1. Сави надеж денѓа аменге о Јехова?

 О ЈЕХОВА денѓа амен јекх бут шужи надеж башо вечно живото. Несавен иси лен надеж кај ка живинен сар бесмртна духовна личностија ко небо (1. Кор. 15:50, 53). Ама повише џене амендар иси амен надеж кај ка живина вечно ки пхув коте со ка ова бахтале хем састе (Отк. 21:3, 4). Бизи разлика дали надинаја амен те живина ко небо или ки пхув, амари надеж аменге бут скапоцено.

2. Ко со темелинела пе амари надеж, хем соске шај те вакера адава?

² О лафи „надеж“ сој користимо ки Библија, шај те значинел „те очекујнел пе кај нешто шукар ка случинел пе“. Амен сием сигурна кај амари надеж баши иднина ка исполнинел пе соске о Јехова денѓа ла аменге (Рим. 15:13). Џанаја со ветинѓа аменге хем исто аѓаар џанаја кај ов секогаш ачхола ко пло лафи (4. Мој. 23:19). Увериме сием кај е Јехова иси ле хем и желба хем и моќ те керел са со ветинѓа. Адалеске, амари надеж нане само јекх фантазија или нешто со амен би мангаја те случинел пе, него ој темелинела пе ко чачутне доказија хем тани реално.

3. Башо со ка кера лафи ки акаја статија? (Псалм 27:14).

³ Амаро небесно Дад мангела амен хем ов мангела те верујна леске. (Читин Псалм 27:14.) Кеда иси амен цврсто надеж ко Јехова ка шај те издржина неволје хем те ова храбра хем бахтале бизи разлика со ка случинел пе аменге. Акана те дикха сар и надеж заштитинела амен. Прво, те дикха соске баши надеж вакерела пе кај тани сар котва хем сар шлеми. Пало адава ка дикха сар шај те кера позорали амари надеж.

4. Сар и надеж тани сар котва? (Евреите 6:19).

⁴ Ко пло писмо џи ко Евреија о апостол Павле спорединѓа  и надеж котваја. (Читин Евреите 6:19.) О Павле бут пути патујнела сине бродеа хем адалеске џанела сине кај о котве користинена пе те шај о броди те ачхол ко јекх тхан хем ма те циден ле о бранија. Ки јекх прилика џикоте патујнела сине бродеа случинѓа пе јекх бари бура. Тегани ов дикхља сар о морнарија фрдена котве ко пани те шај о броди те ачхол стабилно хем ма те кхувел ко карпе (Дела 27:29, 39-41). Исто сар и котва со поможинела е бродеске те ачхол ко јекх тхан аѓаар амари надеж поможинела аменге те ачхова паше узо Јехова хем те на цида амен лестар кеда ка овен амен проблемија кола сој сар баре буре. Амари цврсто надеж поможинела аменге те накха преку баре неволје соске сием увериме кај авена помирна времија. На ваљани те бистра кај о Исус предупрединѓа амен кај ка ова прогониме (Јован 15:20). Значи, адава со размислинаја баши амари надеж поможинела аменге понадари да верно те служина е Јеховаске.

5. Сар и надеж поможинѓа е Исусеске иако џанља кај ка овел мучимо хем мудардо?

⁵ И надеж поможинѓа е Исусеске те ачховел верно иако џанља кај ка овел бут мучимо хем ко крајо ка мерел. Ко Пентакост 33 а.е., о апостол Петар цитиринѓа јекх пророштво таро псалмија кова со бут шукар опишинела кобор смиримо хем уверимо сине о Исус: „А ме ка живинав ки надеж соске џанава кај нане те мукхе ман ко гробо нане ни те дозволине о тело тле верно слугаскоро те кирњол... ка пхере ман баре бахталипаја кеда ка терѓовав англи туте“ (Дела 2:25-28; Пс. 16:8-11). Иако о Исус џанља кај ка мерел, ле сине ле цврсто надеж кај о Девел ка воскреснинел ле хем кај ка овел леа палем заедно ко небо (Евр. 12:2, 3).

6. Со вакерѓа јекх пхрал баши надеж?

⁶ Амари надеж поможинѓа буте пхраленге хем пхењенге те истрајнен. Те дикха о пример јекхе верно пхралескоро тари Англија кова со викинела пе Леонард Чин. Ки прво светско војна ов сине пханло соске на мангља те џал ки војска. Дуј масек сине пханло ки самица хем пало адава мора сине те керел бут пхари бути. Ов покасно пишинѓа: „Мо искуство поможинѓа манге те хаљовав кобор бут ваљани аменге и надеж те шај те истрајна. Ко адава исто шај те поможинел аменге о пример е Исусескоро, е апостоленгоро хем е пророконгоро хем исто аѓаар иси амен о бут шуже ветувања со аракхљона ки Библија. Са акава дела амен бари надеж баши иднина хем дела амен сила те шај те истрајна“. И надеж акале пхралеске сине сар котва хем аменге да шај те овел.

