чорѓа јекх бакхро, ваљани сине те иранел штар бакхре (2. Мој. 22:1). Ама дали заслужинела сине те овел мудардо? Адаја би овела сине бут строго  казна. О Натан уствари вакерѓа акаја парамис те шај о Давид те хаљовел кај ов керѓа побаре гревија. Хем акаја парамис сикавѓа кај о Јехова сине бут по милостиво спрема о Давид, него о Давид спрема о чор тари е Натанескири споредба (2. Сам. 12:7-13).

20. Со шај те сикљова таро е Давидескоро пример?

²⁰ Приметин кај кеда о Давид сине хољамо, ов мислинѓа кај о Навал хем са о мурша таро лескоро кхер заслужинѓе те мерен. А покасно, сине спремно те вакерел кај о барвало мануш тари е Натанескири споредба ваљани те овел мудардо. Ки акаја дујто ситуација шај пучаја амен, соске о Давид кова со обично сине љубезно мануш, осудинѓа добором строго е барвале мануше тари е Натанескири споредба? Размислин само со случинела пе сине е Давидеске ко адава периоди. Ле бут мучинела ле сине и совест. Ако некас иси строго хем осудувачко стави, адава тано знако кај нане ки шукар духовно состојба. О Исус јасно вакерѓа пле следбениконге: „Ма судинен те шај ма те судинел пе туменге, соске саве судоја судинена аѓаар ка судинел пе туменге да“ (Мат. 7:1, 2). Адалеске, те пазина те на ова претерано строга хем те трудина амен те ова „барвале ки милост“, сар амаро Девел.

21-22. Ко саве начинија шај те сикава милост?

²¹ Те ове милостиво на значинела само те овел туке жал е јаверенге, него адава значинела те кере да нешто е јаверенге те шај те поможине ленге. Адалеске, сарине амен шај те размислина саве потребе иси амаре фамилија, ко собрание хем е манушен сој околу аменде. Сигурно иси бут прилике коте со шај те сикава милост! Дали некаске ваљани утеха? Шај ли практично те поможина аѓаар со ка ингара хајбаске или те размислина со јавер шај те кера? Дали некаске со иранѓа пе палем ко собрание, ваљани амал кова со ка охрабринел ле? Шај ли те кера јаверенцар лафи башо шукар хабери кова со дела утеха? Акава тано јекх таро најшукар начинија сар шај те сикава милост сариненге касаја со аваја ко контакт (Јов 29:12, 13; Рим. 10:14, 15; Јак. 1:27).

²² Ако сием свесна башо е јаверенгере потребе, ка приметина кај иси бут прилике околу аменде сар шај те сикава милост. Кеда сикаваја милост, кераја амаре небесно Даде бахтало — о Девел кова сој „барвало ки милост“!