1-2. Која сине и разлика машкар о дуј царија хем башо кола пучиба ка кера лафи?

ТЕ ДОЗНАЈНА нешто повише башо дуј царија кола со живинѓе ко пурано време. Јекх лендар владинела сине упро деш племија ко царство Израел, а о јавер упро дуј племија ко царство Јуда. Иако живинена сине ко различно време, ола керѓе бут слична буќа. О солдуј царија бунинѓе пе против о Јехова хем керѓе о народо те грешинел. О солдуј обожавинена сине ховавне девлен хем солдуј мударѓе буте манушен. Ама, сине јекх разлика машкар акала дуј мануша. Јекх лендар продолжинѓа те керел лошна буќа џи ко крајо таро пло живото, а о јавер каинѓа пе хем сине леске простимо башо страшна буќа со керѓа лен. Кој сине акала мануша?

² Ола сине о Ахав, о цари таро Израел, хем о Манасија, о цари тари Јуда. О разлике со сине машкар акала дуј мануша шај бут те сикавен амен баши јекх важно тема — о каибе (Дела 17:30; Рим. 3:23). Со значинела те каина амен, хем сар шај те сикава ле адава? Ваљани те џана о одговор соске сарине амен мангаја о Јехова те простинел аменге кеда грешинаја. Те шај те открина о одговорија, те дикха саво живото живинѓе акала дуј царија хем со шај те сикљова таро ленгере примерија. Пало адава ка дикха со сикавѓа о Исус башо каибе?

3. Саво цари сине о Ахав?

³ О Ахав сине о ефтато цари упро деш племија таро царство Израел. Ов женинѓа пе е Језавелаја, и чхај е царескири таро Сидон, јекх барвали нација ко север. Акале бракоја и Израелско нација шај барвалили. Ама исто аѓаар акава брако керѓа и нација Израел те грешинел панда повише против о Јехова. Адава сине адалеске со и Језавела обожавинела сине е Ваале, хем ој поттикнинѓа е Ахаве те ширинел акаја  одвратно религија, колате со сине проституција хем жртвујбе е чхавен. Џикоте и Језавела сине царица са е Јеховаскере пророкија сине ки опасност. Ој мударѓа буте џенен лендар (1. Цар. 18:13). А о Ахав керела сине „побаро лошнипе англо е Јеховаскере јакхја него са адала со сине англедер лесте“ (1. Цар. 16:30). О Јехова дикхела сине са со керена сине о Ахав хем и Језавела. Сепак, ов сикавѓа милост хем бичхалѓа е пророко е Илија те шај те поможинел е народоске те керен промене англедер те овел касно. Ама о Ахав хем и Језавела на мангле те шунен.

4. Сави казна сине вакерди е Ахавеске хем сар реагиринѓа ов?

⁴ Пало несаво време, е Јеховаскири стрпливост али више џи ко крајо. Ов бичхалѓа е Илија те вакерел е Ахавеске хем е Језавелаке сар ка казнинел лен. Ленгири цело фамилија ваљани сине те овел мударди. Е Илијаскере лафија бут погодинѓе е Ахаве, хем адалеске акава гордо мануш халило пли грешка хем пело леске жал (1. Цар. 21:19-29).

5-6. Котар џанаја кај о Ахав на каинѓа пе чаче?

⁵ Иако ки адаја прилика о Ахав халило пли грешка хем сине леске жал, лескере постапке пало адава сикавѓе кај ов на каинѓа пе чаче. На трудинѓа пе те чистинел пло царство таро обожавибе е Ваале хем на поттикнинѓа е јаверен те обожавинен е Јехова. Јавера да буќа со керѓа о Ахав сикавѓе кај ов на каинѓа пе чаче.

⁶ Покасно о Ахав викинѓа е царе е Јосафате тари Јуда те џал леа ки војна против о Сиријција. О Јосафат сине шукар цари коле со сине ле доверба ко Јехова, хем ов денѓа предлог прво те пучен јекхе Јеховаскере пророко со ваљани те керен англедер те џан ки војна. Ко почеток о Ахав на мангља те керел адава. Ов вакерѓа: „Иси панда јекх мануш преку касте шај те рода совет таро Јехова, ама ме мрзинава ле соске ов на пророкујнела манге ништо шукар, само лошнипа“. Сепак ола пучле е пророко е Михаија. Хем акава да пути о Михаија пророкујнѓа лошна буќа башо Ахав. Наместо те каинел пе хем те родел таро Јехова те простинел леске. О Ахав чхивѓа е пророко ко затвор (1. Цар. 22:7-9, 23, 27). Иако акава цари успејнѓа те чхивел е Михаија ко затвор, ов нашти сине те чхинавел о пророштво те исполнинел пе. О Ахав сине мудардо ки војна (1. Цар. 22:34-38).