7. Сар амари надеж овела позорали кеда иси амен проблемија? (Римјаните 5:3-5; Јаков 1:12).

⁷ Амари надеж овела позорали кеда истрајнаја ко неволје хем кеда дикхаја сар о Јехова поможинела аменге хем кај тано задоволно амендар. (Читин Римјаните 5:3-5; Јаков 1:12.) Значи, амари надеж акана тани бут позорали него ко почеток кеда прифатинѓем о шукар хабери. О Сатана мангела о проблемија те перавен амен ама о Јехова поможинела амен те издржина ко секова проблеми.

8. Сар и надеж тани сар шлеми? (1. Солуњаните 5:8).

⁸ И Библија исто аѓаар спорединела амари надеж јекхе шлемеа. (Читин 1. Солуњаните 5:8.) Јекх војнико пхиравела шлеми те шај те заштитинел пло шеро таро непријателија кола со мангена те кхувен ле. Ки амари духовно војна амен ваљани те заштитина амари годи таро е Сатанаскере нападија. Ов  бомбардиринела амен буте буќенцар те шај те искушинел амен хем те руминел амаро размислување. Исто сар о шлеми со заштитинела јекхе војникоскоро шеро, аѓаар амари надеж заштитинела амаро размислување те шај те ачхова верна е Јеховаске.

9. Со случинела пе е манушенцар адалеске со нане лен надеж?

⁹ И надеж башо вечно живото ка поможинел аменге те ана мудра одлуке. Тари јавер страна ако амари надеж почминела похари те слабонел хем размислинаја само башо амаре желбе, шај те почмина похари те бистра амари цел, о вечно живото. Те дикха о пример несаве христијаненгоро со живинена сине ко пурано Коринт. Ола нашавѓе пумари вера ко јекх бут важно ветување таро Девел — и надеж башо воскресение (1. Кор. 15:12). О Павле пишинѓа кај о мануша со нане лен надеж живинена само авдивесеске (1. Кор. 15:32). Хем баш авдиве буте џенен со нане лен надеж ко е Девлескере ветувања живинена само авдивесеске хем керена са со шај само те задоволинен пумаре желбе. Ама амен иси амен доверба ко е Јеховаскере ветувања баши иднина. Амари надеж тани сар симболично шлеми кова со заштитинела амаро размислување хем поможинела амен те на размислина само баши аменге соске адава шај те руминел амаро амалипе е Јеховаја (1. Кор. 15:33, 34).

10. Сар и надеж заштитинела амен таро погрешно размислување?

¹⁰ Амари надеж исто аѓаар заштитинела амен таро негативно размислување сар сој кај тано џабе те кера е Јеховаскири волја. На пример несаве шај те мислинен песке: „Ме никогаш нане те овав машкар окола со ка живинен вечно. Ме на сиум шукар мануш. Никогаш нане те успејнав те керав адава со о Девел мангела“. Ако сетинаја амен, е Јовескоро ховавно амал о Елифаз вакерѓа леске нешто слично. Ов пхенѓа: „Сој тано о мануш со мерела па те овел чисто?“ Ов понадари башо Девел вакерѓа: „Ов на верујнела пле света слугенге, чак ни о небо нане чисто англо лескере јакхја“ (Јов 15:14, 15). Акала сине баре ховајба. На ваљани те бистра кај о Сатана гаравела пе пало асавке размислувања. Ов џанела кај ако нонстоп размислинеа ко асавко начин ту ка почмине те нашаве тли надеж. Адалеске отфрлин асавке ховајба хем концентририн тут ко е Јеховаскере ветувања. Никогаш ма сумнин тут кај ов мангела те живине вечно хем кај ка поможинел туке те успејне ко адава (1. Тим. 2:3, 4).

11. Соске ваљани те ова стрплива џикоте аџикераја амари надеж те исполнинел пе?

¹¹ Нане секогаш локхо те овел амен зорали надеж. Шај те почмина те ова нестрплива џикоте аџикераја о Девел те исполнинел пле ветувања. Ама адалеске со о Јехова тано вечно, адава со аменге дикхјола сар бут време е Јеховаске тано кратко (2. Пет. 3:8, 9). Ов сигурно ка исполнинел пли намера хем адава ко најшукар начин ама шај нане те керел адава кеда амен очекујнаја. Со ка поможинел аменге понадари да те овел амен цврсто надеж џикоте стрпливо аџикераја о Девел те исполнинел пле ветувања? (Јак. 5:7, 8).

12. Спрема Евреите 11:1, 6, сар и надеж тани поврзими е вераја?

