1. Сар бут мануша дикхена ки библиско мудрост? (Изреки 1:20, 21).

 КО БУТ пхувја шај сине те дикха сар амаре пхраља хем пхења терѓона ко прометна тхана хем нудинена публикацие е манушенге со накхена. Дали ту да учествујнѓан ки асавки служба? Ако оја, сигурно сетинѓан тут ко лафија таро Изреки кај и мудрост гласно викинела те шај о мануша те шунен лакоро совет. (Читин Изреки 1:20, 21.) Ки Библија хем ко амаре публикацие иси чачутни мудрост, е Јеховаскири мудрост. Е манушенге ваљани акаја мудрост те шај те добинен вечно живото. Амен бут радујнаја амен кеда некој лела таро амаре публикацие. Ама на мангена сарине те лен. Несаве на интересинена пе башо адава со вакерела и Библија. А јавера асана аменге. Ола мислинена кај и Библија тани бут пурани хем нане аменге корисно. А несаве критикујнена о библиска морална мерилија хем мислинена кај окола со икерена пе ки ленде нане љубезна хем тане преправедна. Ама, о Јехова понадари да љубезно дела пли мудрост секаске. Ко саве начинија?

2. Ко кола начинија тани достапно и мудрост авдиве, ама со биринена повише мануша те керен?

² Јекх начин сар о Јехова дела пли мудрост тано преку пло Лафи, и Библија. Акава лил тано скоро сариненге достапно. А со те вакера башо амаре публикацие? Благодарна сием е Јеховаске со денѓа берекети те шај амаре публикацие те овен преведиме ко повише таро 1.000 чхибја. Окола со шунена, јавере лафенцар со читинена хем со применинена адава со сикљона, ка овел лен корист.  Сепак, повише мануша одлучинѓе те на шунен и чачутни мудрост. Кеда ваљани те анен одлуке ола обично керена адава со мангена, или пучена јавере манушен. Шај чак дикхена негативно ки аменде адалеске со кераја адава со вакерела и Библија. Ки акаја статија ка кера лафи башо адава соске о мануша реагиринена аѓаар. Ама, прво те дикха сар шај те стекнина мудрост таро Јехова.

3. Со значинела и чачутни мудрост?

³ И мудрост тани способност те користине адава со џанеа те шај те ане шукар одлуке. Ама, и чачутни мудрост значинела нешто повише. И Библија вакерела: „И дар таро Јехова тани почеток тари мудрост, хем те пенџаре околе сој Најсвето анела разборитост“ (Изр. 9:10). Кеда ваљани те ана несави важно одлука, ваљани те џана сар о Јехова дикхела ки адаја бути. Адава шај те кера аѓаар со ка проучина и Библија хем о библиска публикацие. Само аѓаар ка шај те сикава чачутни мудрост (Изр. 2:5-7).

4. Соске само о Јехова шај те дел амен чачутни мудрост?

⁴ Само о Јехова шај те дел амен чачутни мудрост (Рим. 16:27). Соске шај те вакера адава? Прво, о Јехова тано амаро Створители хем ов џанела са башо буќа со створинѓа лен (Пс. 104:24). Дујто, таро са е Јеховаскере постапке дикхјола пе лескири мудрост (Рим. 11:33). Трито, е Јеховаскере советија секогаш тане корисна адаленге со применинена лен (Изр. 2:10-12). Ако мангаја те ова чаче мудра мора те прифатина акала основна чачипа хем те дозволина те водинен амаре одлуке хем постапке.

5. Кола тане о последице кеда о мануша на прифатинена кај и чачутни мудрост авела таро Јехова?