7. Со вакерѓа о Јехова башо Ахав пало лескоро мерибе?

⁷ Откеда о Ахав муло, о Јехова сикавѓа со мислинела сине баши лесте. Кеда о шукар цари о Јосафат иранѓа пе кхере, о Јехова преку о пророко о Јуј вакерѓа леске кај грешинѓа со гело те поможинел е Ахавеске. О пророко вакерѓа: „Ваљани ли те поможине околенге сој лошна хем те манге околен со мрзинена е Јехова?“ (2. Лет. 19:1, 2). Размислин хари, ако о Ахав чаче каинела пе сине сигурно о пророко на би пхенела сине леске кај тано лошно мануш хем кај мрзинела е Јехова. Иако о Ахав сикавѓа кај џинегде сине леске жал ов никогаш чаче на каинѓа пе.

8. Со шај те сикљова башо каибе таро е Ахавескоро пример?

⁸ Со шај те сикљова таро е Ахавескоро пример? Кеда о Илија вакерѓа леске кај лескири фамилија ка овел казними, ко почеток е Ахавеске пело жал. Адава сине шукар. Ама лескере постапке пало адава сикавѓе кај ов ко вило на каинѓа пе. Адалеске, те каине тут значинела кај мора те кере нешто повише него само те вакере кај туке жал башо адава со керѓан. Те дикха јавер пример кова со ка поможинел аменге те хаљова со значинела чаче те каине тут.

9. Саво цари сине о Манасија?

⁹ Отприлика 200 берша покасно, о Манасија уло цари ки Јуда. Ов сине шај панда полошно цари таро Ахав. Ки Библија пишинела: „Ов керела сине бут лошна буќа англо е Јеховаскере јакхја хем аѓаар вреџинела ле сине“ (2. Лет. 33:1-9). О Манасија керѓа жртвеникија е ховавне девленге, чак чхивѓа јекх диреко резбиме ликоја ко е Јеховаскоро храми — веројатно идоли тари јекх паганско божица. Керела сине магие хем дикхела сине со ка овел ки иднина. Ов исто аѓаар „мударѓа буте џенен“ хем „накхавѓа пле чхавен тари јаг“ сар жртва башо ховавне девела (2. Цар. 21:6, 7, 10, 11, 16).

10. Сар казнинѓа о Јехова е Манасија хем сар реагиринѓа ов?

¹⁰ Исто сар о Ахав, о Манасија сине тврдоглаво хем на мангела сине те шунел е Јеховаскоро совет преку лескере пророкија. Ко крајо, о Јехова анѓа е Асирско царескере заповедникон против и Јуда, хем ола астарѓе е Манасија, пханле ле ко дупло бакарна синџирија хем ингарѓе ле ко Вавилон. Џикоте сине ко затвор ко Вавилон, о Манасија веројатно сериозно почминѓа те размислинел башо адава со керѓа. Ов понизно халило пли грешка хем сине леске жал башо адава. Чак керѓа нешто повише. Ов родела сине таро Јехова милост. Уствари, о извештај вакерела кај о Манасија молинела пе сине леске, со сикавела кај керела сине адава повише пути. Акава лошно мануш почминѓа те керел промене. Ов почминѓа те дикхел ко Јехова сар пло Девел хем стално молинела пе сине леске (2. Лет. 33:10-13).

11. Спрема 2. Летописи 33:15, 16, сар сикавѓа о Манасија кај чаче каинѓа пе?

¹¹ Пало несаво време, о Јехова одговоринѓа ко е Манасијаскере молитве. Таро лескере молитве о Јехова дикхља кај ов чаче променинѓа пе. Адалеске ов шунѓа е Манасија кеда родинѓа лестар те простинел леске хем палем дозволинѓа леске те овел цари. О Манасија користинѓа секоја прилика те сикавел кај чаче каинела пе. Ов керѓа адава со о Ахав никогаш на керѓа. Керѓа промене ко пле постапке. Ов боринѓа пле против о ховавно обожавибе хем поттикнинѓа е народо те обожавинел е Јехова. (Читин 2. Летописи 33:15, 16.) Те шај те керел адава, е Манасијаске ваљанѓа храброст хем вера, соске ов бершенцар сине лошно пример пле фамилијаке, пле водаченге хем пле народоске. Ама кеда пхурило, трудинѓа пе те анел ко редо несаве буќа со руминѓа лен. Веројатно шукар влијајнѓа упро пло тикно унуко о Јосија, кова со покасно уло бут шукар цари (2. Цар. 22:1, 2).