¹² Амари надеж ка овел зорали ако ачховаја паше е Јеховаја соске ов тано адава со ка исполнинел амари надеж. Уствари, те шај те овел амен надеж мора те верујна кај о Јехова постојнела хем кај „наградинела околен со родена ле ревно“. (Читин Евреите  11:1, 6.) Со пореално аменге о Јехова добором повише ка ова увериме кај ов ка керел са адава со ветинѓа. Акана те дикха некобор практична начинија сар шај те ова панда попаше е Јеховаја хем аѓаар те кера амари надеж панда поцврсто.

13. Сар шај те ова паше е Девлеа?

¹³ Молин тут е Јеховаске хем читин лескоро Лафи. Иако амен нашти те дикха е Јехова сепак шај те ова леа паше. Шај те кера леа лафи ки молитва хем те ова увериме кај ка шунел амен (Ерем. 29:11, 12). Шај те шуна ле аѓаар со ка читина лескоро Лафи хем хор ка размислина башо адава со читинаја. Џикоте читинаја башо адава сар о Јехова грижинѓа пе пле верна слугенге ко пурано време, амари надеж ка бајрол панда повише. Са сој пишимо ко е Девлескоро Лафи „пишимо тано те шај те сикљова хем те овел амен сила те истрајна, те шај те овел амен надеж“ (Рим. 15:4).

14. Соске тано шукар те размислина со керѓа о Јехова е јаверенге?

¹⁴ Размислин башо адава сар о Јехова исполнинѓа пле ветувања. Те дикха со керѓа о Девел башо Авраам хем баши Сара. Ола сине бут пхуре те шај те овел лен чхаве, сепак о Девел ветинѓа ленге кај ка овел лен чхаво (1. Мој. 18:10). Сар реагиринѓа о Авраам кеда сине ленге дендо ветување кај ка овел лен чхаво? Ки Библија пишинела: „Ле сине ле вера кај ка овел дад буте народонге“ (Рим. 4:18). Иако о Авраам на џанља сар ка исполнинел пе акава ветување, сепак сине уверимо кај о Јехова ка ачхол ко пло лафи. Хем чаче, о Јехова на разочаринѓа акале верно мануше (Рим. 4:19-21). Асавке извештаија сикавена аменге кај секогаш шај те овел амен доверба ко Јехова кај ка исполнинел пле ветувања чак кеда адава дикхјола аменге невозможно.

15. Соске ваљани те размислина башо адава со џи акана керѓа баши аменде о Јехова?

 ¹⁵ Размислин башо адава со керѓа о Јехова баши туте. Размислин башо ветувања таро е Девлескоро Лафи кола со исполнинѓе пе ко тло живото. На пример, о Исус ветинѓа кај лескоро Дад ка дел тут о основна буќа со ваљани туке (Мат. 6:32, 33). О Исус исто аѓаар уверинѓа тут кај о Јехова ка дел тут пло свети дух ако молинеа ле башо адава (Лука 11:13). О Јехова икерѓа пе ко пло лафи. Веројатно шај те сетине тут ко јавера да ветувања кола со исполнинѓа лен туке лично. На пример, ов ветинѓа кај ка простинел туке, кај ка утешинел тут хем кај ка дел тут духовно храна (Мат. 6:14; 24:45; 2. Кор. 1:3). Кеда размислинеа башо адава со о Јехова керѓа баши туте џи акана, тегани тли надеж ка овел поцврсто башо адава со ка керел баши туте ки иднина.

16. Соске и надеж тани скапоцено поклон?

¹⁶ И надеж башо вечно живото тани бут скапоцено поклон таро Девел. Едвај аџикераја адала диве кола со сигурно ка авен. Амари надеж тани сар котва која со икерела амен цврсто те шај те издржина неволје, прогонствија хем чак те на дара таро мерибе. Ој тани сар шлеми, заштитинела амаре мисле те шај те отфрлина адава сој погрешно хем те кера адава сој исправно. Акаја надеж тари Библија керела амен те ова попаше е Девлеа хем сикавела аменге кобор бут мангела амен ов. Амаре шукарипаске тано ако икераја цврсто амари надеж.

17. Соске амари надеж керела амен бахтале?

¹⁷ О апостол Павле охрабринѓа е пхрален таро Рим е лафенцар „овен бахтале баши тумари надеж“ (Рим. 12:12). О Павле сине бахтало соске сине сигурно кај ако ачховела верно ка добинел вечно живото ко небо. Амен да шај те ова бахтале баши амари надеж соске сием сигурна кај о Јехова ка исполнинел пле ветувања. Баш сар со вакерѓа о псалмисти: „Бахтало тано о мануш со надинела пе ко Јехова, пло Девел, окова со секогаш ачховела верно“ (Пс. 146:5, 6).