⁵ Бут џене ки служба признајнена кај о буќа ки природа тане бут шукар керде ама ола вакерена кај на постојнела Створители. Јавера вакерена кај верујнена ко Девел ама ола мислинена кај о библиска мерилија тане бут пуране хем живинена ола сар со мангена. Сој тано о резултати таро адава? Дали о свето тано пошукар адалеске со о мануша живинена спрема пли мудрост наместо е Девлескири? Дали аракхле чачутно бахталипе или надеж баши иднина? Адава со дикхаја околу аменде уверинела амен ко акава чачипе: „Нане мудрост, ни разборитост, ни совет против о Јехова“ (Изр. 21:30). Акава поттикнинела амен понадари да те рода таро Јехова те дел амен и чачутни мудрост! Жално тано со бут мануша на керена адава. Соске?

6. Спрема Изреки 1:22-25, кој тане адала со на мангена те шунен е Јеховаскири мудрост?

⁶ Бут џене на шунена кеда и чачутни мудрост „гласно викинела ки улица“. Спрема и Библија иси трин групе мануша со на шунена и мудрост: „О неискусна“, „окола со асана е јаверенге“ хем „о глупава“. (Читин Изреки 1:22-25.) Акана те дикха соске акала мануша на шунена е Девлескири мудрост хем сар шај амен те на ова сар ленде.

7. Соске несаве биринена те ачховен „неискусна“?

⁷ „О неискусна“ тане окола со верујнена ко са или локхе шај те ховаве лен (Изр. 14:15). Бут пути аракхаја асавке манушен ки служба. На пример, размислин башо милиоња мануша сој тане ховавде таро религиозна или политичка  водачија. Несавенге тано бут пхаро кеда дознајнена кај ленгере водачија ховавѓе лен. Ама окола сој спомниме ко Изреки 1:22, биринена те ачховен неискусна адалеске со аѓаар мангена (Ерем. 5:31). Бут пошукар ленге те керен адава со ола мангена, хем на мангена те џанен со вакерела и Библија или те икерен пе ко лакере мерилија. Јекх џувли тари Канада, која сој тани бут религиозно, вакерѓа јекхе пхралеске: „Ако амаро свештенико ховавела амен, тегани ов ка овел одговорно башо адава а на амен!“ Бут џене мислинена сар лате ама амен на мангаја те ова сар окола со намерно мангена те ачховен неискусна (Изр. 1:32; 27:12).

8. Со ка поможинел амен те стекнина шукар искуство?

⁸ Иси шукар причине соске и Библија охрабринела амен те на ачхова неискусна него те ова „возрасна ко [амаро] хаљојбе“ (1. Кор. 14:20). Амен стекнинаја шукар искуство кеда применинаја о библиска начелија ко амаро живото. Ако кераја аѓаар шај те дикха сар и Библија поможинела амен те избегина проблемија хем те ана мудра одлуке. Шукар тано те размислина башо одлуке со анѓем лен англедер. На пример, ако проучинеа и Библија хем џаја ко состанокија, шај те пуче тут соске панда на кереа нешто те шај те де лафи кај ка служине е Јеховаске хем те крстине тут. А ако сиан крстимо, дали трудинеа тут те ове пошукар ко проповедибе хем сикајбе? Дали тле одлукенцар сикавеа кај дозволинеа те водинен тут о библиска начелија? Дали понашинеа тут е јаверенцар сар о Исус би понашинела пе сине? Ако дикхаја кај ваљани те кера промене, ваљани хор те размислина башо е Јеховаскере поуке кола со керена „мудро околе со нане искусно“ (Пс. 19:7).

9. Сар окола со „асана е јаверенге“ сикавена кај отфрлинена и мудрост?

⁹ И дујто група со на шунела е Девлескири мудрост тане окола со „асана е јаверенге“. Некогаш кераја лафи асавке манушенцар ки служба. Ола уживинена те вреџинен е јаверен (Пс. 123:4). И Библија панда бут англедер вакерѓа кај ко последна диве ка овен бут асавке мануша (2. Пет. 3:3, 4). Исто сар о џамутре е Лотескере, авдиве да несаве мануша на шунена о предупредувања таро Девел (1. Мој. 19:14). Бут џене асана околенге со живинена спрема о библиска начелија. Ола керена адава соске мангена те „џан пало пумаре желбе кола со о Девел осудинела лен“ (Јуда 7, 17, 18). О начин сар и Библија опишинела акале манушен, тано слично сар о стави со иси е отпадникон хем е јаверен со отфрлинена е Јехова!