12. Со шај те сикљова башо каибе таро Манасија?

¹² Со шај те сикљова таро Манасија? На само со понизно халило пли грешка хем  сине леске жал, него керѓа бут повише таро адава. Молинѓа пе хем родинѓа милост. Променинѓа пле постапке хем бут трудинѓа пе те поправинел и штета која со керѓа ла. Хем денѓа пестар са те обожавинел е Јехова хем те поможинел е јаверенге те керен о исто. Е Манасијаскоро пример дела надеж чак е најлошна грешниконге. Лескоро искуство докажинела кај о Јехова тано „шукар хем спремно те простинел“ (Пс. 86:5). О Јехова ка простинел околенге со чаче каинена пе.

13. Вакер јекх пример кова со поможинела аменге те хаљова јекх важно поука башо каибе.

¹³ О Манасија керѓа нешто повише него само те овел леске жал башо пле гревија. Адава сикавела амен јекх бут важно бути башо каибе. Размислин башо акава пример: Џаја ки слаткарница хем мангеа те кине јекх торта. Ама наместо торта о продавачи дела тут јекх јаро. Дали ка овел туке адава доволно? Сигурно кај на! А ако о продавачи објаснинела туке кај о јаро тано јекх важно состојка тари торта, дали ка убединел тут те ле адава јаро? Па сигурно кај на! Слично, о Јехова таро грешнико родела чаче те каинел пе. Ако е грешникоске тано жал башо лескоро грево, адава тано шукар. Адава чувство тано важно дело таро каибе, ама нане доволно. Со јавер мора те керел о грешнико? Адава шај те дознајна тари јекх споредба со вакерѓа ла о Исус.

14. Сар о бунтовно чхаво тари е Исусескири споредба сикавѓа о прва знакија кај каинела пе?

¹⁴ О Исус вакерѓа јекх охрабрувачко споредба башо јекх бунтовно чхаво која сој пишими ко Лука 15:11-32. Јекх терно мануш бунинѓа пе против по дад хем гело песке кхералдан ки јекх „дур пхув“. Ов адари почминѓа те живинел неморално. Ама кеда почминѓа те овел леске пхаро ко живото, почминѓа сериозно те размислинел башо адава со керѓа. Халило кобор пошукар сине леске џикоте сине ко по дад. О Исус вакерѓа кај акава терно мануш халило пли грешка. Ов одлучинѓа те иранел пе кхере хем те молинел пле даде те простинел леске. О моменти кеда акава чхаво халило кобор грешинѓа сине бут важно, ама дали адава сине доволно? На. Ов ваљани сине те променинел пле постапке!

15. Сар о бунтовно чхаво тари е Исусескири споредба сикавѓа кај чаче каинела пе?

¹⁵ О бунтовно чхаво сикавѓа кај искрено каинела пе башо адава со керѓа. Ов цидинѓа баро друмо те иранел пе кхере. Пало адава кеда ресља кхере вакерѓа пе дадеске: „Грешинѓум против о небо хем против туте, на сиум више достојно те овав викимо тло чхаво“ (Лука 15:21). Акале тернескере искрена лафија сикавѓе кај ов мангља те поправинел пло амалипе е Јеховаја. Исто аѓаар халило кај лескере постапке поврединѓе лескере  даде. Хем ов сине спремно те керел са со ваљани те шај те овел палем пе дадеа шукар. Чак сине спремно те овел јекх таро пле дадескере работникија (Лука 15:19). Акаја споредба нане само јекх бут шужи парамис. О начелија со иси ки лате шај те поможинен е старешиненге кеда трудинена пе те откринен дали некој со керѓа сериозно грево чаче каинела пе.

16. Соске шај те овел пхаро е старешиненге те проценинен дали некој чаче каинела пе?