10. Спрема Псалм 1:1, со ка поможинел амен те на ова сар окола со асана е јаверенге?

¹⁰ Сар шај те ова сигурна кај на сием сар окола со асана е јаверенге? Јекх начин тано аѓаар со нане те дружина амен околенцар со секогаш керена негативно лафи. (Читин Псалм 1:1.) Адава значинела кај на шунаја или на читинаја ништо таро отпадникија. Ваљани бут те пазина те на овел амен негативно стави, хем те почмина те сумнина амен ко Јехова хем ко упатствија со дела лен преку пли организација. Адалеске ваљани те пуча амен: „Дали обично жалинава ман кеда добинаја неве упатствија или кеда иси несаво нево хаљојбе? Дали често аракхава грешке околенге со предводинена?“ Кеда сигате кераја нешто те шај те менина амен, тегани о  Јехова тано задоволно амендар (Изр. 3:34, 35).

11. Со мислинена „о глупава“ башо е Јеховаскере морална мерилија?

¹¹ И трито група со на шунена и мудрост тане „о глупава“. Ола тане асавке адалеске со на мангена те живинен спрема е Девлескере морална мерилија. Керена адава со ола мислинена кај тано шукар (Изр. 12:15). Ола отфрлинена е Јехова, кастар со авела и мудрост (Пс. 53:1). Кеда кераја ленцар лафи ки служба, бут пути критикујнена амен адалеске со икераја амен ко библиска мерилија. А тари јавер страна нане лен ништо попаметно со те вакерен. И Библија вакерела: „И чачутни мудрост тани бут дур таро окова сој глупаво, нане ле со те вакерел ки е дизјакири порта“ (Изр. 24:7). Лен нане лен несаве шукар советија со шај те ден. Адалеске о Јехова предупрединела амен „циде тут таро глупаво мануш“ (Изр. 14:7).

12. Со ка поможинел амен те на постапина сар о глупава?

¹² Амен на сием сар окола со мрзинена е Девлескере советија него мангаја лен хем исто аѓаар лескере мерилија. Шај те бајрара адава мангипе ако размислинаја башо адава со овела кеда сием леске послушна, а со кеда на сием. Размислин само башо адава кобор проблемија анена песке о мануша адалеске со тврдоглаво отфрлинена е Јеховаскере мудра советија. Пало адава, размислин кобор шукар живото иси тут адалеске со сиан послушно е Јеховаске (Пс. 32:8, 10).

13. Дали о Јехова силаја чхивела амен те шуна лескере мудра советија?

¹³ Иако е Јеховаскири мудрост тани достапно сариненге, сепак ов никас на чхивела силаја те прифатинен ла. Ама, ов вакерела саве последице ка овен околен со на шунена и мудрост со авела лестар (Изр. 1:29-32). Окола со биринена те на шунен е Јехова „ка трпинен о последице таро пумаре постапке“. Хем адалеске пало несаво време ка овел лен баре дукха хем муке, а ко крајо ка овен уништиме. Тари јавер страна, околенге со шунена е Јеховаскере мудра советија хем применинена лен, и Библија ветинела ленге: „Кој шунела ма ман, ка живинел мирно хем нане те дарал таро лошнипе“ (Изр. 1:33).

14-15. Со сикљоваја таро Изреки 4:23?

¹⁴ Секогаш иси амен корист кеда применинаја и мудрост со авела таро Девел. Сар со дикхлем, е Јеховаскири мудрост шај локхе те аракхел пе. На пример, ко лил Изреки о Јехова дела практична советија кола со ако применинаја лен ка овел амен пошукар живото. Акана те дикха штар асавке советија.

 ¹⁵ Аракх тло симболично вило. И Библија вакерела: „Таро са о буќа со ваљани те аракхе, највише аракх тло вило соске лестар авела о живото“ (Изр. 4:23). Размислин башо адава со ваљани те кера те шај те заштитина амаро дословно вило. Ваљани те хранина амен шукар, доволно те вежбина хем те избегина лошна навике. Нешто слично кераја те шај те заштитина амаро симболично вило. Секова диве читинаја е Девлескоро Лафи, спреминаја амен башо состанокија, сием присутна ки ленде хем коментиринаја. Ачховаја активна аѓаар со редовно учествујнаја ки служба. Избегинаја те овен амен лошна навике, аѓаар со цидаја амен таро са со шај те руминел амаре мисле, сар сој и неморално забава хем о лошно друштво.

16. Сар шај о стихија таро Изреки 23:4, 5, те поможинен амен авдиве?

¹⁶ Ов задоволно адалеа со иси тут. И Библија дела акава совет: „Ма трудин тут те кхеде барвалипе...само со ка дикхе ки лесте ов нашавѓола соске пхравела пе пака сар орло хем летинела упре ко небо“ (Изр. 23:4, 5). О барвалипе шај сигате те нашавѓовел. Сепак, хем о барвале хем о чороле тане преокупириме те заработинен паре. Адалеске ола бут пути керена буќа коленцар со руминена пумаро анав, пумаро амалипе хем керена штета пумаре састипаске (Изр. 28:20; 1. Тим. 6:9, 10). Тари јавер страна, и мудрост поможинела амен те дикха исправно ко паре. Асавко стави поможинела амен те на ова алчна хем те ова задоволна хем бахтале адалеа со иси амен (Проп. 7:12).

17. Спрема Изреки 12:18, сар шај те овел амен „и чхиб е мудро манушенгири“?

¹⁷ Англедер те кере лафи размислин. Ако на пазинаја шај те кера бари штета амаре лафенцар. И Библија вакерела: „О лафија сој вакерде бизо те мислинел пе посавена сар мачи, ама и чхиб е мудро манушенгири сасљарела“ (Изр. 12:18). Кеда на кераја лафи јаверенцар башо некаскере маане, амен ачховаја ко мир е пхраленцар (Изр. 20:19). Те шај амаре лафенцар те сасљара, наместо те повредина амен мора редовно  те читина хем те размислина башо е Девлескоро Лафи (Лука 6:45). Кеда хор размислинаја башо адава со пишинела ки Библија, амаре лафија шај те овен сар јекх „извор котар со авела и мудрост“ кова со освежинела е јаверен (Изр. 18:4).

18. Спрема Изреки 24:6, сар шај те ова успешна ки служба?

¹⁸ Шун о упатствија. И Библија дела акава корисно совет: „Војна водинела пе мудро водствоја, хем успех иси коте со иси бут советникија“ (Изр. 24:6). Те дикха сар адава со ка применина акава начело ка поможинел аменге те ова пошукар ки служба. Наместо те кера и служба ко амаро начин, трудинаја амен те применина о предлогија сој аменге денде. Ко состанокија добинаја мудро водство коте со искусна пхраља преку говорија хем презентацие обучинена амен баши служба. Исто аѓаар, иси амен публикацие хем видеоклипија кола со поможинена е манушенге те хаљовен и Библија. Шај ли те сикљове пошукар те користине лен ки служба?

19. Со мислинеа баши мудрост со дела ла о Јехова? (Изреки 3:13-18).

¹⁹ Читин Изреки 3:13-18. Бут сием благодарна башо шукар совет со аракхљола ко е Девлескоро Лафи. Со би кераја сине бизо лесте? Ки акаја статија дикхлем несаве примерија башо корисна советија таро лил Изреки. Ама на само ко јекх лил, о Јехова мукхља ки цели Библија те овен пишиме асавке мудра советија. Адалеске те ова одлучна ко секова дело таро амаро живото те применина лен. Аменге нане важно сар о мануша дикхена ки е Девлескири мудрост соске увериме сием кај „окола со цврсто икерена пе ки лате ка овен викиме бахтале“.