¹⁶ Е старешиненге нане локхо те проценинен дали некој со керѓа сериозно грево пало адава чаче каинела пе. Соске адава тано пхаро? О старешине нашти те читинен о виле. Адалеске, ола трудинена пе те аракхен доказија колендар со шај те дикхен кај о објавители керѓа целосно промена ко пло стави башо пло грево. Ко несаве случаија, некој шај керѓа добором пхаро грево со о старешине шај нане те овен увериме кај ов чаче каинела пе.

17. а) Кова пример сикавела кај ако некој вакерела кај леске жал, на значинела кај чаче каинела пе? б) Сар со пишинела ко 2. Коринќаните 7:11, со мора некој те керел те шај те сикавел кај чаче каинела пе?

¹⁷ Размислин башо акава пример. Јекх пхрал кова со бершенцар керела прељуба, наместо те родел помош, гаравела адава тари пли ромни, пле амала хем о старешине. Ко крајо о старешине дознајнена башо адава. Кеда о старешине вакерена леске кај иси лен доказија, ов признајнела со керѓа хем чак изглединела кај леске бут жал. Ама дали адава тано доказ кај ов чаче каинела пе? На. О старешине ка ваљани те дикхен нешто повише него само кај леске жал. Акава пхрал на грешинѓа само јекх пути соске моментално сине духовно слабо, него лескере грешна постапке трајнѓе повише време. Ов на признајнѓа коркори пло грево, него јавера дознајнѓе хем геле вакерѓе ле ко старешине. Адалеске, о старешине ка ваљани те дикхен кај о грешнико искрено менинела пло размислување, пле чувствија хем пле постапке. (Читин 2. Коринќаните 7:11.) Шај ка ваљани бут време те накхел те шај те керел о потребна промене. Најверојатно, несаво време ка овел исклучимо таро собрание (1. Кор. 5:11-13; 6:9, 10).

18. Сар шај о исклучиме те сикавен кај чаче каинена пе хем саво ка овел о резултати?

¹⁸ Те шај те сикавел кај чаче каинела пе, окова сој исклучимо ка авел редовно ко состанокија хем ка шунел е старешиненгоро совет те молинел пе хем редовно те проучинел и Библија. Исто аѓаар ка трудинел пе те избегинел ситуацие кола со шај те чхивен ле те грешинел. Ако трудинела пе палем те овел амал е Јеховаја, шај те овел сигурно кај о Јехова ка простинел леске хем кај о старешине ка поможинен леске палем те иранел пе ко собрание. Џанѓола пе, кеда о старешине  трудинена пе те дикхен дали некој чаче каинела пе, ола проценинена секова случај посебно соске секоја јекх ситуација тани различно хем избегинена те овен строго.

19. Со значинела некој чаче те каинел пе? (Езекиел 33:14-16)

¹⁹ Сар со дикхлем, те шај некој чаче те каинел пе мора те керел повише него само те вакерел кај леске жал башо грево со керѓа ле. Мора те керел промене ки пли годи хем ко пло вило, хем те почминел те постапинел ко начин со ка сикавел кај каинела пе. Адава вклучинела те чхинавел пле погрешна постапкенцар хем палем те почминел те живинел спрема е Јеховаскере мерилија. (Читин Езекиел 33:14-16.) Е грешникоске ваљани те овел најважно палем те овел паше е Јеховаја.

20-21. Сар шај те поможина некаске со керѓа сериозно грево?

²⁰ О Исус објаснинѓа јекх важно дело тари пли служба кеда вакерѓа: „Аљум те викинав е грешникон те каинен пе“ (Лука 5:32). Амен да ваљани те овел амен и исто желба. Адалеске, со ваљани те кера ако дознајнѓем кај несаво амаро паше амал керѓа сериозно грево?

²¹ Ка кере само штета тле амалеске ако гаравеа лескоро грево. Џабе ка трудине тут те гараве ле соске о Јехова са дикхела (Изр. 5:21, 22; 28:13). Шај те поможине тле амалеске аѓаар со ка вакере кај о старешине мангена те поможинен леске. Ако тло амал на мангела те вакерел е старешиненге пло грево, тегани ту ваљани те вакере ленге хем аѓаар ка сикаве кај чаче мангеа те поможине леске. Акава тано бут важно соске лескоро амалипе е Јеховаја тано ки опасност.

22. Со ка дикха ки следно статија?

²² Со ако некој керела грево повише време хем о старешине одлучинена те исклучинен ле? Дали адава значинела кај на сикавѓе леске милост? Ки следно статија, ка дикха сар о Јехова милостиво укоринела е грешникон хем сар шај амен те џа пало лескоро пример.